Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 16 декабря 2017 г. Сейчасъ на порталѣ посѣтителей - 4.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 11-й де́нь.
Слу́жба преподо́бному Іа́кову, игу́мену Желѣзнобо́ровскому, чудотво́рцу.

НА МАЛѢЙ ВЕЧЕРНИ,
[На Го́споди воззва́хъ:] стихи́ры [на 4], гла́съ 8. Подо́бенъ: Му́ченицы Твои́, Го́споди.

Преподо́бне о́тче Іа́кове,* посто́мъ и моли́твами Бо́гу угоди́лъ еси́* и ми́лостынями Ми́лостиваго Бо́га умили́лъ еси́,* сего́ ра́ди Ца́рствіе небе́сное наслѣ́довалъ еси́,* лука́выя же ду́хи низве́рглъ еси́ посо́біемъ Бо́жіимъ* и тмы́ кня́зя посрами́лъ еси́.* Моли́ся у́бо Христу́ Бо́гу* дарова́ти на́мъ ве́лію ми́лость.

Преподо́бне о́тче Іа́кове,* люби́телю пусты́ни, смире́нія рачи́телю,* це́рквамъ строи́телю, наста́вниче и́нокомъ,* и́же во́ждь до́брый всѣ́мъ лю́демъ* на пути́ ко спасе́нію бы́лъ еси́* и яви́лся еси́ стори́цею прине́сшій пло́дъ добродѣ́тели.* Моли́ Христа́ Бо́га* дарова́ти на́мъ ве́лію ми́лость.

Святи́телю Іо́нѣ Всероссíйскому* собесѣ́дникъ бы́лъ еси́, преподо́бне,* и отъ него́ наставля́емь и учи́мь Сло́ву Бо́жію,* сего́ ра́ди моли́ ку́пно съ ни́мъ Го́спода,* да пода́стъ Благовѣ́рному Импера́тору на́шему [и́мярекъ]* на сопроти́вныя свы́ше побѣ́ду и одолѣ́ніе* и на вся́ враги́ устраше́ніе,* и умири́тъ мíръ ми́лостію Свое́ю,* и пода́стъ на́мъ вся́ блага́я Своя́,* моли́твъ ра́ди святы́хъ ва́шихъ.

Сла́ва, гла́съ 6:

Преподо́бне о́тче и свя́те Іа́кове, на земли́ преходя́щее вре́мя прежи́лъ еси́, посто́мъ и моли́твами Бо́гу угожда́я, сего́ ра́ди ны́нѣ на небеси́ лику́еши и со а́нгелы пребыва́еши, дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

И ны́нѣ, пра́здника.

На стихо́внѣ стихи́ры, гла́съ 5. Подо́бенъ: Ра́дуйся.

Ра́дуйся, преподо́бне о́тче Іа́кове,* устро́ивый въ пусты́ни оби́тель* и именова́вый ю́ во и́мя Спа́сова Предте́чи Іоа́нна,* идѣ́же положены́ бы́ша святы́я мо́щи твоя́,* на ни́хже почива́яй Ду́хъ Святы́й* то́читъ цѣльбы́ мно́ги* приходя́щимъ человѣ́комъ съ вѣ́рою,* вся́кими неду́ги стра́ждущимъ,* и́же исцѣле́ніе пріе́млютъ* святы́хъ ра́ди моли́твъ твои́хъ.

Сти́хъ: Честна́ предъ Го́сподемъ* сме́рть преподо́бныхъ Его́.

Ра́дуйся, преподо́бне о́тче Іа́кове,* собра́вый въ пусты́ню и́нокъ мно́жество* и, съ ни́ми всено́щнымъ стоя́ніемъ Бо́га моля́,* воздержа́ніемъ поста́ ду́шу удобри́лъ еси́,* и чи́сту Бо́гу предста́вилъ еси́ ю́,* и прія́лъ еси́ да́ръ мздовоздая́нія —* небе́сный вѣне́цъ на главѣ́ свое́й со ученики́ свои́ми,* и́же послѣ́доваша житію́ твоему́ свято́му;* и ны́нѣ моли́ся Го́сподеви о созда́ннѣй тобо́ю оби́тели,* и о христіа́нѣхъ всѣ́хъ, призыва́ющихъ и́мя твое́ свято́е,* е́же спасти́ся душа́мъ на́шимъ.

Сти́хъ: Блаже́нъ му́жъ, боя́йся Го́спода,* [въ за́повѣдехъ Его́ восхо́щетъ зѣло́].

Ра́дуйся, о́тче Іа́кове преподо́бне,* я́ко утоли́лъ еси́ пло́ти возста́нія* мно́гимъ терпѣ́ніемъ и до́лгимъ алка́ніемъ,* отъ чре́слъ бо ма́тернихъ соблюда́емый Бо́гомъ,* имѣ́лъ еси́ бдѣ́ніе неусы́пное;* того́ ра́ди отве́рзеся тебѣ́, о́тче, Ца́рство небе́сное,* и Боже́ственнаго Ду́ха благода́ть* всели́ся въ се́рдцѣ твое́мъ,* и сла́вна тя́ показа́ Госпо́дь во мно́зѣхъ странѣ́хъ.* Моли́ся у́бо, преподо́бне,* о творя́щихъ честну́ю па́мять твою́,* я́ко да получи́мъ отъ Го́спода благода́ть* и душа́мъ на́шимъ ми́ръ и ве́лію ми́лость.

Сла́ва, гла́съ 6:

Еже по о́бразу Бо́жію соблю́дъ невреди́мо, у́мъ влады́ку на стра́сти па́губныя по́стнически поста́вивъ, и во е́же по подо́бію, я́коже мо́щно, возше́лъ еси́, му́жески бо естество́ пону́дивъ, потща́лся еси́ ху́ждшее покори́ти лу́чшему и пло́ть порабо́тити ду́ху, тѣ́мже и и́нокомъ яви́лся еси́ руководи́тель, благотеку́щимъ утѣше́ніе, пра́вило добродѣ́телей извѣ́стнѣйшее. И ны́нѣ на небесѣ́хъ зрѣ́ти Святу́ю Тро́ицу сподо́бивыйся, о́тче на́шъ Іа́кове, моли́ся непреста́нно о на́съ, вѣ́рою и любо́вію чту́щихъ тя́.

И ны́нѣ, пра́здника.

[Тропа́рь зри́ на вели́цѣй вече́рни.]



НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры [на 8], гла́съ 1. Подо́бенъ: Небе́сныхъ чино́въ.

Отче Іа́кове преподо́бне,* твоя́ пресвѣ́тлая па́мять* свяще́нная собра́нія весели́тъ до́брѣ,* твое́ же житіе́, чуде́съ оби́льное,* я́ко заря́ сія́етъ свѣ́тлая,* и ны́нѣ мо́лимъ тя́:* Христо́ви моли́ся* дарова́ти душа́мъ на́шимъ* ми́ръ и ве́лію ми́лость. [Три́жды.]

Отче святы́й Іа́кове,* вре́менныхъ и плотски́хъ мудрова́ній чужда́яся,* духо́вная и пребыва́ющая возлюби́лъ еси́,* сме́ртную же па́мять въ сердцы́ стяжа́лъ еси́,* и ны́нѣ Христу́ моли́ся* дарова́ти душа́мъ на́шимъ* ми́ръ и ве́лію ми́лость. [Три́жды.]

Отче Іа́кове преподо́бне,* до́блестей испо́лненный,* на небеса́ восте́клъ еси́* и побѣ́дныя по́чести прія́лъ еси́* отъ Христа́ Бо́га на́шего,* тѣ́ло же твое́, положено́ во гро́бѣ, о́тче,* оста́вилъ еси́ источа́ти на́мъ исцѣле́ніе,* и ны́нѣ Христо́ви моли́ся* дарова́ти душа́мъ на́шимъ* ми́ръ и ве́лію ми́лость. [Два́жды.]

Сла́ва, гла́съ 6:

Дне́сь созыва́етъ на́съ преподо́бнаго свѣ́тлое торжество́. Пріиди́те у́бо, празднолю́бцы, да пра́зднуимъ па́мять его́, глаго́люще: ра́дуйся, Іа́кове, свѣти́льниче свѣ́тлый, приводя́й ко Христу́ и́ноковъ мно́жество; ра́дуйся, по́стникомъ похвало́ и удобре́ніе, и всѣ́мъ вѣ́рнымъ благоути́шное приста́нище, и отъ неду́гъ избавле́ніе; ра́дуйся, небе́сныхъ чино́въ воспрія́тія сподо́бивыйся, съ ни́миже ны́нѣ ра́дуешися во сла́вѣ, предстоя́ Христу́ Бо́гу, Его́же моли́ изба́вити на́съ ви́димыхъ и неви́димыхъ вра́гъ и спасти́ ду́ши на́ша.

И ны́нѣ, пра́здника.
Вхо́дъ, Проки́менъ дне́ и чте́нія три́.

Прему́дрости Соломо́новы чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́новы чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́, или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры самогла́сны, гла́съ 5:

Преподо́бне о́тче, не да́лъ еси́ сна́ твои́ма очи́ма, ни вѣ́ждома твои́ма дрема́нія, до́ндеже ду́шу и тѣ́ло отъ страсте́й свободи́лъ еси́, тѣ́мже и Христо́съ, прише́дъ со Отце́мъ, оби́тель у тебе́ сотвори́. И отъ Того́ благода́ть пріи́мъ, преподо́бне Іа́кове, моли́ Единосу́щную Тро́ицу спасти́ся душа́мъ на́шимъ.

Богому́дре о́тче Іа́кове, по́стникомъ бы́лъ еси́ похвала́ и утвержде́ніе, мíръ отню́дъ возненави́дѣвъ отъ ю́ности, Бо́га возлюби́лъ еси́, и тѣ́снымъ путе́мъ ше́ствовалъ еси́, и и́ноческое житіе́ возлюби́лъ еси́. Пресвѣ́тлый свѣти́льниче и вѣ́рнымъ всѣ́мъ те́плый засту́пниче, моли́ся Го́сподеви спасти́ся душа́мъ на́шимъ.

Богому́дре о́тче, ду́шу съ тѣ́ломъ очи́стивъ, Свято́му Ду́ху себе́ оби́тель яви́, тѣ́мже сла́вна тя́ Госпо́дь, Іа́кове, содѣ́ла, въ чудесѣ́хъ же вели́каго свѣти́льника, просвѣти́вша во мра́цѣ су́щая, я́ко наста́вника и́нокомъ, соше́дшеся, велегла́сно ублажа́емъ.

Преподо́бне о́тче Іа́кове, отъ Го́спода просвѣще́ніе пріи́мъ и душетлѣ́нныя стра́сти побѣди́въ, въ до́брыхъ по́двизѣхъ подвиза́лся еси́ на неви́димаго врага́, и, того́ ко́зней, блаже́нне, избѣжа́въ, всели́лся еси́ въ премíрная селе́нія, и та́мо съ ли́ки пра́ведныхъ сочета́лся еси́; съ ни́миже дерзнове́ніе имѣ́я ко Го́споду, ми́ръ испроси́ душа́мъ на́шимъ и ве́лію ми́лость.

Сла́ва, гла́съ 6:

Преподо́бне о́тче, мíра красоты́ и сла́сти вре́менныя отню́дъ возненави́дѣвъ, и́ноческое житіе́ па́че возлюби́лъ еси́ и а́нгеломъ собесѣ́дникъ бы́ти сподо́бился еси́ и, я́ко свѣти́льникъ многосвѣ́тлый Ру́сскія земли́, чудеса́ми свои́ми сія́еши, тѣ́мже усе́рдно мо́лимся тебѣ́: помина́й всѣ́хъ на́съ, соверша́ющихъ свяще́нную па́мять твою́, мы́ бо ча́да твоя́ и о́вцы слове́сныя твои́хъ уче́ній и тя́ на по́мощь призыва́емъ, прося́ще тобо́ю прія́ти ми́ръ и ве́лію ми́лость.

И ны́нѣ, пра́здника.

На стихо́внѣ стихи́ры, гла́съ 4. Подо́бенъ: Да́лъ еси́ зна́меніе.

Житіе́ нескве́рно,* терпѣ́ніе, и кро́тость, и любо́вь нелицемѣ́рну,* и воздержа́ніе примѣ́рно,* всено́щное стоя́ніе* и умиле́ніе боже́ственное,* вѣ́ру, и наде́жду, и ми́лованіе, о́тче, стяжа́лъ еси́* и, а́ки а́нгелъ, пожи́лъ еси́ съ пло́тію на земли́,* блаже́нне Іа́кове,* моли́твенниче о душа́хъ на́шихъ.

Сти́хъ: Честна́ предъ Го́сподемъ* сме́рть преподо́бныхъ Его́.

Земны́й а́нгелъ и небе́сный человѣ́къ* бы́лъ еси́, преподо́бне,* учи́тель умиле́нія, ми́лованія струя́,* чуде́съ мно́жество, грѣ́шникомъ засту́пниче,* ма́слина вои́стинну плодови́та Бо́жія,* еле́емъ трудо́въ умаща́я сердца́ всѣ́хъ вѣ́рныхъ,* восхваля́ющихъ па́мять твою́.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Умъ тво́й просвѣща́я боже́ственными словесы́* и тѣле́сныхъ страсте́й удаля́яся,* о́бразъ земны́мъ себе́ яви́лъ еси́,* укра́шенъ же бы́въ боже́ственными добродѣ́тели,* и, руководи́мый Всесвята́го Ду́ха дѣ́йствомъ,* Бо́гови уго́денъ бы́лъ еси́,* о́тче на́шъ Іа́кове,* и́нокомъ украше́ніе.

Сла́ва, гла́съ 6:

Преподо́бне о́тче, во мно́гія страны́ изы́де вѣща́ніе твои́хъ наставле́ній, и́миже на небесѣ́хъ обрѣ́лъ еси́ мзду́ трудо́въ твои́хъ, бѣсо́вскія полки́ побѣди́лъ еси́ и а́нгельскимъ чино́мъ причте́нъ бы́лъ еси́, и́хже житію́ поревнова́лъ еси́, дерзнове́ніе имы́й ко Го́споду, ми́ръ испроси́ душа́мъ на́шимъ и ве́лію ми́лость.

И ны́нѣ, пра́здника.

Тропа́рь, гла́съ 4:

Небе́снаго жела́я, земна́я возненави́дѣлъ еси́ и, взе́мъ кре́стъ сво́й, послѣ́довалъ еси́ Христу́ и отъ Него́ пріе́мъ дарова́нія чуде́съ, исцѣля́ти неду́жныя; но, я́ко имѣ́я дерзнове́ніе ко Святѣ́й Тро́ицѣ, испроси́ Благовѣ́рному Импера́тору на́шему [и́мярекъ] здра́віе и спасе́ніе, на враги́ же побѣ́ду, и не забу́ди, посѣща́я ча́дъ свои́хъ, припа́дающихъ къ цѣльбоно́сному гро́бу твоему́, Іа́кове, преподо́бне о́тче на́шъ.


НА УТРЕНИ,
[На Бо́гъ Госпо́дь: Тропа́рь свята́го, два́жды. Сла́ва, и ны́нѣ, богоро́диченъ.]

По 1-мъ стихосло́віи сѣда́ленъ, гла́съ 1. Подо́бенъ: Ли́къ а́нгельскій.

Житіе́ земно́е благоче́стно преше́лъ еси́ и къ вѣ́чнымъ оби́телемъ преста́вился еси́, честно́е же тѣ́ло твое́ во гро́бѣ сокрове́нно и въ созда́ннѣй оби́тели твое́й положено́ бы́сть, и яви́ е́ Госпо́дь нетлѣ́нно и по преставле́ніи твое́мъ всѣ́мъ явле́но, тѣ́мже моли́ Христа́ Бо́га о пра́зднующихъ всечестну́ю па́мять твою́, Іа́кове богому́дре, о́тче на́шъ. [Два́жды.]

Сла́ва, и ны́нѣ, богоро́диченъ:

Ра́дуйся, Пречи́стая, душа́мъ снабдѣ́ніе, обурева́емымъ приста́нище невла́емое, согрѣша́ющимъ исправле́ніе извѣ́стное; ра́дуйся, утѣше́ніе ско́рбнымъ душа́мъ и помо́щнице непобѣди́мая; ра́дуйся, премíрная ко Го́споду хода́таица о всѣ́хъ христіа́нѣхъ.

По 2-мъ стихосло́віи сѣда́ленъ, гла́съ 5:

Пусты́ннаго жи́теля почти́мъ, вся́ прило́ги страсте́й плотски́хъ попра́вшаго тве́рдымъ воздержа́ніемъ, и притеце́мъ къ честно́му гро́бу его́, идѣ́же лежа́тъ честны́я и многоцѣле́бныя мо́щи его́, и глаго́лемъ: о преблаже́нне Іа́кове, моли́ся Го́сподеви со Предте́чею Христо́вымъ Іоа́нномъ поми́ловатися душа́мъ на́шимъ. [Два́жды.]

Сла́ва, и ны́нѣ, богоро́диченъ:

Тя́ пѣ́сньми немо́лчными ублажа́емъ, Дѣ́во, я́ко отъ Тро́ицы Еди́наго родила́ еси́ и носи́ла еси́ на Пречи́стую руку́ воплоти́вшееся Сло́во, непрело́жно и неизмѣ́нно, тѣ́мже со а́нгеломъ Тебѣ́ вопіе́мъ: ра́дуйся, Благода́тная, Госпо́дь съ Тобо́ю.

По поліеле́и сѣда́ленъ, гла́съ 8:

Егда́ боже́ственная любо́вь воспали́ ду́шу твою́, свя́те, тогда́ вся́ сро́дники своя́ оста́ви, и плотскíя стра́сти укроти́, и, и́ночество воспрія́въ, въ пусты́ню вни́де, и вся́ страши́лища бѣсо́вская претерпѣ́ Бо́жіимъ хране́ніемъ, идѣ́же, я́ко ке́дръ, умно́жися и проро́чествія да́ръ пріи́мъ, тѣ́мже неотъе́млемо бога́тство на небеси́ дарова́ тебѣ́ Бо́гъ, Іа́кове преподо́бне, моли́ Христа́ Бо́га согрѣше́ніемъ оставле́ніе пода́ти любо́вію чту́щимъ святу́ю па́мять твою́. [Два́жды.]

Сла́ва, и ны́нѣ, богоро́диченъ:

Вопло́щшееся Сло́во отъ утро́бы Твоея́ ро́ждши, Пречи́стая, мене́, растлѣ́ннаго грѣхи́, отъ прило́гъ вра́жіихъ сохрани́, Ма́ти Бо́жія, и се́рдце мое́ очи́сти, Богоблагода́тная, Ма́терними Твои́ми моли́твами, да и а́зъ благода́рно воззову́ Ти́: Марíе Богоро́дице, моли́ Сы́на Твоего́ и Бо́га на́шего поми́ловати ста́до Твое́, е́же стяжа́, Всенепоро́чная.

Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* [сме́рть преподо́бныхъ Его́]. Сти́хъ: Что́ возда́мъ Го́сподеви [о всѣ́хъ, я́же воздаде́ ми?] Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Пресла́внаго строи́теля, и до́му Предте́чева украси́теля, и первоугоди́вшимъ Бо́гу отце́мъ ревни́теля, по́стникомъ похвалу́, и немощны́мъ цѣли́теля, и бѣсо́мъ прогони́теля, Іа́кова почти́мъ, процвѣте́ у́бо, я́ко кри́нъ, и умно́жи ста́до Христо́во слове́сныхъ ове́цъ, сохраня́я и́хъ моли́твами свои́ми въ преподо́біи и пра́вдѣ.

Кано́нъ преподо́бному Іа́кову, Желѣзнобо́ровскому чудотво́рцу, гла́съ 8.

Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Яко безпло́тенъ, блаже́нне Іа́кове, на земли́ поживе́ и ны́нѣ съ ли́ки преподо́бныхъ сочета́лся еси́, съ ни́миже ра́дуяся, на́съ, чту́щихъ тя́, помина́й, приснопа́мятне.

Грѣха́ми мно́гими помраче́нное мое́ се́рдце просвѣти́, блаже́нне Іа́кове, те́плыми моли́твами твои́ми.

Умо́мъ очище́ннымъ Бо́гови порабо́тился еси́, цѣлому́дріемъ тѣле́снымъ и чистото́ю ду́шу и тѣ́ло свое́ просвѣти́лъ еси́, блаже́нне Іа́кове.

Богоро́диченъ: Прему́дрость и Сло́во Отчее несказа́нно ро́ждшая, души́ моея́ лю́тую исцѣли́ я́зву и серде́чную укроти́ болѣ́знь.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Ду́хомъ разжже́нъ бы́въ, Іа́кове о́тче, труды́ подъя́лъ еси́, возвы́сився смире́ніемъ, горды́ню бѣсо́вскую смири́лъ еси́, преподо́бне, сла́ва и́нокомъ и утвержде́ніе.

По у́зкому пути́ ходи́лъ еси́ въ житіи́ свое́мъ, простра́ннаго пути́ удаля́яся, о́тче, неви́димаго змíя посрами́лъ еси́, смире́ніемъ огражда́яся.

Моле́бный гла́съ мо́й услы́ши, о́тче Іа́кове преблаже́нне, не забу́ди раба́ твоего́, воспѣва́ющаго честны́я твоя́ по́двиги.

Богоро́диченъ: Уста́ви неуста́вное се́рдце мое́, Чи́стая Ма́ти Бо́жія, Сы́ну Твоему́ моля́щися при́сно о рабѣ́ Твое́мъ.

Сѣда́ленъ, гла́съ 8:

Ра́зума тве́рдостію украша́яся, плотскíя тя́гости отве́ргъ, змíеву горды́ню попра́лъ еси́ и, оби́тель бы́въ избра́нная Свято́му Ду́ху, неукло́ннымъ ра́зумомъ порабо́тился, еси́ Христу́, всеблаже́нне Іа́кове. Того́ моли́ грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко еди́ну въ жена́хъ Дѣ́ву Тя́ обрѣ́тше, безъ сѣ́мени ро́ждшую Бо́га пло́тію, вси́ блажи́мъ Тя́, ро́ди человѣ́честіи: Сло́во бо всели́ся въ Тя́ Боже́ственное, Его́же, я́ко Младе́нца, пита́ла еси́, Зижди́теля и Го́спода; тѣ́мже а́нгельскій собо́ръ и человѣ́ческій ро́дъ досто́йно сла́витъ пречи́стое Рождество́ Твое́, и мы́ вси́ согла́сно вопіе́мъ Ти́: моли́ Христа́ Бо́га согрѣше́ніемъ на́шимъ оставле́ніе дарова́ти восхваля́ющимъ Тя́.

Пѣ́снь 4.

Ирмо́съ: Всѣ́лъ еси́ на ко́ни, апо́столы Твоя́, Го́споди, и прія́лъ еси́ рука́ма Твои́ма узды́ и́хъ, и спасе́ніе бы́сть ѣжде́ніе Твое́ вѣ́рно пою́щимъ: сла́ва си́лѣ Твое́й, Го́споди.

Ходи́лъ еси́ въ путе́хъ пра́выхъ, и, та́ко неукло́нно ше́ствуя, дости́глъ еси́, блаже́нне, широты́ ра́йскія, и а́нгельскимъ лико́мъ сочета́лся еси́.

Въ пусты́ню жела́ніемъ, преподо́бне, всели́вся, подвиза́лся еси́ крѣ́пкими по́двиги, поще́ніемъ и моли́твами де́нь и но́щь ко Го́споду, научи́ ны́ вопи́ти: сла́ва си́лѣ Твое́й, Го́споди.

Хра́мъ Бо́гови боголѣ́пенъ воздви́глъ еси́ и то́й во и́мя рождества́ Предте́чи именова́лъ еси́, въ не́мже сла́вится при́сно честно́е и́мя твое́, Іа́кове преподо́бне.

Богоро́диченъ: Ра́дуйся, Влады́чице Дѣ́во, це́рквамъ еси́ красота́ и царе́мъ вѣ́рнымъ похвала́ и держа́ва, непреста́нно моли́ся, Богоро́дице, Сы́ну Своему́ сохрани́ти Импера́тора и лю́ди отъ вся́каго зла́го обстоя́нія.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Просвѣща́я у́мъ сво́й боже́ственными словесы́, тѣле́сныхъ страсте́й устрани́лся еси́ и, превы́ше бы́въ земны́хъ, соблю́лъ еси́ о́бразъ въ себѣ́ боже́ственный не омраче́нъ.

Не забу́ди, блаже́нне Іа́кове, посѣща́ти ча́дъ твои́хъ, соверша́ющихъ свяще́нную па́мять твою́, я́ко да твои́ми моли́твами изба́вимся вся́кія ну́жды и печа́ли.

Но́щь грѣхо́вная покры́ла мя́ е́сть, но озари́ мя́ покая́ніемъ, преподо́бне, да омы́ю скве́рну грѣхо́вную окая́нныя моея́ души́.

Богоро́диченъ: Всесвѣ́тлымъ озарена́ еси́ свѣ́томъ, Богора́дованная Ма́ти: Ты́ бо честнѣ́йши родила́ еси́ Христа́ всѣ́хъ Бо́га, Его́же моли́, да изба́витъ ны́ отъ вся́кихъ напа́стей.

Пѣ́снь 6.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, многоми́лостиве Христе́ Бо́же на́шъ.

Ма́слина вои́стинну Бо́жія плодови́та бы́въ труды́ твои́ми, моли́ся, Іа́кове преподо́бне, за вѣ́рно на по́мощь призыва́ющихъ тя́.

Земны́й а́нгелъ и небе́сный человѣ́къ бы́лъ еси́, преподо́бне, и учи́тель умиле́нія, ми́лованія струя́, и исто́чникъ чудесе́мъ.

Сле́зными пото́ки и тру́дными по́ты у́глія сла́дости грѣхо́вныя погаси́лъ еси́. Тѣ́мже въ чудесѣ́хъ сла́вна тя́ показа́ Госпо́дь, Іа́кове блаже́нне, и украси́ вы́шними дарова́ніи.

Богоро́диченъ: Умертви́ся сме́рть Тобо́ю и а́дово жа́ло притупи́ся, Ма́ти Чи́стая: Ты́ бо Безсме́ртнаго Влады́ку Христа́ пло́тію мíрови родила́ еси́.

Конда́къ, гла́съ 8. Подо́бенъ: Взбра́нной.

Серде́чная о́чи, досточу́дне, ко Го́споду впери́въ и тѣле́сныя стра́сти изъ ко́рене исторга́я, неболѣ́зненную жи́знь въ болѣ́знѣхъ воспрія́лъ еси́, преподо́бне, болѣ́знѣмъ же лю́тымъ дае́ши исцѣле́ніе прося́щимъ съ вѣ́рою у тебе́, тѣ́мже мо́лимъ тя́, досточу́дне, исцѣли́ на́ша болѣ́зни душе́вныя и тѣле́сныя, да зове́мъ ти́: ра́дуйся, Іа́кове богому́дре, о́тче на́шъ.

Икосъ:

Покая́нія две́ри отве́рзи ми́, всеблаже́нне, да омы́ю скве́рну окая́нныя моея́ души́ и тѣ́ла моего́ вся́ чу́вства очи́сти, да зову́ ти благода́рственная: ра́дуйся, по́стникомъ вои́стинну преди́вное удобре́ніе; ра́дуйся, исто́чниче пресла́дкій, напая́ющій вѣ́рныхъ сердца́ уче́ньми; ра́дуйся, но́щь на́шего неразу́мія отгна́вый смиренному́дріемъ; ра́дуйся, прелюби́мая весно́, израсти́вшая на́мъ нелицемѣ́рную любо́вь; ра́дуйся, прекра́сный кри́не, любвеоби́льнымъ взо́ромъ ко Го́споду влекíй; ра́дуйся, чудесы́ свои́ми мно́гихъ удивля́яй; ра́дуйся, возжелѣ́нная соверши́вый; ра́дуйся, вѣ́рнымъ по Бо́зѣ крѣ́пкая наде́ждо; ра́дуйся, се́рдцемъ свои́мъ прилѣпля́яйся ко Христу́ де́нь и но́щь; ра́дуйся, оби́тели своея́ храни́телю; ра́дуйся, па́стырю и нача́льниче слове́сныхъ ове́цъ; ра́дуйся, Іа́кове богому́дре о́тче на́шъ.

Пѣ́снь 7.

Ирмо́съ: Ангеломъ о́троки изъ огня́ спасы́й и гремя́щую пе́щь преложи́вый на ро́су, благослове́нъ еси́, Бо́же оте́цъ на́шихъ.

Ангельскимъ житіе́мъ, блаже́нне Іа́кове, пожи́лъ еси́, труды́ подвиго́въ твои́хъ умно́жилъ еси́ и процвѣ́лъ еси́, я́ко фи́никсъ, воспѣва́я: благослове́нъ еси́, Го́споди, Бо́же оте́цъ на́шихъ.

Восхваля́я тя́, о́тче Іа́кове преподо́бне, взыва́емъ ти́: моли́ Христа́ Бо́га лука́вства діа́воля изба́вити на́съ, воспѣва́ющихъ: благослове́нъ еси́, Го́споди, Бо́же оте́цъ на́шихъ.

Въ путе́хъ житія́ заблу́ждшаго и зимо́ю грѣхо́вною оляденѣ́вшаго, согрѣ́й мя́, Іа́кове преподо́бне, и научи́ вопи́ти: благослове́нъ еси́, Бо́же оте́цъ на́шихъ.

Богоро́диченъ: Прія́ла еси́ вои́стинну Боже́ственное Сло́во во чре́во Свое́ и Сіе́ па́че естества́, Пречи́стая, родила́ еси́. Его́же моли́ изба́вити отъ бѣ́дъ ра́бъ Твои́хъ, вопію́щихъ: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Отъ Отца́ пре́жде вѣ́къ Рожде́ннаго и отъ Ма́тере въ послѣ́дняя Воплоще́ннаго, свяще́нницы, благослови́те, лю́діе, превозноси́те во вся́ вѣ́ки.

Инокъ и́стиненъ бы́лъ еси́, простра́ннаго пути́ удаля́яся, широты́ ра́йскія дости́глъ еси́ и та́мо дре́ву живо́тному причаща́ешися во вѣ́ки.

До́мъ духо́вный добродѣ́тели бы́лъ еси́, и правоты́ пра́вило испра́вилъ еси́, Іа́кове пречу́дне, и бу́дущихъ бла́гъ сподо́бился, дре́ву живо́тному причаща́ешися во вѣ́ки.

Лико́мъ преподо́бныхъ сочета́лся еси́, и по́стническимъ житіе́мъ украси́лся еси́, Іа́кове преподо́бне, и ны́нѣ въ ра́йскихъ оби́телехъ дре́ву живо́тному причаща́ешися во вѣ́ки.

Богоро́диченъ: Въ лѣ́тѣхъ бы́вша, отъ Отца́ же безлѣ́тно возсія́вшаго, Богома́ти, на́мъ родила́ еси́. Его́же моли́ спасти́ пою́щія Тя́ во вѣ́ки.

Пѣ́снь 9.

Ирмо́съ: Чи́стую сла́вно почти́мъ, лю́діе, Богоро́дицу, о́гнь Божества́ пріи́мшую во чре́вѣ неопа́льно, пѣ́сньми велича́емъ.

Чи́стое и кра́сное храни́лище добродѣ́телей бы́лъ еси́, Іа́кове блаже́нне, тѣ́мже тя́ непреста́нно велича́емъ.

Отъ се́рдца болѣ́знь, отъ о́чію сле́зы, отъ души́ покая́ніе пріими́, преподо́бне, и ко Го́споду те́плѣ принеси́, я́ко да непреста́нно тя́ велича́емъ.

Всече́стне о́тче Іа́кове, сохрани́ пѣвца́ своего́ неви́димою си́лою отъ находя́щихъ бѣ́дъ и скорбе́й, изба́ви же и всѣ́хъ, почита́ющихъ свяще́нную па́мять твою́, и наста́ви на пу́ть покая́нія, я́ко да получи́мъ у Го́спода ве́лію ми́лость и тя́ непреста́нно велича́емъ.

Богоро́диченъ: Ангели и арха́нгели, проро́цы и апо́столи и ве́сь ли́къ преподо́бныхъ съ блаже́ннымъ Іа́ковомъ ко Христу́ прилѣ́жно и съ Пречи́стою Его́ Ма́терію, за ве́сь мíръ моли́теся, да ва́съ при́сно велича́емъ.

Свѣти́ленъ. Подо́бенъ: Жены́, услы́шите.

Ду́хъ Святы́й тя́, преподо́бне Іа́кове, оби́тель Себѣ́ сотвори́, и, на тебѣ́ почива́яй, наслѣ́дника тя́ Ца́рствію учини́ небе́сному и ли́ку преподо́бническому причте́, и по успе́ніи твое́мъ сла́вна тя́ показа́, преподо́бне, моли́ся о спасе́ніи ду́шъ на́шихъ. [Два́жды.]

Сла́ва, и ны́нѣ, богоро́диченъ:

Еди́нъ Чи́стый, Еди́нъ Госпо́дь, Тя́ еди́ну избра́, честнѣ́йшу всея́ тва́ри, Пренепоро́чная, отъ чи́стыхъ крове́й Твои́хъ воплоти́тися.

На хвали́техъ стихи́ры, гла́съ 4. Подо́бенъ: Зва́нный свы́ше.

Отъ вели́каго святи́теля Іо́ны благослове́ніе воспрія́,* и того́ уче́ніе положи́ въ се́рдцѣ свое́мъ,* и нра́ву того́ послѣ́довалъ еси́,* поще́ніемъ и ну́ждами утверди́ вся́* и духо́вныя ра́дости испо́лнився.* Прія́телище бы́лъ еси́ Пресвято́му Ду́ху,* и уче́ніи свои́ми всѣ́хъ учени́къ свои́хъ научи́лъ еси́* ходи́ти по и́стинному спаси́тельному пути́,* и, на высоту́ добродѣ́телей возводя́* и Христа́ непреста́нно славосло́вя,* сле́зъ твои́хъ проли́тіемъ* о́гнь грѣхо́вный угаси́лъ еси́* и Бо́гу угоди́лъ еси́,* тѣ́мже мо́лимъ тя́:* помина́й на́съ, о́тче Іа́кове,* чту́щихъ па́мять твою́,* и моли́ спасти́ся душа́мъ на́шимъ. [Два́жды.]

Пре́жде бы́вшая пусты́ня,* ны́нѣ же нарече́ся Предте́чева оби́тель,* строе́ніе по́товъ и трудо́въ твои́хъ,* въ не́йже многолѣ́тнѣ потруди́вся честны́ма твои́ма рука́ма,* пресла́вне Іа́кове,* оте́честву пресвѣ́тлый свѣти́льниче,* у́зкій пу́ть преше́лъ еси́* и широты́ ра́йскія дости́глъ еси́,* тѣ́мже вси ве́си и гра́дове Россíйстіи ублажа́ютъ тя́,* со дерзнове́ніемъ зову́ще:* имѣ́емъ тя́, о́тче Іа́кове,* те́плаго къ Бо́гу моли́твенника,* псалмы́ тя́ воспѣва́емъ* и притека́юще къ честнѣ́й ра́цѣ моще́й твои́хъ,* исцѣле́нія да́ры пріе́млемъ,* и ны́нѣ Христу́ моли́ся* спасти́ся душа́мъ на́шимъ.

Пречестна́я оби́тель,* строе́ніе трудо́въ твои́хъ,* имѣ́етъ въ себѣ́ ча́да мно́га,* па́че же всего́ сокро́вище неоскудѣва́емое —* честны́я и многоцѣле́бныя мо́щи твоя́,* преподо́бне Іа́кове,* отъ ни́хже съ вѣ́рою приходя́щіи человѣ́цы пріе́млютъ исцѣле́нія.* Тѣ́мже вси́ зове́мъ тебѣ́, я́ко предста́телю:* преподо́бне о́тче на́шъ,* бу́ди те́плый моли́твенникъ ко Го́споду* о душа́хъ на́шихъ.

Сла́ва, гла́съ 2:

Преподо́бне о́тче Іа́кове, съ ю́ныхъ лѣ́тъ Бо́гомъ храни́мъ бы́лъ еси́ отъ вся́каго лука́вства и злонра́вія, То́й бо, руководя́й тя́, я́ко Авраа́ма, до исхо́да души́ твоея́, дарова́ тебѣ́ чудеса́ мно́гая въ жи́зни се́й, та́кожде и по преставле́ніи просла́ви тя́ во мно́гія страны́, и сла́вна тя́ показа́ повсю́ду, и на небесѣ́хъ съ ли́ки преподо́бныхъ причте́ тя, и ны́нѣ свѣ́тло неизрече́ннымъ свѣ́томъ сія́еши, богому́дре Іа́кове.

И ны́нѣ, пра́здника.



НА ЛИТУРГІИ,

Блаже́нны отъ кано́на пѣ́сни 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Ева́нгеліе отъ Матѳе́я, зача́ло 43. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Слу́жба на преставле́ніе преподо́бнаго отца́ на́шего Іа́кова, игу́мена Желѣзно_Бо́ровскаго, чудотво́рца. Мѣ́сяца Ма́ія въ 5-й де́нь. — Издана́ усе́рдіемъ Архимандри́та Кѵри́лла. — М.: Въ Сѵнода́льной Тѵпогра́фіи, 1886. — Л. 2 – 16 об.

/ Къ оглавленію раздѣла /


Наверхъ / Къ титульной страницѣ

0