Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 28 iюня 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 9-й де́нь.
Свята́го му́ченика Евпси́хія.

[ВЕЧЕРЪ,]
Стихи́ры, гла́съ 8. Подо́бенъ: Му́ченицы Госпо́дни.

Гребеньми́ стру́жемь да́же до вну́треннихъ твои́хъ,* до́блій му́чениче, пребы́лъ еси́ непрекло́ненъ,* имѣ́я о́ко у́мное къ Бо́гу,* укрѣпля́ющему тя́, Евпси́хіе,* и беззако́ннующія посрамля́ющему,* Его́же моли́ спасти́ся* вѣ́рою твою́ чту́щимъ па́мять дне́сь.

Язвою меча́ усѣче́ся* боже́ственная глава́ твоя́, до́блій му́чениче,* и вмѣ́сто кро́ве млеко́ и во́ду источа́еши, чу́дно,* привле́клъ еси́ къ позна́нію неразу́мныя,* сла́ву неизрече́нную пріе́мъ,* и боже́ственными хода́тайствы* всѣ́мъ подая́ ве́лію ми́лость.

Благоду́шно Евпси́хій* страда́нія сконча́ и по́двиги,* и побѣжда́я безу́мныя терпѣ́ніемъ,* и удивля́я невѣ́рныя* болѣ́зней нестерпи́мыхъ наведе́ньми,* тѣ́мже по кончи́нѣ ублажа́ется.* Того́ моли́твами, Го́споди,* всѣ́мъ пода́ждь ве́лію ми́лость.

Сла́ва, и ны́нѣ, богоро́диченъ:

Помышле́нія нечи́ста, и устна́ льсти́ва,* дѣла́ же моя́ вся́ оскверне́на,* и что́ сотворю́?* Ка́ко усря́щу Судію́?* Влады́чице Дѣ́во, моли́ Сы́на Твоего́,* и Зижди́теля, и Го́спода,* я́ко да въ покая́ніи пріи́метъ ду́хъ мо́й,* я́ко еди́нъ Благоутро́бенъ.

Крестобогоро́диченъ:

Не терплю́, Ча́до, ви́дящи Тя́,* на дре́вѣ усну́вша,* бо́дрость всѣ́мъ подаю́щаго,* я́ко да и́же дре́вле преступле́нія плодо́мъ,* сно́мъ поги́бельнымъ усну́вшимъ* боже́ственную и спаси́тельную бо́дрость пода́си, —* Дѣ́ва глаго́лаше, пла́чущися, Юже велича́емъ.


[НА УТРЕНИ,]
Кано́нъ, его́же краегране́сіе: Евпси́хія благоду́шно пою́ болѣ́зни. Творе́ніе Іо́сифово. Гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Страда́нія благоду́шно, блаже́нне, твоя́, Евпси́хіе му́чениче, поя́, молю́ тя́: ко Го́споду имѣ́я дерзнове́ніе, ду́шу мою́ страсте́й мучи́тельства исхити́.

Умъ тво́й, манове́ніемъ е́же къ Бо́гу, презрѣ́ вся́ житія́ кра́сная, блаже́нне, и ве́сь красе́нъ яви́ся, надъ страстьми́ ца́рствовавъ Евпси́хіе.

Бы́сть вои́стинну терпѣли́въ, егда́ му́ками искуша́шеся и болѣ́зньми, вся́ удивля́я безбо́жныя, и страда́лецъ и́стиненъ познава́емь.

Богоро́диченъ: Пло́ти подо́біемъ роди́вся изъ Тебе́, Влады́ка обнови́ на́ше обветша́вшее, Отрокови́це, естество́ и ме́ртвыя небе́сны содѣ́ла.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Разу́мна су́ща повѣ́даютъ безу́мніи тебе́, злочести́вому кня́зю, безу́мно де́мономъ служа́щему.

На высоту́ муче́нія твоего́ возне́сшу ти ся, а́нгелъ я́влься, тебе́ дерзнове́нна устроя́етъ, страстоте́рпче Евпси́хіе.

Поя́, пребы́лъ еси́ въ темни́цѣ, Бо́га и Го́спода исповѣ́дая, храни́тель же Сего́ повелѣ́ніемъ показу́яся.

Богоро́диченъ: Пѣ́ніе благода́рственно страда́льческій ли́къ пое́тъ Тебѣ́, Отрокови́це Чи́стая, Твои́ми хода́тайствы побѣдоно́сецъ бы́въ.

Сѣда́ленъ, гла́съ 1. Подо́бенъ: Гро́бъ Тво́й.

Благоду́шно до́брый соверши́въ по́двигъ, побѣди́лъ еси́ врага́ супоста́та, му́чениче, по́чести и чудеса́ отъ Бо́га пріе́мъ. Тѣ́мже вся́ вѣ́рныхъ Це́рковь ублажа́етъ тя́, въ настоя́щій де́нь богохва́льно почита́ющи.

Сла́ва, и ны́нѣ, богоро́диченъ:

Наста́ви ны́ на пу́ть покая́нія, укло́ньшіяся при́сно къ безпу́тіемъ зо́лъ и Преблага́го прогнѣ́вавшія Го́спода, Неискусобра́чная Благослове́нная Марíе, прибѣ́жище отча́янныхъ человѣ́ковъ, Бо́жіе жили́ще.

Крестобогоро́диченъ:

Зря́щи Тя́, Христе́, Всенепоро́чная Ма́ти, ме́ртва на Крестѣ́ просте́рта, вопія́ше: Сы́не Мо́й, Собезнача́льне Отцу́ и Ду́ху, что́ неизрече́нное Твое́ сіе́ смотре́ніе, и́мже спа́слъ еси́ пречи́стыхъ ру́къ Твои́хъ, Ще́дре, созда́ніе?

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Ра́дуяся, му́чениче, разда́лъ еси́ вся́ имѣ́нія ни́щимъ, муче́нія бога́тство некра́домо и ра́дость нестарѣ́емую противостяжа́въ.

Свяще́нно просвѣща́емь, тму́ несвяще́нныхъ ты́ обличи́лъ еси́, ну́дити искуша́ющихъ тя́, отвести́ ле́стію злоде́монскою.

Иже пре́лести прилѣжа́щіи тебѣ́, неле́стными нра́вы украше́нному, дивля́хуся, источа́ющу живото́чныя словеса́, досточу́дне.

Богоро́диченъ: Превы́шши си́лъ небе́сныхъ Ты́ су́щи, плотски́хъ страсте́й вы́шшій у́мъ мо́й, Дѣ́во, покажи́.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Терпѣ́лъ еси́ плотскíя я́звы терпѣли́вно, обѣ́шенъ бы́въ, блаже́нне Евпси́хіе, пріи́скренно Влады́цѣ всея́ тва́ри.

Пое́ши Христу́, по ре́бромъ, му́чениче, стру́жемь и ко́жи одира́емь, му́жественнымъ по́мысломъ терпѣли́внѣйшій.

Пою́щу Бо́гу, явля́ется тебѣ́ а́нгелъ, къ подвиго́мъ обуча́я тя́, я́же, о Го́сподѣ возмога́емь, соверши́лъ еси́.

Богоро́диченъ: О и́же на Тя́ наде́жды всѣ́хъ, Влады́чице, возложи́вшихъ при́сно моли́ся, я́ко да бу́дущего осужде́нія изба́вимся.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Обурева́етъ у́бо муче́ній тягота́, не мо́жетъ же погрузи́ти тя́, му́чениче: Христа́ бо и Бо́га Помо́щника имѣ́лъ еси́ и Ко́рмчія, направля́юща тя́ ко приста́нищу ти́хому Своего́ Ца́рствія, Евпси́хіе.

Красно́ твое́ воста́ніе, му́чениче, душе́вное сопроти́внымъ показу́я, яви́лся еси́ тѣ́мъ стра́шенъ, удивля́я терпѣ́ніемъ о́нѣхъ зломы́сліе, и прія́тъ отъ Христа́ подвиго́въ побѣ́ды возме́здіе.

Безъ пра́вды пролія́нною кро́вію погрузи́лъ еси́ ве́сь де́монскій по́лкъ и злочести́выхъ мно́жество истопе́; вѣ́рныхъ же напои́ся собо́ръ, Евпси́хіе, бога́тно, святы́хъ му́ченикъ украше́ніе.

Богоро́диченъ: Испра́ви спа́дша мя́ всего́, я́ко страсте́мъ отве́рзшаго две́рь, и Твои́мъ благи́мъ хода́тайствомъ къ покая́нія вхо́домъ введи́, и спаси́ мя, всѣ́хъ Спа́са ро́ждшая и Го́спода.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Собо́ромъ му́чениковъ причи́слился еси́ и лико́мъ боже́ственныхъ безпло́тныхъ, отъ безслове́сія страсте́й тѣ́ло удержа́въ, хра́бровалъ еси́ изря́дно, страда́льче Христо́въ треблаже́нне.

О, до́брыя твоея́ ку́пли! Го́рстію бо кро́ве измѣни́лъ еси́ вы́шнее Ца́рство, му́дре, въ не́мже и воспѣва́еши: благослове́нъ еси́, Го́споди Бо́же, во вѣ́ки.

Па́даеши, уязви́вся мече́мъ, му́чениче, и безъ мѣ́ры хва́лящагося веліа́ра спопира́еши и я́звами ссѣка́еши неисцѣ́льно, твоему́ крѣ́пкому уму́ злообра́зно прирази́вшася.

Богоро́диченъ: Го́ру Тя́ проро́къ Даніи́лъ Боже́ственнымъ Ду́хомъ нарече́, Дѣ́во, изъ нея́же ка́мень — Христо́съ — безъ руку́ отсѣче́ся и сокруше́ніе содѣ́ла истука́нныхъ пре́лести.

Пѣ́снь 8.

Ирмо́съ: Побѣди́тели мучи́теля и пла́мене благода́тію Твое́ю бы́вше, за́повѣдемъ Твои́мъ зѣло́ прилежа́ще, о́троцы вопія́ху: благослови́те, вся́ дѣла́ Госпо́дня, Го́спода.

Побѣди́тель мучи́телей и духо́въ бы́лъ еси́ нечи́стыхъ, вѣ́рныхъ же человѣ́ковъ, страда́льче Евпси́хіе, сла́ва и похвала́, тя́ восхваля́ющихъ свяще́нными пѣ́сньми и превознося́щихъ Христа́ во вся́ вѣ́ки.

Кесарíйстіи свяще́нніи воспѣва́ютъ тя́ лю́діе, преблаже́нне: въ то́мъ бо, му́чениче, лежа́, тѣ́ло твое́ источа́етъ исцѣле́ній струи́, стра́сти потопля́ющія и вѣ́рныхъ сердца́ ороша́ющія боже́ственно.

Вше́дъ му́жески въ подвиго́въ суди́ще, му́чениче, стро́ганъ бы́лъ еси́ да́же до члено́въ и до самаго́ вну́тренняго строе́нія, но яви́лся еси́ ве́сь непрекло́ненъ, непоколеби́мь, тѣ́мъ вѣнцы́ прія́лъ еси́ побѣ́ды.

Богоро́диченъ: Ми́лостивая Дѣ́во, Яже ми́лостиваго Сло́ва ро́ждши, немилосе́рдаго мя́ ту́не уще́дри, отча́яннаго прегрѣше́ньми безмѣ́рными и не обраща́ющася, но въ лѣ́ности житіе́ ижди́вша.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

На дре́во воздви́женъ бы́лъ еси́, стра́сть вообража́я Безстра́стнаго и стра́сти ума́лившаго благочести́выхъ за милосе́рдіе, му́чениче Евпси́хіе.

Ви́дѣно бы́сть чу́до ве́ліе въ твое́й кончи́нѣ: вмѣ́сто бо кро́ве млеко́ съ водо́ю главѣ́ твое́й, отсѣ́ченѣ бы́вшей, му́чениче, истече́.

Твои́ми удесы́, всеблаже́нне, Препросла́вленный еди́нъ Бо́гъ просла́вися въ прославле́ніи всесвяты́я твоея́ па́мяти, я́коже проре́клъ еси́.

Дне́сь весе́ліе въ твое́й боже́ственнѣй па́мяти Це́рковь познава́етъ, Евпси́хіе, въ ню́же пою́щія тя́ вся́ спаса́й моли́твами твои́ми.

Богоро́диченъ: Свѣ́томъ мя́ покая́нія озари́, Дѣ́во, грѣха́ но́щію омраче́ннаго и уны́нія мгло́ю спокрове́ннаго.

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 36 об. – 39 об.

/ Къ оглавленію раздѣла /


Наверхъ / Къ титульной страницѣ

0