Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 18 августа 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 5-й де́нь.
Святы́хъ му́ченикъ Ѳеоду́ла и Агаѳопо́да и и́же съ ни́ми.

[ВЕЧЕРЪ,]
На Го́споди воззва́хъ: стихи́ры, гла́съ 1. Подо́бенъ: Небе́сныхъ чино́въ.

Боже́ственнаго супру́га* страда́нія и труды́, совоку́пльшеся вѣ́рою,* къ подо́бнѣй ре́вности впери́мъ ра́зумы,* Христа́ прилѣ́жно моля́ще и глаго́люще:* Иже святы́хъ прославле́й, я́ко Бла́гъ,* и на́съ утверди́ стра́хомъ Твои́мъ.

Яко тезоимени́тна зва́нія* пріе́мше, му́дріи,* и боже́ственная дѣя́нія испра́вльше,* вельми́ подо́бно, страстоте́рпцы,* въ стезя́хъ пра́выхъ Бо́гу рабо́тасте* и муче́нія ча́шу вои́стинну испи́сте спаси́тельную.

Безбо́жіе я́коже и́но пресѣ́кше мо́ре,* въ зе́млю безстра́стія,* въ небе́сное Ца́рство внидо́сте досто́йно,* идѣ́же пи́щи пото́къ истека́етъ* и Свѣ́тъ непрело́жный, му́ченицы Христо́вы,* сія́етъ присносу́щный.

Сла́ва, и ны́нѣ, богоро́диченъ:

Всегуби́тельныхъ страсте́й мои́хъ* огнепа́льная стремле́нія* ороше́ніемъ боже́ственнаго во́льнаго дождя́ Твоего́* погаси́, Дѣ́во:* да и а́зъ, я́ко о́троцы,* Бо́гу, су́щему отъ Тебе́, благодарю́,* сла́вя и благословя́ бла́гость Твою́, Влады́чице.

Крестобогоро́диченъ:

Воздви́жена я́ко ви́дѣ на Крестѣ́ Агнца,* Непоро́чная Дѣ́ва, пла́чущи, вопія́ше:* сла́дкое Мое́ Ча́до,* что́ но́вое и пресла́вное видѣ́ніе?* Ка́ко содержа́й вся́ческая го́рстію,* на дре́вѣ пригвожда́ешися пло́тію?


[НА УТРЕНИ,]
Кано́нъ, его́же краегране́сіе: Твои́хъ воспѣва́ю му́ченикъ, Христе́, красоту́. Іо́сифъ. Гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Боже́ственнымъ муче́нія вѣнце́мъ увя́зшеся, просвѣще́ни добро́тою мы́сленною, Влады́цѣ предстоите́, о на́съ моля́щеся, прекра́сніи великому́ченицы.

Красно́ къ Бо́гу творя́ще, му́дріи, присвое́ніе, безлѣ́потныя зло́бы себе́ благоче́стно удали́сте и съ ли́ки, ра́дующеся, страстоте́рпецъ причто́стеся.

Во́дъ Животворя́щаго Ду́ха су́ще испо́лнены, неразу́мія дре́вле зно́емъ та́ющія напои́сте благодѣя́ніемъ, святíи, Боже́ственнымъ повину́ющеся велѣ́ніемъ.

Богоро́диченъ: Спа́са и Вседѣ́теля Го́спода во чре́вѣ носи́ла еси́, Его́же Агаѳопо́дъ вку́пѣ со сла́внымъ Ѳеоду́ломъ проповѣ́да, су́ща Бо́га и Человѣ́ка, Дѣ́во Ма́ти Всенепоро́чная.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Глаго́лы твои́хъ плени́цъ, препе́нся, вра́гъ паде́ и я́вственно обличи́ся, му́чениче страстоте́рпче Ѳеоду́ле.

Любо́вію су́щею къ Бо́гу укрѣпи́въ ду́шу, показа́лъ еси́ всю́ вра́жію си́лу, му́чениче Агаѳопо́де, некрѣ́пку.

Исцѣле́нія вѣ́рнымъ отъ приснотеку́щихъ пото́ковъ точа́ще, исто́чникъ страсте́й, сла́вніи, Боже́ственною си́лою изсуша́ете.

Богоро́диченъ: Избавля́ющаго человѣ́ки отъ плѣне́нія вра́жія, Чи́стая, Изба́вителя родила́ еси́, пло́тію на́шею обложе́на.

Сѣда́ленъ, гла́съ 8. Подо́бенъ: Прему́дрости.

Бра́тія по благода́ти Ду́ха, единонра́вніи вѣ́рою благочести́вою, су́ще святíи, вои́стинну великоимени́тіи, въ моли́твахъ и поще́ніихъ житіе́ проходя́ще, лю́ди привлеко́сте къ Боже́ственному позна́нію. Тѣ́мже, до́бліи во́ини, пре́лесть му́жески плѣни́сте и, зако́нно пострада́вше, вѣнцы́ получи́сте. Моли́те Христа́ Бо́га прегрѣше́ній оставле́ніе дарова́ти пра́зднующимъ любо́вію святу́ю па́мять ва́шу.

Сла́ва, и ны́нѣ, богоро́диченъ:

Прему́дрость и Сло́во въ Твое́мъ чре́вѣ заче́нши неопа́льно, Ма́ти Бо́жія, мíрови родила́ еси́ мíръ Содержа́щаго и во объя́тіихъ понесла́ еси́ вся́ Нося́щаго, Пита́теля всѣ́хъ и Творца́ тва́ри. Тѣ́мже молю́ Тя, Всесвята́я Дѣ́во, и вѣ́рно сла́влю Тя́, изба́витися мнѣ́ отъ прегрѣше́ній, и въ де́нь Суда́, егда́ предста́ти и́мамъ предъ лице́мъ Созда́теля моего́, Влады́чице Дѣ́во Чи́стая, Твою́ по́мощь тогда́ пода́ждь ми́: вся́ бо мо́жеши, ели́ка хо́щеши, Всепѣ́тая.

Крестобогоро́диченъ:

Агнца и Па́стыря и Изба́вителя, Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мляй Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе, вѣ́рою пою́щимъ Боже́ственныя Стра́сти Твоя́.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Яко свѣти́льницы возсія́вше пресвѣ́тліи муче́нія свѣтлостьми́, вселе́нныя исполне́ніе просвѣща́ютъ сла́вніи му́ченицы, пре́лести омрача́юще зломы́сліе.

Блаже́нную супру́гу, благоу́мную и пріи́мшую вѣне́цъ муче́нія, а́нгели почуди́шася, и человѣ́цы похвали́ша терпѣ́нія до́блесть.

Ра́дуяся, Ѳеоду́лъ вопія́ше: въ пу́ть теку́, Го́споди, Твои́хъ свидѣ́тельствъ и наслажда́юся бога́тно Твоего́ сія́нія, ку́пно съ тве́рдымъ Агаѳопо́домъ.

Богоро́диченъ: Витíйствующе воплоще́ніе Влады́ки, изъ Твоея́ возсія́вша утро́бы, Богоро́дице, му́ченицы сла́вніи спаси́тельное испи́ша пи́во муче́нія, ра́дующеся.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Но́ги твоя́ я́вѣ на правотѣ́ поста́вилъ еси́, прехва́льне Агаѳопо́де, честна́го муче́нія, враги́ препина́ющія.

Во́ду жи́зни, страстоно́сцы, теку́щую въ се́рдцы стяжа́вше, сла́вный коне́цъ водо́ю прія́сте.

Тече́ніе и́дольскаго преще́нія изсуши́сте, вве́ржени, страда́льцы, во глубину́ морску́ю и во́лею умерщвле́ни.

Богоро́диченъ: Ма́ти Бо́жія, души́ моея́ озлобле́нія уврачи́, ро́ждшая Всеблага́го Сло́ва, вся́ ублажа́ющаго.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Во́дъ живото́чныхъ су́ще испо́лнени, достохва́льную кончи́ну потопле́ніемъ во́дъ прія́сте, зло́бы въ ни́хъ предста́теля потопи́вше.

Благода́тію и си́лою Бо́жіею соблюда́еми, не преврати́стеся пожре́ти ме́рзкимъ куми́ромъ, но же́ртву Влады́цѣ себе́ чи́сту принесо́сте.

Ору́жія вра́жія въ ва́съ изнемого́ша, изощре́ныя бо стрѣ́лы ва́шего му́жества вонзо́сте, страда́льцы, въ се́рдце его́ до́блественно.

Богоро́диченъ: Исцѣли́ души́ моея́ стра́сти, Всенепоро́чная, безстра́стія ро́ждши Исто́чникъ, и уста́ви томи́тельство непреста́нно смуща́ющихъ, Чи́стая, се́рдце мое́.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Ра́зумомъ Боже́ственнымъ въ леви́тскую оде́жду одѣ́ялся еси́, сію́ муче́нія свѣ́тлостію свяще́нно свѣтлѣ́йшу содѣ́лавъ, и ны́нѣ предстои́ши, Агаѳопо́де, Сло́ву ра́дуяся.

Первому́ченика слу́жбою украша́емь, Сло́ву пожре́нному, блаже́нне, служи́ти, Агаѳопо́де, сподо́бился еси́, благослове́нъ еси́, — вопія́, — въ хра́мѣ сла́вы Твоея́, Го́споди.

Единоу́міемъ еди́но мы́сляще, досточу́дніи, еди́нъ сме́рти иску́съ за Христа́ претерпѣ́сте, зову́ще: благослове́нъ еси́ въ хра́мѣ сла́вы Твоея́, Го́споди.

Богоро́диченъ: Преукра́шену добродѣ́телей, Чи́стая, свѣ́тлостію, Сло́во, добродѣ́телію покры́вый небеса́, обрѣ́тъ Тя́, всели́ся въ Тя́, Пренепоро́чная, и человѣ́ческое естество́ онебеси́.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Словесы́ твои́ми ле́сть помрача́я, му́дре Ѳеоду́ле, му́дростію благода́тною озаря́емь, просія́лъ еси́, предъ суди́щемъ благоче́стіе возглаша́я и злочести́выхъ загражда́я уста́, зовы́й: благослови́те, вся́ дѣла́ Госпо́дня, Го́спода.

Скры́ти морска́я глубина́ ва́ша тѣлеса́ ника́коже возмо́же, святíи, на су́шу бо сія́ издае́тъ Боже́ственнымъ манове́ніемъ неистлѣ́нна, источа́юща на́мъ ди́вная чудеса́, вопію́щимъ: вся́ дѣла́ благослови́те Госпо́дня Го́спода.

Ве́сь порабо́тився тебе́ ра́ди въ ра́біи о́бразѣ я́вльшемуся, сла́вне, и по сме́рти промышле́ніе сирота́мъ явля́ешися творя́ и вдова́мъ, Влады́чнее законоположе́ніе исполня́я, я́ко благоразу́менъ ра́бъ Госпо́день, преблаже́нне Ѳеоду́ле.

Пелены́ ва́ша, и ра́ны, и боре́нія Ѳессалоникíя чти́тъ, того́ бо воспита́ніе яви́стеся, и въ то́мъ блаже́нную кончи́ну, я́ко страда́льцы, вои́стинну прія́сте, и Це́рковь перворо́дныхъ че́стно ны́нѣ уясня́ете.

Богоро́диченъ: Не премѣни́въ естества́, Христо́съ изъ Тебе́ во всего́ человѣ́ка облече́ся, Богора́дованная Влады́чице, Его́же стра́сть Ѳеоду́лъ и Агаѳопо́дъ крѣ́пцѣ изобрази́вше, вопію́тъ: вся́ дѣла́, благослови́те Госпо́дня Го́спода.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Се́ ны́нѣ что́ добро́, — вопія́ху, — или́ что́ красно́, страстоте́рпцы, но е́же жи́ти во гра́дѣ жива́го Бо́га, соблю́дше благоче́стія соу́зъ, да́же до сме́рти нерѣши́мь?

Яко свидѣ́тельства тече́ніе сконча́вше, страда́льцы, ликостоя́ніе вы́шнихъ чино́въ ва́съ воспрія́тъ, неувяда́ющими, сла́вніи, вѣнча́еми вѣнцы́.

Дне́сь свѣ́тло пра́зднуетъ сла́вная Ѳессалоникíя, вся́къ гра́дъ и страну́ созыва́ющи въ па́мять ва́шу съ высо́кимъ проповѣ́даніемъ, о Агаѳопо́де и Ѳеоду́ле!

Взя́стеся къ неизрече́ннѣй сла́вѣ свѣтоявле́нно, я́коже страстоте́рпцы, ея́же сподо́битися вѣ́рою ва́шу соверша́ющимъ па́мять всегда́, я́ко дерзнове́ніе иму́ще, моли́теся, пречестнíи.

Богоро́диченъ: Свѣ́томъ мя́ Твоего́ благоутро́бія, во тмѣ́ неразу́мія лежа́щаго, озари́, еди́на, Свѣтода́вца Ро́ждшая, Изба́вителя и Го́спода, святы́я вѣнча́ющаго.

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 24 – 27.

/ Къ оглавленію раздѣла /


Наверхъ / Къ титульной страницѣ

0