Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 24 мая 2017 г. Сейчасъ на порталѣ посѣтителей - 7.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Древняя служба равноап. Меѳодію составлена учениками святителя въ Болгаріи въ X вѣкѣ; свѣрена со спискомъ службы XIII вѣка.

Мѣ́сяца Апри́ллія въ 6-й де́нь.
Свята́го равноапо́стольнаго Меѳо́дія, учи́теля слове́номъ, архіепи́скопа Мора́вскаго.

ВЕЧЕРЪ,
На Го́споди воззва́хъ: стихи́ры, гла́съ 4. Подо́бенъ: Да́лъ еси́ зна́меніе.

Зако́нъ благода́ти наказа́теля стяжа́въ себѣ́,* святи́телю Меѳо́діе,* тѣ́мъ у́бо святы́мъ бу́квамъ бы́лъ еси́ прему́дръ устрои́тель* и пре́далъ еси́ свои́мъ лю́демъ и ста́ду уче́ніе и́хъ,* и́миже чту́щіи и поуча́ющіися въ святы́хъ кни́гахъ* благословя́тъ Го́спода.* Блажи́мъ тя́ досто́йно.

Госпо́днимъ словесе́мъ послѣ́дуя,* Меѳо́діе блаже́нне,* благосло́вяше я́вѣ Отца́, у́бо Роди́теля Словеси́ су́ща* и Изводи́теля Ду́ху Пресвято́му.* И еще́ же и́стѣе исповѣ́даше, вопія́:* отъ Отца́, не отъ Сы́на Утѣ́шителя я́вѣ исходя́ща;* тѣ́мже яви́ся со отцы́ Пе́рваго Собо́ра* то́жде глаго́ляй, богогла́се,* съ тѣ́ми моли́ся Спа́су,* да спасе́тъ ны́ вся́.

Апо́стольскую благода́ть неску́дно отъ Бо́га пріе́мъ,* о́тче Меѳо́діе,* проро́чества сподо́бися и чуде́съ же отъ Почти́вшаго тя́ досто́йно* глаго́лати пре́жде бу́дущая, я́ко настоя́щая, му́дре.* Ра́дуйся, слѣпы́мъ ви́дѣніе, и бѣсо́мъ прогони́телю,* и неду́жнымъ врачу́, сла́вне,* тѣ́мже пода́ждь на́мъ грѣхо́въ оставле́ніе* и ве́лію ми́лость.

Сла́ва, гла́съ то́йже:

Мора́вскія земли́ ве́лій граждани́нъ, сла́ва же и похвала́ сѣ́верскія страны́, святи́тель Меѳо́дій высо́кимъ ны́нѣ созыва́етъ проповѣ́даніемъ. Пріиди́те, памятолю́бцы, вѣ́рою стеце́мся и ликовству́имъ съ ни́мъ въ пра́зднество успе́нія его́ пресла́внаго, да прино́ситъ то́й непреста́нну моли́тву ко Христу́ Бо́гу на́шему, да изба́витъ всея́ бѣды́ и напа́стей ду́ши на́ша.

И ны́нѣ, тріо́ди.

На стихо́внѣ стихи́ры тріо́ди.
Сла́ва, свята́го, гла́съ 8. Парѳе́нія епи́скопа:

Пріиди́те, празднолю́бцы, вѣ́рою стеце́мся и пѣ́сньми свяще́нными ликовству́имъ во успе́ніи святи́теля Меѳо́дія, Мора́вскія земли́ просвѣти́теля и слове́нскихъ стра́нъ равноапо́стола. Се́й бо мíра кра́сная оста́вивъ и кре́стъ апо́стольства на ра́мо взе́мъ, просвѣти́ съ бра́томъ ро́ды слове́нскія, и по успе́ніи прія́тъ отъ Бо́га мзду́ пра́вды, и мо́лится непреста́нно изба́витися отъ бѣ́дъ и напа́стей душа́мъ на́шимъ.

И ны́нѣ, тріо́ди.

Тропа́рь свята́го, гла́съ 4:

Святи́теля Твоего́, Христе́, творя́щимъ свѣ́тло торжество́ успе́нія, ми́лость Твою́ свы́ше пода́ждь, отве́рзи же Ца́рствія две́ри, разрѣши́ же у́зы на́ша мно́гихъ грѣхо́въ хода́тайствомъ свята́го Твоего́ ученика́, отца́ на́шего.


НА УТРЕНИ,
Кано́нъ, гла́съ 2.

Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Да́ждь, Христе́ Спа́се, еди́не Милосе́рде, сло́во простра́нно, молю́ся Твоея́ ми́лости, да святи́теля Твоего́ восхвалю́ Меѳо́дія и Тя́ просла́влю.

Оста́вивъ ро́дъ и оте́чество, подру́жіе и дѣ́тій, свя́те учи́телю, въ пусты́ни изво́ли со святы́ми отцы́ жи́ти, пресла́вне.

Бра́нь лю́ту посрами́въ, о́тче, бѣсо́вскую, бра́нь лю́ту утоли́ грѣхо́въ мои́хъ, учи́телю Меѳо́діе, моли́твами твои́ми.

Богоро́диченъ: Кто́ изрещи́ Тебѣ́ досто́йно мо́жетъ зача́тіе Твое́, па́че словесе́, Бо́га бо роди́ пло́тію, Пречи́стая, на́мъ явле́на, Спа́са всѣ́мъ.

Пѣ́снь 3.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

О, пресла́вне! кто́ мо́жетъ изрещи́ Меѳо́дія добродѣ́тели и труды́, и́же пострада́ отъ ерети́къ тріязы́чныхъ.

Меѳо́діе свя́те! да́ръ ты́ прія́лъ отъ Бо́га и подаде́ тре́бующимъ, сла́вящимъ Бо́га, просла́вльшаго тя́.

Еже ми́ подаде́ бога́тство, Христе́ Спа́се, блу́дно жи́въ, погуби́хъ окая́нный, но обогати́ мя покая́ніемъ.

Богоро́диченъ: Марíе, злата́я кади́льнице, Ты́ стра́стный мо́й смра́дъ отжени́, утверди́ мене́, коле́блющася приложе́ніемъ льсти́ваго борца́.

Сѣда́ленъ, гла́съ 4. Подо́бенъ: Удиви́ся Іо́сифъ.

Яко свѣ́тлость отъ восто́ка тя́ Христо́съ возсія́въ, къ за́паду, о́тче, посла́ му́дра учи́теля Меѳо́дія всѣ́мъ, просвѣща́юща гра́ды мно́ги и страны́ бу́квами твои́ми, почита́юща, богодухнове́нныя, блаже́нне, уче́нія Ду́ха Пресвята́го, ны́нѣ моли́ся непреста́нно о хва́лящихъ тя́.

И ны́нѣ, тріо́ди.

Пѣ́снь 4.

Ирмо́съ: Услы́шахъ, Го́споди, слу́хъ Тво́й и убоя́хся, разумѣ́хъ дѣла́ Твоя́, и диви́хся, и возопи́хъ: сла́ва си́лѣ Твое́й, Го́споди.

Тя́ и́мать, о́тче, земля́ Мора́вская стѣ́ну тве́рду, е́юже побѣжда́емъ еретики́.

Одесну́ю предстоя́ща Пресвяты́я Тро́ицы, учи́теля, моли́тася сохрани́ти ста́до слове́нское.

Ду́шу свою́ и тѣ́ло же оскверни́хъ, неключи́мая дѣ́лая, но, Спа́се, очи́сти мя́ Свое́ю ми́лостію.

Богоро́диченъ: Молю́тися, Пречи́стая, заче́нши Бо́га безъ сѣ́мене, при́сно моли́ся за рабы́ Своя́.

Пѣ́снь 5.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Истый насто́льникъ апо́стола сла́внаго Андрони́ка, сла́вне, яви́ся, украся́ престо́лъ Святы́я Це́ркве Панно́нскія, му́дре.

Тя́ мо́лимъ, Меѳо́діе, святи́телю сла́вне, разгна́ное еретики́ ста́до твое́ сохрани́ въ вѣ́рѣ правовѣ́рнѣй моли́твами твои́ми, о́тче.

Пучи́ну преплыва́я жите́йскую, прелете́, о́тче, оре́льски, потопля́ема мя́ грѣхи́, свя́те, изведи́, молю́ся, моли́твами твои́ми, му́дре.

Богоро́диченъ: Тебѣ́, ро́ждшей Творца́ вся́ческимъ, вопіе́мъ: ра́дуйся, Пречи́стая, ра́дуйся, возсія́вшая на́мъ Свѣ́тъ, ра́дуйся, вмѣсти́вшая Бо́га Невмѣсти́маго.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Ты́ отъ за́пада, свя́те, возсія́въ, я́коже звѣзда́, своя́ лучи́ посыла́ющи до восто́ка, и сѣ́вера, и ю́га, сла́вне Меѳо́діе.

Юже слу́жбу, сла́вне, прія́ отъ Христа́ Спа́са Милосе́рдаго, сконча́, святи́телю, я́ко вѣ́ренъ ра́бъ Го́споду своему́.

Отъ скве́рны грѣхо́въ мои́хъ измы́й мя́, Ще́дре Спаси́телю, еди́не Милосе́рде, Ты́ бо еди́нъ и́маши вла́сть, Го́споди, отпуща́ти грѣхи́.

Богоро́диченъ: Вѣ́рнаго Импера́тора на́шего утверди́, побѣ́ду дая́ Ему́, я́ко Всемогу́щъ, на ва́рвары, Влады́ко, рожде́йся изъ Чи́стыя и Безму́жныя Ма́тере.

Конда́къ, гла́съ 2:

Боже́ственна и вѣ́рна Меѳо́дія вси́ воспои́мъ, лю́діе, и любо́вію ублажи́мъ, я́ко па́стыря вели́каго слове́номъ, служи́теля Тро́ицы че́стна, прогони́теля е́реси, мо́литъ бо ся о всѣ́хъ на́съ.

Икосъ:

Ца́рственная Панно́нія, ку́пно но́віи су́ще лю́діе, тебе́ па́стыря че́стна свѣ́дящи, ра́дуется, мы́ же добродѣ́тели твое́й поспѣшеству́емъ, труды́ же и болѣ́зни похва́льныя та́йно тебе́ почита́ющимъ мѵ́ро многоче́стное су́ть, Меѳо́діе святи́телю, моли́ся непреста́нно о всѣ́хъ на́съ.

Пѣ́снь 7.

Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

О ва́ю, свята́я, хва́лится сла́вно гра́дъ Солу́нскій, Кири́лле свя́те и Меѳо́діе, Ми́сія, и Панно́нія, и Мора́вская, блаже́нніи, земля́, сла́вящи и вопію́щи: благослове́нъ еси́, Бо́же оте́цъ на́шихъ.

На ка́мени ты́ вѣ́ры утверди́ но́зѣ свои́, блаже́нне, и не поколеба́ тебе́, свя́те, богопроти́вныхъ духо́въ си́ла, но, я́ко хра́брый боре́цъ, проти́вяся и́мъ, поя́ше: благослове́нъ еси́, Бо́же оте́цъ на́шихъ.

Избоде́на мя́ разбо́йники, Христе́, и уя́звлена, поми́луй мя́, молю́ся Тебѣ́, и возле́й еле́й ми́лости Твоея́ на мя́, я́ко да восхвалю́ Тя́: Бо́же, благослове́нъ еси́.

Богоро́диченъ: Невеще́ственнаго Свѣ́та селе́ніе Твое́ чре́во бы́сть, свѣтлостьми́ Бо́жія ра́зума безбо́жіе отгна́вшее, Чи́стая Богоневѣ́сто Дѣви́це, е́же пое́мъ, вопію́ще: благослове́нъ еси́, Бо́же оте́цъ на́шихъ.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Сла́венъ, свя́те Меѳо́діе, ты́ бы́лъ еси́, ко́зни вра́жія низложи́въ, сла́вне учи́телю прему́дре, — по́йте, — вопію́ще, — благослови́те, вся́ дѣла́, Го́спода, по́йте и превозноси́те Его́ во вѣ́ки.

Архіере́й ты́ бы́лъ еси́ по чи́ну Ааро́ню вѣ́рнымъ, блаже́нне, Агнца рука́ми твои́ми святы́ми жру́щій, поя́: благослови́те, вся́ дѣла́, Го́спода, по́йте и превозноси́те Его́ во вѣ́ки.

Но́щь люта́ мя́, Христе́, грѣхо́вная пости́же и лю́тѣ зѣло́ омрачи́ ду́шу мою́, молю́тися, Бо́же, просвѣти́ и на покая́ніе наста́ви пою́ща Тя́ во вѣ́ки.

Богоро́диченъ: Изнемо́гшу мно́гими прило́ги лука́ваго, Богоро́дице, окая́нную ду́шу мою́ цѣле́бными моли́твами, Дѣви́це, здра́ву содѣ́лай, да Тя́ прославля́емъ во вѣ́ки.

Пѣ́снь 9.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Тя́, блаже́нне, пое́тъ земля́ Мора́вская, че́стно твое́ тѣ́ло иму́щи, и Панно́нская, святи́телю, просвѣще́на тобо́ю, и лю́діе, е́ю, соше́дшеся, пра́зднуютъ твою́ па́мять.

Иму́ща, свята́я, прю́ о Святѣ́й Тро́ицѣ, Кири́лле преподо́бне и Меѳо́діе святи́телю, ста́до ва́ше свято́е, ходя́ще по земли́ стра́ннѣй, сохра́нша, расти́та моли́твами свои́ми, блаже́нная.

Ны́нѣ припа́даю, учи́телю свя́те, моля́ся тебѣ́: умиле́нное сіе́ пѣ́ніе пріими́ и проси́ же отпу́ста грѣхо́въ мои́хъ отъ Спа́са Христа́.

Богоро́диченъ: Ра́дуйся, Пресвята́я Богоро́дице Марíе, ра́дуйся, Непоро́чная, иску́са му́жеска не позна́вшая, ра́дуйся, Свѣти́ло всему́ мíру ро́ждши, моля́щи не преста́й къ Бо́гу Спа́су.

Источникъ: Мине́я Апрѣ́ль. Ча́сть пе́рвая. — М.: Издательскій совѣтъ Русской Православной Церкви, 2002. — С. 120-125.

Свѣрено съ изданіемъ: Трефологій Зографскаго монастыря XIII вѣка. // И. Срезневскій. Свѣденія и замѣтки о малоизвѣстныхъ и неизвѣстныхъ памятникахъ. Приложеніе къ XXVIII-му тому записокъ Имп. Академіи Наукъ. № 1. — СПб., 1875. — С. 426-429.

/ Къ оглавленію раздѣла /


Наверхъ / Къ титульной страницѣ

0