Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 20 октября 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

По указу Свят. Сѵнода (1885 г.) 6-го Апрѣля должно отправлять   п о л і е л е й   свт. Меѳодію.

Мѣ́сяца Апри́ллія въ 6-й де́нь.
Преподо́бнаго отца́ на́шего Меѳо́дія, учи́теля Слове́номъ, архіепи́скопа Мора́вскаго.

НА ВЕЧЕРНИ,
[Блаже́нъ му́жъ, 1-й антифо́нъ.] На Го́споди воззва́хъ: стихи́ры, гла́съ 4. Подо́бенъ: Даде́ зна́меніе.

Госпо́днимъ словесе́мъ послѣ́дуя,* Меѳо́діе блаже́нне,* благосло́вяше я́вѣ Отца́, у́бо Роди́теля Словеси́ су́ща* и Изводи́теля Ду́ху Пресвято́му.* И еще́ же и́стѣе исповѣ́даше, вопія́:* отъ Отца́, не отъ Сы́на Утѣ́шителя я́вѣ исходя́ща;* тѣ́мже яви́ся со отцы́ Пе́рваго Собо́ра* то́жде глаго́ляй, богогла́се,* съ тѣ́ми моли́ся Спа́су,* да спасе́тъ ны́ вся́.

Апо́стольскую благода́ть неску́дно отъ Бо́га пріе́мь,* о́тче Меѳо́діе,* проро́чества сподо́бися и чуде́съ же отъ Почти́вшаго тя́ досто́йно* глаго́лати пре́жде бу́дущая, я́ко настоя́щая, му́дре.* Ра́дуйся, слѣпы́мъ ви́дѣніе, и бѣсо́мъ прогони́телю,* и неду́жнымъ врачу́, сла́вне,* тѣ́мже пода́ждь на́мъ грѣхо́въ оставле́ніе* и ве́лію ми́лость.

Ина, стихи́ра:

Мора́вскія земли́ ве́лій граждани́нъ, сла́ва же и похвала́ сѣ́верскія страны́, святи́тель Меѳо́дій высо́кимъ ны́нѣ сзыва́етъ проповѣ́даніемъ. Пріиди́те, памятолю́бцы, вѣ́рою стецѣ́мся и ликовству́имъ съ ни́мъ въ пра́зднество успе́нія его́ пресла́внаго, да прино́ситъ то́й непреста́нну моли́тву къ Христу́ Бо́гу на́шему, да изба́витъ всея́ бѣды́ и напа́стей ду́ши на́ша.

Сла́ва, и ны́нѣ, богоро́диченъ.
[Вхо́дъ. Проки́менъ дне́. Чте́нія три́.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

При́тчей чте́ніе.

Уста́ пра́веднаго ка́плютъ прему́дрость, язы́къ же непра́веднаго поги́бнетъ. Устнѣ́ муже́й пра́ведныхъ ка́плютъ благода́ти, уста́ же нечести́выхъ развраща́ются. Мѣ́рила льсти́вая ме́рзость предъ Го́сподемъ, вѣ́съ же пра́ведный прія́тенъ Ему́. Идѣ́же а́ще вни́детъ досажде́ніе, та́мо и безче́стіе, уста́ же смире́нныхъ поуча́ются прему́дрости. Соверше́ніе пра́выхъ наста́витъ и́хъ, и поползнове́ніе отрица́ющихся упасе́тъ и́хъ. Не по́льзуютъ имѣ́нія въ де́нь я́рости, пра́вда же изба́витъ отъ сме́рти. Умеръ пра́ведный, оста́ви раска́яніе, нару́чна же быва́етъ и посмѣя́тельна нечести́выхъ па́губа. Пра́вда непоро́чнаго исправля́етъ пути́, въ нече́стіе же па́даетъ непра́вда. Пра́вда муже́й пра́выхъ изба́витъ и́хъ, безсовѣ́стіемъ же плѣня́ются беззако́нніи. Сконча́вшуся му́жу пра́ведну, не поги́бнетъ наде́жда, похвала́ же нечести́выхъ поги́бнетъ. Пра́ведникъ отъ ло́ва убѣ́гнетъ, въ него́же мѣ́сто предае́тся нечести́вый. Во устѣ́хъ нечести́выхъ сѣ́ть гра́жданомъ, чу́вство же пра́ведныхъ благопоспѣ́шное. Во благи́хъ пра́ведныхъ испра́вится гра́дъ, и въ поги́бели нечести́выхъ ра́дованіе. Во благослове́ніи пра́выхъ возвы́сится гра́дъ, усты́ же нечести́выхъ раскопа́ется. Руга́ется гра́жданомъ лише́нный ра́зума, му́жъ же му́дрый безмо́лвіе во́дитъ.

Прему́дрости Соломо́новы чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.]

Стихи́ры на стихо́внѣ зри́ въ слу́жбѣ св. Кири́ллу и Меѳо́дію, 11-го Маія.

[На стихо́внѣ стихи́ры, гла́съ 8:

Свѣ́тлостію житія́ ва́шего,* учи́теліе равноапо́стольніи,* я́ко звѣ́зды небе́сныя, на тве́рди церко́внѣй просія́ли есте́* и, мре́жею уче́ній ва́шихъ мно́гія язы́ки Христу́ улови́вше,* ко Свѣ́ту Непристу́пну востекли́ есте́,* идѣ́же со а́нгелы ны́нѣ водворя́ющеся,* мольбу́ сотвори́те о на́съ,* свяще́нную па́мять ва́шу о Го́сподѣ пра́зднующихъ.

Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.

Пріиди́те, о празднолю́бцы,* возвели́чимъ учи́тели,* апо́столомъ равнопресто́льныя и Слове́нъ сла́ву:* и́ми бо отъ пре́лести бѣсо́вскія свободи́вшеся,* свѣ́тъ благовѣ́стія Христо́ва прія́хомъ* и позна́хомъ Предвѣ́чное Сло́во,* отъ мра́ка грѣхо́внаго изба́вльшеся.

Сти́хъ: Уста́ пра́веднаго поуча́тся прему́дрости* и язы́къ его́ возглаго́летъ су́дъ.

Кири́лле богому́дре и Меѳо́діе боголюби́ве,* Це́ркве Слове́нскія апо́столи и первоучи́тели* и вѣ́рныхъ засту́пницы,* благоче́стія ревни́тели,* Ду́ха Свята́го орга́ни сладкогла́сніи,* ны́нѣ ве́ліе дерзнове́ніе у Христа́ Пастыренача́льника иму́ще,* моли́теся о на́съ, честну́ю па́мять ва́шу соверша́ющихъ,* да возведе́тъ отъ тли́ живо́тъ на́шъ, я́ко Многоми́лостивъ.

Сла́ва, гла́съ то́йже:

Ра́дуйся, дво́ице свяще́нная, свѣ́томъ богопозна́нія на́съ озари́вшая: Кири́лле, духо́вныя му́дрости исто́чниче живоно́сный, язы́ки Слове́нскія, жа́ждею истаява́ющія, напои́вый, Меѳо́діе, моли́твы чи́стое обита́лище. Христу́, Ему́же во сла́вѣ предстои́те, моли́теся прилѣ́жно, да ку́пно съ ва́ми Его́ велича́емъ и превозно́симъ во вся́ вѣ́ки.]

И ны́нѣ, богоро́диченъ.

По Ны́нѣ отпуща́еши.., тропа́рь, гла́съ 4:

Святи́теля Твоего́, Христе́, творя́ще свѣ́тло торжество́ успе́нія, ми́лости Твоея́ свы́ше пода́ждь, отве́рзи же Ца́рствія две́ри, разрѣши́ же ю́зы на́ша мно́гихъ грѣхо́въ хода́тайствомъ свята́го Твоего́ ученика́, отца́ на́шего.


НА УТРЕНИ,
Сѣда́льны по 1-мъ и 2-мъ стихосло́віи, и по поліеле́и велича́ніе и сѣда́ленъ, и по 50-мъ псалмѣ́ стихи́ру, зри́ въ слу́жбѣ св. Кири́ллу и Меѳо́дію, 11-го Маія.

[По 1-мъ стихосло́віи сѣда́ленъ, гла́съ 3:

Тро́ицѣ Живонача́льнѣй, Юже немо́лчно славосло́вятъ а́нгельскія си́лы и Юже велегла́сно во язы́цѣхъ проповѣ́дасте, ны́нѣ во Свѣ́тѣ непристу́пнѣмъ предстоя́ще, моли́теся прилѣ́жно, Кири́лле и Меѳо́діе, долго́въ разрѣше́ніе дарова́ти и вѣ́чнаго осужде́нія изба́вити, любо́вію па́мять ва́шу почита́ющія. [Два́жды.]

Сла́ва, и ны́нѣ, богоро́диченъ.

По 2-мъ стихосло́віи сѣда́ленъ, гла́съ 5:

Да ра́дуются дне́сь ро́ди слове́нстіи, свяще́нную па́мять учи́телей богому́дрыхъ свѣ́тло пра́зднующе: тѣ́ми бо нача́тся на сро́днѣмъ на́мъ язы́цѣ слове́нстѣмъ Литургíя Боже́ственная и все́ церко́вное служе́ніе соверша́тися, и тѣ́мъ неисчерпа́емый кла́дязь воды́, теку́щія въ жи́знь вѣ́чную, даде́ся на́мъ отъ нея́же пію́ще, не преста́немъ велича́ти ва́съ, Кири́лле и Меѳо́діе. Вы́ же, во сла́вѣ святы́хъ веселя́щеся, моли́теся прилѣ́жно спасти́ся душа́мъ на́шимъ. [Два́жды.]

Сла́ва, и ны́нѣ, богоро́диченъ.

На поліеле́и велича́ніе:

Велича́емъ ва́съ, святíи равноапо́стольніи Меѳо́діе и Кири́лле, вся́ слове́нскія страны́ уче́ньми свои́ми просвѣти́вшія и ко Христу́ приве́дшія.

Псало́мъ избра́нный святи́тельскій.

По поліеле́и сѣда́ленъ, гла́съ 4:

Пріиди́те, просвѣти́тели на́ша велегла́сно хвала́ми почти́мъ: тíи бо язы́ки слове́нскія, гла́домъ сло́ва Бо́жія погиба́вшія, ма́нною уче́нія богому́драго напита́ста и преложе́ніемъ Благовѣ́стія сы́на Гро́мова на сро́дную и́мъ бесѣ́ду, я́ко луче́ю со́лнечною, просвѣти́ста, отъ нея́же и мы́ озаре́ніе пріе́мше, благода́рственно воззове́мъ: ра́дуйтеся, Кири́лле и Меѳо́діе присносла́вніи. [Два́жды.]

Сла́ва, и ны́нѣ, богоро́диченъ.

Степе́нна, 1-й антифо́нъ 4-го гла́са. Проки́менъ, гла́съ 4: Свяще́нницы Твои́ облеку́тся въ пра́вду,* и преподо́бніи Твои́ возра́дуются. Сти́хъ: Услы́шите сія́, вси́ язы́цы, внуши́те, вси́, живу́щіи по вселе́ннѣй. Вся́кое дыха́ніе да хва́литъ Го́спода... Ева́нгеліе о́бщее святи́телемъ: [отъ Іоа́нна, зача́ло 35 отъ полу́].

По 50-мъ псалмѣ́ стихи́ра, гла́съ 6:

Апо́столомъ единонра́вныя, іера́рховъ удобре́ніе, язы́ковъ слове́нскихъ просвѣти́тели и те́плыя засту́пники, пріиди́те, празднолю́бцы, похва́льными пѣ́ніи воспои́мъ, глаго́люще: ра́дуйся, Кири́лле, богосло́вія трубо́ златокова́нная, та́инство Святы́я Тро́ицы подо́біемъ со́лнечнымъ уясни́вый и тѣ́мъ злоху́льная уста́ ага́рянская загради́вый; ра́дуйся и ты́ съ ни́мъ, Меѳо́діе, единому́дренно подвиза́выйся, моли́твами и зна́меніи тому́ споспѣшеству́я; и ны́нѣ, отцы́ всеблаже́нніи, не преста́йте моля́щеся о на́съ Христу́ Бо́гу, вѣ́рою и любо́вію ва́съ велича́ющихъ.]

Кано́нъ, гла́съ 2.

Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Да́ждь, Христе́ Спа́се, еди́не Милосе́рде, сло́во простра́нно, молю́ся Твоея́ ми́лости, да святи́теля Твоего́ восхвалю́ Меѳо́дія и Тя́ просла́влю.

Оста́вивъ ро́дъ и оте́чество, подру́жіе и дѣ́тій, свя́те учи́телю, въ пусты́ни изво́ли со святы́ми отцы́ жи́ти, пресла́вне.

Бра́нь лю́ту посрами́въ, о́тче, бѣсо́вскую, бра́нь лю́ту утоли́ грѣхо́въ мои́хъ, учи́телю Меѳо́діе, моли́твами твои́ми.

Богоро́диченъ: Кто́ изрещи́ Тебѣ́ досто́йно мо́жетъ зача́тіе Твое́, па́че словесе́, Бо́га бо роди́ пло́тію, Пречи́стая, на́мъ я́влена, Спа́са всѣ́мъ.

Пѣ́снь 3.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

О, пресла́вне, кто́ мо́жетъ изрещи́ Меѳо́дія добродѣ́тели и трудъ́, и́же пострада́ отъ ерети́къ тріязы́чныхъ.

Меѳо́діе свя́те, да́ръ ты́ прія́ отъ Бо́га и подаде́ тре́бующимъ, сла́вящимъ Бо́га, просла́вльшаго тя́.

Еже ми́ подаде́ бога́тство, Христе́ Спа́се, блу́дно жи́въ, погуби́хъ окая́нный, но обогати́ мя покая́ніемъ.

Богоро́диченъ: Марíе, злата́я кади́льнице, Ты́ стра́стный мо́й смра́дъ отжени́, утверди́ мене́, коле́блющася приложе́ніемъ льсти́ваго борца́.

Сѣда́ленъ, гла́съ 4. Подо́бенъ: Удиви́ся Іо́сифъ.

Яко свѣ́тлость отъ восто́ка тя́ Христо́съ возсія́въ, къ за́паду, о́тче, посла́ му́дра учи́теля Меѳо́дія всѣ́мъ, просвѣща́юща гра́ды мно́ги и стра́ны бу́квами твои́ми, почита́юща, богодухнове́нный, блаже́нне, уче́нія Ду́ха Пресвята́го, ны́нѣ моли́ся непреста́нно о хва́лящихъ тя́.

Пѣ́снь 4.

Ирмо́съ: Услы́шахъ, Го́споди, слу́хъ Тво́й и убоя́хся, разумѣ́хъ дѣла́ Твоя́, и диви́хся, и возопи́хъ: сла́ва си́лѣ Твое́й, Го́споди.

Тя́ и́мать, о́тче, земля́ Мора́вска стѣ́ну тве́рду, е́юже побѣжда́емъ еретики́.

Одесну́ю предстоя́ща Пресвяты́я Тро́ицы, учи́теля, моли́тася сохрани́ти ста́до Слове́нское.

Ду́шу свою́ и тѣ́ло же оскверни́хъ, неключи́мая дѣ́лая, но, Спа́се, очи́сти мя́ Свое́ю ми́лостію.

Богоро́диченъ: Молю́тися, Пречи́стая, заче́нши Бо́га безъ сѣ́мене, при́сно моли́ся за рабы́ Своя́.

Пѣ́снь 5.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Истый насто́льникъ апо́стола сла́внаго Андрони́ка, сла́вне, яви́ся, украся́ престо́лъ Святы́я Це́ркве Панно́нскія, му́дре.

Тя́ мо́лимъ, Меѳо́діе, святи́телю сла́вне, разгна́ное еретики́ ста́до твое́ сохрани́ въ вѣ́рѣ правовѣ́рнѣй моли́твами твои́ми, о́тче.

Пучи́ну преплыва́я жите́йскую, прелетѣ́, о́тче, оре́льски, потопля́ема мя́ грѣхи́, свя́те, изведи́, молю́ся, моли́твами твои́ми, му́дре.

Богоро́диченъ: Тебѣ́, ро́ждшей Творца́ вся́ческимъ, вопіе́мъ: ра́дуйся, Пречи́стая, ра́дуйся, возсія́вшая на́мъ Свѣ́тъ, ра́дуйся, вмѣсти́вшая Бо́га Невмѣсти́маго.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Ты́ отъ за́пада, свя́те, возсія́, я́коже звѣзда́, своя́ лучи́ посыла́ющи до восто́ка, и сѣ́вера, и ю́га, сла́вне Меѳо́діе.

Юже слу́жбу, сла́вне, прія́ отъ Христа́ Спа́са Милосе́рдаго, сконча́, святи́телю, я́ко вѣ́ренъ ра́бъ Го́споду своему́.

Отъ скве́рны грѣхо́въ мои́хъ измы́й мя́, Ще́дре Спаси́телю, еди́не Милосе́рде, Ты́ бо еди́нъ и́маши вла́сть, Го́споди, отпуща́ти грѣхи́.

Богоро́диченъ: Вѣ́рнаго Царя́ на́шего утверди́, побѣ́ду дая́ Ему́, я́ко Всемогу́щь, на ва́рвары, Влады́ко, рожде́йся изъ Чи́стыя и Безму́жныя Ма́тере.

Конда́къ, гла́съ 2:

Боже́ственна и вѣ́рна Меѳо́дія вси́ воспои́мъ, лю́діе, и любо́вію ублажи́мъ, я́ко па́стыря вели́каго Слове́номъ, служи́теля Тро́ицы че́стна, прогони́теля е́реси, мо́литъ бо ся о всѣ́хъ на́съ.

Икосъ:

Ца́рственная Панно́нія, ку́пно но́віи су́ще лю́діе, тебе́ па́стыря че́стна свѣ́дящи, ра́дуется, мы́ же добродѣ́тели твое́й поспѣ́шествуемъ, труды́ же и болѣ́зни похва́льныя та́йно тебе́ почита́ющимъ мѵ́ро многоче́стное су́ть, Меѳо́діе святи́телю, моли́ся непреста́нно о всѣ́хъ на́съ.

Пѣ́снь 7.

Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

О ва́ю, свята́я, хва́лится сла́вно гра́дъ Солу́нскій, Кири́лле свя́те и Меѳо́діе, Ми́сія, и Панно́нія, и Мора́вская, блаже́нніи, земля́, сла́вящи и вопію́щи: благослове́нъ еси́, Бо́же оте́цъ на́шихъ.

На ка́мени ты́ вѣ́ры утверди́ но́зѣ свои́, блаже́нне, и не поколеба́ тебе́, свя́те, богопроти́вныхъ духо́въ си́ла, но, я́ко хра́брый боре́цъ, проти́вяся и́мъ, поя́ше: благослове́нъ еси́, Бо́же оте́цъ на́шихъ.

Избоде́на мя́ разбо́йники, Христе́, и уя́звлена, поми́луй мя́, молю́ся Тебѣ́, и возле́й еле́й ми́лости Твоея́ на мя́, я́ко да восхвалю́ Тя́: Бо́же, благослове́нъ еси́.

Богоро́диченъ: Невеще́ственнаго Свѣ́та селе́ніе Твое́ чре́во бы́сть, свѣ́тлостьми Бо́жія ра́зума безбо́жіе отгна́вшее, Чи́стая Богоневѣ́сто Дѣви́це, е́же пое́мъ, вопію́ще: благослове́нъ еси́, Бо́же оте́цъ на́шихъ.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Сла́венъ, свя́те Меѳо́діе, ты́ бы́лъ еси́, ко́зни вра́жія низложи́въ, сла́вне учи́телю прему́дре, — по́йте, — вопію́ще, — благослови́те, вся́ дѣла́, Го́спода, по́йте и превозноси́те Его́ во вѣ́ки.

Архіере́й ты́ бы́лъ еси́ по чи́ну Ааро́ню вѣ́рнымъ, блаже́нне, Агнца рука́ми твои́ми святы́ми жру́щій, поя́: благослови́те, вся́ дѣла́, Го́спода, по́йте и превозноси́те Его́ во вѣ́ки.

Но́щь лю́та мя́, Христе́, грѣхо́вная пости́же и лю́тѣ зѣло́ омрачи́ ду́шу мою́, молю́тися, Бо́же, просвѣти́ и на покая́ніе наста́ви пою́ща Тя́ во вѣ́ки.

Богоро́диченъ: Изнемо́гшу мно́гими прило́ги лука́ваго, Богоро́дице, окая́нную ду́шу мою́ цѣле́бными моли́твами, Дѣви́це, здра́ву содѣ́лай, да Тя́ прославля́емъ во вѣ́ки.

Пѣ́снь 9.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Тя́, блаже́нне, пое́тъ земля́ Мора́вская, че́стно твое́ тѣ́ло иму́щи, и Панно́нская, святи́телю, просвѣще́на тобо́ю, и лю́діе, ею́, соше́дшеся, пра́зднуютъ твою́ па́мять.

Иму́ща, свята́я, прю́ о Святѣ́й Тро́ицѣ, Кири́лле преподо́бне [и] Меѳо́діе святи́телю, ста́до ва́ше свято́е, ходя́ще по земли́ стра́ннѣй, сохра́нша, расти́та моли́твами свои́ми, блаже́нная.

Ны́нѣ припа́даю, учи́телю свя́те, моля́ся тебѣ́: умиле́нное сіе́ пѣ́ніе пріими́ и проси́ же отпу́ста грѣхо́въ мои́хъ отъ Спа́са Христа́.

Богоро́диченъ: Ра́дуйся, Пресвята́я Богоро́дице Марíе, ра́дуйся, Непоро́чная, иску́са му́жеска не позна́вшая, ра́дуйся, Свѣти́ло всему́ мíру ро́ждши, моля́щи не преста́й къ Бо́гу Спа́су.

На хвали́техъ стихи́ры и на литургíи блаже́нна, проки́менъ, аллилу́ія и прича́стенъ зри́ въ слу́жбѣ 11-го Ма́ія, свв. Кири́ллу и Меѳо́дію.

[Свѣти́ленъ:

Учи́тели святíи, па́мять ва́шу свѣ́тло пра́зднующе, мо́лимъ ва́съ всеусе́рдно: язы́ки, и́хже сокро́вищемъ благовѣ́стія обогати́сте, на ка́мени исповѣ́данія Христо́ва утверди́те, и соблюди́те въ ми́рѣ живо́тъ на́шъ. [Два́жды.]

Сла́ва, и ны́нѣ, богоро́диченъ.

На хвали́техъ стихи́ры, гла́съ 4. Подо́бенъ: Яко до́бля.

Кири́лле и Меѳо́діе богому́дріи,* апо́стольскимъ стопа́мъ послѣ́дующе,* ко взыска́нію люде́й заблу́ждшихъ единому́дренно подви́гшеся,* я́ко орли́ скоропаря́щія, стра́ны Слове́нскія облетѣ́ли есте́,* я́же свѣ́томъ богопозна́нія озари́вше,* приведо́сте ко Іису́су Человѣколю́бцу* и Спа́су ду́шъ на́шихъ.

Виногра́да Христо́ва дѣ́лателіе,* благоче́стія насади́тели,* лю́ди Слове́нскія, я́ко дра́хму поги́бшую,* со тща́ніемъ взыска́вше, обрѣли́ есте́, богоно́сніи отцы́,* ю́же въ сокро́вищницу жи́зни вѣ́чныя прія́тъ,* ра́дуяся, со а́нгелы Іису́съ Человѣколю́бецъ,* и Спа́съ ду́шъ на́шихъ.

Святы́я Тро́ицы побо́рницы* и заблу́ждшихъ наста́вницы,* злохуле́ніе Ага́рянское препрѣ́вшіи* и нече́стіе Іуде́йское посрами́вшіи,* Це́рковь, ю́же стяжа́ли есте́* богоуго́дными труды́ и по́ты ва́шими,* сохрани́ти потщи́теся отъ навѣ́товъ вра́жіихъ неврежде́ну* и благопрія́тну Іису́су Человѣколю́бцу* и Спа́су ду́шъ на́шихъ.

Сла́ва, гла́съ 6:

Просвѣти́телей на́шихъ благоче́стно па́мять соверша́юще, лю́діе, благода́рственно возопіи́мъ: ра́дуйтеся, свѣти́льницы пресвѣ́тліи, свѣ́томъ богопозна́нія стра́ны Слове́нскія озари́вшія, ра́дуйтеся, па́стыріе до́бріи, слове́сныя о́вцы, въ де́бряхъ невѣ́рія разсѣ́янныя, во еди́но собра́вшіи и къ Пастыренача́льнику Христу́ приве́дшія. Его́же велича́юще, ва́съ ублажа́емъ.

И ны́нѣ, богоро́диченъ.
Славосло́віе вели́кое. Ектеніи́ и отпу́стъ.



НА ЛИТУРГІИ,

Блаже́нна отъ кано́на свята́го, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ ко Евре́емъ, зача́ло 318. Аллилу́ія, гла́съ 2: Свяще́нницы Твои́ облеку́тся въ пра́вду, и преподо́бніи Твои́ возра́дуются. Уста́ моя́ возглаго́лютъ прему́дрость, и поуче́ніе се́рдца моего́ ра́зумъ. Ева́нгеліе отъ Матѳе́я, зача́ло 11. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Избо́рникъ, слу́жбы, житія́, словеса́ похва́лна и ака́ѳистъ святы́мъ учи́телемъ Слове́нскимъ Кири́ллу и Меѳо́дію обдержа́й. — Издаде́ся въ па́мять о дни́ свята́го Меѳо́дія.  — СПб.: Въ Сѵнода́льной Тѵпогра́фіи, 1886. — С. 27-34.

/ Къ оглавленію раздѣла /


Наверхъ / Къ титульной страницѣ

0