Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 18 августа 2017 г. Сейчасъ на порталѣ посѣтителей - 22.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 4-й де́нь.
Преподо́бныхъ оте́цъ на́шихъ Іо́сифа Пѣснопи́сца и Гео́ргія, и́же въ Мале́и.

[ВЕЧЕРЪ,]
Стихи́ры, гла́съ 2. Подо́бенъ: Егда́ отъ дре́ва.

Взя́лъ еси́ на ра́мена кре́стъ,* и распя́лся еси́ мíру,* и послѣ́довалъ еси́ стопа́мъ Созда́вшего отъ небытія́ вся́,* Бо́жію Сло́ву, я́коже рече́,* любо́вь же жите́йскую* и вся́ко пристра́стіе оттря́съ;* отону́дуже и добродѣ́тельми просія́въ,* дѣ́тельми же боже́ственными* наслѣ́діе вѣ́чное, о́тче, воспрія́лъ еси́.

Труба́ яви́лся еси́ та́инственная,* къ духо́вному пѣ́нію вся́ воздви́жущи,* цѣ́вница же богодви́жима,* боже́ственныя полки́ восхваля́ющи,* сла́вящи вся́ святы́я* и си́хъ побѣ́ды проповѣ́дающи.* Ты́ бо отъ исто́чникъ спаси́тельныхъ* бе́здну поче́рплъ еси́ слове́съ,* Бо́жій до́мъ напоя́ющу.

Яви́лся еси́ сокро́вище добродѣ́телей,* вся́, я́же въ житіи́ Бо́гу благоугоди́вшія,* любо́вію распаля́емь, взыска́лъ еси́,* поя́ свяще́нными пѣ́сньми,* и си́хъ вѣ́рою боже́ственнымъ исправле́ніемъ подо́бяся;* и́мже прича́стникъ бы́въ боже́ственнымъ о́бразомъ,* показа́лся еси́ и наслажде́нія соприча́стникъ.

Ины стихи́ры свята́го Гео́ргія, гла́съ 1. Подо́бенъ: Небе́сныхъ чино́въ.

Воздержа́ніемъ стра́сти, о́тче Гео́ргіе,* по́мыслу порабо́тилъ еси́,* безстра́стія бы́въ красе́нъ, преблаже́нне, сосу́дъ,* вмѣсти́теленъ живо́тнымъ сія́ніемъ,* и потреби́тель де́моновъ,* и страсте́й вра́чь досточу́дне.

Чи́стая мѵрополо́жница Боже́ственнаго Ду́ха,* чуде́съ исто́чникъ,* мона́шествующихъ сто́лпъ,* кро́ткій и кро́ткаго Христа́ подо́бникъ,* земны́й а́нгелъ и небе́сный человѣ́къ бы́въ,* да восхва́лится ны́нѣ Гео́ргій.

Въ безмо́лвное приста́нище* устреми́въ душе́вный кора́бль,* жите́йскихъ мяте́жей,* я́ко отъ во́лнъ морски́хъ, отбѣ́гъ,* и́же къ Бо́гу манове́ньми отъ земли́ возлетѣ́лъ еси́* и яви́лся еси́, съ пло́тію а́нгеломъ подо́бенъ.

Сла́ва, и ны́нѣ, богоро́диченъ:

Яко по́мощь Ты́ еси́ безпомо́щныхъ человѣ́ковъ,* я́ко наде́жда еси́ всѣ́хъ ненаде́жныхъ* и рѣши́ло, Богоро́дице, лю́тыхъ,* Помо́щница ми́ бу́ди,* отъ грѣ́хъ и бѣ́дъ, я́ко Ми́лостива,* избавля́ющи мя́, Пречи́стая.

Крестобогоро́диченъ:

У Креста́ предстоя́щи Сы́на и Бо́га Твоего́* и долготерпѣ́ніе Того́ смотря́ющи,* глаго́лаше, пла́чущи, Ма́ти Чи́стая:* увы́ Мнѣ́, Ча́до сладча́йшее,* что́ сія́ стра́ждеши непра́ведно, Сло́ве Бо́жій,* да спасе́ши человѣ́чество?


[НА УТРЕНИ,]
Кано́нъ, гла́съ 2.

Пѣ́снь 1.

Ирмо́съ: Гряди́те лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Пѣ́сненно пѣснопи́сца почти́мъ, и́же того́ медото́чныя пѣ́сни пою́ще, Іо́сифа, я́ко отъ пѣ́ній въ пѣ́сни вѣ́чныя преста́вльшася.

Якоже проро́къ и апо́столъ проповѣ́даніе всю́ зе́млю освѣти́, та́ко и пѣ́ніе твои́хъ усте́нъ, мíръ къ сла́вѣ всѣ́хъ Бо́га возставля́етъ.

Отъ младе́нства возложи́вся, Іо́сифе, Христу́, по́стнически пожи́лъ еси́, отону́дуже и дарова́ньми тя́ обогати́ боже́ственными, наде́ждею, и любо́вію, и вѣ́рою чи́стою.

Богоро́диченъ: Тя́ проро́ческое дре́вле боже́ственное сло́во две́рь Бо́жію провозвѣсти́ и го́ру святу́ю, Богоро́дице Дѣ́во, боже́ственныхъ страда́льцевъ удобре́ніе.

Кано́нъ свята́го Гео́ргія, его́же краегране́сіе: Твоя́ усе́рдно, о о́тче, пою́ болѣ́зни.
Пѣ́снь 1. Гла́съ и ирмо́съ то́йже.

Трисія́нною Богонача́льною свѣ́тлостію просвѣще́нъ, преподо́бне, мíръ оста́вилъ еси́ и страсте́й мглу́ и житіе́мъ свѣтлѣ́йшимъ, о́тче, украси́лся еси́.

Наста́вленъ бы́въ боже́ственнымъ промышле́ніемъ, Гео́ргіе, къ небеси́ веду́щую стезю́ ше́ствовалъ еси́, помо́щника стяжа́въ еди́наго Благодѣ́теля и Всеще́драго.

Бо́гомъ, блаже́нне, я́вѣ управля́емь, сынотворе́нія благода́тію освяща́емь, соверши́лъ еси́, о́тче, преподо́бно и пра́ведно жи́тельство.

Богоро́диченъ: Твои́мъ утвержде́ніемъ и заступле́ніемъ обога́щшеся, Богоро́дицу, Пречи́стая, исповѣ́дающе Тя́, отъ треволне́нія жите́йскаго, Всенепоро́чная Дѣ́во, спаса́емся.

Пѣ́снь 3.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Чистоты́ любле́ніемъ Бо́га умоли́лъ еси́ пода́ти помо́щники и, пріе́мъ неоску́дныя отцы́ твоя́, получи́лъ еси́, о́тче, наде́жду твою́.

Любве́ и́стинныя показу́я позна́ніе, и до́мъ, и дѣя́ніе, и му́дрость, отъ Бо́га дарова́нная тебѣ́, я́коже две́рь Іовъ, всѣ́мъ отве́рзлъ еси́.

Ва́рварскими рука́ми я́тъ бы́въ, пребога́те, я́коже дре́вле во Еги́петъ до́блій Іо́сифъ, съ вѣ́рою и чистото́ю да́ръ соблю́лъ еси́.

Богоро́диченъ: Ра́й кра́сный, посредѣ́ имѣ́яй Дре́во, Дѣ́во, нетлѣ́нія, Іису́са Христа́ Го́спода, позна́лася еси́, тѣ́мже Тя́ ублажа́емъ.

Инъ. Ирмо́съ то́йже.

Ты́ стезю́ жи́зненную, въ безконе́чный вѣ́къ, всеблаже́нне, пребыва́ющую, неукло́нно, ра́дуяся, ше́ствовалъ еси́ и во оби́тели вѣ́чныя всели́лся еси́.

Житіе́ твое́ свѣ́тло и сло́во, со́лію боже́ственною въ Ду́сѣ растворе́но, показа́ся, Гео́ргіе, земледѣ́ланія боже́ственнаго боже́ственный са́дъ.

Сы́нъ Бо́жій ты́ креще́ніемъ бы́ти, всеблаже́нне, сподо́бленъ, оте́ческое наслѣ́дилъ еси́ сокро́вище, житія́ чистото́ю.

Богоро́диченъ: Утвержде́ніе бу́ди, и прибѣ́жище, и покро́въ, Дѣ́во Богороди́тельнице, вѣ́рою къ Тебѣ́ прибѣга́ющимъ и Бо́жію Тя́ Ма́терь проповѣ́дающимъ.

Сѣда́ленъ, гла́съ 4. Подо́бенъ: Яви́лся еси́ дне́сь.

Яви́лся еси́ кро́токъ и молчали́въ, смиренному́дръ, трепе́ща боже́ственныхъ слове́съ, твоего́ Влады́ки сло́во исполня́я, Иже на тя́, о́тче, призрѣ́ и въ вы́шнюю оби́тель всели́.

Сла́ва, и́нъ сѣда́ленъ Гео́ргія, гла́съ 3. Подо́бенъ: Красотѣ́ дѣ́вства.

Краснѣ́йшаго Христа́ возжелѣ́лъ еси́ и тѣле́сныя стра́сти возненави́дѣлъ еси́, а́нгельски на земли́, Гео́ргіе, пожи́въ. Тѣ́мже свято́е твое́ пра́зднуемъ успе́ніе и облобыза́емъ ра́ку моще́й твои́хъ, изъ нея́же на́мъ то́чиши исцѣле́нія, о́тче, любо́вію чту́щимъ тя́.

И ны́нѣ, богоро́диченъ:

Яко невоздѣ́ланная, Дѣ́во, лоза́, краснѣ́йшій Гро́здъ прозябла́ еси́, источа́ющъ на́мъ вино́ спасе́нія, всѣ́хъ веселя́щее ду́ши же и тѣлеса́. Тѣ́мже я́ко вину́ Тя́ до́брыхъ блажа́ще при́сно, со а́нгеломъ вопіе́мъ Ти́: ра́дуйся, Благода́тная.

Крестобогоро́диченъ:

Неискусобра́чная Чи́стая и Ма́ти Твоя́, Христе́, ви́дящи Тя́, ме́ртва ви́сяща на Крестѣ́, ма́терски пла́чущи, глаго́лаше: что́ Тебѣ́ воздаде́ евре́йскій беззако́нный собо́ръ и неблагода́рный, и́же мно́гихъ и вели́кихъ Твои́хъ, Сы́не Мо́й, даро́въ наслади́выйся? Пою́ Твое́ Боже́ственное снизхожде́ніе.

Пѣ́снь 4.

Ирмо́съ: Услы́шахъ, Го́споди, слу́хъ Твоего́ смотре́нія, и просла́вихъ Тя́, Еди́не Человѣколю́бче.

Разсужде́ніе разу́мно и мона́ховъ умѣ́ренное пра́вило Христо́съ показа́ тя́, о́тче преподо́бне.

Смире́нія мо́стъ твое́ показа́лъ еси́, богому́дре, житіе́, преводя́щъ ко и́стиннѣй жи́зни.

Предвари́въ, ублажи́ тя́ Влады́ка, о́тче, я́ко даю́ща во вре́мя сло́ва пшени́чное мѣ́реніе.

Богоро́диченъ: Свѣ́тъ возсія́лъ еси́, Го́споди, су́щимъ въ нощи́ и тмѣ́ прегрѣше́ній, отъ Чи́стыя Дѣ́вы во чре́вѣ носи́мь.

Инъ. Ирмо́съ то́йже.

Испещре́нъ добро́тами добродѣ́тели и нра́вы свѣтоно́сными, къ Бо́гу возлетѣ́лъ еси́, о́тче Гео́ргіе.

Теку́щихъ, о́тче Гео́ргіе, смуще́нія убѣжа́лъ еси́, къ тишинѣ́ боголюбе́знымъ житіе́мъ претворя́яся.

Беззако́нія пото́цы твою́ ду́шу не возмого́ша смути́ти, сла́дости бо пото́цы тебе́ напои́ша.

Боже́ственнымъ поуче́ніемъ, прему́дре, всегда́ внима́я, непостоя́нная помышле́нія отри́нулъ еси́, о́тче Гео́ргіе.

Богоро́диченъ: Пѣсносло́вяще, Чи́стая, во утро́бѣ Твое́й Воплоще́ннаго, и Тя́ славосло́вимъ, я́ко Богома́терь.

Пѣ́снь 5.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Ихже на земли́ сы́й, святы́хъ воспѣ́лъ еси́ вѣ́рно, преподо́бне, съ ни́ми сы́й ны́нѣ, слы́ша пѣ́нія, ра́дуешися, сла́вя непреста́нно Го́спода.

Къ покая́нію и исповѣ́данію, му́дре, вся́ привлача́, себѣ́ написа́лъ еси́ вся́ку вину́, моли́твы Бо́гу принося́ улучи́ти проще́ніе.

Все́ житіе́ твое́, святы́ми упражня́яся дѣя́ньми, я́ко и́стиненъ купе́цъ, бы́лъ еси́, я́ко ка́меніе че́стно, и словеса́, и дѣя́нія себѣ́ собира́я.

Богоро́диченъ: Изба́ви ны́ отъ искуше́ній и бу́ри помышле́ній, Чи́стая, вся́каго гнѣ́ва, вся́каго грѣха́, гла́да же, и па́губы, и вѣ́чнаго, Дѣ́во, муче́нія.

Инъ. Ирмо́съ то́йже.

Блаже́нство и безсме́ртную жи́знь получи́лъ еси́, о́тче му́дре, боже́ственными восхо́ды сходя́, всеблаже́нне, наде́ждею, любо́вію и вѣ́рою укрѣпля́емь.

Украша́яся смире́ніемъ благосты́ннымъ, преподо́бне, къ высотѣ́ я́вѣ возне́слся еси́ добродѣ́телей, богому́дре, земледѣ́ланія боже́ственнаго бы́въ гумно́.

Тѣ́ла истоща́ніе воздержа́ніемъ опа́сно показа́лъ еси́ и чи́сто се́рдце стяжа́лъ еси́, и́мже сподо́бился еси́ ви́дѣти, о́тче, всѣ́ми Неви́димаго.

Богоро́диченъ: Яко непости́жное и неудобозри́мое всѣ́мъ, Влады́чице, е́же па́че ума́ та́инство, Отрокови́це, Боже́ственнаго рождества́ Твоего́: су́щаго бо вои́стинну Бо́га на́мъ родила́ еси́.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Пестро́тнымъ мно́жествомъ пѣ́сней твои́хъ, я́ко на тве́рди, Це́рковь Христо́ва, звѣздоявле́нно просія́вши, дрема́ніе отгоня́етъ душегу́бное.

Словесе́ твоего́ мольба́, преподо́бне, душе́ю скорбя́щимъ и тѣ́ломъ, я́коже нѣ́кая гу́ба, вся́кую очища́я печа́ль, яви́ся.

Алчущимъ сло́ва спаси́тельнаго и тѣле́сными упита́вшимся озлобле́ніи, сугу́бо, преподо́бне, исцѣле́ніе незави́стно пода́лъ еси́.

Богоро́диченъ: На пути́ мя́ житія́ блудя́ща и въ безпу́тія ча́сто впа́дающа грѣхми́, Влады́чице, на покая́нія стезю́ наста́ви.

Инъ. Ирмо́съ то́йже.

Лука́выхъ духо́въ отгони́тель те́плъ яви́лся еси́, пресла́вне о́тче Гео́ргіе, Свята́го Ду́ха содѣ́йствомъ я́вѣ укрѣпля́емь.

Безстра́стія украше́нъ дарова́ніемъ, цѣлому́дрія ри́зою, Гео́ргіе, пресвѣ́тло одѣ́ялся еси́, страсте́й отгна́въ смуще́ніе.

Пла́менное ору́жіе преше́лъ еси́, му́дре, и ра́йскія сла́дости сподо́бился еси́, кре́стнымъ, Гео́ргіе, обложе́нъ ору́жіемъ непобѣди́мымъ.

Богоро́диченъ: На Тя́ упова́ніе возложи́хъ, Ма́ти Приснодѣ́во, спасе́нія моего́, и Тя́ предста́тельницу полага́ю жи́зни моея́ тве́рду и непоколеби́му.

Конда́къ, гла́съ 4. Подо́бенъ: Вознесы́йся.

Покая́нія исто́чникъ неисчерпа́емый, утѣше́нія пода́тель неконча́емаго и умиле́нія пучи́на еси́, Іо́сифе, сле́зы на́мъ пода́ждь покая́нія боже́ственнаго, и́миже утѣше́ніе, здѣ́ пла́чущеся, обря́щемъ отъ Бо́га, твоея́ по́мощи прося́ще, свя́те.

Пѣ́снь 7.

Ирмо́съ: Вѣтíи яви́шася о́троцы любому́дрѣйшіи дре́вле, отъ богопрія́тныя бо души́, богосло́вяще устна́ми, поя́ху: Пребоже́ственный отце́въ и на́шъ Бо́же, благослове́нъ еси́.

Потща́лся еси́ и по снѣ́ сме́ртнѣмъ затворе́ны душе́вныя о́чи твоя́ не имѣ́ти, пое́ши бо пѣ́сни съ пою́щими: Пребоже́ственный оте́цъ на́шихъ Бо́же, благослове́нъ еси́.

Вѣне́цъ муче́нія прія́лъ еси́, я́ко ублажи́въ прилѣ́жно ли́ки му́ченикъ неисче́тныхъ. И немо́лчно, о́тче, пое́ши съ ни́ми: Пребоже́ственный оте́цъ на́шихъ Бо́же, благослове́нъ еси́.

Исцѣле́ніе грѣхо́въ вели́кихъ я́ко сы́й, е́же, прему́дре, исповѣ́даніе положи́ пою́щимъ, о́тче, пѣ́сни твоя́: Пребоже́ственный оте́цъ на́шихъ Бо́же, благослове́нъ еси́.

Богоро́диченъ: Свѣ́та Твоего́, Богоро́дице Дѣ́во, чи́стыми облиста́ніи омрачи́вшуюся ду́шу мою́ лука́выми лю́тѣ преступле́ньми свѣ́томъ наста́ви, две́рь су́щи Свѣ́та, я́ко да пѣсносло́влю Тя́.

Инъ.

Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

Укрѣпи́въ ду́шу си́лою Христо́вою, о́тче Гео́ргіе, Того́ держа́вою отгна́лъ еси́ тебе́ ненави́дящихъ полки́, сія́ Кресто́мъ устраши́въ, и́мже соблюда́емь пѣ́лъ еси́: благослове́нъ еси́, Го́споди, Бо́же оте́цъ на́шихъ.

Блаже́нъ еси́, и добро́ тебѣ́ бу́детъ ны́нѣ, преблаже́ннѣйше, воспріе́млющу болѣ́зней твои́хъ и подвиго́въ воздая́ніе и со а́нгелы вопію́щу Го́сподеви, Гео́ргіе: благослове́нъ еси́, Го́споди, Бо́же оте́цъ на́шихъ.

Бы́лъ еси́ свѣ́тло жили́ще Христо́во, престо́лъ чу́вствія, о́тче, бы́въ и му́дрости, святы́ни испо́лненъ, вѣ́рою же и благода́тію сія́я, и зовы́й, Гео́ргіе: благослове́нъ еси́, Бо́же оте́цъ на́шихъ.

Богоро́диченъ: Свѣ́щникъ Свѣ́та, и о́блакъ свѣ́телъ, и свяще́нія мѣ́сто показа́лася еси́, Неискусобра́чная, святы́хъ бо Свято́е Сло́во прія́ла еси́ несказа́нно, Его́же пою́ще, вопіе́мъ Ти́: благослове́нна Бо́га пло́тію ро́ждшая.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго, и пла́мень въ ро́су прело́жшаго Бо́га, по́йте, дѣла́, я́ко Го́спода, и превозноси́те во вся́ вѣ́ки.

Якоже мимотеку́щую сѣ́нь, ны́нѣшнюю пои́стиннѣ жи́знь вѣ́дый, нетлѣ́нную прія́ти подвиза́лся еси́, му́дре; сего́ ра́ди честны́я монастыри́ мно́жества назда́лъ еси́ душа́мъ на спасе́ніе.

Кро́ткимъ правоту́ и ду́хомъ ни́щаго имѣ́яй, му́жество показа́лъ еси́ вся́ко, я́коже не еди́наго себе́ утвержда́ти, рабо́тати Зижди́телю, о́тче, но всѣ́хъ, тебе́ зря́щихъ.

Незло́біе твое́ и излія́ніе любве́ твоея́, треблаже́нне, о́бразъ поста́ви Человѣколю́бца Христа́, къ Нему́же непреста́нно пѣ́лъ еси́: превозно́симъ во вся́ вѣ́ки.

Богоро́диченъ: О, та́инства стра́шна! О, слы́шанія ужа́снаго! Ка́ко Дѣ́ва несказа́ннымъ соедине́ніемъ уподо́бльшагося на́мъ Сло́ва ражда́етъ, пребыва́ющи, я́коже пре́жде рождества́, Чиста́ во вѣ́ки.

Инъ. Ирмо́съ то́йже.

Къ неразори́мѣй жи́зни, къ неувяда́ющей сла́дости, о́тче, преста́вился еси́ къ присносу́щнѣй сла́вѣ и къ невече́рнему Свѣ́ту: Бо́жіе бо показа́лся еси́ дѣ́ланіе, Его́же превозно́симъ во вѣ́ки.

Яко ра́бъ Христо́въ, я́ко слуга́ вѣ́ренъ и строи́тель Того́ та́инъ, я́ко непреле́стенъ путево́ждь, бы́лъ еси́, Гео́ргіе прему́дре, стра́сти врачу́я ду́шъ же и тѣле́съ.

По́лнъ поще́нія пло́дъ къ гумну́ Христо́ву, о́тче, прине́слся еси́, я́коже зрѣ́лъ гро́здъ, небе́сными точи́лы, преблаже́нне, изгне́лся еси́, умиле́нія вино́ источа́еши на́мъ въ твое́й па́мяти.

Богоро́диченъ: Чре́ва Твоего́ Пло́дъ нетлѣ́нныя мнѣ́ жи́зни вино́венъ яви́ся и сла́дости присносу́щныя, Богороди́тельнице Чи́стая. Тѣ́мже Ти́ зову́, веселя́ся, арха́нгеловъ гла́съ: ра́дуйся, Дѣ́во.

Пѣ́снь 9.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Добродѣ́телей о́бразы, я́ко на скрижа́ли, написа́въ чи́стѣй души́ твое́й, дѣ́тельнѣ всѣ́мъ святы́мъ прине́слъ еси́, сугу́бо ко́ейждо отъ добродѣ́телей пѣ́нія вне́съ, достопрія́тно принося́ отъ дѣ́лъ и похвале́ніе.

Ангельстіи ли́цы, апо́стольскій собо́ръ, Богоро́дица со Крести́телемъ, проро́ческое сосло́віе, свяще́нникъ чи́нове съ по́стники, му́ченическая во́инства, Іо́сифе, противомѣ́рными похвала́ми тя́ ны́нѣ вѣнча́ютъ.

Слове́сное твое́ ста́до помина́ти не преста́й, но, я́коже жи́въ, предста́тельствовалъ еси́, му́дре, си́це жи́знь нетлѣ́нную подая́ бу́ди, тѣле́сныхъ страсте́й и душе́вныхъ изыма́я, о́тче, ко Христу́ моли́твами твои́ми.

Богоро́диченъ: О на́съ моля́щи Сы́на Твоего́ не преста́й, Дѣ́во, Человѣколю́бца Бо́га: Тя́ бо наде́жду стяжа́хомъ и Твои́мъ заступле́ніемъ избавля́емся бѣ́дъ, и страсте́й, и прегрѣше́ній, и болѣ́зней, вѣ́рою Тя́ сла́вящіи.

Инъ. Ирмо́съ то́йже.

Укрѣпля́емь вѣ́рою и Христо́вою си́лою, всеблаже́нне, огражде́нъ тве́рдо, сѣ́ти де́монскія разори́лъ еси́ и, си́хъ ловле́ній и кова́рствъ всѣ́хъ отбѣ́гъ, Влады́цѣ всѣ́хъ предстои́ши, ра́дуяся.

Все́ жела́ніе твое́, блаже́нне, къ Бо́гу пренося́ и Боже́ственныя наслажда́яся добро́ты, ея́же вся́ко естество́ жела́етъ, видѣ́ніемъ, и дѣя́ніемъ, и житія́ свѣ́тлостію себе́ украси́лъ еси́, о́тче, тѣ́мже тя́ ублажа́емъ.

О на́съ, вѣ́рою твою́ па́мять соверша́ющихъ, Христа́ моля́ прилѣ́жно, о́тче, не преста́й, спасти́ся на́мъ напа́стей, и треволне́нія, и бу́ри, и бѣ́дъ и страсте́й, и ми́ръ мíру дарова́ти, преблаже́нне.

Богоро́диченъ: Вопло́щшееся Сло́во, е́же пре́жде безъ пло́ти су́ще, я́ко Бо́гъ е́сть отъ Бо́га, родила́ еси́, еди́на Всепѣ́тая, на обновле́ніе и спасе́ніе всѣ́хъ земноро́дныхъ, тѣ́мже, вѣ́рніи, Тя́ вси́ пѣ́сньми велича́емъ.

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 19 – 24.

/ Къ оглавленію раздѣла /


Наверхъ / Къ титульной страницѣ

0