Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 24 мая 2017 г. Сейчасъ на порталѣ посѣтителей - 5.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія во 12-й де́нь.
Преподо́бнаго отца́ на́шего и исповѣ́дника Васи́лія, епи́скопа Парíйскаго.

[ВЕЧЕРЪ,]
На Го́споди воззва́хъ: стихи́ры, гла́съ 8. Подо́бенъ: О, пресла́внаго чудесе́!

Съ похвала́ми па́мять твоя́* сотворя́ется свѣ́тло,* святи́телю Васи́ліе,* и ра́дости наполня́етъ* правосла́вныя собо́ры,* я́ко пра́вду возлю́бльшаго,* и цѣлому́дрія чистоту́, и кро́тость,* и ти́хость всегда́ изря́дно* поче́тша и соверше́нно.

Па́влу боже́ственному подо́бяся,* во изгна́ніихъ терпѣли́вно,* святи́телю Васи́ліе,* жи́знь сконча́лъ еси́ въ ну́ждахъ и ско́рбехъ,* неоску́дно утѣсня́емь* и прехожде́нія при́сно творя́,* ны́нѣ же безпеча́льное и неизмѣ́нное* отъ Бо́га обрѣ́лъ еси́ селе́ніе и наслажде́ніе.

Яко святи́тель богопрія́тенъ,* мы́сленнаго селе́нія* назира́еши незаходи́мая* и премíрная зрѣ́ти сподо́бился еси́,* одѣ́янъ въ преподо́біе,* пра́вдою обложе́нъ,* и благолѣ́пія красоту́ разу́мныхъ* лице́мъ къ лицу́* зри́ши, пребога́те.

Сла́ва, и ны́нѣ, богоро́диченъ:

Спаси́ мя́, Влады́чице Пречи́стая,* я́же Спа́са Христа́ неизрече́нно ро́ждшая,* Тя́ бо еди́ну стяжа́хъ предста́тельницу,* и необори́мую стѣ́ну,* и покро́въ, и ра́дованіе,* и души́ моея́ Боже́ственное утѣше́ніе.* Ты́ у́бо мя́ изба́ви неусыпа́ющаго че́рвія* и огня́ вѣ́чнующаго,* Ма́ти Христа́ Бо́га.

Крестобогоро́диченъ:

Что́ зри́мое видѣ́ніе,* е́же Мои́ма очи́ма ви́дится, о Влады́ко:* содержа́й всю́ тва́рь* на дре́во воздви́женъ бы́въ* и умира́еши, всѣ́мъ дая́й жи́знь? —* Богоро́дица, пла́чущися, глаго́лаше,* егда́ узрѣ́ на Крестѣ́ возноси́ма* изъ Нея́ неизрече́нно возсія́вшаго* Бо́га и Человѣ́ка.


[НА УТРЕНИ,]
Кано́нъ, гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Несказа́нный Свѣ́тъ тебѣ́ и трисія́ненъ въ неподви́жимѣмъ Ца́рствіи небе́снѣмъ возсія́, о́тче, и пра́ведныхъ весе́ліе досто́йно тя́ прія́тъ.

Отверзо́шася врата́ тебѣ́ Еде́мская, и къ святи́телемъ приложи́лся еси́ святи́тель, и перворо́дныхъ Це́ркви сочета́лся, достосла́вне.

Зако́нно пострада́въ и чи́сто свяще́нство до конца́ соблю́дъ, съ небе́сными ликова́ти свяще́нники сподо́бился еси́.

Богоро́диченъ: Пло́ти по ѵпоста́си соедини́вся Иже отъ Тебе́ прія́тіемъ, всѣ́хъ Зижди́тель про́йде несказа́нно, Богома́ти, и человѣ́комъ прибли́житися благоизво́ли.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Досточу́дная и пресла́вная па́мять твоя́ ра́достно правосла́вныхъ увеселя́етъ собо́ры.

Облакъ тѣлесе́ совле́къ, преподо́бне, и, сою́зовъ разрѣши́вся, къ Бо́гу прибли́жился еси́.

Кончи́ну блаже́нную и наслажде́ніе, преподо́бне, избра́нныхъ, я́ко избра́ненъ, досто́йно прія́лъ еси́.

Богоро́диченъ: Имѣ́я Тя́ Помо́щницу, не постыжду́ся, Пречи́стая Ма́ти Бо́жія, имѣ́я Тя́ Предста́тельницу, вра́гъ мои́хъ изба́влюся.

Сѣда́ленъ, гла́съ 3. Подо́бенъ: Боже́ственныя вѣ́ры.

Вели́кое со́лнце вселе́ннѣй возсія́лъ еси́ добродѣ́тельми твои́ми: сія́ньми и чуде́съ свѣтлостьми́ просвѣти́лъ еси́ вѣ́рныхъ составле́нія и потреби́лъ еси́ страсте́й омраче́ніе, о́тче Васи́ліе, Христа́ Бо́га моли́ дарова́ти на́мъ ве́лію ми́лость.

Сла́ва, и ны́нѣ, богоро́диченъ:

Боже́ственная ски́нія была́ еси́ Сло́ва, еди́на Пречи́стая Ма́ти Дѣ́во, чистото́ю а́нгелы превозше́дшая, па́че всѣ́хъ мене́, пе́рсть бы́вша, оскверне́на плотски́ми прегрѣше́ньми, очи́сти моли́твъ Твои́хъ боже́ственными вода́ми, подаю́щи, Чи́стая, ве́лію ми́лость.

Крестобогоро́диченъ:

Нескве́рная Агница Сло́ва, нетлѣ́нная Дѣ́во Ма́ти, на Крестѣ́ зря́щи повѣ́шена изъ Нея́ безъ болѣ́зни прозя́бшаго, ма́терски подо́бно рыда́ющи, вопія́ше: увы́ Мнѣ́, Ча́до Мое́! Ка́ко стра́ждеши во́лею, хотя́ изба́вити отъ страсте́й безче́стія человѣ́ка?

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Моли́твы творя́ къ Бо́гу, вознесе́нную мы́сль низложи́лъ еси́ злому́дренныя е́реси и Це́рковь, о́тче, возвесели́лъ еси́.

Въ ски́ніяхъ небе́сныхъ тя́ Подвигополо́жникъ, о́тче, всели́, неосла́бное твое́ противле́ніе къ противобо́рцемъ пріе́мь.

Преда́ній ра́ди храни́мыхъ Це́ркве Бо́жія отгна́нія претерпѣ́лъ еси́ и, побѣ́ды пріе́мля, сконча́лся еси́.

Богоро́диченъ: Бо́га, Его́же родила́ еси́, Чи́стая Дѣ́во, Сего́ моли́ рабо́мъ Твои́мъ дарова́ти согрѣше́ній проще́ніе.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Боже́ственная все́льшися благода́ть въ тя́, богоно́се, па́стыря вѣ́рнѣйша Це́ркве тя́ показа́.

Умертви́въ пло́ти твоея́ мудрова́ніе и стра́сти, жи́зни ду́ху послѣ́довалъ еси́, сла́вне.

Цѣлому́дренно и пра́ведно житіе́ твое́ соверши́въ, богому́дре, прія́лъ еси́ добродѣ́телей воздая́ніе.

Богоро́диченъ: Су́щи Пресвяты́й хра́мъ, безстра́стія исто́чника родила́ еси́, Дѣ́во Ма́ти Всенепоро́чная.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Просвѣща́емь красото́ю небе́сныхъ сія́ній, престо́лъ, и́же на земли́, оста́вилъ еси́, преподо́бне, и наслѣ́діе нетлѣ́нно въ земли́ кро́ткихъ, я́ко кротча́йшій, воспрія́лъ еси́.

Пре́лести смѣя́ся ху́льныхъ ерети́къ, боже́ственному и благоче́стному правосла́вныхъ ра́зуму преусе́рдно научи́лъ еси́, ико́ну чествова́ти Спа́сову, досточу́дне.

Жела́ніе твое́ къ Бо́гу испо́лнися, пресла́вне: преста́вися бо къ Нему́, боже́ственно ра́дуяся, и ны́нѣ свѣ́тлости святы́хъ, о́тче, зри́ши и красоты́.

Богоро́диченъ: Ме́ртвости и тли́ изба́вися человѣ́чество естество́мъ бо Жизнода́вца безсѣ́менно родила́ еси́, Дѣ́во Всенепоро́чная, на благодѣ́яніе восхваля́ющихъ Тя́ вѣ́рно.

Конда́къ, гла́съ 2. Подо́бенъ: Вы́шнихъ ища́.

Вы́шняго свѣ́томъ озари́вся, блаже́нне, просвѣща́еши вся́, и́же любо́вію честву́ющія твое́, о́тче, честно́е страда́ніе, Васи́ліе священнострада́льне, моли́ Христа́ Бо́га непреста́нно о всѣ́хъ на́съ.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно, и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

О, несказа́ннаго весе́лія, его́же сподо́бился еси́, всеблаже́нне, прія́ти, въ невеще́ственнѣмъ Свѣ́тѣ живы́й, и поя́: благослове́нъ еси́, Го́споди Бо́же, во вѣ́ки.

Вѣнце́мъ боже́ственнаго благолѣ́пія, всеблаже́нне, красно́ удобря́емь, лику́еши, вопія́ съ вы́шними во́инствы: благослове́нъ еси́, Го́споди Бо́же, во вѣ́ки.

Таи́нникъ сы́й Тро́ицы, та́йнамъ служи́тель небе́снымъ, Влады́ку на́мъ ми́лостива сотвори́, вопію́щимъ: благослове́нъ Бо́гъ оте́цъ на́шихъ.

Богоро́диченъ: Евы дре́внюю кля́тву преложи́ла еси́, Чи́стая, на благослове́ніе, Сы́на Бо́жія ро́ждши. Ему́же вси́, благослове́нъ еси́, — зове́мъ, — во вѣ́ки вся́.

Пѣ́снь 8.

Ирмо́съ: Побѣди́тели мучи́теля и пла́мене благода́тію Твое́ю бы́вше, за́повѣдемъ Твои́мъ зѣло́ прилежа́ще, о́троцы вопія́ху: благослови́те, вся́ дѣла́ Госпо́дня, Го́спода.

Ско́рбныхъ житія́ и лю́таго слія́нія изба́вленъ, ра́дость, всеблаже́нне, и весе́ліе е́же па́че сло́ва прія́лъ еси́, поя́: благослови́те, вся́ дѣла́, Го́спода и превозноси́те Его́ во вѣ́ки.

Духо́вными уче́ніи те́плѣ противля́яся, языковре́дія ху́льниковъ, о́тче, удо́бнѣ разрѣши́лъ еси́, священнотаи́нниче, благослови́те, — поя́, — вся́ дѣла́, Го́спода и превозноси́те Его́ во вѣ́ки.

Яко красно́ мѣ́сто, въ не́же всели́лся еси́, священноявле́нне, я́ко красно́, о́тче, селе́ніе, идѣ́же пребыва́еши, поя́: благослови́те, вся́ дѣла́, Го́спода и превозноси́те Его́ во вѣ́ки.

Богоро́диченъ: Предста́тельницу, вси́ вѣ́рніи, стяжа́хомъ Тя́, Пречи́стая, и, Твои́ми моли́твами лю́тыхъ изба́вльшеся, Христу́ вопіе́мъ: благослови́те, вся́ дѣла́, Го́спода и превозноси́те Его́ во вѣ́ки.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Свя́то твое́ житіе́, о́тче, препроводи́лъ еси́ и, Бо́гу угоди́въ дѣ́лы твои́ми, небе́сное Ца́рство прія́лъ еси́, му́дре.

Тече́ніе сконча́въ, вѣ́ру же соблю́дъ и по́двигъ соверши́въ, Васи́ліе, пра́вды прія́лъ еси́, ра́дуяся, вѣне́цъ.

Зва́ніе, преблаже́нне, получи́лъ еси́ боже́ственное и соверше́нное жела́ній исполне́ніе, ны́нѣ у́бо моля́ не преста́й о ста́дѣ твое́мъ.

Богоро́диченъ: То́ка сле́зъ мои́хъ не отврати́ся, Яже отъ вся́каго лица́ вся́ку сле́зу отъе́мшаго, Дѣ́во, Христа́ ро́ждшая.

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 46 – 48 об.

/ Къ оглавленію раздѣла /


Наверхъ / Къ титульной страницѣ

0