Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 21 августа 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 7-й де́нь.
Преподо́бнаго отца́ на́шего Гео́ргія, епи́скопа Мелити́нскаго.

[ВЕЧЕРЪ,]
Стихи́ры, гла́съ 1. Подо́бенъ: Всехва́льніи му́ченицы.

Отче Гео́ргіе,* Христо́вѣ честнѣ́й и пречи́стѣй* че́стно поклони́лся еси́ ико́нѣ, всему́дре,* богобо́рцовъ на́глости* ника́коже ужаса́яся,* си́лою Того́ укрѣпля́емь.* Его́же ны́нѣ моли́* дарова́ти душа́мъ на́шимъ* ми́ръ и ве́лію ми́лость.

Отче Гео́ргіе,* я́рость нечести́выхъ претерпѣ́лъ еси́,* гнѣ́вающихся безслове́снѣ,* я́же и ви́дѣлъ еси́ превознося́щіяся* злочести́вымъ шата́ніемъ* и па́ки сокруша́емы лю́тѣ* я́вственно промышле́ніемъ,* ко отмще́нію несмы́сленныхъ* дви́жимо, сла́вне.

Отче Гео́ргіе,* Бо́гу содѣ́йственникъ бы́въ* я́ко іере́й и земледѣ́латель,* стори́чествующъ пло́дъ Влады́цѣ —* ду́ши приве́лъ еси́* ны́нѣ спасе́нныхъ сло́вомъ твои́мъ.* И ны́нѣ моли́ся* дарова́ти душа́мъ на́шимъ* ми́ръ и ве́лію ми́лость.

Сла́ва, и ны́нѣ, богоро́диченъ:

Ра́дуйся, купино́ неопали́мая,* совѣ́та вели́каго Ангела,* ра́дуйся, еди́на ро́ждшая;* ра́дуйся, изволе́ніе Честны́я Тро́ицы;* ра́дуйся, земны́мъ утвержде́ніе;* ра́дуйся, рая́ кла́съ прозя́бши невоздѣ́ланный,* Царя́ и Го́спода,* прозябе́нія изсуша́юща зло́бы.

Крестобогоро́диченъ:

Своего́ Агнца* Агница и непоро́чная Влады́чица* на Крестѣ́ я́ко ви́дѣвши,* зра́ка не иму́ща, ниже́ добро́ты, —* увы́ Мнѣ́, — рыда́ющи, глаго́лаше, —* гдѣ́ добро́та Твоя́ за́йде, Сладча́йшій?* Гдѣ́ благолѣ́піе,* гдѣ́ благода́ть блиста́ющая о́браза Твоего́,* Сы́не Мо́й любе́знѣйшій?


[НА УТРЕНИ,]
Кано́нъ, гла́съ 8.

Пѣ́снь 1.

Ирмо́съ: Пѣ́снь возсле́мъ, лю́діе, чу́дному Бо́гу на́шему, свободи́вшему Изра́иля отъ рабо́ты, пѣ́снь побѣ́дную пою́ще и вопію́ще: пои́мъ Тебѣ́, Еди́ному Влады́цѣ.

Зарю́ благоутро́бія мнѣ́, Христе́, испо́лньшемуся прегрѣше́ній и грѣхи́ лю́тыми, возсія́й, Ще́дре, и мра́къ отжени́ моего́ ослѣпле́нія мольба́ми Твоего́ іера́рха.

Всю́ воздѣ́лалъ еси́, му́дре, болѣ́зньми и по́ты твои́ми воздержа́нія зе́млю и, сѣ́я въ се́рдцы пшени́цу Ду́ха, кла́съ безстра́стія прине́слъ еси́, Гео́ргіе блаже́нне.

На ра́мена кре́стъ тво́й взе́мъ, и земны́я красоты́ міроде́ржцу тмы́ отве́рглъ еси́, Христу́ послѣ́довавъ, и сокро́вище стяжа́лъ еси́ невеще́ственнаго Ца́рствія Его́.

Богоро́диченъ: Ору́жіе и приста́нище тве́рдое, и стѣ́ну, и крѣ́пость, и Боже́ственное основа́ніе, и мо́стъ, и покро́въ, Твое́, Богоневѣ́сто, иму́ще предста́тельство, отъ бѣ́дъ избавля́емся всѣ́хъ.

Пѣ́снь 3.

Ирмо́съ: Нѣ́сть свя́тъ, я́ко Госпо́дь, и нѣ́сть пра́веденъ, я́ко Бо́гъ на́шъ, Его́же пое́тъ вся́ тва́рь: нѣ́сть пра́веденъ па́че Тебе́, Го́споди.

На высоту́ вше́дъ, блаже́нне, добродѣ́телей, и во глубины́ ду́ха досто́йно воззрѣ́въ, и видѣ́нія прія́телище бы́въ, преподо́бне, водворя́ешися со а́нгельскими ли́ки.

Обнища́въ ду́хомъ, обогати́лся еси́, му́дре, Ца́рствомъ невеще́ственнымъ, въ не́мже ста́ду твоему́ сокро́вища вѣ́чная вѣ́рно предугото́валъ еси́, тѣ́мже тя́ ублажа́емъ.

Простото́ю, преподо́бне, и кро́тостію душе́вною уподо́бился еси́ нра́вы твои́ми и исправле́ньми Іа́кову и показа́лся еси́ чистото́ю ду́ха Изра́иль, у́мъ, зря́й Бо́га.

Богоро́диченъ: Безо́тча родила́ еси́, безма́терня пре́жде Тебе́, и я́ко Младе́нца дои́ла еси́, Пита́ющаго вся́, Его́же моли́ спасти́ся вѣ́рно пою́щимъ Тя́ госпо́дственно, Богоро́дицу Чи́стую.

Сѣда́ленъ, гла́съ 8. Подо́бенъ: Прему́дрости.

Смире́нія высото́ю свѣ́телъ бы́въ, возноше́нія вра́жія до конца́ потреби́лъ еси́, хра́брствовавъ свѣ́тло; ми́лостивъ же бы́въ, о́тче преподо́бне, оби́льнымъ подая́ніемъ а́лчущія удовли́лъ еси́. Тѣ́мже нестарѣ́ющуюся по сме́рти наслѣ́довалъ еси́ пи́щу, ра́дуяся во вѣ́ки, Гео́ргіе іера́рше блаже́нне. Моли́ Христа́ Бо́га прегрѣше́ній оставле́ніе дарова́ти пра́зднующимъ любо́вію святу́ю па́мять твою́.

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца дои́ши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Крестобогоро́диченъ:

Агнца и Па́стыря и Изба́вителя, Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мляй Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе, вѣ́рою пою́щимъ Боже́ственныя Стра́сти Твоя́.

Пѣ́снь 4.

Ирмо́съ: Изъ горы́ пріосѣне́нныя, Сло́ве, проро́къ, еди́ныя Богоро́дицы, хотя́ща воплоти́тися богови́дно усмотри́ и со стра́хомъ славосло́вяше си́лу Твою́.

Ты́ душе́вный кора́бль спа́слъ еси́ отъ страсте́й ве́щнаго треволне́нія, во приста́нище устреми́лся еси́ и тишину́ воздержа́нія, о́тче преподо́бне.

Ангелови́денъ ра́зумъ стяжа́въ, Тро́ическое отъ а́нгелъ пѣснопѣ́ніе послу́шалъ еси́, бы́въ во изступле́ніи смы́сла твоего́, прехва́льне.

Ты́, мы́сленною пра́щею вооружи́вся, я́коже ино́го Голіа́ѳа, кня́зя тмы́, гордя́щася, низложи́лъ еси́, іера́рше, Дави́дски и боже́ственною вѣ́рою твое́ю.

Богоро́диченъ: Наде́жда и предста́тельство мíра, Богоро́дице, моли́ изъ Тебе́ Воплоще́ннаго о рабѣ́хъ Твои́хъ, Тя́ бо свято́е очисти́лище стяжа́вше, отъ грѣха́ избавля́емся.

Пѣ́снь 5.

Ирмо́съ: Отъ но́щи невѣ́денія боговѣ́дѣніемъ просвѣти́вый концы́, просвѣти́ мя у́тромъ человѣколю́бія Твоего́, Го́споди.

Тя́, я́ко чистоты́ сто́лпъ и цѣлому́дрія клю́чь, приснопа́мятне, вѣ́дуще вси́, да улучи́мъ у́бо ми́лость моли́твами твои́ми.

Богови́днымъ прозрѣ́ніемъ во свяще́нный одѣ́ялся еси́ чи́нъ, Непоро́чнѣй Дѣ́вѣ я́ко непоро́чна тя́ въ сіе́ призва́вшей.

Ми́лости щедро́тство всажде́но имѣ́я и всегда́ соживу́що, бы́лъ еси́ ни́щимъ бога́тныя пи́щи дѣ́лателище.

Богоро́диченъ: Небе́снаго Влады́ку во утро́бѣ заче́нши, Всенепоро́чная, была́ еси́ вы́шши небе́съ и всея́ тва́ри.

Пѣ́снь 6.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, многоми́лостиве Христе́ Бо́же на́шъ.

Ду́хъ Всесвяты́й въ тебѣ́ обрѣ́тъ селе́ніе, духо́въ лука́выхъ отгна́въ легео́ны моли́твами твои́ми.

Тишины́ яви́лся еси́ рѣка́ и струя́ кро́тости, отъ ни́хже напая́емся пото́ка сла́дости, преподо́бне о́тче.

Умертви́въ плотскíя сла́сти, ду́хомъ ожи́лъ еси́, и мене́ же, страстьми́ па́дшаго, возста́ви, сла́вне.

Богоро́диченъ: Сло́во во утро́бѣ, Иже отъ Отца́ безлѣ́тно возсія́вша, въ лѣ́то зачала́ еси́ Бо́га Сло́ва па́че сло́ва, Приснодѣ́во.

Пѣ́снь 7.

Ирмо́съ: Отроки ороси́вый въ пещи́ и Дѣ́ву сохрани́вый, ро́ждшую Тя́, по рождествѣ́, благослове́нъ еси́, Бо́же оте́цъ на́шихъ.

Осія́ніемъ Ду́ха Боже́ственнаго, е́же отсю́ду проразумѣ́лъ еси́ къ лу́чшимъ преставле́ніе твое́, и ны́нѣ лику́еши, преподо́бне, во о́нѣхъ оби́телехъ.

Яко звѣздѣ́, я́вльшуся тебѣ́, житіе́мъ и заре́ю боже́ственною чу́вствы просвѣще́нну, преставле́ніе, преподо́бне, твое́ звѣзда́ провозвѣсти́.

Въ черто́гъ Вы́шняго Ца́рствія, одѣ́янъ, вше́лъ еси́ досто́йно и восклони́вся съ Женихо́мъ, преподо́бне, на трапе́зѣ невеще́ственныя сла́дости.

Богоро́диченъ: Небе́сныя Тя́ си́лы, я́ко Ма́терь Жи́зни всѣ́хъ, по до́лгу дорино́сятъ и воспѣва́ютъ, Влады́чице, я́ко Предста́тельство ду́шъ на́шихъ.

Пѣ́снь 8.

Ирмо́съ: Богоглаго́ливіи о́троцы, въ пещи́ со огне́мъ пла́мень попира́юще, поя́ху: благослови́те, дѣла́ Госпо́дня, Го́спода.

Богоуправля́емое имѣ́я се́рдце, страсте́й мои́хъ мра́чную, о́тче, отжени́ бу́рю и ко приста́нищу тишины́ твоея́ наста́ви.

Насажде́нъ при боже́ственныхъ исхо́дищахъ любве́ во́дъ, дре́во жи́зни возрасти́ и плоды́ благоче́стія во вре́мя отда́лъ еси́.

Яко вра́чь неисцѣ́льныхъ неду́говъ и отгони́тель нечи́стыхъ духо́въ, блаже́нне Гео́ргіе, и моего́ грѣха́ неду́гъ уврачи́.

Богоро́диченъ: Кто́ изрече́тъ Боже́ственное рождество́ Твое́, Богороди́тельнице Марíе? Вся́ко бо естество́ диви́тся земноро́дныхъ и а́нгелъ, и Тя́ ублажа́ютъ.

Пѣ́снь 9.

Ирмо́съ: Проявле́нное на горѣ́ законополо́жнику во огни́ и купинѣ́, Рождество́ Приснодѣ́вы, въ на́ше вѣ́рныхъ спасе́ніе, пѣ́сньми немо́лчными велича́емъ.

Твои́хъ сле́зъ исто́чники безстра́стія воздѣ́лалъ еси́, преподо́бне, ра́й непоро́чно и многооби́ленъ пло́дъ изно́сиши, пита́я добродѣ́тельми боже́ственное ста́до.

Ты́ чи́сто Бо́гу прине́слъ еси́ служе́ніе и, вѣ́ры, преподо́бне, тече́ніе соверши́въ, ны́нѣ прія́лъ еси́ вѣне́цъ пра́вды изъ руки́ Христа́ Подвигополо́жника.

Дне́сь игра́етъ и лику́етъ вѣ́рныхъ мно́жество, мона́ховъ стада́, свяще́нниковъ собо́ри: тя́ бо вси́ о́бразъ спасе́нія обрѣто́ша, и пра́вилу изображе́ніе.

Богоро́диченъ: Богому́жно Твое́ рождество́, Всенепоро́чная Отрокови́це, я́ко Бо́га су́ща и Зижди́теля вѣко́въ моля́щи не оскудѣва́й непреста́нно, спасти́ ду́ши воспѣва́ющихъ Тя́.

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 30 об. – 33 об.

/ Къ оглавленію раздѣла /


Наверхъ / Къ титульной страницѣ

0