Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 27 мая 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 8-й де́нь.
Святы́хъ апо́столъ Иродіо́на, Ага́ва, Асинкри́та, Ру́фа, Фле́гонта и Ерма, и и́же съ ни́ми.

[ВЕЧЕРЪ,]
Стихи́ры, гла́съ 4. Подо́бенъ: Яко до́бля.

Орли́ я́ко крила́ти,* всю́ зе́млю претеко́сте,* честна́я уче́нія разсѣва́юще,* и пле́велы истерза́юще ле́сти благода́тію,* и многокла́сенъ пло́дъ дѣ́лающе, всехва́льніи,* его́же держа́тъ мы́сленныя жи́тницы во вѣ́ки,* Дѣ́лателю безсме́ртному бога́тно соблюда́емь.

Иродіо́на, Ага́ва и Асинкри́та,* Ру́фа же и боже́ственнаго Фле́гонта ублажи́мъ,* Лозы́ су́ще плодови́тыя ро́зги,* иска́пающа на́мъ сла́дость спаси́тельную,* веселя́щу жа́ждущая сердца́* вѣ́рою и́стинною* боже́ственное си́хъ соверша́ющихъ торжество́.

Небеса́ бы́вше, высока́ мы́слію,* сла́ву возвѣща́юще Бо́га на́шего,* вопло́щшагося во́лею, богови́дцы апо́столи,* наста́вницы благочести́выхъ,* це́рквей основа́нія,* столпи́ непоколеби́міи,* благоче́стія приста́нища,* неизглаго́ланныхъ та́инъ служи́теле,* свѣтоводи́теле ду́шъ на́шихъ.

Сла́ва, и ны́нѣ, богоро́диченъ:

Яже Бо́га Невмѣсти́маго* во чре́вѣ Твое́мъ вмѣсти́вшая,* человѣколю́бно Человѣ́ка бы́вша,* и на́ше смѣше́ніе изъ Тебе́ пріи́мша,* и обожи́вша я́вѣ,* не пре́зри мене́, Всечи́стая, ны́нѣ скорбя́ща,* но уще́дри ско́ро* и разли́чныя вражды́ же* и вре́да лука́ваго свободи́.

Крестобогоро́диченъ:

На Крестѣ́ Тя я́ко узрѣ́* пригвожде́нна, Го́споди,* Агница и Ма́ти Твоя́ дивля́шеся* и что́ видѣ́ніе сіе́, — взыва́ше, —* Сы́не вождѣле́нне?* Сія́ Тебѣ́ невѣ́рный собо́ръ воздаде́ беззако́нный,* и́же мно́гихъ Твои́хъ чуде́съ наслади́выйся.* Но сла́ва неизглаго́ланному* соше́ствію Твоему́, Влады́ко.


[НА УТРЕНИ,]
Кано́нъ, его́же краегране́сіе: Апо́столомъ исплете́мъ боже́ственную пѣ́снь. Творе́ніе Іо́сифово. Гла́съ 3.

Пѣ́снь 1.

Ирмо́съ: Во́ды дре́вле, ма́ніемъ Боже́ственнымъ, во еди́но со́нмище совокупи́вый, и раздѣли́вый мо́ре Изра́ильтескимъ лю́демъ, Се́й Бо́гъ на́шъ, препросла́вленъ е́сть, Тому́ Еди́ному пои́мъ, я́ко просла́вися.

Апо́столовъ святы́хъ всесвяту́ю согла́сно торжеству́емъ па́мять и ты́я воспои́мъ весе́ліемъ души́: Пресвято́е бо мо́лятъ Сло́во очище́ніе дарова́ти на́мъ и ми́лость.

Многобо́жнаго неи́стовства согни́тіе отгна́вше сло́ва со́лію боже́ственнаго, ду́ши, сла́вніи, обуя́вшія дре́вле вся́, уздра́висте и спасе́ны Зижди́телю всѣ́хъ предста́висте: тѣ́мъ и прославля́етеся.

Сла́вный Иродіо́нъ, Ру́фъ, и Фле́гонтъ, и Ага́въ, и Асинкри́тъ, вку́пѣ и Ермъ пѣ́сньми да ублажа́тся, бли́жніи бы́вше Изба́вителя на́шего дру́зи, и му́дріи апо́столи, и боже́ственніи проповѣ́дницы.

Богоро́диченъ: Ми́лостивая Богоро́дице, апо́столовъ похвало́, и страстоте́рпцевъ сла́ва, и вѣ́рныхъ утвержде́ніе, утверди́, молю́ся, претворя́емый навѣ́ты лестца́ у́мъ мо́й, помраче́нный преступле́ньми.

Пѣ́снь 3.

Ирмо́съ: Иже отъ не су́щихъ вся́ приведы́й, Сло́вомъ созида́емая, соверша́емая Ду́хомъ, Вседержи́телю Вы́шній, въ любви́ Твое́й утверди́ мене́.

Церко́вная бы́вше очеса́, мно́гимъ отверзо́сте о́чи ви́дѣти добро́ту недомы́сленную, богови́дніи ученицы́ Боже́ственнаго Сло́ва.

До́мъ Тро́ицы показа́лся еси́ свѣтови́денъ, Ру́фе пресла́вне, и сло́вомъ благода́ти тре́бища низве́рглъ еси́, и созда́лъ еси́ Го́споду Це́ркви.

Сло́вомъ твои́мъ боже́ственнымъ обнови́въ, Ру́фе му́дре, сердца́, насѣ́явъ спаси́тельная уче́нія, и многопло́денъ кла́съ спа́сшихся пожа́лъ еси́ спасе́ніе.

Богоро́диченъ: По Существу́ Сы́й Боже́ственному непристу́пенъ, Пречи́стая, присту́пенъ мнѣ́ ны́нѣ бы́сть и пло́ти прія́тіемъ ве́сь соедини́ся кра́йняго ра́ди благоутро́бія.

Сѣда́ленъ, гла́съ 4. Подо́бенъ: Вознесы́йся.

Научи́вшеся отъ исто́чника прему́дрости, умудри́сте пре́жде неразу́міемъ служа́щія умовре́дно истука́ннымъ, му́дріи. Тѣ́мже блажи́ми есте́ въ вѣ́къ вѣ́ка, престо́лу предстоя́ще Святы́я Тро́ицы, но прилѣ́жно моли́теся обрѣсти́ разрѣше́ніе прегрѣше́ній на́шихъ, пресла́вніи.

Сла́ва, и ны́нѣ, богоро́диченъ:

По Бо́зѣ во Тво́й, Богоро́дице, прибѣга́ю смире́нный покро́въ боже́ственный, припа́дая, молю́ся: поми́луй, Пречи́стая, я́ко превзыдо́ша главу́ мою́ грѣси́, и бою́ся, Влады́чице, му́ки, и трепе́щу. Моле́ніе сотвори́, Чи́стая, къ Сы́ну Твоему́ отъ си́хъ изба́вити мя́.

Крестобогоро́диченъ:

Иже отъ Безнача́льнаго Отца́ рожде́ннаго напослѣ́докъ Тя́ пло́тію ро́ждшая, на Крестѣ́ ви́сяща, зря́щи, Христе́, — увы́ Мнѣ́, любе́знѣйшій Іису́се, — вопія́ше, — ка́ко сла́вимый я́ко Бо́гъ отъ а́нгелъ, отъ беззако́нныхъ ны́нѣ человѣ́къ, Сы́не, хотя́, распина́ешися? Пою́ Тя, Долготерпѣли́ве.

Пѣ́снь 4.

Ирмо́съ: Положи́лъ еси́ къ на́мъ тве́рдую любо́вь, Го́споди: Единоро́днаго бо Твоего́ Сы́на за ны́ на сме́рть да́лъ еси́. Тѣ́мже Ти́ зове́мъ, благодаря́ще: сла́ва си́лѣ Твое́й, Го́споди.

Врачева́ніе вѣ́рнымъ язы́комъ боже́ственное принося́ще, зе́млю нече́стія лука́вную, разоре́нію, му́дріи, преда́сте и созда́сте ду́ши въ вѣ́рѣ, сего́ ра́ди ублажа́етеся.

Въ си́лу тобо́ю, Иродіо́не блаже́нне, облече́ся гра́дъ Па́трскій преявле́нно: пе́рвый бо ты́ престо́лъ украси́лъ еси́, Боже́ственными просвѣща́емь свѣтоли́тіи Свята́го Ду́ха.

Гра́дъ Па́трскій граждани́номъ тобо́ю вели́кимъ обогати́ся, блаже́нне Иродіо́не, вои́стинну, къ Сіо́ну вы́шнему приводя́щимъ сíй въ пра́вду, тѣ́мже почита́етъ тя́ боже́ственными пѣснопѣ́ньми.

Богоро́диченъ: Сло́вомъ свяще́ннымъ Отчее Сло́во зачала́ еси́, вся́каго безслове́сія человѣ́ки, Богороди́тельнице Дѣ́во, избавля́юща. Тѣ́мже словесы́ всегда́ велегла́сно боже́ственными Тя́ сла́вимъ.

Пѣ́снь 5.

Ирмо́съ: На земли́ Неви́димый яви́лся еси́ и человѣ́комъ во́лею сожи́лъ еси́, Непостижи́мый, и, къ Тебѣ́ у́тренююще, воспѣва́емъ Тя́, Человѣколю́бче.

На зе́млю прише́дша, е́же спасти́ заблу́ждшаго, проповѣ́дасте Сло́во, боже́ственніи апо́столи, и отъ ле́сти вся́ человѣ́ки изба́висте.

Страннолѣ́пно проро́чествія тебѣ́ благода́ть отъ Бо́га излія́ся бога́тно, богому́дре Ага́ве, провозглаша́еши бо сказа́ніе хотя́щихъ бы́ти явле́нно.

Яви́лся еси́ иногда́, прозна́менуя Па́влу навѣ́ты, и у́зы, и озлобле́нія, проро́че Ага́ве, егда́ ру́ки твоя́ о́наго по́ясомъ связа́лъ еси́.

Богоро́диченъ: Еди́на на земли́ рождество́ имѣ́ла еси́ стра́нно, еди́нѣхъ на́съ примиря́ющи еди́ному Пребезнача́льному Отцу́. Сего́ ра́ди еди́ну Тя́, я́ко Ма́терь Бо́га, чти́мъ.

Пѣ́снь 6.

Ирмо́съ: Бе́здна послѣ́дняя грѣхо́въ обы́де мя́, и исчеза́етъ ду́хъ мо́й; но простры́й, Влады́ко, высо́кую Твою́ мы́шцу, я́ко Петра́ мя́, Упра́вителю, спаси́.

Положи́, свѣщи́ я́ко свѣтоза́рны, ва́съ Сло́во, вселе́нную просвѣща́ющія, и тму́ рѣша́щія, богови́дцы апо́столи, и показу́ющія пу́ть спаси́тельный.

Ме́ртвость проповѣ́дуя Безсме́ртнаго, умерщвле́нныхъ къ животу́ преставля́ше му́дрый Асинкри́тъ, апо́столовъ похвала́, Ирка́ніи же тве́рдое огражде́ніе.

Обрѣ́те тя́, Асинкри́те, рѣку́, во́дъ испо́лнену Ирка́нія Ду́ха, и, честны́ми напое́ніи твои́ми напои́вшися, принесе́ краснѣ́йшая Влады́цѣ прозябе́нія.

Богоро́диченъ: Зако́на Тя́ образова́ше киво́тъ, пріе́мшую зако́на Боже́ственнаго исполне́ніе, и пло́тію ро́ждшую, и по рождествѣ́ пребы́вшую Приснодѣ́ву, я́ко пре́жде рождества́, Богоневѣ́сто.

Конда́къ, гла́съ 2. Подо́бенъ: Вы́шнихъ ища́.

Яви́стеся Христо́вы ученицы́ и апо́столи всечестнíи, Иродіо́не сла́вне, Ага́ве и Ру́фе, Асинкри́те, Фле́гонте со Ермомъ, при́сно моли́теся Го́сподеви пода́ти на́мъ согрѣше́ній проще́ніе, пою́щимъ ва́съ.

Пѣ́снь 7.

Ирмо́съ: Пре́жде о́бразу злато́му, перси́дскому чти́лищу, о́троки не поклони́шася тріе́, пою́ще посредѣ́ пе́щи: отце́въ Бо́же, благослове́нъ еси́.

Основа́вше до́брѣ на ка́мени вѣ́ры язы́ковъ исполне́нія, ка́меніе дре́вле чту́щія всу́е просвѣти́сте я́вѣ, богоглаго́ливіи.

Попали́лъ еси́, Фле́гонте свяще́нне, огне́мъ боже́ственныхъ слове́съ твои́хъ вся́ко ле́стное те́рніе и сердца́, окая́нно уга́сшая, теплото́ю Ду́ха вже́глъ еси́ явле́нно.

Мараѳо́нстіи жи́тели, предста́теля тя́ велича́йша, и учи́теля изря́дна, и свѣти́льника, и наста́вника иму́ще, Фле́гонте сла́вне, почита́ютъ тя́ непреста́нно.

Богоро́диченъ: Но́въ ра́й на́мъ, жи́зни дре́во, Чи́стая, стяжа́вши, была́ еси́, его́же снѣ́дь снѣ́дію умерщвле́нныя оживи́, Чи́стая Богороди́тельнице.

Пѣ́снь 8.

Ирмо́съ: Вавило́нская пе́щь о́троки не опали́, ниже́ Божества́ о́гнь Дѣ́ву растли́. Тѣ́мъ со о́троки, вѣ́рніи, возопіе́мъ: благослови́те, дѣла́ Госпо́дня, Го́спода.

Да ублажи́тся Ага́въ, Фле́гонтъ и Асинкри́тъ, Ру́фъ и Ермíй сла́вный и Иродіо́нъ дне́сь, Сло́ва бы́вше боже́ственніи апо́столи, и свѣти́ла мíра, и язы́ковъ учи́теліе.

Ермíй пресла́вный Далма́тіи бы́сть всея́ наста́вникъ и просвѣще́ніе: на сію́ бо, я́ко со́лнце многосвѣ́тло, на́йде, творя́ ди́вная и просвѣща́я сердца́, неви́дящая пе́рвѣе.

Сло́во, я́ко свѣти́льникъ сія́ющь, Ермíе, нося́, сла́вне, су́щія въ нощи́ лю́тыхъ сѣдя́щія просвѣти́лъ еси́, исцѣле́нія и зна́менія творя́ вели́ка, привле́клъ еси́ къ вѣ́рѣ невѣ́рныхъ исполне́ніе.

Богоро́дименъ: Тя́ предста́тельство и́мамы, Пречи́стая, раби́ Твои́, и къ Сы́ну Твоему́ и Бо́гу Хода́таицу непосты́дну, отъ бѣ́дъ ны́ спаси́ и лю́тыхъ напа́стей, да вѣ́рою и любо́вію при́сно Тя́ сла́вимъ.

Пѣ́снь 9.

Ирмо́съ: Купино́ю и огне́мъ пропи́санную въ Сина́и законополо́жнику Моисе́ю и Бо́жій во чре́вѣ неопа́льно заче́ншую Огнь, всесвѣ́тлую и негаси́мую свѣщу́, су́щую Богоро́дицу пѣ́сньми, чту́ще, велича́емъ.

Свяще́ннѣйшій ли́къ соста́вимъ вѣ́рно, единомышле́ніемъ души́ блажа́ще те́плѣ Ерма и Иродіо́на, Ру́фа, Ага́ва, Асинкри́та же вели́каго и Фле́гонта боже́ственнаго, я́ко Сло́ва самови́дцы бы́вшія.

Яко ма́слины та́йныя явле́ни вои́стинну, богоглаго́ливіи, на́ша умасти́ша ду́ши и ли́ца благода́тію и изба́виша отъ безбо́жнаго наси́лія и тмы́ неразу́мія. Тѣ́мже и досто́йно ублажа́ются.

Стена́ній ны́ мно́гихъ, и рабо́ты вра́жія, и ве́тхаго запина́теля изба́висте, му́дріи Изба́вителевы апо́столи, и показа́сте стези́, веду́щія боже́ственною наде́ждею къ Ца́рству небе́сному.

Шестосвѣ́тная свѣще́ святы́хъ учени́къ, моли́ прилѣ́жно Трисо́лнечную Зарю́ просвѣти́ти ду́ши на́ша, всесвѣ́тлую соверша́ющихъ ва́шу па́мять, и изба́вити отъ тмы́ и вѣ́чнаго осужде́нія.

Богоро́диченъ: Якоже пламеноно́сная клеща́, прія́ла еси́ во утро́бѣ у́гль разу́мный, попаля́ющъ на́ша стра́сти, и просвѣща́ющъ ду́ши на́ша, и рѣша́щъ тму́ идолонеи́стовства, Чи́стая Дѣ́во многопѣ́тая.

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 33 об. – 36 об.

/ Къ оглавленію раздѣла /


Наверхъ / Къ титульной страницѣ

0