Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 18 августа 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 14-й де́нь.
Слу́жба святы́мъ тріе́мъ му́ченикомъ: Анто́нію, Іоа́нну и Евста́ѳію, въ Ви́льнѣ пострада́вшимъ.

НА ВЕЛИЦѢЙ ВЕЧЕРНИ,
Блаже́нъ му́жъ.., [1-й антифо́нъ.] На Го́споди, воззва́хъ: стихи́ры му́ченикомъ на 6, гла́съ 4. Подо́бенъ: Яко до́бля.

Небеса́, повѣ́дающа Бо́жія та́инства и сла́ву всѣ́мъ возвѣща́юща, му́ченицы боже́ственніи бы́сте, и́бо вѣща́ніе по́двиговъ и вѣ́ры ва́шея во вся́ концы́ Правосла́вныя Це́ркве изы́де. Тѣ́мже вся́ Це́рковь почита́етъ страда́нія ва́ша, я́же подъя́сте до́блественнѣ о Христѣ́, присносла́вніи.

Лы́стомъ твои́мъ сокруше́ннымъ и косте́мъ, приснопа́мятне Евста́ѳіе, и бе́драмъ твои́мъ, па́че естества́ сотре́ннымъ, и но́су и у́шію урѣ́заннымъ, ра́довался еси́, всеблаже́нне, змíеву главу́ идолослуже́нія отсѣка́я. Сего́ ра́ди подвигополо́жникъ Христо́съ Бо́гъ вѣне́цъ побѣ́дный дарова́ тебѣ́.

Правосла́вно увѣ́ровавше въ Тро́ицу Пребоже́ственную, науче́ни пресви́теромъ Не́сторомъ, просвѣти́стеся Ду́хомъ Святы́мъ, прехва́льніи, и, на міроде́ржца ополчи́вшеся, ко́зни его́ му́жески побѣди́сте, посо́біемъ Бо́жіимъ на него́ подви́гшеся. Тѣ́мъ дне́сь пресвѣ́тлую ва́шу па́мять соверша́юще, по до́лгу хвала́ми ва́ше почита́емъ страда́ніе.

Ра́намъ преда́вшеся и му́камъ, святíи, непрекло́нни прему́дростію пребы́сте, я́ко свѣщи́, разже́гшеся теплото́ю духо́вною, просвѣща́ете сердца́ вѣ́рныхъ благода́тію и отгоня́ете вся́къ неду́гъ и вся́ку ско́рбь. Тѣ́мже вся́ческій ро́дъ и во́зрастъ пра́зднуетъ ва́шу святу́ю па́мять, пѣ́сньми сла́вяще Го́спода.

Свѣ́тлостію, му́ченицы, чуде́съ ва́шихъ всю́ просвѣти́сте тва́рь, отгоня́юще мглу́ страсте́й и скорбе́й, бѣсо́вскихъ наважде́ній и болѣ́зней отъ притека́ющихъ къ ва́мъ со слеза́ми и вѣ́рою прося́щихъ ва́шего заступле́нія, до́бліи страда́льцы Спа́совы Анто́ніе, Іоа́нне и Евста́ѳіе. Тѣ́мже вѣ́рою свято́е и свѣтоно́сное ва́ше соверша́емъ торжество́.

Сла́ва, гла́съ 6:

Це́рковь дне́сь пра́зднуетъ свѣ́тло, въ но́ву оде́жду одѣ́явшися, я́ко порфи́рою и ви́ссомъ, кро́вію и страда́ніемъ но́выхъ страстоте́рпецъ: сíи бо, въ благоче́стіи воспита́вшеся, же́ртву непоро́чну, прія́тну и благоуго́дну принесо́ша Ти́, Христе́. Тѣ́мже, Спа́се на́шъ, Бо́же, си́хъ побѣди́тели беззако́нныхъ показа́вый, вѣнча́вый и просла́вивый, низпосли́ на́мъ тѣ́хъ моли́твами ве́лію ми́лость.

И ны́нѣ, богоро́диченъ:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Вхо́дъ. Проки́менъ дне́ и пареміи́.

Проро́чества Иса́іина чте́ніе. [Глава́ 43.]

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры, гла́съ 4. Подо́бенъ: Яко до́бля.

Яко звѣ́зды многосвѣ́тлыя, страстоте́рпцы прехва́льніи, Боже́ственными свѣтлостьми́ озаря́ете вселе́нныя концы́, де́монскаго омраче́нія и страсте́й тлетво́рныхъ и бѣ́дъ изыма́юще. Тѣ́мже дне́сь свѣ́тлое, и свѣтоно́сное, и свято́е ва́ше торжество́, соше́дшеся, восхва́лимъ, сла́вніи.

Сти́хъ: Воззва́ша пра́ведніи, и Госпо́дь услы́ша и́хъ.

Чу́дніи, боже́ственніи, прему́дріи страстоте́рпцы пѣ́сньми свяще́нными да почту́тся: Тро́ицу бо Несозда́нную предъ враги́ свяще́нно проповѣ́дающе, многобо́жную угаси́ша ле́сть кро́вными излія́ніи и сла́ву прія́ша неувяда́емую.

Сти́хъ: Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь.

Царя́ беззако́ннаго, беззако́нно повелѣва́ющаго поклони́тися и че́сти принести́ безслове́снымъ бого́мъ безду́шнымъ, блаже́нніи, му́дрѣ посрами́сте, му́ченицы великоимени́тіи, и, пострада́вше терпѣли́вно и зако́нно, вѣнцы́ исплето́сте побѣ́ды, о мíрѣ моля́щеся.

Сла́ва, гла́съ 6:

По́лкъ боговѣнча́ненъ ны́нѣ я́вльшихся му́ченикъ, заколе́ніе непоро́чное, за Христа́ пожре́ное усе́рдно, святоизбра́нное во́инство, мучениколю́бцы, пріиди́те, всесвяще́нную па́мять духо́вно соверша́юще, возопіе́мъ къ ни́мъ: сокруши́те свирѣпство ага́рянъ безбо́жныхъ и изба́вите лю́ди благочестному́дренныя моли́твами ва́шими вся́каго обстоя́нія.

И ны́нѣ, богоро́диченъ:

Бо́га, изъ Тебе́ воплоти́вшагося, разумѣ́хомъ, Богоро́дице Дѣ́во, Того́ моли́ о спасе́ніи ду́шъ на́шихъ.

Посе́мъ: Ны́нѣ отпуща́еши.., и Трисвято́е, по Отче на́шъ..,
Тропа́рь, гла́съ 4:

Иже земны́хъ че́сти и сла́вы отве́ргшеся, до́бліи и честнíи страда́льцы, вѣ́ры ра́ди крѣ́пко, и му́жественно му́ки претерпѣ́сте, на сме́рть себе́ вда́вше за Живо́тъ всѣ́хъ, Влады́ку. Тѣ́мже и Христо́съ пресла́вно столпо́мъ о́блачнымъ съ небесе́ ва́съ озари́ и по́честьми и вѣнцы́ отъ престо́ла сла́вы вѣнча́, со а́нгелы Тому́ предстоя́ще, моли́те спасти́ся душа́мъ на́шимъ.

Другíй тропа́рь, гла́съ то́йже:

Отъ ко́рене непло́дна, преблаже́нніи, возрасти́вше Правосла́вныя вѣ́ры вѣ́тви, первому́ченикомъ тезоимени́тіи яви́стеся: зла́го бо и нечести́ваго кня́зя я́рости не убоя́стеся, повелѣва́юща Христа́ отрещи́ся. Сего́ ра́ди му́ченическія вѣнцы́ пріе́мше и со а́нгелы престо́лу Влады́чню предстоя́ще, о на́съ моли́теся, преблаже́нніи, правосла́вно чту́щихъ святу́ю па́мять ва́шу.


НА УТРЕНИ,
На Бо́гъ Госпо́дь: Тропа́рь [святы́мъ, два́жды. Сла́ва, и ны́нѣ, богоро́диченъ].

По 1-й каѳи́смѣ сѣда́ленъ, гла́съ 4. Подо́бенъ: Яви́лся еси́ дне́сь.

Честну́ю тве́рдь церко́вную, я́ко звѣ́зды велича́йшія, просвѣща́ете при́сно и вѣ́рныя озаря́ете, му́ченицы боже́ственніи, Христо́вы во́ини. [Два́жды.]

Сла́ва, и ны́нѣ, богоро́диченъ:

Въ кро́въ Тво́й, Пречи́стая Дѣ́во, прибѣга́ющихъ, мольбу́ пріе́млеши отъ на́съ, не преста́й моля́щи Человѣколю́бца спасти́ рабы́ Твоя́.

По 2-й каѳи́смѣ сѣда́ленъ, гла́съ 4. Подо́бенъ: Вознесы́йся на кре́стъ во́лею.

Му́жественнѣйшимъ по́мысломъ преше́дше муче́ніе, чу́дніи страстоте́рпцы, сквозѣ́ о́гнь и во́ду проидо́сте и премину́сте ко спасе́нія широтѣ́, наслѣ́діе пріе́мше — небе́сное Ца́рство, въ не́мже твори́те о на́съ боже́ственныя мольбы́, му́дріи великому́ченицы. [Два́жды.]

Сла́ва, и ны́нѣ, богоро́диченъ:

Иже благода́рно воспѣва́емъ Ти́ отъ се́рдца и про́симъ прилѣ́жно, Богоро́дице, Твоея́ ми́лости, Влады́чице, на рабы́ Твоя́, зову́щія и глаго́лющія: Пресвята́я Дѣ́во, предвари́ и изба́ви отъ вра́гъ ви́димыхъ и неви́димыхъ и вся́каго преще́нія, Ты́ бо еси́ на́ше заступле́ніе.

По Хвали́те и́мя Госпо́дне..,

Припѣ́въ: Велича́емъ ва́съ, страстоте́рпцы святíи Анто́ніе, Іоа́нне и Евста́ѳіе, и чте́мъ честна́я страда́нія ва́ша, я́же за Христа́ претерпѣ́ли есте́.

Псало́мъ избра́нный: Бо́гъ на́мъ прибѣ́жище и си́ла...

По поліеле́и сѣда́ленъ, гла́съ 8:

Ведо́ми бы́сте свя́зани отъ враго́въ и въ темни́цѣ заключе́ни на времена́ мно́га, вѣ́рою соблюда́еми, невре́дни пребы́сте и, отрѣ́шшеся мечи́ тѣле́съ, святíи, боже́ственнымъ жела́ніемъ я́вѣ связа́стеся. Тѣ́мже, я́ко свѣти́ла, просія́сте въ мíрѣ, вся́ просвѣща́юще Ду́ха благода́тію, страстоте́рпцы блаже́нніи, моли́те Христа́ Бо́га грѣхо́въ оставле́ніе дарова́ти пра́зднующимъ любо́вію святу́ю па́мять ва́шу. [Два́жды.]

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца дои́ши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Степе́нна, 1-й антифо́нъ 4-го гла́са. Проки́менъ, [гла́съ 4]: Воззва́ша пра́ведніи,* и Госпо́дь услы́ша и́хъ. Сти́хъ: Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь. Вся́кое дыха́ніе... Ева́нгеліе му́ченическое, отъ Матѳе́я, зача́ло 36.

По 50-мъ псалмѣ́ стихи́ра, гла́съ 6:

Пріиди́те, возра́дуемся Го́сподеви, въ па́мять страстоте́рпцевъ, о празднолю́бцы! Пріиди́те, воспои́мъ, та́йно восхваля́юще, страда́лецъ Христо́выхъ, ле́сть и́дольскую па́губѣ преда́вшихъ и Христа́ посредѣ́ суди́ща я́сно проповѣ́давшихъ. Тѣ́мже, о всеблаже́нніи и многострада́льніи, не преста́йте моля́щеся о душа́хъ на́шихъ.

Кано́нъ му́ченикомъ на 4, гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Добро́тою муче́нія, сла́вніи, удобря́еми и Боже́ственнаго свѣ́та па́че естества́ исполня́еми, му́ченицы, и́же ва́шу чту́щихъ па́мять отону́ду осіява́ете.

Глаго́лы мучи́теля небрего́ша, боже́ственніи му́ченицы, я́рость, гнѣ́въ и горды́ню ни во что́же вмѣни́ша и благохва́льно сме́рть, веселя́щеся, претерпѣ́ша.

Крѣ́постію утверди́вшеся, святíи, Вседержи́телевою, и́стиною во чре́сла держа́вно препоя́савшеся, вои́стинну лука́ваго си́лу и кова́рство разруши́сте.

Богоро́диченъ: Си́лы па́че есте́ственныхъ содѣ́лаша, боже́ственніи му́ченицы, укрѣпля́еми си́лою Твое́ю, Іису́се Всеси́льне, Иже въ на́шу не́мощь пе́рвѣе отъ Дѣ́вы оболкíйся.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Любо́вь ко Го́споду воспріе́мше, и́стинніи му́ченицы, о Не́мъ ра́дующеся, вои́стинну ду́ши преда́ша.

Тѣлесе́мъ и душа́мъ цѣли́тели ва́съ, прему́дріи, показа́, Иже ва́ше страда́ніе и терпѣ́ніе Пріе́мый.

Пре́лесть дре́внюю оттря́сше, тве́рдіи му́ченицы, но́вую изво́листе жи́знь, живу́ще о Христѣ́ па́че человѣ́ка.

Богоро́диченъ: Дне́ мя́ Свѣ́та невече́рняго прича́стника сотвори́, Ма́ти Бо́жія Всечи́стая, тмы́ избавля́ющи бу́дущія.

Сѣда́ленъ му́ченикомъ, гла́съ 1. Подо́бенъ: Гро́бъ Тво́й, Спа́се.

Огню́ чу́вственному не принесо́сте че́сти, изба́вистеся огня́ гее́нскаго, богоглаго́ливіи, огню́ и му́камъ пріобщи́вшеся, святíи, не отверго́стеся Иже всѣ́хъ Влады́ки, но, ра́дующеся, до сме́рти храни́ти вѣ́ру потща́стеся.

Сла́ва, гла́съ 8:

Огне́мъ муче́нія, я́ко зла́то въ горни́лѣ, искуше́нніи, свѣ́тло искуси́стеся, приснопа́мятніи му́ченицы, и яви́стеся зла́та честнѣ́йши естество́мъ, я́ко душе́вную добро́ту пресвѣ́тлу показа́вше, сосу́дъ Влады́цѣ честнѣ́йшій вои́стинну принесо́сте, святíи, огню́ не послужи́вше. Сего́ ра́ди моли́теся ко Го́споду о всѣ́хъ на́съ, грѣхо́въ оставле́ніе дарова́ти чту́щимъ любо́вію па́мять ва́шу.

И ны́нѣ, богоро́диченъ:

Моли́твы Свои́хъ рабо́въ пріими́, Богоро́дице, и изба́ви ны́ отъ вся́кія бѣды́, я́ко ро́ждшая Христа́, Спа́са ду́шъ на́шихъ.

Крестобогоро́диченъ:

Иже Твое́ заступле́ніе стяжа́вше, Пречи́стая, и Твои́ми моли́твами отъ напа́стей избавля́еми, Кресто́мъ бо Сы́на Твоего́ вездѣ́ сохраня́еми, по до́лгу Тя́ вси́ благоче́стно велича́емъ.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Крѣпча́йшимъ противле́ніемъ до́бліи и стремле́ніемъ неотло́жніи, друзíи Маккаве́и яви́стеся, повелѣва́ющихъ я́рости не убоя́стеся, скве́рная я́сти не изво́ливше.

Съ го́рними си́лами предстоя́ще всѣ́ми Владѣ́ющему, му́ченицы до́бліи, ва́съ почита́ющихъ напа́стей изба́вите и вѣ́чнаго муче́нія.

Нескве́рно дарова́ніе соблю́дше всечестна́го креще́нія, Твои́ страстоте́рпцы сіе́ честнѣ́йше содѣ́лаша, сла́дко сме́рти Твое́й поревнова́вше.

Твое́й сме́рти му́ченицы до́бліи, Влады́ко Христе́, подо́бящеся, повѣ́шени на дре́вѣ, ра́дующеся, ду́ши преда́ша Ти́, — сла́ва си́лѣ Твое́й, — пою́ще.

Богоро́диченъ: Вели́чія Ти́ сотвори́ Влады́ка, Еди́нъ Сы́й, Влады́чице, си́ленъ крѣ́постію, я́коже прорекла́ еси́, и́бо блажа́тъ Тя́ вси́ ро́ди, Непоро́чная.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Черто́гъ вмѣни́сте пе́рвый темни́цу, блаже́нніи, та́мо бо Жениху́ Кра́сному, ра́дующеся, му́ченицы, обручи́стеся, Его́же ра́ди уя́звлени душа́ми, неудержи́мымъ жела́ніемъ къ Нему́ устреми́стеся.

Красе́нъ еси́, Влады́ко, и въ слѣ́дъ Тебе́ тече́мъ чи́стыми душа́ми, Женише́, — тро́ица му́ченикъ вопія́ше, ра́дующеся, — Твое́ю любо́вію, я́коже зри́ши, связа́хомся и Боже́ственнымъ Ти́ раче́ніемъ.

Ходи́сте по Влады́цѣ, святíи, иму́ще во́ду жи́ву бію́щу, сла́дко подви́жущую ва́съ къ подвиго́мъ муче́нія, Христо́ву ча́шу ве́село испи́сте.

Богоро́диченъ: Твоея́, Богоневѣ́сто, сла́вы земля́ испо́лнися, и къ Себѣ́ святы́хъ вся́ ли́ки свѣ́тло привлече́, мíра сла́дкая оста́вити си́хъ повину́ющи и получи́ти Твоея́ свѣ́тлости.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Жезлы́ неми́лостивно му́ченикъ Евста́ѳій приклоня́емь, вся́чески стена́ніе или́ сле́зу не испусти́: крѣ́пкаго бо адама́нта бя́ше твердѣ́йшій.

Возмо́глъ еси́, си́лою Боже́ственною укрѣпля́емь, му́чениче Евста́ѳіе, терпѣ́ти му́ки нестерпи́мыя, блаже́нне, сего́ ра́ди боже́ственнаго весе́лія сподо́бился еси́.

Полны́ лука́выхъ бѣсо́въ побѣжде́ни бы́ша му́ченикъ мно́жествомъ крове́й, и крѣпи́тся Твоя́ Це́рковь, Жизнода́вче, воспѣва́ющи Твое́й си́лѣ сла́ву.

Богоро́диченъ: Добро́тою дѣ́вства сія́ющи, Влады́чице, Царе́ви вѣко́въ избрана́ была́ еси́ въ жили́ще, Его́же ражда́еши, по рождествѣ́ соблюда́ющаго Тя́ нетлѣ́нну.

Конда́къ, гла́съ 3. Подо́бенъ: Дѣ́ва дне́сь.

Оте́ческую пре́лесть оста́вльше святíи, приведо́стеся Христо́ви, всѣ́мъ души́ усе́рдіемъ ста́сте, мужему́дренно до сме́рти, тѣ́мже и взя́сте побѣ́ды по́честь вои́стинну, о всѣ́хъ Влады́ку на́шего непреста́нно моля́ще.

Икосъ:

Му́ченикъ по́двигъ любопра́зднственнѣ ви́дяще, му́жеству и́хъ досто́йно почуди́мся, и со безпло́тными врага́ми си́хъ боре́нію а́нгеловъ ли́кове ра́дующеся, си́хъ ублажи́ша. Та́мо бѣсо́встіи полцы́, побѣжда́еми, ли́ца отвраща́ху, та́мо бо всѣ́хъ Влады́ка вѣнцы́ сла́вно украша́етъ му́ченикъ главы́. Сего́ ра́ди возопіе́мъ къ ни́мъ: о всѣ́хъ, му́ченицы Христо́вы блаже́нніи, моли́теся.

Пѣ́снь 7.

Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.

Иска́пающи ра́дость и духо́вное весе́ліе, яви́ся на́мъ честна́я ва́ша па́мять, блаже́нніи, сердца́ услажда́я, исполня́ющи ра́дости премно́гія.

Умъ впери́лъ еси́, блаже́нне, па́че чу́вства добро́тами плѣне́нный, и сокруше́нія бе́дромъ не ощуща́лъ еси́, блаже́нне Евста́ѳіе, и власо́мъ съ пло́тію отрѣ́заннымъ ти́ терпѣ́лъ еси́, я́ко адама́нтъ, въ му́кахъ.

Красота́ тѣле́сная, му́дре му́чениче, и ю́ности цвѣ́тъ возра́стный, ли́къ и жела́ніе ни во что́же ти́ вмѣни́ся, сего́ ра́ди, Евста́ѳіе, сла́дости ны́нѣ Боже́ственныя воспріе́млеши.

Но́са и у́шію Тебе́ ра́ди, Спа́се, обрѣ́занъ, му́ченикъ Евста́ѳій, Твою́, Влады́ко, велича́ше си́лу и воплоще́ніе Твое́ поя́ше, сподобля́юща того́ па́че есте́ственныхъ терпѣ́ній.

[Богоро́диченъ: Яко спасе́ніе на́ше Тя́, Богоро́дице, мо́лимъ: моли́ за ны́ Вопло́щшагося изъ Тебе́].

Пѣ́снь 8.

Ирмо́съ: Изба́вителю всѣ́хъ, Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Исте́кшая, преблаже́нніи, кро́вь ва́ша честна́я всю́ освяти́ тва́рь, мно́жествомъ тече́нія му́ченики содѣ́лавшая ва́съ, и́бо свѣ́тло Бо́га проповѣ́дасте, ва́съ ра́ди уме́рша.

Неруши́мая Це́ркви основа́нія, вѣ́рнымъ же крѣ́пкое предгра́діе, стѣны́ твердѣ́йше, яви́стеся, му́ченицы богоглаго́ливіи, и на́съ всѣ́хъ крѣ́пко заступа́юще.

Земля́ соде́ржитъ честна́я тѣлеса́ ва́ша, богоно́сніи, не́бо же — ду́ши, тѣ́мъ весели́теся, му́ченицы, со а́нгелы, Го́сподеви трисвяту́ю пѣ́снь пою́ще: благослови́те, вся́ дѣла́ Госпо́дня, Го́спода.

Богоро́диченъ: Страшна́ человѣ́комъ сме́рть пре́жде рождества́ Твоего́, Богоро́дице, по си́хъ же игра́лище святы́мъ вмѣни́ся, хода́тайствуя живо́тъ вѣ́чный.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Воздѣ́ланъ бы́въ, я́ко ра́ломъ, сло́вомъ твои́мъ, богому́дре Анто́ніе, чу́дный Евста́ѳій, сѣ́мя же пріе́мъ, я́ко блага́я земля́, Іоа́ннъ богому́дрый, и́же муче́нія кла́съ возрасти́.

Вели́кимъ по́двигомъ, прему́дріи, по́чести взе́мше, воздая́нія трудо́мъ и болѣ́знемъ отъ Бо́га прія́сте, му́ченицы, о на́съ Того́ моли́те, и́же ва́съ помина́ющихъ, святíи.

Ны́нѣ у престо́ла предстоя́ще Царе́ви всѣ́хъ и бу́дущихъ бла́гъ наслажда́ющеся, богоблаже́нніи, чту́щихъ помина́йте ва́шу па́мять свяще́нную.

Богоро́диченъ: Во́ды живы́я испо́лнь весе́лія, благода́ти дарова́нія пролива́еши, всѣ́мъ сія́ незави́стно источа́я, Тебе́ бо ра́ди дарова́ся вся́ко бла́го мíрови, Влады́чице.

Свѣти́ленъ:

Муче́нія добро́тами осія́вшеся, отъ Бо́га воздая́ніе трудо́мъ ны́нѣ прія́сте вои́стинну, о на́съ, му́ченицы, Благода́теля моли́те. [Два́жды.]

Сла́ва, и ны́нѣ, богоро́диченъ:

Вели́ка Совѣ́та Ангела родила́ еси́ — Христа́, Препѣ́тая Отрокови́це, Царя́ Сла́вы, Его́же Кре́стъ му́ченицы взе́мше, во слѣ́дъ Сего́ потеко́ша, съ ни́миже непреста́нно о на́съ моли́ся.

На хвали́техъ стихи́ры, гла́съ 4. Подо́бенъ: Да́стъ зна́меніе.

Иму́ще, блаже́нніи, Христо́ву Боже́ственную си́лу, я́ко ору́жіе непобѣди́мое, отрази́сте вся́ си́лы бѣсо́вскія и тмы́ безпло́тныхъ боре́цъ и побѣ́ды по́чести взя́сте, тѣ́мже предстоя́ще Подвигополо́жнику Христу́, о всѣ́хъ моли́теся, чту́щихъ па́мять ва́шу.

Огню́ не послужи́вше чу́вственному, приснопа́мятніи, и огню́ причасти́вшеся и му́камъ, прія́сте небе́сную ро́су, и поко́й боже́ственный, и вѣ́чную ра́дость и, кня́зя тмы́, му́ченицы прему́дріи, попали́вше терпѣ́ніемъ болѣ́зней ва́шихъ, вѣ́рныхъ утверди́сте ко и́стинному благоче́стію.

Къ приста́нищу невла́емому приста́сте, му́ченицы, мяте́жныя волны́ изба́вльшеся, я́ко му́дростніи, и треволне́нія мяте́жа вели́каго, отню́дуже собира́юще пло́дъ болѣ́зней — вѣ́чную жи́знь, помина́йте и на́съ, блаже́нніи, чту́щихъ па́мять ва́шу.

Сла́ва, гла́съ 3:

До́блественніи му́ченицы и́стинніи, ва́съ ни ну́жда мучи́тельская, ни ласка́ніе льсти́вное, ни удо́въ отрѣ́заніе, ниже́ сме́рти преще́ніе отъ боже́ственныя любве́ разлучи́ти возмо́же, тѣ́мже дерзнове́ніе иму́ще ко Христу́, Иже надъ всѣ́ми Бо́гу, проси́те отъ Христа́ и на́мъ моли́твами ва́шими дарова́ти ве́лію ми́лость.

И ны́нѣ, богоро́диченъ, гла́съ 8:

Влады́чице, пріими́ моли́твы [ра́бъ Твои́хъ и изба́ви на́съ отъ вся́кія ну́жды и печа́ли].

Славосло́віе вели́кое. [Ектеніи́] и отпу́стъ.



НА ЛИТУРГІИ,

[Блаже́нна отъ кано́на, пѣ́снь 3-я и 6-я.] Проки́менъ, гла́съ 4: Святы́мъ, и́же су́ть на земли́ Его́,* удиви́ Госпо́дь вся́ хотѣ́нія Своя́ въ ни́хъ. Сти́хъ: Предзрѣ́хъ Го́спода предо мно́ю вы́ну, [я́ко одесну́ю мене́ е́сть, да не подви́жуся.] Апо́столъ къ Ефесе́емъ, зача́ло 233. Аллилу́ія, гла́съ 4: Воззва́ша пра́ведніи, и Госпо́дь услы́ша и́хъ [и отъ всѣ́хъ скорбе́й и́хъ изба́ви и́хъ]. Сти́хъ: Мно́ги ско́рби пра́веднымъ, [и отъ всѣ́хъ и́хъ изба́витъ я́ Госпо́дь]. Ева́нгеліе отъ Матѳе́я, зача́ло 36. Прича́стенъ: Ра́дуйтеся пра́ведніи [о Го́сподѣ, пра́вымъ подоба́етъ похвала́].

Источникъ: Слу́жба и Ака́ѳистъ святы́мъ тріе́мъ му́ченикомъ ви́ленскимъ: Анто́нію, Іоа́нну и Евста́ѳію, въ Ви́льнѣ пострада́вшимъ 1342-го го́да. — М.: Въ Сѵнода́льной Тѵпогра́фіи, 1887. — Л. 2 – 13 об.

/ Къ оглавленію раздѣла /


Наверхъ / Къ титульной страницѣ

0