Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 22.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Служба составлена въ русскомъ Пантелеимоновомъ монастырѣ на Аѳонѣ.

Мѣ́сяца Апри́ллія въ 4-й де́нь.
Священному́ченика Ники́ты Славяни́на.

ВЕЧЕРЪ,
На Го́споди воззва́хъ: стихи́ры, гла́съ 8:

Преподо́бне о́тче Ники́то,* ты́ любве́ ра́ди Бо́жія* оте́чество твое́ По́нтъ оста́вилъ еси́* и, Святы́я Горы́ Аѳо́нскія дости́гъ,* въ не́й до́брѣ подвиза́лся еси́,* смиренному́дръ и возде́рженъ бы́въ,* послушли́въ же и незло́бивъ,* цѣлому́дръ и и́стиненъ,* я́коже Іовъ, удаля́яйся отъ вся́кія лука́выя ве́щи,* тѣ́мъ по достоя́нію здѣ́* поста́вился еси́ іере́й Бо́га Вы́шняго,* Ему́же, всече́стне, моли́ся* о спасе́ніи ду́шъ на́шихъ.

Многострада́льне о́тче Ники́то,* му́чимъ лю́тѣ за Христа́* во дни́ спаси́тельныхъ страсте́й Его́,* непобѣди́мъ яви́лся еси́ Того́ си́лою,* вонзе́ніе и́глъ подъ ногтьми́ терпя́,* преломле́ніе въ суста́вѣхъ ру́къ и но́гъ,* раскале́ннымъ сосу́домъ вѣнча́емь,* въ но́здри и подъ чре́вомъ опаля́емь* и ужа́сно та́мо пронза́емь,* за но́зѣ повѣ́шаемь,* главу́ имѣ́я зѣло́ сти́снуту,* ве́рвію же на дре́вѣ уда́вленъ,* сла́ву му́ченическую воспрія́лъ еси́,* моля́ся о спасе́ніи ду́шъ на́шихъ.

Свяще́нне о́тче Ники́то,* преподо́бнымъ житіе́мъ твои́мъ* іере́йскимъ же пома́заніемъ* и доблестьми́ страстоте́рпческими* Бо́гу прибли́зился еси́ соверше́ннѣйше* и отъ Него́ сугу́бо увѣнча́лся еси́.* Отъ вся́кихъ у́бо бѣ́дъ и искуше́ній* избавля́й твои́мъ предста́тельствомъ* любо́вію воспѣва́ющія тя́,* моля́ся о спасе́ніи ду́шъ на́шихъ.

Оби́тели сея́ и́ночествующіи, цвѣ́ты пѣ́сненныя собра́вше отъ луго́въ духо́вныхъ и вѣне́цъ отъ тѣ́хъ спле́тше, вѣнцено́сному небожи́телю Ники́тѣ принесе́мъ: священнострада́льче, — зову́ще ему́, — съ преподо́бными и му́ченики моли́ся ко Го́споду поми́ловатися душа́мъ на́шимъ.

По́стничества труды́ и страда́льчества болѣ́зни соедини́въ, богопрія́тне, крилѣ́ невеще́ственнѣ себе́ угото́валъ еси́ и тѣ́ми къ небе́снымъ добро́тамъ возлетѣ́лъ еси́, отону́дуже призира́й, свяще́нне, на су́щія во оби́тели се́й, лю́тыхъ обстоя́ній изыма́я на́съ твои́ми ко Го́споду моли́твами.

Сы́нъ свѣ́та сы́й, богосвѣ́тле, свѣ́томъ благода́ти озари́лся еси́ по кончи́нѣ, освѣща́я гра́дъ, Ники́то, я́коже узрѣ́ша вѣ́рніи въ но́щь пресвѣ́тлаго Воскресе́нія Христо́ва. И ны́нѣ свѣтоно́сною душе́ю твое́ю предстоя́ Безлѣ́тному Свѣ́ту, озаря́й оби́тель сію́, прося́ на́мъ ве́лія ми́лости.

Сла́ва, гла́съ 6:

Витíйствуя свѣ́тлымъ гла́сомъ о Божествѣ́ Христо́вѣ, Ники́то, и та́йну Его́ домострои́тельства высоковѣща́я ага́ряномъ, Моаме́ѳа, лжепроро́ка и́хъ льстеца́ наре́клъ еси́ и чу́вственнаго діа́вола, постыжде́ннымъ же словесы́ твои́ми зако́нникомъ тѣ́хъ и власти́телемъ и претя́щимъ тебѣ́ му́ками и сме́ртію, съ весе́ліемъ, доблему́дре, возопи́лъ еси́: сего́ а́зъ жела́ю и на сіе́ самозва́нъ пріидо́хъ къ ва́мъ, да пожру́ся поже́ршемуся мене́ ра́ди Влады́цѣ и Бо́гу моему́, я́ко То́й е́сть Бла́гъ и Человѣколю́бецъ.

[Вхо́дъ. Проки́менъ дне́ и чте́нія три́.

Проро́чества Иса́іина чте́ніе.

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.]

На стихо́внѣ стихи́ры, гла́съ 5:

Ра́дуйся, благосла́вне Ники́то,* честно́е Це́ркве украше́ніе,* іере́евъ лѣ́пото,* преподобному́чениковъ похвало́,* свѣти́льниче, озаря́яй вѣ́рныя,* въ нощи́ плѣне́нія су́щія,* тмы́ злоче́стія ага́рянскаго обличи́телю,* Христа́ же — Со́лнца Пра́вды — проповѣ́дниче,* подаю́щаго мíру ве́лію ми́лость.

Сти́хъ: Пра́ведникъ, я́ко фи́никсъ, процвѣте́тъ* и, я́ко ке́дръ, и́же въ Лива́нѣ, умно́жится.

Ра́дуйся, свяще́нства пома́заніе свято́е,* свя́тъ яви́выйся въ лѣ́тѣхъ послѣ́днихъ* и освяща́яй сла́вящія твоя́ по́двиги,* вра́жіихъ ко́зней низложи́телю* и сарацы́нскія вѣ́ры попра́телю,* сограждани́не преподо́бныхъ* и священному́чениковъ совсе́льниче,* моли́твенниче же о на́съ ко Го́споду,* подаю́щему мíру ве́лію ми́лость.

Сти́хъ: Честна́ предъ Го́сподемъ* сме́рть преподо́бныхъ Его́.

Ра́дуйся, по́стничества рачи́телю,* до́блій ору́жниче Спа́совъ,* всеору́жіемъ Креста́ огражде́нный* и терпѣ́ніемъ му́жески вооружи́выйся,* небре́гъ о я́рости злочести́выхъ,* лю́тыхъ му́къ иску́съ ве́сь проше́дый* и вѣне́цъ побѣ́ды прія́вый,* я́ко всеизря́дный подо́бникъ* стра́сти Христа́ Бо́га,* подаю́щаго мíру ве́лію ми́лость.

Сла́ва, гла́съ 1:

Весели́ся о Го́сподѣ, е́же въ Се́ррахъ вѣ́рныхъ составле́ніе, иму́ще зе́млю, освяще́нную кро́вію сла́внаго священному́ченика; ра́дуйся, Свята́я Горо́ Аѳо́нская, преподо́бнаго возрасти́вшая Це́ркви Бо́жіей, я́ко дре́во благопло́дное при исхо́дищихъ во́дъ; пра́зднуй дне́сь, Ру́сская киновíе сія́, Боже́ственныхъ Та́инъ соверши́теля прехва́льнаго Ники́ту у себе́ зрѣ́вшая; спра́зднуй же и собо́ре ски́тскихъ по́стниковъ, я́ко всеизря́дный по́стникъ тво́й, лику́я ны́нѣ со а́нгелы, помоществу́етъ съ вѣ́рою его́ призыва́ющимъ.

Тропа́рь, гла́съ 4:

По́стнически подвиза́вся и пло́ть покори́въ ду́ху, вше́лъ еси́ въ тишину́ безстра́стія, іере́йствомъ же укра́шенъ, за Христа́ пострада́лъ еси́ твердѣ́йши, Ему́же моли́ся о чту́щихъ тя́, священному́чениче Ники́то приснопа́мятне.

Инъ тропа́рь, гла́съ 1:

Плотска́я увяди́въ двиза́нія вся́, моли́твою и стоя́ніемъ всено́щнымъ, воздержа́ніемъ же и слеза́ми безстра́стія дости́глъ еси́, сла́вный Ники́то, и Христа́ со дерзнове́ніемъ проповѣ́давъ, тве́рдо за Него́ пострада́лъ еси́, священному́чениче. Сла́ва Да́вшему ти́ крѣ́пость, сла́ва Вѣнча́вшему тя́, сла́ва Дѣ́йствующему тобо́ю всѣ́мъ исцѣле́нія.


НА УТРЕНИ,
По 1-мъ стихосло́віи, сѣда́ленъ, гла́съ 8:

Оби́тели сея́ и́ночествующіи, цвѣ́ты пѣ́сненныя собра́вше отъ луго́въ духо́вныхъ и вѣне́цъ отъ тѣ́хъ спле́тше, вѣнцено́сному небожи́телю Ники́тѣ принесе́мъ: священнострада́льче, — зову́ще ему́, — съ преподо́бными и му́ченики моли́ся ко Го́споду поми́ловатися душа́мъ на́шимъ. [Два́жды.]

Сла́ва, и ны́нѣ, богоро́диченъ:

Боже́ственная ски́нія была́ еси́ Сло́ва, еди́на Пречи́стая Дѣ́во Ма́ти, чистото́ю а́нгелы превозше́дшая, па́че всѣ́хъ мене́, пе́рсть бы́вша, оскверне́на плотски́ми прегрѣше́ньми, очи́сти моли́твъ Твои́хъ боже́ственными вода́ми, подаю́щи, Чи́стая, ве́лію ми́лость.

По 2-мъ стихосло́віи сѣда́ленъ, гла́съ 5:

Ра́дуется дне́сь вѣ́рныхъ собра́ніе въ па́мяти твое́й, Ники́то, ты́ бо, по́стническое житіе́ свяще́нно проше́дъ, послѣди́ пострада́лъ еси́ за и́стину, ра́дуяся, посрами́въ злочести́выя, богому́дре, и обвесели́въ благочести́выя. Моли́ся у́бо Христу́ Бо́гу уще́дрити и спасти́ пою́щія тя́. [Два́жды.]

Сла́ва, и ны́нѣ, богоро́диченъ:

Все́ упова́ніе, и́же въ Горѣ́ Твое́й, Госпоже́, возлага́емъ на необори́мый покро́въ Тво́й, предста́тельствомъ преподо́бнаго Твоего́, Ники́ты священному́ченика, не преста́й на́съ храни́ти и на благо́е наставля́ти, избра́нныхъ ча́сти сподобля́ющи любо́вію пою́щія Тя́.

[Поліеле́й и велича́ніе:

Велича́емъ тя́, священному́чениче Ники́то, и чте́мъ святу́ю па́мять твою́, ты́ бо мо́лиши за на́съ, Христа́ Бо́га на́шего.

Псало́мъ избра́нный: Услы́шите сія́, вси́ язы́цы...]

По поліеле́и сѣда́ленъ, гла́съ 8:

По́стничества труды́ и страда́льчества болѣ́зни соедини́въ, богопрія́тне, крилѣ́ невеще́ственнѣ себе́ угото́валъ еси́ и тѣ́ми къ небе́снымъ добро́тамъ возлетѣ́лъ еси́, отону́дуже призира́й, свяще́нне, на су́щія во оби́тели се́й, лю́тыхъ обстоя́ній изыма́я на́съ твои́ми ко Го́споду моли́твами. [Два́жды.]

Сла́ва, и ны́нѣ, богоро́диченъ:

Еди́на Пресвята́го ро́ждшая, еди́наго всѣ́хъ Освяти́теля, освяще́ніе ниспосыла́й на́мъ, Пресвята́я, живу́щимъ во Святѣ́й Горѣ́ Твое́й: благословя́щія Тя́ благослови́ еди́на въ жена́хъ Благослове́нная, спаса́ющи въ ми́рѣ ду́ши на́ша.

[Степе́нна, 1-й антифо́нъ 4-го гла́са. Проки́менъ: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе Луки́, зача́ло 67.]

По 50-мъ псалмѣ́ стихи́ра, гла́съ 6:

Преподо́бне о́тче, пусты́нное житіе́ возлю́бль на Аѳо́нѣ, въ безмо́лвіи пе́рвѣе ски́тскомъ подвиза́лся еси́, та́же во общежи́тіи се́мъ священнодѣ́йствитель бы́лъ еси́, пострада́въ же вѣ́ры ра́ди, сугу́бымъ вѣнце́мъ побѣ́ды отъ Христа́ украси́лся еси́, Его́же моли́, о Ники́то, обрѣсти́ на́мъ ми́лость въ де́нь Су́дный.

Кано́нъ свята́го, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Во́ду проше́дъ мірска́го мяте́жа и вся́каго зла́ избѣжа́въ, богому́дре, въ ти́хое приста́нище Аѳо́на всели́лся еси́ и благоуго́дная Изба́вителю и Бо́гу твори́лъ еси́.

Восхожде́нія въ се́рдцѣ свое́мъ полага́ющу тебѣ́, благосла́вне, въ водѣ́ сле́зъ твои́хъ потопи́лъ еси́ фарао́на мы́сленнаго побѣди́тельною десни́цею Бо́га на́шего.

Тезоиме́ннъ сы́й побѣ́ды, добропобѣ́дниче, на стра́сти подвиза́лся еси́ и всеору́жіемъ Креста́ побѣди́тель тѣ́хъ бы́лъ еси́, но и на́мъ побѣди́тели грѣха́ бы́ти, моли́ся.

Богоро́диченъ: Вве́дши богозва́ннаго Ники́ту въ Го́ру достоя́нія Своего́, въ гото́вое жили́ще ски́тское, Помо́щница и Покрови́тельница, Госпоже́, была́ еси́ ему́ во спасе́ніе.

Другíй кано́нъ, гла́съ то́йже.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Страстьми́ мя омраче́нна, свѣ́тлыми моли́твами твои́ми озари́, преподо́бне, да тя́, свѣтоза́рна іере́я и му́ченика, воспою́ пѣ́сньми.

Любве́ ра́ди Бо́жія вся́, я́же въ мíрѣ сла́дкая, оста́вилъ еси́ и, Святы́я Горы́ безмо́лвникъ бы́въ, сосу́дъ яви́лся еси́ благода́ти, всече́стне.

Богоро́диченъ: Благода́рственную пѣ́снь прино́симъ Ти́, Влады́чице, избавля́еми Тобо́ю отъ вся́кихъ лю́тыхъ, ра́дуйся, зову́ще, Засту́пнице сла́вящихъ Тя́.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Небе́снаго кру́га Творцу́ и жела́ній кра́ю, всеизя́щне, приближа́яся, въ любви́ къ Нему́ отъ всея́ души́, се́рдца и помышле́нія утвержда́лся еси́ и отъ си́лы въ си́лу ше́ствовалъ еси́ благода́тію Еди́наго Человѣколю́бца.

Се́ что́ добро́ или́ что́ красно́, — пою́щу ти́, — но е́же жи́ти бра́тіи вку́пѣ; житіе́ общежи́тельное въ оби́тели се́й возлюби́лъ еси́ и соверше́нныя любве́ къ бли́жнимъ испо́лнился еси́ по́мощію Человѣколю́бца.

Небе́сный человѣ́къ и земны́й а́нгелъ ревну́я бы́ти, а́нгельскія чистоты́ рачи́тель бы́лъ еси́ и, благода́ти свяще́нства сподо́бленъ, я́ко а́нгелъ, слове́сную слу́жбу непоро́чно приноси́лъ еси́ Еди́ному Человѣколю́бцу.

Богоро́диченъ: Небе́сною си́лою Твое́ю, Всецари́це, препоя́сану бы́вшу Ники́тѣ, небе́сныя си́лы, неви́димо служа́щія, имѣ́, достосла́вный въ стра́шномъ Тайнодѣ́йствіи, сла́вя бла́гость Твою́ и вели́чіе Сы́на Твоего́, Еди́наго Человѣколю́бца.

Инъ.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, Еди́не Человѣколю́бче.

Бо́гомъ укрѣпля́емь, по́стническое житіе́ на Аѳо́нѣ возлюби́лъ еси́, Всеблагу́ю Ма́терь Живота́ Тайноучи́тельницу имѣ́я, богопрія́тне.

Яко кри́нъ, во удо́ліихъ Святы́я Горы́ процвѣ́лъ еси́, прехва́льне, я́коже фи́никсъ, возвы́сился еси́ добродѣ́телію и, я́ко ке́дръ, крѣ́покъ показа́лся еси́.

Богоро́диченъ: Сострада́тельною Твое́ю любо́вію ста́до Твое́ назира́ющи, смертоно́снаго изба́ви вре́да, моля́щися о на́съ, рабѣ́хъ Твои́хъ, Всеблага́я Влады́чице.

Инъ конда́къ, гла́съ 4. Подо́бенъ: Вознесы́йся.

Всеору́жіемъ Креста́ огражде́нъ, къ по́двигомъ во́льнѣ изше́лъ еси́, не убоя́вся, богогла́се, вра́жіихъ преще́ній, съ ре́вностію же вѣ́ру исповѣ́дуя, не преста́лъ еси́, до́ндеже муче́нія иску́съ проше́лъ еси́ ве́сь, и по́честь побѣ́ды, Ники́то, получи́лъ еси́.

Сѣда́ленъ, гла́съ 4:

Преподо́бныхъ похвалу́ и страда́льцевъ украше́ніе свяще́нное, Ники́ту достоблаже́ннаго воспои́мъ съ вѣ́рою къ нему́ взыва́юще: священному́чениче свѣтоза́рне, моли́ Христа́ Бо́га прегрѣше́ній оставле́ніе дарова́ти пра́зднующимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Всю́ наде́жду на Тя́, Богоро́дице, Ники́та возложи́въ, благоугоди́ Тебѣ́ въ наслѣ́діи Твое́мъ, іере́й и му́ченикъ бы́въ Сы́на Твоего́. Хода́тайствомъ того́ яви́ богоуго́дны и на́съ, упова́ющихъ на Тя́, и грѣхо́въ проще́ніе испроси́ на́мъ, Преблагослове́нная.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Услы́шавъ, приснопа́мятне, гла́съ Христа́, во Ева́нгеліи глаго́люща: возми́те и́го Мое́ на себе́, — въ трудѣ́хъ и бдѣ́ніихъ пожи́лъ еси́ здѣ́, въ воздержа́ніи и поще́ніи, сокро́вище некра́домо — моли́тву у́мную имѣ́я и сла́вя Его́ Божество́.

Услы́шавше равноа́нгельное житіе́ твое́, всеизря́дне, и по́стническія по́двиги, мно́зи отъ су́щихъ на Аѳо́нѣ назида́хуся кро́тостію и смире́ніемъ твои́мъ, молча́ніемъ же и терпѣ́ніемъ, и прославля́ху Христо́во Божество́.

Услы́шавшу тебѣ́, свя́те, о неизрече́нныхъ бла́гахъ, я́же угото́ва Бо́гъ лю́бящимъ Его́, въ слеза́хъ и воздыха́ніихъ стреми́лся еси́ стяжа́ти себѣ́ хра́мину нерукотворе́ну, вѣ́чну на небесѣ́хъ, да прославля́еши та́мо Христо́во Божество́.

Богоро́диченъ: Услы́ша преподо́бный Ники́та обѣтова́нія Твоя́, Дѣ́во, я́ко боголюбе́зно пожи́вшихъ въ Горѣ́ Твое́й предста́виши Бо́гу и испро́сиши проще́ніе грѣхо́въ, труды́ къ трудо́мъ прилага́ше, благоугожда́я Тебѣ́ и сла́вя Сы́на Твоего́ Божество́.

Инъ.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Плотско́е жела́ніе вконе́цъ отри́нувъ, вѣ́ру, наде́жду и любо́вь ко Го́споду и Его́ Ма́тери стяжа́лъ еси́, освяти́вшихъ тя́, всече́стне.

Богоугожде́нія ревни́тель сы́й, возставля́й на́съ ко благодѣ́ланію, богоно́сне, неуязви́мы творя́ отъ стрѣ́лъ вра́жіихъ моли́твами твои́ми.

Богоро́диченъ: Ты́ сла́ва человѣ́ческаго ро́да, Богоневѣ́стная Марíе, Ты́ благода́ть богода́нная вѣ́рнымъ, Ты́ и́нокомъ прибѣ́жище и утѣше́ніе.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Просвѣща́ему тебѣ́ повелѣ́ніи Госпо́дними, мра́чная де́монская искуше́нія побѣжда́лъ еси́, побѣдоно́сне, Боже́ственною благода́тію покрыва́емь храни́вшаго тя́ Человѣколю́бца.

Просвѣща́ющаго вся́каго человѣ́ка, Христа́, іере́й сы́й, моли́ся о почита́ющихъ тя́, богатносвѣ́тле, да не объи́метъ на́съ но́щь лю́тыхъ наведе́ній, отъ но́щи у́тренюющихъ къ Человѣколю́бцу.

Просвѣща́емь словесы́ Го́спода, доблему́дре, е́же послѣ́довати стопа́мъ Его́, огню́ любве́, снѣда́ющу тя́, возжелѣ́лъ еси́ исповѣ́дати предъ мусульма́ны и́мя Его́ и принести́ себе́ въ же́ртву Человѣколю́бцу.

Богоро́диченъ: Просвѣти́ у́мъ на́шъ и ду́шу свѣтоводи́, Свѣтоводи́тельнице Ники́ты, наставля́ющи ны́ моли́твами его́ на повелѣ́нія Сы́на Твоего́ и укрѣпля́ющи благода́тію Того́, я́ко Человѣколю́бца.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Но́щь мра́чныхъ искуше́ній покрыва́етъ мя́, свѣтоза́рне, привлача́я къ бе́зднѣ безнаде́жія. Тѣ́мже молю́ тя: на свѣ́тлую стезю́ покая́нія напра́ви мя́.

Да́ждь ми́ вре́мя покая́нія, Многоми́лостиве Го́споди, предста́тельствомъ свяще́ннаго исповѣ́дника Твоего́ и непобѣди́маго му́ченика Ники́ты.

Богоро́диченъ: Посѣще́нія сподо́би мя́, Всенепоро́чная, и житію́ исправле́ніе пода́ждь ми́, наставля́ющи на стези́ спаси́тельнаго дѣя́нія и зрѣ́нія.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Моли́твы пролива́лъ еси́ те́плыя ко Го́споду, да пода́стъ ти́, достосла́вне, Боже́ственную си́лу Свою́ со гла́сомъ хвале́нія и исповѣ́данія пожре́тися Ему́, поже́ршемуся на́съ ра́ди и отъ тли́ возве́дшему ны́.

Моли́тву приле́жну твори́лъ еси́, свя́те, я́вльшуся ти́ на по́двигъ страда́льческій во дни́ воспомина́нія страсте́й Христо́выхъ: въ оби́тели бо гра́да Се́рръ, всю́ но́щь у хра́ма бдя́, по и́сповѣди Пренебе́сными Да́ры оживотвори́лся еси́.

Моли́твою и Та́йнами, прехва́льне, укрѣпле́нъ, узрѣ́лъ еси́ ага́рянина, хро́ма отъ рожде́нія, и обѣща́вшуся ти́ исцѣли́ти его́, а́ще увѣ́руетъ во Христа́ Бо́га, я́тъ бы́лъ еси́ мусульма́ны и пре́данъ тѣ́хъ власти́телемъ.

Богоро́диченъ: Моли́твамъ, принесе́ннымъ Тебѣ́, Богоро́дице, Ники́тою, ми́лостивно вне́мши, укрѣпи́ла еси́ того́ соверши́ти, ели́ка обѣща́ о́нъ и возжела́ возда́ти во спасе́ніе свое́ Го́сподеви. И мы́ мо́лимъ Тя́: отъ тли́ возведи́ ны.

Инъ.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Трапезу́нда прозябе́ніе, Аѳо́на похвалу́ и Се́рръ удобре́ніе, мона́шествующихъ собо́ръ, преподо́бнаго страда́льца да ублажи́мъ.

Іере́йства оде́ждою обложе́нъ, украси́лся еси́ сла́вою му́ченичества, жре́цъ и же́ртва я́вѣ показа́выйся, приснопа́мятне.

Богоро́диченъ: Храни́, Всеблага́я Госпоже́, достоя́ніе Твое́ невре́дно отъ искуше́ній бори́теля и испо́лнити во́лю Сы́на Твоего́ укрѣпи́ ны.

Конда́къ, гла́съ 2:

Въ преподо́біи и пра́вдѣ, о́тче, пожи́лъ еси́ и, страда́ньми усоверши́вся, сокро́виществовалъ еси́ себѣ́ бога́тство дарова́ній. Долго́въ у́бо разрѣше́ніе испроси́ на́мъ, неду́говъ свобожда́ющи, всебога́те Ники́то, и оби́тели сея́, въ не́йже Же́ртву Бо́гу приноси́лъ еси́, бу́ди при́сное утвержде́ніе.

Икосъ:

Новоявле́нная звѣзда́ показа́лся еси́ на тве́рди церко́внѣй, Ники́то небоявле́нне, ты́ бо, по́стничествомъ удобре́нъ, іере́йствомъ укра́шенъ и Ду́ха благода́тію осія́нъ, свѣ́тлымъ исповѣ́даніемъ свои́мъ омраче́нныя оттома́ны посрами́лъ еси́, Христа́ — Со́лнце Пра́вды — благоче́стно тѣ́мъ проповѣ́давшу ти́, му́ки же лю́тыя и удавле́ніе за Него́ небоя́зненно прія́вшу, досто́йно увѣнча́нну и просла́влену на небеси́, отону́дуже не преста́й озаря́ти сла́вящія тя́, священному́чениче, и оби́тели сея́, въ не́йже священнодѣ́йствовалъ еси́, бу́ди при́сное утвержде́ніе.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Честна́я па́мять твоя́, великоимени́те, весели́тъ оби́тель сію́, воспѣва́ющую по́двиги твоя́, ю́же соблюда́й мольба́ми свои́ми ко Го́споду, да пое́мъ: отце́въ Бо́же, благослове́нъ еси́.

Яко адама́нтъ, тве́рдъ бы́въ, притупи́лъ еси́ стрѣ́лы ага́рянскія, уничижи́въ Моаме́ѳа, свѣ́тлое же возвы́сивъ зна́меніе побѣ́ды, ра́дуяся, взыва́лъ еси́, добропобѣ́дниче: отце́въ Бо́же, благослове́нъ еси́.

Цѣлому́дріемъ и пра́вдою укра́шену ти́, му́дрость же и му́жество я́вльшу во страда́ніи, кра́сною колесни́цею сея́ четвери́цы восте́клъ еси́ къ небе́снымъ, вопія́: отце́въ Бо́же, благослове́нъ еси́.

Богоро́диченъ: Крѣ́пость и утвержде́ніе Тебе́, Всенепоро́чная, Ники́та имѣ́я, проти́ву сарацы́нскія пре́лести крѣ́пко вооружи́ся, Тя́ проповѣ́давъ, Богоро́дицу, и Сы́ну Твоему́ поя́: отце́въ Бо́же, благослове́нъ еси́.

Инъ.

Ирмо́съ: Бо́жія снисхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

Ли́къ духо́вный соста́вльше, пѣснопѣ́ніе прино́симъ ти́, богому́дре, хода́тая тя́ отъ на́съ къ Бо́гу предлага́юще и Богома́тери.

Кíй язы́къ восхвали́ти возмо́жетъ твое́ терпѣ́ніе въ му́кахъ, въ ни́хже до́блественъ показа́лся еси́, непобѣди́ме?

Богоро́диченъ: Кíй да́ръ принесе́мъ Ти́, Марíе, за вся́ да́ры, я́же пріе́млемъ отъ Твоего́ благоутро́бія? Сла́вимъ у́бо Тя́ и велича́емъ ми́лость Твою́.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Слове́съ твои́хъ, свя́те, си́лы злочести́віи стерпѣ́ти не возмого́ша, тѣ́мже въ смра́дную темни́цу, бію́ще, тя́ вверго́ша, Го́сподеви взыва́юща: свяще́нницы, благослови́те Его́ во вѣ́ки.

Огне́мъ лю́тѣ опаля́емь и за но́зѣ неми́лостивно повѣ́шаемь, подъ ногтьми́ же и чре́вомъ ужа́сно пронза́емь, пострада́вшему за ны́ Христу́ вопія́лъ еси́: свяще́нницы, воспо́йте Его́ во вся́ вѣ́ки.

Зря́ Подвигополо́жникъ достосла́вный коне́цъ по́двиговъ твои́хъ, рука́ми а́нгельскими несо́му, прія́ свяще́нную ду́шу твою́, къ Нему́же ра́достно взыва́лъ еси́: свяще́нницы, хвали́те Его́ во вся́ вѣ́ки.

Богоро́диченъ: Иже отъ Тебе́, Чи́стая, воплоти́вшееся Сло́во распя́тіе претерпѣ́ спасе́нія ра́ди на́шего, Того́ стра́сти велича́я, Ники́та, въ му́кахъ укрѣпля́емь, взыва́ше: свяще́нницы, превозноси́те Его́ во вѣ́ки.

Инъ.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Твою́, боже́ственне, лѣ́тнюю соверша́етъ па́мять оби́тель сія́, засту́пника тя́ иму́щи я́ко своего́ іере́я и му́ченика христоподража́тельна.

Гла́съ ти́ возсыла́емъ моле́бный, богопрія́тне: бу́ди на́мъ сто́лпъ крѣ́пости, избавля́я вся́кихъ бѣ́дъ твои́мъ ко Влады́цѣ хода́тайствомъ.

Богоро́диченъ: Пріими́, Влады́ко, ми́лостивно Моли́твенницу, Ма́терь Твою́, о на́съ и моли́твами Ея́ и свята́го Ники́ты проба́ви ми́лость Твою́ къ рабо́мъ Твои́мъ.

Пѣ́снь 9.

Ирмо́съ: Проявле́нное на горѣ́ законополо́жнику во огни́ и купинѣ́, Рождество́ Приснодѣ́вы, въ на́ше вѣ́рныхъ спасе́ніе, пѣ́сньми немо́лчными велича́емъ.

Подража́тель бы́въ Усну́вшаго на Дре́вѣ и ме́ртвыхъ Возбуди́вшаго и непобѣди́мый таи́нникъ Того́, въ де́нь поко́я Его́ у́спѣ, на дре́вѣ ве́рвію уду́шенъ, враги́ удуши́въ терпѣ́ніемъ свои́мъ.

Вѣнцено́сный возше́лъ еси́, добрострада́льче, въ Го́рняя селе́нія, сугу́бымъ вѣнце́мъ увязе́нъ руко́ю Вѣнцеда́теля, всеблаже́нный у́бо небожи́тель сы́й, помина́й помина́ющія тя́.

Духовнику́, поощри́вшему тебе́, свя́те, Боже́ственными словесы́ на му́ченичество, спасе́ніе съ небесе́ подае́ши и честна́го ученика́ твоего́ спаса́еши по обои́мъ твои́мъ предста́тельствомъ.

Богоро́диченъ: Ми́лостива яви́ на́мъ Сы́на Твоего́, Пречи́стая, егда́ ся́детъ на престо́лѣ сла́вы Своея́ суди́ти вся́ земны́я, имѣ́ющи на сіе́ моля́щаго Тя́ ублажа́емаго на́ми уго́дника Твоего́ Ники́ту.

Инъ.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Отъ неистощи́маго Исто́чника живота́ всѣ́хъ — Христа́ — живоно́сныя поче́рплъ еси́ струи́ благода́ти, и чудеса́ соверша́еши, и исцѣле́нія подае́ши къ тебѣ́ прибѣга́ющимъ.

Ангеловъ собесѣ́дниче, преподо́бныхъ соприча́стниче и священному́чениковъ равностоя́телю, проще́ніе испроси́ пѣвце́мъ твои́мъ, свя́те, ми́ръ, здра́віе же и спасе́ніе.

Богоро́диченъ: Со всѣ́ми святы́ми лику́я, сла́витъ Тебе́, Дѣ́во, и Сы́на Твоего́ и Бо́га Ники́та, но и на́съ мольба́ми того́ жи́зни вѣ́чныя наслѣ́дники сотвори́, да Тя́ при́сно велича́емъ.

Свѣти́ленъ:

Сы́нъ свѣ́та сы́й, богосвѣ́тле, свѣ́томъ благода́ти озари́лся еси́ по кончи́нѣ, освѣща́я гра́дъ, Ники́то, я́коже узрѣ́ша вѣ́рніи въ но́щь пресвѣ́тлаго Воскресе́нія Христо́ва. И ны́нѣ свѣтоно́сною душе́ю твое́ю предстоя́ Безлѣ́тному Свѣ́ту, озаря́й оби́тель сію́, прося́ на́мъ ве́лія ми́лости. [Два́жды.]

Сла́ва, и ны́нѣ, богоро́диченъ:

Свѣ́та незаходи́маго была́ еси́ оби́тель, Влады́чице, дѣ́вства добро́тами свѣтя́щи и благода́тію сія́ющи, тѣ́мже просвѣти́ ны, вопію́щія Ти́: ра́дуйся, хра́ме пресвяты́й Боже́ственныя сла́вы и свѣ́те су́щихъ во тмѣ́, препросла́вленная Богоро́дице Приснодѣ́во.

На хвали́техъ стихи́ры на 4, гла́съ 2. [Аще на 3, 1-я оставля́ется.]

Свяще́нную па́мять* священному́ченика Ники́ты* свяще́нными пѣ́сньми свяще́нная оби́тель сія́* священнолѣ́пно почита́етъ дне́сь,* я́ко своего́ свяще́ннаго моли́твенника,* Первосвяще́нника Христа́ о не́мъ велича́ющи.

Ра́дуяся о святѣ́мъ Ники́тѣ,* Аѳо́нъ взыва́етъ Трапезу́нду,* оте́честву достоблаже́ннаго,* и Се́ррамъ — мѣ́сту страда́нія его́:* моя́ е́сть о Бо́зѣ и Богоро́дицѣ похвала́ — преподо́бный се́й,* духо́вно бо возроди́ся* и по́стнически воспита́ся у мене́.

По му́ченичестѣй кончи́нѣ твое́й,* побѣдоно́сне Ники́то,* побѣди́ся въ тебѣ́ естества́ чи́нъ:* тре́тій бо де́нь ви́сящу ти́,* пото́комъ нача́ тещи́ кро́вь изъ тѣлесе́ твоего́,* во освяще́ніе вѣ́рныхъ и исцѣле́ніе.

Недоумѣва́ющуся христолю́бцу* о тебѣ́, всеизря́дне,* Госпо́дь сла́вящія Его́ сла́вяй,* разсѣ́я мра́къ невѣ́рія,* трикра́ты возгласи́въ тому́:* вѣ́руй непрело́жно,* я́ко Ники́та е́сть и́стинный му́ченикъ Мо́й.

Сла́ва, гла́съ 7:

Словесе́мъ Госпо́днимъ вне́мля, я́ко въ дому́ Отца́ Его́ оби́тели мно́ги су́ть, и, возжелѣ́въ та́мо, свя́те, обита́ти, добродѣ́тельми, сво́йственными тѣ́мъ оби́телемъ, потща́лся еси́ себе́ украси́ти: воздержа́ніемъ бо увяди́въ пло́ть свою́ и о́гнь страсте́й погаси́въ, возже́глъ еси́ въ души́ свое́й о́гнь Боже́ственныя любве́, и́мже попали́лъ еси́ нече́стіе въ сла́вномъ страда́льчествѣ твое́мъ, и ны́нѣ, наслажда́яся пресла́дкимъ лицезрѣ́ніемъ Домувлады́ки, не преста́й моли́тися, Ники́то, о соверша́ющихъ честну́ю па́мять твою́.


НА ЛИТУРГІИ,

[Блаже́нна, пе́рваго кано́на, пѣ́снь 3-я, и втора́го, пѣ́снь 6-я. Проки́менъ, гла́съ 7: Восхва́лятся преподо́бніи во сла́вѣ* и возра́дуются на ло́жахъ свои́хъ. Сти́хъ: Воспо́йте Го́сподеви пѣ́снь но́ву, хвале́ніе Его́ въ це́ркви преподо́бныхъ. Апо́столъ ко Евре́емъ, зача́ло 334. Аллилу́ія, гла́съ 2: Свяще́нницы Твои́ облеку́тся въ пра́вду, и преподо́бніи Твои́ возра́дуются. Сти́хъ: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ. Ева́нгеліе Луки́, зача́ло 67. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся].

Источникъ: Мине́я Апрѣ́ль. Ча́сть пе́рвая. — М.: Издательскій совѣтъ Русской Православной Церкви, 2002. — С. 98-111.

/ Къ оглавленію раздѣла /


Наверхъ / Къ титульной страницѣ

0