Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 20 октября 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 10-й де́нь.
Святы́хъ му́ченикъ Тере́нтія, Помпиíя и и́же съ ни́ми.

[ВЕЧЕРЪ,]
Стихи́ры, гла́съ 4. Подо́бенъ: Яко до́бля.

Многоимени́тно сочета́ніе* многоразли́чныя му́ки* страда́лецъ претерпѣ́ тве́рдо* и ко еди́ному Бо́гу на́шему* пре́йде, ра́дуяся,* со тма́ми свяще́нныхъ безпло́тныхъ си́лъ весели́тся,* я́ко змíевы мно́гія ты́сящи побѣди́ша* противле́ніемъ тве́рдымъ* и Ду́ха благода́тію.

Пресла́вный Макси́мъ* и вели́кій Тере́нтій,* Помпиíй прему́дрый,* Мака́рій и Африка́нъ боже́ственный* да почту́тся пѣ́сньми,* съ ни́ми и про́чее му́ченикъ сосло́віе,* и́же кро́вію свое́ю вы́шнее Ца́рство купи́ша,* сла́вы непрее́мныя исполня́емы.

Ни гла́дъ, ниже́ бѣда́,* ни живо́тъ, ниже́ сме́рть,* любве́, сла́вніи, Сотво́ршаго* ва́съ разлучи́ти возмого́ша.* Тѣ́мже наслѣ́довасте Ца́рство небе́сное,* и сла́дость неизживу́щую,* и не иму́щее конца́ весе́ліе,* но испроси́те и на́мъ* благопода́тно очище́ніе и ми́лость.

Сла́ва, и ны́нѣ, богоро́диченъ:

Яже Бо́га невмѣсти́маго* во чре́вѣ Твое́мъ вмѣсти́вшая,* человѣколю́бно Человѣ́ка бы́вша,* и на́ше смѣше́ніе изъ Тебе́ пріи́мша,* и обожи́вша я́вѣ,* не пре́зри мене́, Всечи́стая, ны́нѣ скорбя́ща,* но уще́дри ско́ро* и разли́чныя вражды́ же* и вре́да лука́ваго свободи́.

Крестобогоро́диченъ:

Агнца, и Па́стыря, Тя́* на дре́вѣ я́ко ви́дѣ* Агница ро́ждшая, рыда́ше* и ма́терски Тебѣ́ вѣща́ше:* Сы́не возжелѣ́нне,* ка́ко на дре́вѣ Кре́стнѣмъ повѣ́шенъ еси́, Долготерпѣли́ве?* Ка́ко ру́цѣ и но́зѣ Твои́, Сло́ве,* пригвозди́шася отъ беззако́нныхъ,* и кро́вь Твою́ излія́лъ еси́, Влады́ко?


[НА УТРЕНИ,]
Кано́нъ, его́же краегране́сіе: Мно́жество мя́ спаси́ добропобѣ́дныхъ му́чениковъ. Творе́ніе Іо́сифа. Гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Мно́жество страда́лецъ сла́вныхъ, Христа́ умоли́те, мно́жество иму́щаго щедро́тъ, мно́жества ума́лити зо́лъ мои́хъ, я́ко да восхваля́ю ва́ше торжество́.

Служа́ще живо́му и и́стинному Бо́гу, страстоно́сцы, безду́шнымъ че́сти бого́мъ ника́коже принесо́сте и жива́я Жизнода́вцу же́ртва принесо́стеся.

Проповѣ́даша безбо́жніи повелѣ́ніе богоме́рзкое, и посреди́ суди́ща четы́редесять страда́лецъ проповѣ́даша Сло́во воплоще́нное, безслове́сія мíръ изба́вльшее.

Богоро́диченъ: Пою́ Тя́, Дѣ́во, я́ко Бо́га, Всепѣ́тая, воплоти́ла еси́ еди́на отъ Твои́хъ честны́хъ крове́й, Пресвята́я, и па́че сло́ва стра́шно породила́ еси́.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Усты́ проповѣ́даша свяще́нными свои́ми Го́спода страда́льцы предъ мучи́тели, стра́ждуще терпѣли́вно.

На у́ды ссѣщи́ся за Христа́ я́вѣ преда́шася страда́льцы, стра́стію разжже́ніемъ Того́ возлюби́вше.

Разрѣши́ша соу́зъ суеты́ свя́занніи за Христа́, и́же съ боже́ственнымъ бы́вше Тере́нтіемъ.

Богоро́диченъ: Спаси́ мя, ро́ждшая Преблага́го Го́спода Ма́ти Чи́стая, утиши́ души́ моея́ многомяте́жную бу́рю.

Сѣда́ленъ, гла́съ 4. Подо́бенъ: Вознесы́йся.

Четы́редесять Христо́вы страстоте́рпцы, си́лою Христо́вою вооруже́ни, бѣсо́вскія полки́ низложи́вше вѣ́рою, уме́рше же, къ безсме́ртному концу́, ра́дующеся, преидо́ша и на́мъ испроша́ютъ прегрѣше́ній оставле́ніе, при́сно творя́щимъ тѣ́хъ торжество́.

Сла́ва, и ны́нѣ, богоро́диченъ:

Грѣхолюби́въ сы́й, молю́ Тя, Безгрѣ́шнаго Бо́га ро́ждшую, взе́млющаго грѣхи́ мíра, Пречи́стая, многогрѣ́шную ду́шу мою́ уще́дрити и грѣхи́ моя́ мно́гія очи́стити: грѣ́шнымъ бо Ты́ еси́ очище́ніе, и спасе́ніе вѣ́рныхъ, и заступле́ніе.

Крестобогоро́диченъ:

Иже отъ Безнача́льнаго Отца́ рожде́ннаго напослѣ́докъ Тя́ пло́тію ро́ждшая, на Крестѣ́ ви́сяща, зря́щи, Христе́, — увы́ Мнѣ́, любе́знѣйшій Іису́се, — вопія́ше, — ка́ко сла́вимый я́ко Бо́гъ отъ а́нгелъ, отъ беззако́нныхъ ны́нѣ человѣ́къ, Сы́не, хотя́, распина́ешися? Пою́ Тя, Долготерпѣли́ве.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Украси́стеся, му́ченицы, вдая́ніемъ болѣ́зней, сія́юще па́че сапфи́ра и зла́та тве́рдыхъ подвиго́въ показа́ньми.

Живоно́сное дѣ́йство отъ Живонача́льныя Тро́ицы пріе́мше, вся́ку болѣ́знь, вся́ку ме́ртвость ду́шъ и тѣле́съ отго́ните.

Не отве́ржемся Го́спода и де́мономъ безу́мнымъ не пожре́мъ, — богому́дріи вопія́ху, истязу́еми болѣ́зньми и му́ками.

Богоро́диченъ: Тя́, Всенепоро́чная Влады́чице, напа́стьми обстои́мь, на по́мощь призыва́ю: ускори́ и спаси́ мя, Яже Спа́са Сло́ва ро́ждшая.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси́ Бо́гъ на́шъ, ра́звѣ Тебе́, ино́го не вѣ́мы.

Низложи́сте пре́лести тве́рдость, страстоте́рпцы, растерза́ньми терпѣ́нія, всехва́льніи.

Крове́й тече́ньми изсуши́вше пре́лести глубину́, блаже́нніи, вся́ку ду́шу напои́сте.

Па́жить многоцвѣ́тна показа́стеся, благово́ніе Свята́го Ду́ха, боже́ственніи, испуща́юще, му́ченицы.

Богоро́диченъ: Избавля́я, яви́ся, Пречи́стая, Сы́нъ Тво́й, ро́дъ человѣ́ческій, изъ Тебе́ ро́ждься Человѣколю́бецъ.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Крѣ́постію Твое́ю, Іису́се, утвержде́ни, низложи́ша вра́жію си́лу и си́льни яви́шася вои́стинну, не́мощію плотско́ю бра́вшеся и пове́ргше крѣ́пкаго, честнíи и добропобѣ́дніи му́ченицы.

Побѣди́въ многообра́знаго змíя, и сего́ нога́ми твои́ми сокруши́лъ еси́ я́ко вои́стинну главу́, побѣдоно́сенъ на ве́рхъ тво́й вѣне́цъ прія́лъ еси́, Тере́нтіе, му́чениче Христо́въ, святы́хъ а́нгелъ соприча́стниче.

Цѣльбы́ ра́ка му́ченикъ источа́етъ, и стра́сти очища́етъ, и ду́шъ омыва́етъ скве́рну, и де́моновъ погружа́етъ полки́, всѣ́хъ же благочести́выхъ сердца́ напая́етъ благода́тію.

Богоро́диченъ: Присѣ́нну прозря́ще Тя́ го́ру проро́къ Авваку́мъ, Богоро́дице, изъ нея́же Бо́гъ па́че сло́ва про́йде, воплоща́емь, и мíръ спасе́, бу́рею лю́таго грѣха́ тя́жко одержи́мый.

Конда́къ, гла́съ 2. Подо́бенъ: Въ моли́твахъ.

Му́ченическая честна́я па́мять пріи́де дне́сь, веселя́щи вся́ческая, Тере́нтія прему́драго и дружи́ны его́. Те́плѣ у́бо стеце́мся, да пріи́мемъ исцѣле́нія, сíи бо благода́ть отъ Бо́га прія́ша Ду́ха Свята́го исцѣля́ти неду́ги ду́шъ на́шихъ.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Уши, благопослушли́вы къ боже́ственному исполне́нію, боже́ственная повелѣ́нія стяжа́вше, му́дріи, поя́сте преусе́рдно: благослове́нъ еси́, Го́споди Бо́же, во вѣ́ки.

Зако́ны боже́ственныя, страстоте́рпцы, противоположи́сте повелѣ́ніемъ беззако́нныхъ, веля́щихъ Христа́ отврещи́ся, Ему́же вопіе́мъ: благослове́нъ еси́, Го́споди Бо́же, во вѣ́ки.

Удеса́ ка́знемъ отда́вше, отверго́стеся тѣ́ла любве́ ра́ди Явльшагося на земли́ и пло́ть взе́мша, Ему́же пѣснопое́те, му́ченицы: Бо́же, благослове́нъ еси́.

Богоро́диченъ: Истлѣ́вшія дре́вле родонача́льники преступле́ніемъ безмѣ́стнаго согрѣше́нія, во утро́бѣ Христа́ неизрече́нно заче́нши, исправля́еши, Пренепоро́чная, Плодо́мъ чре́ва Твоего́.

Пѣ́снь 8.

Ирмо́съ: Седмери́цею пе́щь халде́йскій мучи́тель, Богочести́вымъ неи́стовно разжже́; си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

На суди́щи мучи́тельстѣмъ, богому́дрый Тере́нтій и Африка́нъ, Макси́мъ же и Помпиíй, Алекса́ндръ, и Зифо́нъ, и сла́вный Ѳео́доръ, вку́пѣ трегу́бицею спострада́вшая десяти́ца и трегу́бица еди́ницы, Спа́са всѣ́хъ Христа́ исповѣ́давше, до́блественно пострада́ша.

За Христа́ му́чими, и волу́ями жи́лами біе́ми, и неми́лостивно страда́льцы стру́жеми, трезу́бцы срѣ́чеми, и звѣре́мъ поверга́еми, и разжже́нными рожны́ въ ре́бра опаля́еми, вопія́ху: свяще́нницы, благослови́те, лю́діе, превозноси́те Его́ во вѣ́ки.

Глаго́лъ жи́зни нося́ще, добропобѣ́дніи му́ченицы умерщвле́нныя въ пре́лести спасо́ша, враги́ умори́ша и, Христо́ву сме́рть и свѣтоза́рныя изобража́юще стра́сти, му́ками многообра́зными блаже́нную кончи́ну прія́ша, пою́ще Его́ во вся́ вѣ́ки.

Богоро́диченъ: Умерщвле́нную оживи́, па́дшую возста́ви, уя́звенную ду́шу мою́ исцѣли́ копіе́мъ, Всенепоро́чная, пробо́дшимъ Боже́ственная ре́бра изъ утро́бы Твоея́ вопло́щшагося Спа́са, Его́же о́троцы благословя́тъ, свяще́нницы пою́тъ, лю́діе превозно́сятъ во вся́ вѣ́ки.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Цѣле́ніе то́читъ ра́ка му́ченикъ, отъ исто́чника Боже́ственнаго Ду́ха напая́ема при́сно. Преусе́рдно, пріиди́те, почерпе́мъ, тѣ́ло, се́рдце и ду́шу освяща́юще и Спа́са Христа́ велича́юще вѣ́рно, мучениколю́бцы.

Яко цвѣ́ти боже́ственнаго села́, я́коже шипцы́ та́йніи, процвѣто́сте и благово́нія честна́го Це́рковь напо́лнисте, пре́есть злосмра́дную вра́жію дале́че отгна́вше Боже́ственною благода́тію, му́ченицы Христо́вы четы́редесяте.

Дне́сь Макси́ма, вѣ́рніи, и Алекса́ндра вку́пѣ, и Ѳео́дора, Зифо́на и Помпиíя, Африка́на же и Тере́нтія съ про́чими страда́льцы вѣ́рно восхва́лимъ и ублажи́мъ, воспѣва́юще тѣ́хъ по́двиги.

Земля́ у́бо кро́вь ва́шу и тѣлеса́ пострада́вшая въ себе́ прія́тъ, не́бо же — боже́ственныя ду́хи, а́нгельская во́инства, че́стно собра́вшеся въ побѣ́дѣ, му́дріи, и Христо́съ я́ко побѣди́тели вѣнча́.

Богоро́диченъ: Просвѣти́, две́ре свѣ́та, ду́шу мою́, лю́тыми помраче́нную преступле́ньми, омраче́нную и бѣ́дствующую, и дне́ прича́стника Боже́ственнаго покажи́, я́ко да сла́влю Тя́, Предста́тельницу вѣ́рныхъ непосты́дную.

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 39 об. – 42 об.

/ Къ оглавленію раздѣла /


Наверхъ / Къ титульной страницѣ

0