Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 11-й де́нь.
Свята́го священному́ченика Анти́пы, епи́скопа Перга́ма Асíйскаго.

[ВЕЧЕРЪ,]
На Го́споди воззва́хъ: стихи́ры, гла́съ 4. Подо́бенъ: Да́лъ еси́ зна́меніе.

Му́ченикъ свяще́ненъ,* и святи́тель благопрія́тенъ,* и па́стырь и́стиненъ,* сто́лпъ непревра́тенъ,* благоче́стія степе́нь,* забра́ло Це́ркве,* святи́телей добро́та,* исто́чникъ чуде́съ, Анти́по, бы́лъ еси́.* Тѣ́мже тя́ ублажа́емъ благоче́стно пѣ́сньми* и боже́ственное твое́ дне́сь соверша́емъ торжество́.

Пра́виломъ слове́съ твои́хъ* церко́вный, сла́вне,* я́ко ко́рмчій изря́денъ,* кора́бль упра́вилъ еси́,* вы́ше во́лнъ пла́вая преле́стныхъ* и всескве́рными козньми́ чужда́го не погруже́нъ;* пострада́въ же крѣ́пко* и врага́ побѣди́въ,* ко Христу́ преше́лъ еси́,* Его́же стра́сти поревнова́лъ еси́.

Мѵ́ро твоя́ мо́щи источа́ютъ всегда́,* святи́телю богодухнове́нне:* Христо́во же благоуха́ніе вои́стинну бы́лъ еси́,* пре́лести злосмра́діе низложи́въ* терпѣли́вно, я́ко страда́лецъ,* му́чениче, сопротивле́ніемъ.* Тѣ́мже тя́ мо́лимъ:* помяни́ вся́, вѣ́рою тя́ помина́ющія,* ко Го́споду дерзнове́ніе стяжа́въ.

Сла́ва, и ны́нѣ, богоро́диченъ:

Одожди́ ми, Влады́чице,* Твоея́ ми́лости бе́здну,* и опа́льшееся зно́емъ страсте́й се́рдце мое́,* я́ко ми́лостива, напо́й, Отрокови́це,* и умиле́нія ка́пли точи́ти* непреста́нно сотвори́, молю́ся,* и́миже утѣше́нія сподо́блюся, Чи́стая,* е́же получи́ти и́мутъ* и́же и́скренно пла́кавшіися.

Крестобогоро́диченъ:

Распина́ема Христа́ Человѣколю́бца ви́дящи Пречи́стая* и ре́бра ископова́ема копіе́мъ,* пла́чущи, вопія́ше:* что́ сіе́, Сы́не Мо́й?* Что́ Ти безблагода́тніи лю́діе возда́ша,* за я́же сотвори́лъ еси́ до́брая и́мъ?* и тщи́шися безча́дствовати Мя́, Вселюбе́знѣйшій.* Удивля́юся, Благоутро́бне,* Твоему́ во́льному распя́тію.

Тропа́рь, гла́съ 4:

И нра́вомъ прича́стникъ, [и престо́ломъ намѣ́стникъ апо́столомъ бы́въ, дѣя́ніе обрѣ́лъ еси́, богодухнове́нне, и видѣ́нія восхо́дъ: сего́ ра́ди, сло́во и́стины исправля́я, и вѣ́ры ра́ди пострада́лъ еси́ да́же до кро́ве, священному́чениче Анти́по, моли́ Христа́ Бо́га спасти́ся душа́мъ на́шимъ].

Или́ се́й, гла́съ то́йже:

Идольскія ле́сти упраздни́лъ еси́, Анти́по, и, діа́вольскую попра́въ си́лу, предъ богобо́рцы дерзнове́нно Христа́ исповѣ́далъ еси́. Тѣ́мже со а́нгельскими чи́ны въ вы́шнихъ водворя́яся, Влады́цѣ всѣ́хъ славосло́віе принося́, и о на́съ моле́бное благодаре́ніе предлага́еши, благода́ть цѣльбы́ да́руя. Сего́ ра́ди тя́ чти́мъ, священному́чениче Анти́по, моли́ Христа́ Бо́га, да спасе́тъ ду́ши на́ша.


[НА УТРЕНИ,]
Кано́нъ, его́же краегране́сіе: Свѣ́тлаго въ му́ченицѣхъ Анти́пу честву́ю. Творе́ніе Іо́сифово. Гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Заре́ю трисо́лнечныя благода́ти осія́емь, свѣ́тлый тво́й се́й пра́здникъ соверша́ющія озари́, страстна́го избавля́я, му́чениче Анти́по, омраче́нія.

Сло́во Бо́жіе тя́, всему́дре, свидѣ́теля и́стинна свои́хъ показа́ страсте́й, злоче́стіе потребля́ющаго и де́моновъ вся́кое лука́вство побѣжда́ющаго.

Умертви́въ плотска́я мудрова́нія мно́гими поще́ніи, свяще́нства боже́ственнаго свяще́нною украси́лся еси́ оде́ждею и безкро́вно поже́рлъ еси́ тебе́ ра́ди ме́ртва Бы́вшаго.

Богоро́диченъ: Свѣ́та Твоего́ блиста́ньми озари́, Отрокови́це Всенепоро́чная, въ нощи́ страсте́й и искуше́ній одержи́мое се́рдце мое́, Пра́вды Со́лнце всѣ́мъ неизрече́нно возсія́вшая.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Источи́лъ еси́ рѣ́ки уче́нія, вѣ́рныхъ напоя́ющія, и му́тныя во́ды многобо́жія изсуши́лъ еси́.

Крѣ́постію, блаже́нне, Христо́вою, гоня́щихъ крѣ́пость ссѣ́клъ еси́, и терпѣли́вно пострада́лъ еси́, и му́ченически вѣнча́лся еси́.

Де́мономъ служа́щія чествова́ти Бо́га и́стиннаго увѣ́рилъ еси́, пло́ть ме́ртвенную, преподо́бне, бога́тствомъ благоутро́бія поне́сшаго.

Богоро́диченъ: Избавля́ющаго человѣ́ки плѣне́нія вра́жія, Чи́стая, Изба́вителя родила́ еси́, тѣ́мже благоче́стно Тя́ сла́вимъ.

Сѣда́ленъ, гла́съ 3. Подо́бенъ: Боже́ственныя вѣ́ры.

Боже́ственными у́гльми боже́ственныя любве́ разжже́нъ, му́чениче Анти́по, безбо́жія пла́мень угаси́лъ еси́ и, въ разжже́нъ вложе́нъ бы́въ коно́бъ, къ Невече́рнему Свѣ́ту отше́лъ еси́. Отче преподо́бне, Христа́ Бо́га моли́ грѣхо́въ оставле́ніе дарова́ти на́мъ.

Сла́ва, и ны́нѣ, богоро́диченъ:

Боже́ственнаго естества́ не отлу́чься, пло́ть бы́въ во чре́вѣ Твое́мъ, но Бо́гъ вочеловѣ́чься и пребы́сть, Иже по рождествѣ́ Ма́терь Тя́ Дѣ́ву, я́ко пре́жде рождества́, сохрани́въ Всенепоро́чную, еди́нъ Госпо́дь: Того́ прилѣ́жно моли́ дарова́ти на́мъ ве́лію ми́лость.

Крестобогоро́диченъ:

Нескве́рная Агница Сло́ва, нетлѣ́нная Дѣ́ва Ма́ти, на Крестѣ́ зря́щи повѣ́шена изъ Нея́ безъ болѣ́зни прозя́бшаго, ма́терски подо́бно рыда́ющи, вопія́ше: увы́ Мнѣ́, Ча́до Мое́! Ка́ко стра́ждеши во́лею, хотя́ изба́вити отъ страсте́й безче́стія человѣ́ка?

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Не поколеба́ столпа́ твоего́ се́рдца пребеззако́ннующихъ противле́ніе, му́чениче страстоте́рпче; тѣ́мже, распаля́емь ре́вностію вѣ́ры, яви́лся еси́ огня́ си́льнѣйши.

Дрема́ніемъ нече́стія одержи́мыя возбужда́я, прехва́льне, уче́ніи Свята́го Ду́ха, къ ра́зуму воздви́глъ еси́ и́стиннаго позна́нія.

Смири́лъ еси́ вы́сость де́монскую, къ Бо́гу возвыше́ньми, Анти́по, прилѣжа́, и восхожде́ньми боже́ственными обожа́емь, и богови́денъ познава́емь.

Богоро́диченъ: По рождествѣ́, я́ко пре́жде рождества́, сохрани́лася еси́, Дѣ́во Ма́ти нетлѣ́нная, Зижди́теля бо всѣ́хъ родила́ еси́, изъ Тебе́ человѣ́ческое тѣ́ло во́лею поне́сшаго.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Возше́лъ еси́ на го́ру добродѣ́телей, блаже́нне, и въ ра́зумъ вше́лъ еси́ кра́йнѣйшаго мра́ка, и Бо́гу бесѣ́довалъ еси́.

Глаго́лъ твои́хъ плени́цами изъ глубины́ безбо́жія улови́лъ еси́, святи́телю, заблу́ждшія человѣ́ки и благода́тію спа́слъ еси́.

Тѣ́ло огню́ на снѣ́дь преда́лъ еси́, свы́ше, святи́телю, отъ Бо́га боже́ственную ро́су бога́тно пріе́мля.

Богоро́диченъ: Сы́й въ зра́цѣ Бо́жіи Пребоже́ственный всели́ся во чре́во Твое́, зра́къ мо́й понесы́й Госпо́дь, Всенепоро́чная.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Распе́нъ воздержа́ніемъ удеса́, блаже́нне, въ поще́ніи подвиза́вся, му́ченическими вѣнча́лся еси́ по́двиги, я́же подъя́лъ еси́ ума́, Анти́по, тве́рдостію.

Стоя́лъ еси́ предъ суди́щемъ, проповѣ́дуя воплоще́ніе тебе́ ра́ди Истощи́вшагося, и Пила́тову суди́щу Предста́вшаго, страстоте́рпче, и Кресто́мъ врага́ умори́вшаго.

Боля́щимъ врачевство́ е́сть це́рковь, въ не́йже, блаже́нне му́чениче, терпѣли́вое твое́ лежи́тъ тѣ́ло, боже́ственную зарю́ дарова́ній испуща́етъ Ду́ха.

Богоро́диченъ: Святы́й Іису́съ, всели́выйся во утро́бу Твою́, Иже во святы́хъ, Дѣ́во, почива́яй и прославля́яй вѣ́рою и́стинною Сего́, Отрокови́це, сла́вящія.

Конда́къ, гла́съ 4. Подо́бенъ: Вознесы́йся.

Апо́столовъ сопресто́льникъ и святи́телей украше́ніе бы́лъ еси́, блаже́нне, му́ченически просла́вився, возсія́лъ еси́, я́коже со́лнце, всѣ́хъ просвѣща́я, Анти́по свяще́нне, разруши́лъ еси́ безбо́жія но́щь глубо́кую. Сего́ ра́ди тя́ почита́емъ, я́ко боже́ственнаго су́ща священному́ченика и цѣле́бъ пода́теля.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Юныя три́ о́троки изобразу́я, Анти́по му́дре, я́коже посреди́ пе́щи, ста́лъ еси́ лю́то разжже́ннаго мѣ́днаго сосу́да, взыва́я: благослове́нъ еси́ въ хра́мѣ сла́вы Твоея́, Го́споди.

Да Свѣ́та непристу́пнаго яви́шися прича́стникъ, тму́ лука́выхъ духо́въ, Бо́гомъ просвѣще́нъ, мимоте́клъ еси́, — благослове́нъ еси́, Бо́же мо́й, — зовы́й, — Го́споди.

Стра́сти разли́чны рукодѣ́йствомъ, Анти́по, ду́ха утоля́еши человѣ́ковъ, му́чениче, Христо́вымъ подо́бяся страсте́мъ, — благослове́нъ еси́, Бо́же мо́й, — зовы́й, — Го́споди.

Богоро́диченъ: Отъ крове́й, Отрокови́це, дѣви́ческихъ Твои́хъ вои́стинну вопло́щся Сло́во, Отцу́ Собезнача́льное, на́ше сокруше́ніе исправля́я. Благослове́на Ты́ въ жена́хъ еси́, Пренепоро́чная Влады́чице.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Ны́нѣ не въ зерца́лѣхъ зри́ши, ни въ гада́ніихъ до́брыхъ послѣ́днее, лице́мъ же па́че къ лицу́, преше́дшимъ сѣ́немъ, вопія́ ра́достно тя́ Просла́вльшему: благослови́те, вся́ дѣла́ Госпо́дня, Го́спода.

Тя́, Началопа́стыря Христа́ боже́ственное овча́ до́брѣ упа́сшаго Того́ ста́да, прему́дре, я́ко а́гнца, беззако́нніи всесожига́ютъ огне́мъ, Анти́по, пою́ща: благослови́те, вся́ дѣла́ Госпо́дня, Го́спода.

На ка́мени Боже́ственныхъ за́повѣдей се́рдца твоего́ утверди́лъ еси́ стопы́, лю́тыхъ му́къ вѣ́тры, ласка́тельными же бу́рями не поколеба́лся еси́, пѣснопоя́, Анти́по прему́дре: благослови́те, вся́ дѣла́ Госпо́дня, Го́спода.

Богоро́диченъ: Яко Ма́ти всѣ́хъ Творца́, я́ко Боже́ственный хра́мъ Вседержи́теля, я́ко земля́ неора́нная, недѣ́ланный кла́съ прозя́бшая, Дѣ́во Ма́ти, вѣ́рны вопію́щія сохрани́: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Іера́ршески, святи́телю, свяще́нное сконча́лъ еси́ тече́ніе, свяще́ннѣйшую жи́знь твою́ свяще́ннѣйше соверши́въ, ра́дуяся, поте́клъ еси́, къ тебѣ́ Люби́мому, Анти́по му́чениче свяще́ннѣйше.

Яко добродѣ́тельными ви́ды удобре́нъ бы́въ, сла́вою муче́нія, всеблаже́нне, освяти́ся и преше́лъ еси́ къ кра́сному Го́споду, прича́стіемъ обожа́емь, богопрія́тне.

Ты́ Госпо́днею любо́вію разжже́гся, му́чениче Анти́по, въ разжже́нъ усе́рдно вше́лъ еси́ сосу́дъ, всесожига́емь, и Бо́гу прія́тна, о́тче, же́ртва прине́слся еси́.

Свяще́нныхъ твои́хъ моще́й свяще́нная, блаже́нне, ра́ка мѵ́ро исцѣле́ній то́читъ, злосмра́дныя стра́сти отгоня́щи и твою́ сла́вящія па́мять я́вѣ благоуха́ющи.

Богоро́диченъ: Нося́щая Христа́ на руку́, манове́ніемъ нося́щаго вся́, Сего́, я́ко Бо́га и Влады́ку, Чи́стая, моли́ уще́дрити ны́, Богоро́дицу Чи́стую исповѣ́дающія Тя́ всегда́, Непоро́чная.

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 42 об. – 46.

/ Къ оглавленію раздѣла /


Наверхъ / Къ титульной страницѣ

0