Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 18 ноября 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія во 8-й де́нь.
Слу́жба и́же во святы́хъ отцу́ на́шему Ни́фонту, епи́скопу Новгоро́дскому.

ВЕЧЕРЪ,
На Го́споди воззва́хъ: стихи́ры, гла́съ 4. Подо́бенъ: Яко до́бля.

Язы́къ медото́чныхъ твои́хъ усте́нъ,* святи́телю преблаже́нне Ни́фонте,* тро́сть Ду́ха Свята́го су́щи,* низложи́ горды́ню тя́ ненави́дящихъ,* и ны́нѣ горды́нею на ста́до твое́ востаю́щія посрами́ враги́* и на́съ, во правосла́вныхъ догма́тѣхъ укрѣпля́я,* заступле́ніемъ твои́мъ спаси́,* я́ко да отъ чи́стыя со́вѣсти* любо́вію прино́симъ о тебѣ́ Бо́гу хвале́ніе.

Озаре́нъ свѣ́томъ Бо́жія благода́ти,* просія́лъ еси́, я́коже со́лнце, въ мíрѣ* и луча́ми твои́хъ добродѣ́телей* просвѣти́лъ еси́ мно́гія страны́,* тѣ́мже, указа́ніемъ отъ е́же свы́ше,* избра́нъ бы́лъ еси́, преподо́бне,* отъ всѣ́хъ согла́сно па́стырь слове́сному ста́ду,* о не́мже и по отше́ствіи твое́мъ моли́ся прилѣ́жно,* сохрани́тися отъ враго́въ ненавѣ́тованну.

Сла́ва, гла́съ 2:

Пріиди́те, новгоро́дстіи правосла́вныхъ собо́ри, торжество́ дне́сь въ лѣ́тней па́мяти преблаже́ннаго отца́ любо́вію съ на́ми соста́вльше, дади́мъ сла́ву Изба́вителю Бо́гу, я́ко даде́ на́мъ па́стыря, и учи́теля, и моли́твенника о душа́хъ на́шихъ.

И ны́нѣ, богоро́диченъ или́ крестобогоро́диченъ.

На стихо́внѣ, въ тріо́ди. Сла́ва, гла́съ 4:

Хра́мъ Ду́ху Свято́му се́рдце свое́ устроя́я, хра́мы моли́твенныя ко умноже́нію сла́вы Бо́жія воздви́гнулъ еси́, я́же благолѣ́пно предукраси́въ, слове́сныя своя́ о́вцы а́ки въ небе́сную огра́ду собира́лъ еси́ и предлага́лъ и́мъ па́жить сла́дкаго и богодухнове́ннаго твоего́ уче́нія, наставля́я и вразумля́я на пу́ть благоче́стія и спасе́нія, на́нь же и на́съ моли́твами твои́ми наста́ви, преподо́бне о́тче, я́ко да всегда́ прославля́емъ Еди́наго Бо́га и Спа́са ду́шъ на́шихъ.

И ны́нѣ, богоро́диченъ или́ крестобогоро́диченъ.

Тропа́рь, гла́съ 3:

Яко сы́й нра́вомъ правосла́вныхъ Восто́чныя Це́ркве преда́ній и́стинный защи́тникъ, сподо́бился еси́ вели́каго во отцѣ́хъ Ѳеодо́сія ви́дѣти по сме́рти, я́ко жи́ва, возвѣща́юща тебѣ́ Ца́рствія небе́снаго наслѣ́діе, его́же неизрече́нныхъ добро́тъ ны́нѣ съ ни́мъ неразлу́чно наслажда́яся, моли́ и о на́съ, ча́дѣхъ свои́хъ, Ни́фонте прехва́льне.

Сла́ва, и ны́нѣ, богоро́диченъ.



[НА УТРЕНИ,]
Кано́нъ святи́телю, гла́съ 1.

Пѣ́снь 1.

Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяномъ пу́ть глубины́ новосодѣ́лавшая.

Твоя́ десни́ца, Христе́ мо́й, да наста́витъ мя́ въ дне́шній де́нь пѣ́ти па́мять уго́дника Твоего́, стира́я запина́ющія ми́ враги́ и пу́ть, страстьми́ обветша́вшій, во утро́бѣ мое́й обновля́я.

Благода́ть Паракли́та Твоего́ посла́въ, Христе́, рабу́ Твоему́, призва́лъ еси́ въ слѣ́дъ Тебе́ тещи́: и́же а́біе отве́ржеся мíра и возлюби́ зако́нъ Тво́й, пу́ть въ любви́ Твое́й обновля́ющъ.

Твое́ю мы́шцею наста́вленъ преподо́бный Тво́й, Го́споди, пріи́де къ безбу́рному приста́нищу въ пречестну́ю Ма́тере Твоея́ Пече́рскую оби́тель, и бы́сть и́нокъ, и́ночествуя добродѣ́тельными нра́вы.

Просія́ дале́че добродѣ́тель твоя́, о́тче, ю́же ви́дяще, мно́зи велича́ху тя́, и прославля́ху Небе́снаго Отца́, да́вшаго тебѣ́ благода́ть сицеву́ю, ея́же и мы́ да не лиши́мся твои́ми, о́тче, исправле́ніи.

Богоро́диченъ: Бу́ди ми́ руководи́тельница, Богоневѣ́стная Дѣ́во, руководя́щи на спасе́нную стезю́, и ду́шу мою́, страстьми́ обветша́вшую, обновля́ющи, Марíе, Твои́ми щедро́тами.

Пѣ́снь 3.

Ирмо́съ: Еди́не, вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й, одушевле́нный хра́ме неизрече́нныя сла́вы Твоея́, Человѣколю́бче.

Еди́нъ пу́ть пра́въ ви́дя вѣ́рный ра́бъ Тво́й, е́же прія́ти въ жи́зни се́й Кре́стъ Тво́й и Тебѣ́, Влады́цѣ своему́, послѣ́довати, а́біе къ Тому́ спѣ́шно поте́клъ, тѣ́мъ ны́нѣ неизрече́нныя сла́вы Твоея́ насыща́ется, Человѣколю́бче.

Еди́ному Бо́гу отъ чи́стаго се́рдца моли́твы твоя́ непреста́нно возсыла́я, немощна́го врага́ ко́зни разруши́лъ еси́, уби́въ того́ копіе́мъ вѣ́ры, тѣ́мъ прія́лъ еси́, святи́телю, вѣне́цъ сла́вы отъ Христа́ Человѣколю́бца.

Бдѣ́ніемъ и посто́мъ горѣ́ возлетѣ́въ, не изводи́лъ еси́ ума́ своего́ до́лу къ скоротеку́щимъ и сицевы́мъ дѣя́ніемъ стяжа́лъ еси́ ви́дѣніе Бо́жія сла́вы, ю́же и на́мъ улучи́ти моли́ Іису́са Человѣколю́бца.

Та́ко просвѣти́ся житіе́ твое́ предъ человѣ́ки, я́ко ви́дѣвше добродѣ́тели твоя́, о́тче, избра́ша тя́ на престо́лъ архіере́йскій Новугра́ду, ему́же и бы́лъ еси́ па́стырь, Пастыренача́льнику приводя́ своя́ о́вцы, Іису́су Человѣколю́бцу.

Богоро́диченъ: Пастыренача́льника Ма́ти Чи́стая су́щи, заблу́ждшее мя́ овча́ на пу́ть пра́вый наста́ви и упра́ви живо́тъ мо́й, да, Тобо́ю упра́вленъ, сподо́блюся насы́титися сла́вы Іису́са Человѣколю́бца.

Сѣда́ленъ, гла́съ 4:

Ре́вностію зѣло́ о Правосла́віи подвиза́яся, умножа́лъ еси́ въ па́ствѣ твое́й сла́ву Бо́жію, и ны́нѣ у́бо прославля́яся идѣ́же гла́съ пра́зднующихъ непреста́нно; моли́ о чту́щихъ па́мять твою́, Ни́фонте, о́тче свяще́ннѣйшій.

Сла́ва, и ны́нѣ, богоро́диченъ:

Яко ро́ждшая сла́вы Го́спода, шу́іяго на́съ безсла́внаго стоя́нія свобо́ждши, прича́стники сла́вы святы́хъ бы́ти сподо́би и просла́ви чту́щихъ Рождество́ Твое́, Чи́стая.

Пѣ́снь 4.

Ирмо́съ: Го́ру Тя́, благода́тію Бо́жіею приосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше Свято́му, во спасе́ніе на́ше и обновле́ніе.

Горо́ю высокоу́мія ходя́щихъ смири́лъ еси́, блаже́нне, не да́въ междоусо́бныя бра́ни сотвори́ти, но благослови́лъ еси́ ми́ромъ, приве́дъ тѣ́хъ ко спасе́нію и любви́ обновле́нію.

Словесе́мъ апо́стольскимъ послѣ́дуя, благовре́менно и безвре́менно настоя́лъ еси́, о́тче, все́ю си́лою завѣщава́я свои́мъ овца́мъ не удаля́тися отъ за́повѣдей Госпо́днихъ и отъ пра́вильныхъ Це́ркве Его́ преда́ній, я́ко та су́ть на спасе́ніе на́ше и обновле́ніе.

Де́рзость твою́, святи́телю, кто́ исповѣ́сть? Глаго́лалъ бо еси́ о свидѣ́ніихъ Госпо́днихъ предъ цари́, не стыдя́ся діади́мы, тѣ́мъ бы́лъ еси́ вторы́й Предте́ча, облича́я дѣя́нія беззако́нныя.

Тѣ́ло свое́ не Христу́, но блуже́нію беззако́ннымъ бра́комъ предаю́щихъ князе́й дерзнове́нно обличи́лъ еси́, апо́стольски повелѣва́я Це́ркви свое́й и всему́ кли́ру сицевы́хъ, безчи́нно ходя́щихъ, отмѣта́тися.

Богоро́диченъ: Беззако́ннующа мя́ испра́ви и разсвирѣ́певшія во мнѣ́ стра́сти смири́, Богоро́дице, да Тобо́ю тѣ́хъ свобо́дь бы́въ, обря́щу отра́ду, Ты́ бо еси́ еди́на всѣ́хъ на́съ спасе́ніе и обновле́ніе.

Пѣ́снь 5.

Ирмо́съ: Просвѣти́вый сія́ніемъ прише́ствія Твоего́, Христе́, и освѣти́вый Кресто́мъ Твои́мъ мíра концы́, сердца́ просвѣти́ свѣ́томъ Твоего́ богоразу́мія, правосла́вно пою́щихъ Тя́.

Втора́го тя́ Ѳео́дора Студíйскаго пое́тъ Це́рковь Россíйская, блаже́нне, де́рзости ра́ди и исповѣ́данія и призыва́етъ къ духо́вному весе́лію любо́вію, о́тче, хва́лящихъ тя́.

Ты́ непра́вильно ходя́щимъ сопротивоста́лъ еси́, преподо́бне, ника́коже соизволя́я безъ благослове́нія вселе́нскаго Константи́ня гра́да патріа́рха произвести́ на престо́лъ архіере́я и нече́стно да́ти во́лка въ па́стыря овца́мъ, благоче́стно Христа́ сла́вящимъ.

Че́сти досто́инъ еси́, свя́те, я́ко на че́сть святи́тельства главо́ю Кли́мента свята́го возводя́щимъ не соизво́лилъ еси́, па́че же обличи́въ, съ человѣкоуго́дники си́хъ собо́ръ осуди́лъ еси́.

Истинный сы́нъ Восто́чнаго Вселе́нскаго престо́ла су́щи, сыно́мъ Россíйскимъ не соизволя́лъ еси́ отъ пе́рвенства своего́ отстава́ти, но достовѣ́рно исповѣ́далъ еси́ то испе́рва рукописа́ніемъ утвержде́но бы́ти, да изволе́ніемъ приро́днаго па́стыря своего́, Константи́ня гра́да патріа́рха, все́ твори́мо бу́детъ.

Богоро́диченъ: Благослове́ніемъ ро́дъ человѣ́ческій Вѣнча́вшая, благослове́нія избра́нныхъ на́съ сподо́би и сла́ву Сладча́йшаго Сы́на Твоего́ зрѣ́ти да́ждь правовѣ́рно хва́лящимъ Тя́.

Пѣ́снь 6.

Ирмо́съ: Обы́де на́съ послѣ́дняя бе́здна, нѣ́сть избавля́яй, вмѣни́хомся, я́ко о́вцы заколе́нія, спаси́ лю́ди Твоя́, Бо́же на́шъ, Ты́ бо крѣ́пость немощству́ющихъ и исправле́ніе.

Обы́де тя́ зло́бою архіере́й, ненави́дяй пра́вды, не сообща́лся бо еси́ ему́, я́ко непра́ведно престо́лъ похи́тившу, но ты́, о́тче, не устраши́лся еси́ того́, имѣ́яй наде́жду на Бо́га, Иже е́сть крѣ́пость немощны́хъ и исправле́ніе.

Удержа́ти тя́, блаже́нне, не удержа́ннаго, покуша́яся, архіере́й, наусти́ кня́зя въ заточе́ніе тя́ посла́ти и удержа́ самаго́, язы́ка же твоего́ не удержа́, обличи́лъ бо еси́ того́, я́ко незако́нно престо́лъ похи́тивша.

Словеса́ твоя́ бы́ша ме́чь беззако́ннымъ, и́мже посѣ́клъ еси́ тѣ́хъ неи́стовство, сего́ ра́ди и ненави́дяху тя́ и престо́ла отлучи́ша, но ты́ не малоду́шествовалъ еси́, о́тче, блаже́нства изгна́нныхъ пра́вды ра́ди надѣ́яся.

Обличе́ніе твое́, святи́телю Ни́фонте, я́зва бы́сть нечести́вымъ, снѣда́ше бо и́хъ я́ко законопресту́пныхъ, и распыха́хуся сердцы́, скреже́щуще зубы́ звѣ́рски, хотя́ще тя́ растерза́ти.

Богоро́диченъ: Обыдо́ша на́съ мы́сленніи звѣ́ри, скреже́щуще зубы́, и ра́дуются о поги́бели на́шей, но Ты́, я́ко си́льна въ крѣ́пости, Дѣ́во, сокруши́ и́мъ че́люсти и на́съ испра́ви проти́ву тѣ́мъ ста́ти, Ты́ бо еси́ крѣ́пость немощны́мъ и исправле́ніе.

Конда́къ, гла́съ 5:

Ре́вности дре́внихъ оте́цъ въ тве́рдомъ и́стинныхъ догма́тъ хране́ніи подо́бяся, крѣпкоу́мне Ни́фонте, не восхотѣ́лъ еси́ восхи́тившему самово́льнѣ престо́лъ митропо́ліи Кли́му сослужи́тель бы́ти, избра́нному же на се́ отъ всѣ́хъ, поко́рся, священнолѣ́пнѣ съ ни́мъ служи́лъ еси́ и, жи́знь свою́ сконча́въ, обрѣ́лъ еси́ безконе́чное Ца́рство Христо́во.

Пѣ́снь 7.

Ирмо́съ: Тебе́, у́мную, Богоро́дице, пе́щь, разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Ты́, о́тче блаже́ннѣйшій, въ оби́тели многочуде́снѣй, я́ко въ Черто́зѣ небе́сномъ живы́й, ра́дуяся, благода́рственная воздава́лъ еси́ всѣ́хъ Цари́цѣ и Сладча́йшему Сы́ну Ея́, поя́: отце́въ Бо́же, благослове́нъ еси́.

Дерзнове́нно ста́въ, преподо́бне, Правосла́вія ра́ди, лиши́лся еси́ отъ законопресту́пныхъ престо́ла своего́, но престо́лъ тебѣ́ гото́вяшеся во огра́дѣ небе́сной, я́ко и́стинному свидѣ́телю пра́вды.

Ви́дя Пастыренача́льникъ о́вцы твоя́, укоснѣ́ніемъ твои́мъ смяте́нны, па́ки тя́ па́стыря и́мъ подае́тъ, и́бо зло́ творя́й пра́веднымъ судо́мъ Бо́жіимъ са́мъ зло́ сугу́бо прія́тъ и отлучи́вый тя́ престо́ла са́мъ отпаде́ престо́ла.

Христолюби́вый кня́зь Гео́ргій, Изясла́ва пра́ведно съ престо́ла княже́нія изгна́въ, со мно́гою че́стію отпусти́ тя на престо́лъ тво́й, на не́мже узрѣ́вше тя́, о́вцы твоя́, преподо́бне, съ ра́достію воспѣ́ша: отце́въ Бо́же, благослове́нъ еси́.

Богоро́диченъ: Пра́ведно низпа́дшій ро́дъ человѣ́ческій отъ Бо́жія благода́ти возста́вила еси́ пречи́стымъ Рождество́мъ Твои́мъ, Богома́ти, сего́ ра́ди ра́достно пое́тъ Ти́ во вся́ ро́ды, Благослове́нная.

Пѣ́снь 8.

Ирмо́съ: Въ пещи́ о́троцы Изра́илевы, я́коже въ горни́лѣ, добро́тою благоче́стія чистѣ́е зла́та блеща́хуся, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Въ пещи́ искуше́ній и въ пла́мени ласка́нія законопресту́пныхъ егда́ тебе́ неопали́вшася слы́ша вселе́нскій Константи́ня гра́да патріа́рхъ, ублажи́ му́жество твое́, о́тче, и причте́ тя къ дре́внимъ исповѣ́дникомъ, съ ни́миже ны́нѣ пое́ши Го́спода во вѣ́ки.

Ви́дя твое́ дерзнове́ніе, въ кни́зѣ живы́хъ напи́сано, патріа́рхъ Константи́ня гра́да присла́ и свое́ къ тебѣ́ напи́санное посла́ніе, въ не́мже ублажа́ше твою́ о Правосла́віи ре́вность, ю́же помина́юще, и сы́нове россíйстіи превозно́сятъ Го́спода во вѣ́ки.

Сугу́бымъ жела́ніемъ распала́емь, святи́телю, спѣ́шно прише́лъ еси́ въ гра́дъ Кíевъ, жела́я Богома́тери въ оби́тели Пече́рской и преподо́бнымъ отце́мъ поклони́тися, та́кожде отъ гряду́щаго архіере́я благослове́ніе прія́ти. Тѣ́мже ди́вно видѣ́ніе ви́дѣти сподо́бился еси́, я́ко святы́й Ѳеодо́сій глаго́ла тебѣ́: отсе́лѣ бу́деши съ на́ми неразлу́чно, сла́вя и поя́ Го́спода во вѣ́ки.

Яко птене́цъ, любя́ гнѣздо́, на хо́лмѣ Пече́рскомъ отъ Чи́стыя Голуби́цы созда́нное, любе́зно жела́лъ еси́ въ не́мъ жи́ти неисхо́дно, а́ще же и привлече́ тя жела́ніе сицево́е, но Бо́жій Про́мыслъ угото́вяше отше́ствіе твое́ отъ вре́менныхъ къ вѣ́чнымъ.

Богоро́диченъ: Птене́цъ е́смь, въ Твое́й огра́дѣ, Влады́чице моя́, рожде́нный, но низпадо́хъ, уловле́нъ бѣсо́вскими прило́ги, оба́че молю́ся: приведи́ мя́ па́ки во о́ну, да идѣ́же нача́ло, та́мо и кончи́ну пріиму́ благу́ю и со святы́ми отцы́ превозношу́ си́лу Твою́ во вѣ́ки.

Пѣ́снь 9.

Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Образомъ чу́днаго видѣ́нія извѣсти́ тебѣ́, свя́те, всѣ́хъ Влады́ка, яко и́маши по трудѣ́хъ въ поко́йная отыти́ мѣста́, идѣ́же сла́вятъ немо́лчно Тро́ицу Пресвяту́ю а́нгельскія си́лы, Юже и мы́ съ ни́ми велича́емъ.

Въ то́нокъ со́нъ низве́дся, возмнѣ́лся еси́, о́тче, въ це́ркви Пече́рской стоя́щи, простира́ти къ Пречи́стѣй Богоро́дицѣ мольбу́, да ви́диши лице́ блаже́ннаго Ѳеодо́сія, и бы́сть, я́коже восхотѣ́лъ еси́.

По жела́нію твоему́, въ видѣ́ніи нѣ́кто отъ бра́тій, пое́мь, преподо́бне, приведе́ тя ко блаже́нному Ѳеодо́сію, его́же ра́достнѣ узрѣ́въ, я́лся еси́ за но́зѣ и благослове́нія сподо́бился еси́. Жела́ніемъ сего́ и мы́ одержи́ми, Тро́ицу Пресвяту́ю велича́емъ.

О, сла́дкаго гла́са! О, до́браго цѣлова́нія отца́ на́шего! Рече́ бо: отсе́лѣ бу́деши съ на́ми, и показа́ ти́ сви́токъ, въ не́мже бѣ́ напи́сано: се́ а́зъ и дѣ́ти мои́. Се́й гла́съ и мы́ да услы́шимъ, мо́лимся Бо́жіей Ма́тери, и при́сно Сію́ съ тобо́ю, о́тче, велича́емъ.

Богоро́диченъ: Ра́дуйся, сви́тче, Пресвята́я Дѣ́во, въ Тебѣ́ бо написа́ся пе́рстомъ Бо́жіимъ Предвѣ́чное Сло́во. Ты́ же на́съ напиши́ во сви́тцѣ съ рабы́ Твои́ми, вы́ну бо о се́мъ Тебѣ́ мо́лимся и пѣ́сньми Тя́ велича́емъ.

Свѣти́ленъ:

Ангельски на земли́ пожи́въ, а́нгеломъ сожи́тель яви́лся еси́, преста́вився бо отъ ни́жнихъ, къ вы́шнимъ отше́лъ еси́, идѣ́же предстоя́ Влады́цѣ всѣ́хъ Бо́гу, моли́ о чту́щихъ па́мять твою́, Ни́фонте блаже́нне.

Сла́ва, и ны́нѣ, богоро́диченъ:

Вы́шнихъ чинонача́лій превы́шшая су́щи, на́съ, ни́жнихъ, не отступа́й, но при́сно съ на́ми бу́ди, свобожда́ющи отъ вся́кихъ навѣ́товъ, Твою́ бо крѣ́пкую о на́съ по́мощь ви́дяще, никто́же воста́нетъ на ны́.

На хвали́техъ стихи́ры, гла́съ 4:

Въ благонаро́читый де́нь па́мяти богоно́снаго отца́* пріиди́те, христоимени́тіи лю́діе, ра́достно взыгра́емъ,* пѣ́сни похва́льныя принося́ще,* и, сла́достію духо́вною учрежда́ющеся,* любо́вію возопіи́мъ:* Ни́фонте, о́тче свяще́ннѣйшій,* моли́ся Христу́ Бо́гу* о спасе́ніи ду́шъ на́шихъ.

Плодоно́симъ ти́, о́тче преподо́бне,* въ дне́шній де́нь любо́вію пѣ́сненныя да́ры,* помина́юще исправле́нія твои́хъ добродѣ́телей,* и мо́лимся Христу́ Бо́гу,* я́ко да, вре́дныхъ помышле́ній избѣжа́вше,* испра́вимъ жи́знь на́шу въ благи́хъ дѣя́ніихъ* и небе́сныя по́чести не лиши́мся* моли́твами твои́ми.

Кто́ по достоя́нію восхвали́ти возмо́жетъ* святы́я Твоя́, Христе́ Бо́же?* Яко, любо́вію Твое́ю уязви́вшеся,* вся́ земна́я презрѣ́ша,* и, во пло́ти су́ще, безпло́тнаго врага́ побѣди́ша,* и ны́нѣ съ безпло́тными на небеси́ веселя́тся,* и́хже ликостоя́нія и на́съ сподо́би* святи́теля Твоего́ моли́твами.

Сла́ва, гла́съ 6:

Святи́телемъ удобре́ніе и отце́въ сла́ву, исто́чника чуде́съ и вѣ́рныхъ ско́раго посо́бника, дне́сь, празднолю́бніи лю́діе, въ пречестны́й хра́мъ соше́дшеся, хвала́ми воспое́мъ, глаго́люще: ра́дуйся, подви́жниче до́брый; ра́дуйся, бо́дрый па́стырю слове́сныхъ ове́цъ; ра́дуйся, мы́сленнаго во́лка отъ ста́да твоего́ жезло́мъ вѣ́ры отгна́вый и всецѣ́ло е́ къ Пастыренача́льнику твоему́ приведы́й, Ему́же при́сно и о на́съ моли́ся, я́ко да сохрани́мся отъ всѣ́хъ враго́въ невреди́ми и бу́демъ наслѣ́дницы жи́зни вѣ́чныя.

И ны́нѣ, богоро́диченъ: Богоро́дице, Ты́ еси́ лоза́ и́стинная...
Славосло́віе вели́кое, [ектеніи́] и отпу́стъ.



НА ЛИТУРГІИ,

Слу́жба о́бща святи́телю: [Блаже́нна, отъ кано́на пѣ́снь 3 и 6. Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́омъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́. Ева́нгеліе Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся].

Источникъ: Слу́жбы Преподо́бнымъ отце́мъ Пече́рскимъ, и́хже мо́щы въ Бли́жной и Да́льной пеще́рѣ нетлѣ́нно почива́ютъ. — Кíевъ: Въ тѵпогра́фіи Кíево-Пече́рскія Ла́ѵры, 1785. — Л. 72 – 76.

/ Къ оглавленію раздѣла /


Наверхъ / Къ титульной страницѣ

0