Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 12 декабря 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 6-й де́нь.
Иже во святы́хъ отца́ на́шего Евтихíя, архіепи́скопа Константино́польскаго.

[ВЕЧЕРЪ,]
Стихи́ры, гла́съ 2. Подо́бенъ: Егда́ отъ дре́ва.

Ста́ду и овца́мъ Христо́вымъ слове́снымъ,* Евтихíе блаже́нне,* тебе́ жре́бій подаде́* побо́рника непобѣди́ма Це́рковь Бо́жія,* злочести́ваго отгоня́ща Несто́рія отъ сея́,* пресла́вную Бо́жію Ма́терь Чи́стую* всу́е поху́лившаго,* Сію́, глаго́люща,* пои́стиннѣ не бы́ти Богоро́дицу,* его́же отри́нулъ еси́.

На травѣ́ вѣ́ры пра́выя* и на водѣ́ и́стинныя му́дрости живы́я,* и зла́цѣ кра́снѣ пребы́ти твоему́ ста́ду,* му́дрѣ наста́вилъ еси́,* въ па́жить богонасажде́нну,* пи́щу нетлѣ́нія,* неотпа́дающую и неоскудѣ́ющу,* уста́, износя́ща боже́ственныя глаго́лы жи́зни вѣ́чныя* и неразори́мо умышле́ніе.

Коре́ніе и те́рніе посѣка́я* учи́тельнымъ твои́мъ серпо́мъ,* ерети́ческая словеса́* ра́ломъ твои́мъ* сердца́ посѣка́лъ еси́ ме́рзостная,* и сѣ́ялъ еси́ боже́ственныхъ повелѣ́ній* твое́ исправле́ніе и правоту́,* и, сія́ плодоно́сна показа́въ,* и́маши тала́нтъ тво́й сугу́бъ,* и сего́ прино́сиши Влады́цѣ твоему́.

Сла́ва, и ны́нѣ, богоро́диченъ, подо́бенъ то́йже:

Ина́го держа́внаго прибѣ́жища* и крѣ́пости, столпа́ и стѣны́ необори́мыя* вои́стинну не стяжа́хомъ,* ра́звѣ Тебе́, Пречи́стая.* Къ Тебѣ́ прибѣга́емъ и Тебѣ́ вопіе́мъ:* Влады́чице, помози́, да не поги́бнемъ,* покажи́ Твою́ благода́ть на ны́,* и крѣ́пости сла́ву,* и милосе́рдія Твоего́ вели́чество.

Крестобогоро́диченъ:

Дре́ву Кре́стному Тя́, Іису́се,* пригвожде́на зря́щи, Неискусобра́чная,* пла́чущи, глаго́лаше:* Ча́до сла́дкое,* почто́ оста́вилъ еси́ Мене́,* ро́ждшую Тя́, еди́ну,* Свѣ́те непристу́пный* Пребезнача́льнаго Отца́?* Потщи́ся и просла́вися,* я́ко да сла́ву получа́тъ Боже́ственную* Боже́ственныя стра́сти Твоя́ сла́вящія.

Тропа́рь, гла́съ 4:

Пра́вило вѣ́ры и о́бразъ кро́тости, воздержа́нія учи́теля яви́ тя ста́ду твоему́ я́же веще́й и́стина, сего́ ра́ди стяжа́лъ еси́ смире́ніемъ высо́кая, нището́ю бога́тая, о́тче Евтихíе, моли́ Христа́ Бо́га спасти́ся душа́мъ на́шимъ.


[НА УТРЕНИ,]
Кано́нъ, его́же краегране́сіе: Чудодѣ́тельному Евтихíю удивля́юся. Творе́ніе Ѳеофа́ново. Гла́съ 6.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Добродѣ́тельми благополу́чествовавъ и просвѣ́щся свѣтолу́чными сія́ньми даро́въ Бо́жіихъ, злополуче́нія изба́ви мя́ страсте́й моли́твами твои́ми, му́дре, я́ко да воспою́ тя.

Небосажде́нна розга́ во дво́рѣхъ Бо́жіихъ, прозя́блъ еси́ гобзова́нныя плоды́ добродѣ́тельныхъ дѣя́ній, вку́пѣ и чуде́съ пои́стиннѣ, блаже́нне Евтихíе.

Умъ влады́ку сотвори́въ, страсте́й томи́тельство, преподо́бне, удержа́лъ еси́, тѣ́мже, безстра́стія кри́лы возвы́сився, къ са́мымъ Бо́жіимъ приве́лся еси́ селе́ніемъ.

Богоро́диченъ: Твоего́ пріе́мше Содѣ́теля, я́ко Са́мъ восхотѣ́, изъ безсѣ́меннаго Твоего́ чре́ва, па́че ума́ воплоща́ема, Чи́стая, тва́рей вои́стинну яви́лася еси́ Влады́чица.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Свята́го Ду́ха бы́лъ еси́ хра́мъ, богоно́се, тебе́ сама́го очи́стивъ отъ тимѣ́нія страсте́й прилѣжа́ніемъ мно́гимъ, святи́телю сла́вне Евтихíе.

Сы́нъ дне́ прича́стіемъ свѣ́тлости невеще́ственныя показа́лся еси́ и свѣ́томъ врачева́ній нело́жныхъ мглу́ страсте́й отго́ниши вре́да, всеприснопа́мятне.

Сосца́ сса́въ издѣ́тска воздержа́нія, въ мѣ́ру моли́твами непреста́нными во́зраста Христо́ва дости́глъ еси́ вои́стинну, святи́телю сла́вне Евтихíе.

Богоро́диченъ: Боже́ственнаго рождества́ Твоего́, Чи́стая, вся́кій естества́ чи́нъ превосхо́дитъ чу́до: Бо́га бо преесте́ственнѣ зачала́ еси́ во чре́вѣ и, ро́ждши, пребыва́еши Приснодѣ́ва.

Сѣда́ленъ, гла́съ 3. Подо́бенъ: Боже́ственныя вѣ́ры.

Боже́ственною си́лою одѣ́явся, обнажи́лъ еси́ крѣ́пость льсти́ваго, чудодѣ́йствуя, богоно́се, изря́дная. Отгна́нъ же непра́ведно ста́да твоего́, па́ки возврати́лся еси́ въ не́, прославля́емь, о́тче преподо́бне: Христа́ Бо́га моли́ дарова́ти на́мъ ве́лію ми́лость.

Сла́ва, и ны́нѣ, богоро́диченъ.

Боже́ственная ски́нія была́ еси́ Сло́ва, еди́на Пречи́стая Ма́ти Дѣ́во, чистото́ю а́нгелы превозше́дшая, па́че всѣ́хъ мене́, пе́рсть бы́вша, оскверне́на плотски́ми прегрѣше́ньми, очи́сти моли́твъ Твои́хъ боже́ственными вода́ми, подаю́щи, Чи́стая, ве́лію ми́лость.

Крестобогоро́диченъ:

Нескве́рная Агница Сло́ва, нетлѣ́нная Дѣ́ва Ма́ти, на Крестѣ́ зря́щи повѣ́шена изъ Нея́ безъ болѣ́зни прозя́бшаго, ма́терски подо́бно рыда́ющи, вопія́ше: увы́ Мнѣ́, Ча́до Мое́, ка́ко стра́ждеши во́лею, хотя́ изба́вити отъ страсте́й безче́стія человѣ́ка?

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Заре́ю, всему́дре, боже́ственныя благода́ти осіява́емь, вся́кое ерети́ческое мнѣ́ніе омрачи́лъ еси́ и уясни́лъ еси́ люде́й правосла́вныхъ собо́ры.

Не стужи́лъ еси́, за вѣ́ру гоне́нія терпя́, и́бо Того́ имѣ́лъ еси́, спобора́юща тебѣ́, гони́маго Христа́, святи́телю всече́стне.

Возвы́сивъ, поста́ви на ка́мени Христо́съ Своея́ и́стины твоея́ души́, блаже́нне, стопы́ и запя́тъ враго́въ вознесе́нная мудрова́нія.

Богоро́диченъ: Яко вои́стинну невѣща́нна и непости́жна Твоего́ боголѣ́пнаго, Богоро́дице, су́ть рождества́ су́щимъ на земли́ и на небеси́, Приснодѣ́во, та́инства.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

До́блественнѣ терпя́ разлуче́ніе вруче́ннаго ти́ ста́да, о́тче, непра́ведно изгна́нъ бы́лъ еси́; а́біе же къ сему́ па́ки тече́ши ра́достно, вельми́ отъ всѣ́хъ восхваля́емый.

Не въ гада́ніихъ зри́ши сла́ву, ю́же возжела́лъ еси́ Бо́жію отъ младе́нства, блаже́нне Евтихíе, лице́мъ же па́че ны́нѣ къ лицу́ разрѣ́шшимся зерца́ломъ плотски́мъ, о́тче на́шъ.

Во́дъ боже́ственныхъ твоя́ душа́, о́тче, испо́лньшися, рѣ́ки Це́ркви вои́стинну источи́ уче́ній, му́дре Евтихíе, и сея́ напая́еши, блаже́нне, бразды́.

Богоро́диченъ: Иже Богоро́дицу Тя́ отъ души́, Влады́чице мíра Блага́я, исповѣ́дающія спаса́й: Тя́ бо предста́тельство непобори́мое стяжа́хомъ, су́щую Богороди́тельницу.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Въ тебѣ́ всели́ся Тро́ица я́ко въ чи́стомъ отъ страсте́й слія́нія и дарова́ній испо́лни вои́стинну, богому́дре Евтихíе, и́миже вся́къ неду́гъ отго́ниши при́сно.

Возвы́сился еси́, стяжа́въ въ се́рдцы твое́мъ нело́жнѣ высокотво́рное смире́ніе, и де́монскія вся́ ко́зни до конца́ смири́лъ еси́, святи́телю Госпо́день пресла́вне.

Жите́йское мо́ре безво́лненнѣ преше́дъ, къ приста́нищемъ дости́глъ еси́ Ца́рствія, о́тче, небе́снаго, Бо́гу бре́мя души́ спа́слъ еси́, досточу́дне.

Богоро́диченъ: Пречи́стая Влады́чице, ро́ждшая человѣ́комъ Ко́рмчію и Го́спода, страсте́й мои́хъ нестоя́нное и лю́тое утоли́ смуще́ніе и тишину́ пода́ждь се́рдцу моему́.

Конда́къ, гла́съ 8:

Боже́ственнаго вѣ́рно Евтихíя вси́ пою́ще, лю́діе, любо́вію да ублажи́мъ, я́ко па́стыря вели́ка и служи́теля, и учи́теля прему́дра, и прогони́теля ересе́й, мо́литъ бо Го́спода о всѣ́хъ на́съ.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Снѣгови́дну, о́тче, ду́шу стяжа́въ, добродѣ́телей бѣ́лостію уподо́бился еси́ а́нгеломъ. Тѣ́мже съ ни́ми лику́еши и, ра́дуяся, вопіе́ши: благослове́нъ еси́, Бо́же оте́цъ на́шихъ.

Же́ртву я́ко непоро́чну, прине́слъ еси́ тя́ сама́го отъ младе́нства, преподо́бне, Влады́цѣ твоему́ сласте́й умерщвле́ніемъ я́ко вои́стинну. Тѣ́мже, ра́дуяся, вопіе́ши: благослове́нъ еси́, Бо́же оте́цъ на́шихъ.

То́ки твои́хъ сле́зъ, о́тче, угаси́ша о́гненное пале́ніе плотски́хъ сласте́й и бы́ша исцѣле́ній роса́ вѣ́рно зову́щимъ всегда́ Христу́: благослове́нъ еси́, Бо́же оте́цъ на́шихъ.

Богоро́диченъ: Тя́, Всенепоро́чная и Ма́ти Приснодѣ́во, позна́хомъ спасе́ніе, человѣ́цы, и́бо въ нѣ́дрѣхъ Отца́ неразлу́чный Сы́нъ изъ Тебе́ воплоти́ся. Тѣ́мже Благослове́на еси́ въ ро́ды родо́въ.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Дрема́ніе уны́нія оттря́съ добродѣ́телей попече́ніемъ, о́тче, бдѣ́лъ еси́, до́ндеже Бо́га Іа́ковля яви́лся еси́ селе́ніе, Его́же превозно́симъ во вся́ вѣ́ки.

Щито́мъ благоче́стія защища́яся, и, я́ко обоюдоо́стръ ме́чь, воспріи́мъ повелѣ́ніе честно́е, тве́рдо вся́ ссѣ́клъ еси́ ерети́ческія полки́, богому́дре.

Безкро́вныя же́ртвы Бо́гу прине́слъ еси́, смире́ніемъ се́рдца, о́тче Евтихíе, же́ртвуя тебе́ ра́ди Пожре́нному, я́ко овча́ти, Его́же превозно́симъ во вся́ вѣ́ки.

Тро́иченъ: Еди́но естество́ Тро́ицы, неисче́тную си́лу, превозше́дшую времена́ вся́ и естества́ по́мыслъ, при́сно правосла́вно проповѣ́даемъ и превозно́симъ во вся́ вѣ́ки.

Богоро́диченъ: Въ рождествѣ́ избѣжа́ла еси́ болѣ́зни, Чи́стая, и, ро́ждши, Дѣ́ва па́ки пребыла́ еси́: вся́ бо твори́тъ Іису́съ Бо́гъ и Человѣ́къ, Его́же превозно́симъ во вся́ вѣ́ки.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Ма́лыми велича́йшая стяжа́въ и тлѣ́нными нетлѣ́нная до́брѣ искупи́въ, Ца́рство недви́жимое прія́лъ еси́, немимоходя́щую сла́ву получи́лъ еси́, добродѣ́телей твои́хъ добро́тами украша́емь.

Чи́сто житіе́ твое́ соверши́лъ еси́ и Чи́стыя Дѣ́вы служи́тель яви́лся еси́, Евтихíе, іера́рхъ Бо́жій и́стиннѣйшій, сто́лпъ правосла́вія, тве́рдь вѣ́ры, стѣна́ люде́й избра́нныхъ, богоблаже́нне.

Плотско́е мудрова́ніе повину́лъ еси́ по́мыслу и, я́коже безпло́тенъ, во пло́ти на земли́ пожи́лъ еси́, Евтихíе, тѣ́мже со безпло́тными боже́ственными си́лами Влады́цѣ всѣ́хъ и Бо́гу, ра́дуяся, предстои́ши.

Яко а́нгеломъ ны́нѣ купножи́тель, патріа́рхомъ, му́ченикомъ и преподо́бнымъ равносе́льникъ, съ ни́ми моли́ся Го́сподеви рѣше́ніе грѣхо́въ всѣ́мъ дарова́ти, свяще́нную твою́ на земли́ па́мять творя́щимъ, му́дре.

Богоро́диченъ: Сы́на, безлѣ́тно отъ Отца́ возсія́вшаго, Ты́, во чре́вѣ несказа́нно заче́нши, родила́ еси́, Богома́ти Чи́стая, Дѣ́во нескве́рная. Моли́, Пресвята́я, о рабѣ́хъ Твои́хъ Того́, я́ко Человѣколю́бца Бо́га, спасти́ ро́дъ на́шъ.

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 27 – 30 об.

/ Къ оглавленію раздѣла /


Наверхъ / Къ титульной страницѣ

0