Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 29 iюня 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 13-й де́нь.
Свята́го священному́ченика Арте́мона.

[ВЕЧЕРЪ,]
На Го́споди воззва́хъ: стихи́ры, гла́съ 1. Подо́бенъ: Небе́сныхъ чино́въ.

Со безпло́тными совокупи́лся еси́,* на земли́ живы́й,* и съ ни́ми непреста́нно слу́жиши Тро́ицѣ,* Арте́моне богоблаже́нне.* Отону́дуже при́сно, я́ко небе́сный человѣ́къ ходя́,* вы́шнимъ учи́ши земны́я боже́ственнымъ чудесе́мъ.

Боже́ственнымъ сія́ніемъ озаря́емь,* мно́гими му́ками изнури́лъ еси́ твое́ тѣ́ло,* къ невеще́ственнѣй преста́вився зари́,* е́юже разрѣши́лъ еси́ мольба́ми твои́ми* страсте́й омраче́нную но́щь, му́дре,* озаря́я ду́ши на́ша.

О творя́щихъ твою́ па́мять,* священному́чениче, вѣ́рно,* и мно́гая по́двиги честна́го твоего́ муче́нія пою́щихъ* не преста́й моля́ при́сно сохрани́ти отъ бѣ́дъ и скорбе́й* и бу́дущія изба́витися си́мъ тли́,* Арте́моне му́чениче, богопроповѣ́дниче.

Сла́ва, и ны́нѣ, богоро́диченъ:

Нра́вомъ гнилы́мъ попо́лзся, ни́цъ лежу́,* и къ Твое́й, Дѣ́во, притека́ю тишинѣ́:* отъ бу́ри сопроти́вныя* и искуше́ній многообра́зныхъ мя́ изба́ви,* да пою́ Твою́ благода́ть непреста́нно,* Богоро́дице Ма́ти Приснодѣ́во.

Крестобогоро́диченъ:

У Креста́ предстоя́щи Сы́на и Бо́га Твоего́* и долготерпѣ́ніе Того́ смотря́ющи,* глаго́лаше, пла́чущи, Ма́ти Чи́стая:* увы́ Мнѣ́, Ча́до сладча́йшее,* что́ сія́ стра́ждеши непра́ведно, Сло́ве Бо́жій,* да спасе́ши человѣ́чество?


[НА УТРЕНИ,]
Кано́нъ, его́же краегране́сіе по алфави́ту. Гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Отверза́я ра́зума сокро́вища, Пода́тель и си́хъ благода́ть подава́етъ оби́льно слове́съ вѣ́рою восхваля́ющимъ страда́льца Его́ Арте́мона.

Стрѣло́ю пресла́дкія любве́ Христо́вы уя́звена отъ ю́ности тя́, му́дре, тѣле́сное пристра́стіе, Арте́моне, Сего́ любве́ не отсѣче́.

Писа́нія прини́къ прилѣ́жно боже́ственнаго во глубину́, Арте́моне, извле́клъ еси́ му́дрѣ ра́зума лу́чшаго бога́тство, и́мже вся́ вѣ́рныя обогати́лъ еси́.

Богоро́диченъ: Земноро́дніи рождество́мъ Твои́мъ отъ земли́ къ высотѣ́ небе́снѣй вознесо́хомся вои́стинну, Чи́стая Богоро́дице, и а́нгельскимъ ликостоя́ніемъ причто́хомся.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Си́лою Ду́ха одѣ́янъ, побѣди́лъ еси́ ополче́нія, я́же на Зижди́теля, Арте́моне вседо́блій.

Угаси́лъ еси́ пе́щь безбо́жія, преподо́бне, страда́льческихъ крове́й твои́хъ одожде́ніи, Арте́моне пресла́вне.

Кипя́ боже́ственнымъ раче́ніемъ и разжига́емь боже́ственною любо́вію, преподо́бне, за сію́ пострада́лъ еси́.

Богоро́диченъ: Разрѣши́ рождество́ Твое́ грѣхо́въ на́шихъ, Чи́стая, вины́ и пра́вдою вся́ вѣ́рныя связа́.

Сѣда́ленъ, гла́съ 4. Подо́бенъ: Ско́ро предвари́.

Исповѣ́даніи свяще́нными подо́бствовавъ и му́ченически жи́знь соверши́въ, къ небеси́ восте́клъ еси́, Арте́моне му́дре, вѣне́цъ неувяда́емый отъ Бо́га пріе́мь. Тѣ́мъ святу́ю твою́ пра́зднуемъ па́мять, вопію́ще: помяни́ ны́, священному́чениче, Христу́ предстоя́.

Сла́ва, и ны́нѣ, богоро́диченъ:

Обнови́ла еси́, Чи́стая, Боже́ственнымъ рождество́мъ Твои́мъ истлѣ́вшее во страсте́хъ земноро́дныхъ ме́ртвенное существо́ и воздви́гла еси́ вся́ отъ сме́рти къ животу́ нетлѣ́нія. Тѣ́мже Тя́ по до́лгу блажи́мъ вси́, Дѣ́во препросла́вленная, я́коже прорекла́ еси́.

Крестобогоро́диченъ:

На Крестѣ́ Тя возвы́шена я́ко узрѣ́ Пречи́стая Ма́ти Твоя́, Сло́ве Бо́жій, ма́терски рыда́ющи, вѣща́ше: что́ но́вое и стра́нное сіе́ чу́до, Сы́не Мо́й? Ка́ко, Жи́знь всѣ́хъ, вкуша́еши сме́рти, оживи́ти ме́ртвыя хотя́, я́ко Милосе́рдъ?

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Же́ртва твоя́, сла́вне, на же́ртвенникъ небе́сный вознесе́ся и благопрія́тна Влады́цѣ всѣ́хъ ны́нѣ бы́сть.

Въ видѣ́ніе лу́чшее возне́съ у́мъ, Арте́моне преподо́бне, научи́лся еси́ та́инъ Христо́выхъ, за ни́хже и пострада́лъ еси́.

Водрузи́вся на недви́жимѣмъ ка́мени Зижди́телевы, преподо́бне, любве́, прило́ги и треволне́ніи враго́въ не поколеба́лся еси́ весьма́ мы́слію.

Богоро́диченъ: Яко неистоща́емое, Влады́чице, Тя́ дарова́ній сокро́вище иму́ще, незави́стныя да́ры чуде́съ отъ Тебе́ вси́ пріе́млемъ.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Волна́мъ, му́дре, безбо́жія запрети́въ, спа́слъ еси́ лю́ди благопокорли́выя, наста́вль во приста́нище вѣ́ры.

Свѣти́льникъ свѣ́телъ, въ нощи́ ле́сти, преподо́бне, возсія́въ добродѣ́телей свѣ́томъ богоразу́мія, на свѣ́тъ человѣ́ки напра́вилъ еси́.

Таи́нникъ Христо́въ бы́въ, Арте́моне преподо́бне, неизрече́нныхъ та́инъ, себе́ прине́слъ еси́ Тому́ прія́тну же́ртву страда́ніемъ.

Богоро́диченъ: Отъ скве́рны мя́ страсте́й и окаля́нія очи́щши, ду́шу мою́, Богоневѣ́сто, Твои́ми моли́твами чи́сту Бо́гу предста́ви.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Зако́нно за Христа́ страда́въ, Арте́моне, обличи́лъ еси́ беззако́ннующихъ вра́гъ злочести́вое велѣ́ніе, тѣ́мже зако́ненъ му́ченикъ показа́лся еси́, боже́ственными побѣ́дами вѣнча́емь.

Изсуши́въ му́тныя пото́ки безбо́жія слове́съ твои́хъ огне́мъ, свѣ́тлыя источи́лъ еси́ рѣ́ки вѣ́ры богоразу́мія вѣ́рнымъ, Арте́моне преподо́бне.

Вооружи́въ, сла́вне, по́мыслъ на бори́теля змíя, до́блимъ соплете́ніемъ, Арте́моне, низложи́въ его́, ме́ртва показа́лъ еси́ и отъ Го́спода побѣ́ды вѣне́цъ прія́лъ еси́.

Богоро́диченъ: Бы́хомъ ме́ртвіи, безсме́ртни Боже́ственною благода́тію рождества́ Твоего́ и тлѣ́нія пе́рваго изба́вихомся, Богоро́дице Чи́стая, и нетлѣ́нія оде́ждею украси́хомся.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Огне́мъ распала́емь боже́ственною Влады́ки любо́вію, му́чениче сла́вне, въ по́двигъ трудо́въ усе́рдно во́лею вте́клъ еси́, зовы́й: оте́цъ на́шихъ Бо́же, благослове́нъ еси́.

Си́лою Паракли́товою облече́нъ, му́чениче, я́ко апо́столи, пре́лести ополче́нія до́блимъ терпѣ́ніемъ побѣди́въ, пѣ́лъ еси́: оте́цъ на́шихъ Бо́же, благослове́нъ еси́.

Цѣлому́дріемъ житіе́ украси́въ и тѣ́ло чистото́ю, чи́сто Христу́, Арте́моне, священнодѣ́йствовалъ еси́, поя́ и воспѣва́я благода́рственная: оте́цъ на́шихъ Бо́же, благослове́нъ еси́.

Богоро́диченъ: Да вся́ привлече́тъ къ небе́снѣй сла́вѣ Творе́цъ всего́, изъ Тебе́, Богороди́тельнице, благоизво́ли роди́тися и съ на́ми я́ко Человѣколю́бецъ и Благодѣ́тель Бо́гъ пло́тію пожи́ти.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Царя́ Небе́снаго, я́коже предпоче́лъ еси́ по достоя́нію отъ всѣ́хъ земны́хъ, съ Си́мъ во вѣ́ки, Арте́моне, сра́дуешися.

Превознесе́на тя́ душе́ю къ Зижди́телю, прило́зи мучи́телей, страстоно́сче, ника́коже Сего́ отвлеко́ша любве́.

Свѣ́та боже́ственнаго блиста́ньми, страстоте́рпче, просвѣ́щся, вше́дъ въ незаходи́мый же́ртвенникъ та́инъ, я́ко таи́нникъ неизрече́нныхъ.

Богоро́диченъ: Иже человѣ́ческое естество́ пріе́мый, Богоро́дице, изъ Тебе́ па́че ума́ и сло́ва сы́ны человѣ́ческія содѣ́ла сво́йственны.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Зи́му безбо́жія, му́чениче, прете́къ, во благоче́стія ве́сну дости́глъ еси́ и со́лнца сла́вы свѣ́та сподо́бился еси́.

Душе́вными и разу́мными очесы́ прови́дѣвъ одесну́ю тебе́ стоя́ща Го́спода, не поколеба́лся еси́ му́къ, Арте́моне, волна́ми.

Яко боже́ственныя неизрече́нныя сла́вы, страстоте́рпче, сподо́блься со страстоте́рпцы и ученики́ Христо́вы, о на́съ умоли́ Сего́, я́ко Благоутро́бнаго.

Богоро́диченъ: Свы́ше, Богоро́дице, Твои́мъ благоутро́біемъ на́шу нищету́ посѣти́ и отъ тли́ и бѣ́дъ на́съ изба́ви.

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 48 об. – 51.

/ Къ оглавленію раздѣла /


Наверхъ / Къ титульной страницѣ

0