Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 27 мая 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 3-й де́нь.
Преподо́бнаго отца́ на́шего Ники́ты Исповѣ́дника, игу́мена оби́тели Мидикíйскія.

[ВЕЧЕРЪ,]
На Го́споди воззва́хъ: стихи́ры, гла́съ 2. Подо́бенъ: Егда́ отъ дре́ва.

Сло́вомъ управля́я ду́ши,* боже́ственный строи́тель показа́лся еси́,* тайново́ждь же вѣ́ренъ,* сѣ́мена спаси́тельная влага́я* и жня́ многого́бзенный пло́дъ, богоно́се,* се́й Влады́цѣ твоему́ прино́сиши, ра́дуяся,* Ему́же ны́нѣ предстоя́, блаже́нне,* помяни́ ста́до твое́ сіе́,* при́сно чту́щее тя́, богодухнове́нне.

Кро́токъ бы́въ и про́стъ,* правосла́вія ре́вностію яви́лся еси́, ра́туя,* вѣ́рою бо, я́ко броня́ми, обложе́нъ* и, я́ко копіе́мъ, воздержа́ніемъ, Ники́то богому́дре,* вся́кую ху́льную е́ресь обличи́лъ еси́,* боже́ственный Спа́са о́бразъ почита́я* и служа́, богоно́се,* уста́вомъ оте́ческимъ я́вѣ послѣ́дуя.

Егда́ во изгна́ніихъ тя́ го́рькихъ* и въ те́мнѣйшихъ мѣ́стѣхъ* темнѣ́йшій мучи́тель заключи́ звѣ́рскимъ суровство́мъ,* ра́йское селе́ніе во умѣ́ обнося́,* ра́дуяся же ду́хомъ, о́тче, претерпѣ́лъ еси́,* Его́же ны́нѣ благолѣ́піе ви́дѣти* вои́стинну сподо́бился еси́, блаже́нне,* болѣ́зней воздая́нія пріе́мля.

Сла́ва, и ны́нѣ, богоро́диченъ:

Еди́на Невмѣсти́маго Бо́га* нетѣсномѣ́стно во чре́вѣ носи́ла еси́,* Человѣ́ка бы́вша за бла́гость, Пресвята́я Богоневѣ́сто.* Тѣ́мже молю́ Тя:* утѣсня́ющихъ мя́ страсте́й измѣни́,* я́ко да, тѣ́сную и пра́вую стезю́, ше́ствовавъ,* дости́гну, я́же къ жи́зни, Дѣ́во, водя́щую.

Крестобогоро́диченъ. Подо́бенъ: Егда́ отъ дре́ва.

Егда́ нескве́рная Агница ви́дѣ Своего́ Агнца,* на заколе́ніе я́ко Человѣ́ка во́лею влеко́ма,* пла́чущи, глаго́лаше:* безча́дствовати Мя́ ны́нѣ тщи́шися, Христе́, ро́ждшую Тя́,* что́ сіе́ сотвори́лъ еси́, Изба́вителю вся́ческихъ?* Оба́че воспѣва́ю и сла́влю Твою́,* ю́же па́че ума́ и сло́ва,* кра́йнюю бла́гость, Человѣколю́бче.


[НА УТРЕНИ,]
Кано́нъ, его́же краегране́сіе, кромѣ́ богоро́дичновъ: Твое́ честву́ю всесвѣ́тлое житіе́, о́тче. Гла́съ 2.

Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Свѣ́томъ Боже́ственнаго блиста́нія, о́тче, озаря́емь, твою́ жи́знь Бо́гу освяти́лъ еси́, издѣ́тска избра́въ дѣ́вства свѣтоно́сную свѣ́тлость, е́юже уподо́бился еси́ безпло́тныхъ чистотѣ́.

Наста́вникомъ Боже́ственнымъ и Честны́мъ Ду́хомъ пома́занъ Богови́днымъ, мона́шествующихъ о́бразомъ чи́сто бесѣ́довалъ еси́ и пребы́лъ еси́ многосвѣ́тлою осія́емь заре́ю, богоно́се, житіе́ чистѣ́йшо стяжа́въ.

Укрѣпи́вся си́лою Креста́, стра́сти увяди́лъ еси́ плотскíя и у́мъ просвѣти́лъ еси́, о Ники́то всему́дре, прилѣжа́ніемъ уче́ній духо́вныхъ, Боже́ственнаго зрѣ́нія бога́тство неиждива́емо пло́дствовавъ.

Цѣлому́дріемъ, блаже́нне, просвѣ́щся и чистото́ю, ко свяще́нному возведе́нъ бы́лъ еси́ нача́льству: свяще́нства бо свѣтлѣ́йшею украси́лся еси́ оде́ждею, Боже́ственныхъ та́инствъ, преподо́бне, хода́тай познава́емь.

Богоро́диченъ: Превы́шши яви́лася еси́, Чи́стая, вся́кія ви́димыя и неви́димыя, Приснодѣ́во, тва́ри, Зижди́теля бо родила́ еси́, я́ко благоволи́ воплоти́тися во утро́бѣ Твое́й, Его́же со дерзнове́ніемъ моли́ спасти́ пою́щія Тя́.

Пѣ́снь 3.

Ирмо́съ: Процвѣла́ е́сть пусты́ня, я́ко кри́нъ, Го́споди, язы́ческая неплодя́щая це́рковь, прише́ствіемъ Твои́мъ, въ не́йже утверди́ся мое́ се́рдце.

Небе́сное стяжа́въ жи́тельство, преподо́бне, свѣтови́денъ и свѣ́телъ, благоче́стія, о Ники́то, бы́лъ еси́ свѣти́льникъ, мно́гими укра́шенъ дарова́ньми.

Умертви́въ мудрова́нія пло́ти твоея́, преподо́бне, добродѣ́телію оживи́лъ еси́ богому́дренно души́ боже́ственное и жи́зни нетлѣ́нныя сподо́бился еси́.

Ра́дуяся, препроводи́лъ еси́ твое́ житіе́, сла́вне, преиспещре́нъ добро́тами и кра́сными богатѣ́я дарова́ньми, въ ни́хже утверди́ся се́рдце твое́.

Возсія́лъ еси́, я́ко со́лнце, мона́шествующихъ чино́мъ, добродѣ́тельми украша́емь, о Ники́то богому́дре преподо́бне! Тѣ́мъ тя́, ра́дующеся, ублажа́емъ.

Богоро́диченъ: Просвѣща́ющаго концы́, Пресвята́я, родила́ еси́, пло́тію несозда́ннаго и пре́жде всѣ́хъ Отцу́ Собезнача́льнаго, тѣ́мже Тя́, Богоро́дицу, вѣ́рою чти́мъ.

Сѣда́ленъ, гла́съ 4. Подо́бенъ: Ско́ро предвари́.

Водвори́лся еси́ въ гора́хъ безмо́лвія, му́дре, воспита́лся еси́ во градѣ́хъ воздержа́нія я́вѣ, возвы́сився обою́ду, оста́вилъ еси́ долѣре́тныя сла́сти, жи́знь дости́глъ еси́ небе́сную, во оби́тель всели́вся, въ не́йже мо́лиши о на́съ Бо́га.

Сла́ва, и ны́нѣ, богоро́диченъ:

Дѣ́во Всенепоро́чная, Яже Пресу́щнаго Бо́га ро́ждшая, со безпло́тными Того́ непреста́нно моли́ оставле́ніе прегрѣше́ній и исправле́ніе житія́ да́ти на́мъ пре́жде конца́, вѣ́рою и любо́вію пою́щимъ Тя́ по до́лгу, еди́на Всепѣ́тая.

Крестобогоро́диченъ:

Дѣ́во Пренепоро́чная, Ма́ти Христа́ Бо́га, ору́жіе про́йде Твою́ пресвяту́ю ду́шу, егда́ распина́ема ви́дѣла еси́ во́лею Сы́на и Бо́га Твоего́, Его́же, Благослове́нная, моля́щи не преста́й проще́ніе прегрѣше́ній на́мъ дарова́ти.

Пѣ́снь 4.

Ирмо́съ: Прише́лъ еси́ отъ Дѣ́вы, не хода́тай, ни а́нгелъ, но Са́мъ, Го́споди, вопло́щся, и спа́слъ еси́ всего́ мя человѣ́ка. Тѣ́мъ зову́ Ти́: сла́ва си́лѣ Твое́й, Го́споди.

Кореносѣ́чецъ страсте́й, богоно́се, показу́емь, души́ чистото́ю богобо́рныхъ исто́ргнулъ еси́ вся́кую душегу́бную пре́лесть, священнотаи́нниче прече́стне.

Взе́мъ побѣ́ды, пребога́те, вѣне́цъ, въ се́лѣхъ небе́сныхъ ны́нѣ почива́еши, блаже́нне, стра́сти оттря́съ и въ безстра́стіе, о́тче, одѣ́явся.

Же́ртву я́ко непоро́чну, о́тче, житіе́ твое́ Христу́ прине́слъ еси́, Боже́ственныя любве́ испо́лненъ и по́стничества украша́емь добро́тою, преблаже́нне.

Витíйства душетлѣ́нныя, богому́дре, е́реси я́сно изобличи́лъ еси́, Христо́ву чту́щъ боже́ственную ико́ну, и Богома́тере, и святы́хъ всѣ́хъ, свяще́ннѣйшій.

Богоро́диченъ: Яко похвалу́, я́ко держа́ву мíра и утвержде́ніе, я́ко приста́нище благоути́шно, я́ко весе́лію вино́вну, Тя́, Пречи́стая, сла́вимъ, крася́щіися вси́ въ сла́вѣ Твое́й.

Пѣ́снь 5.

Ирмо́съ: Хода́тай Бо́гу и человѣ́комъ бы́лъ еси́, Христе́ Бо́же: Тобо́ю бо Влады́ко, къ свѣтонача́льнику Отцу́ Твоему́, отъ но́щи невѣ́дѣнія, приведе́ніе и́мамы.

Яко кро́токъ, въ земли́ кро́ткихъ всели́лся еси́, Ники́то му́дре, побо́рникъ бы́въ по и́стинѣ, всеприснопа́мятне, и исповѣ́данія вѣнце́мъ свѣ́тло украша́емь.

Къ Боже́ственному Свѣ́ту ны́нѣ преста́вился еси́, преподо́бне, Свѣ́та бы́въ сы́нъ возлю́бленъ, въ ра́дости и красотѣ́ съ ли́ки а́нгельскими ра́достно веселя́ся.

Неизрече́нныя сла́дости ра́йскія бы́лъ еси́ ны́нѣ прича́стникъ, приста́нище бо всеблагоути́шное обурева́емымъ показа́лся еси́ и а́лчущихъ, блаже́нне, препита́тель бы́лъ еси́.

Богоро́диченъ: Глаго́лы Твоя́ помина́юще, ны́нѣ Тя́ ублажа́емъ: Тобо́ю, Пренепоро́чная, блаже́нство несказа́нное и жи́знь нестарѣ́емую и́стинно воспрія́хомъ.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Блаже́нныхъ наде́ждъ получи́лъ еси́, о́тче всеблаже́нне, блаже́нства Влады́чня бы́въ наслѣ́дникъ и Боже́ственнаго осія́нія.

Свѣтоно́сныя свѣщи́ имѣ́я сугу́бы исповѣ́данія твоего́ и по́стничества, въ небеса́ вмѣсти́лся еси́, богоно́се Ники́то пребога́те.

Наслажда́яся безконе́чныя и Боже́ственныя сла́дости въ небе́сныхъ ны́нѣ, о́тче, ски́ніихъ, о на́съ моли́ всѣ́хъ Влады́ку и Го́спода.

Богоро́диченъ: Ны́нѣ къ Тебѣ́ прибѣга́ю, Пречи́стая, спаси́ мя мольба́ми Твои́ми и соблюди́, ели́ка бо хо́щеши, мо́жеши, я́ко Ма́ти Всемогу́щаго.

Конда́къ, гла́съ 2. Подо́бенъ: Вы́шнихъ ища́.

Небе́сный у́мъ и житіе́ стяжа́въ, сія́еши я́сно, я́коже со́лнце, свѣ́тлостію дѣ́лъ, просвѣща́еши су́щія во тмѣ́ жите́йстѣй, о́тче Ники́то, и, приводя́ всѣ́хъ къ Бо́гу, моли́ непреста́нно о всѣ́хъ на́съ.

Пѣ́снь 7.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Твоя́ кро́тость вельми́ въ пе́рсть смири́ мучи́теля суровство́, ча́стыми мольба́ми сего́ умори́вши, вѣ́сть бо во́лю твори́ти боя́щихся Его́ Госпо́дь.

Гро́мъ догма́товъ твои́хъ и свѣтоно́сная мо́лнія житія́ твоего́ мíръ уясни́, вѣ́рныя озаря́ющи боговѣща́нными сія́ньми, словесы́ же и дѣя́ніи свѣ́тло, священнотаи́нниче богоблаже́нне.

Крѣ́постію вжиля́емь Утѣ́шителя, де́монскихъ полко́въ и сѣ́тей ерети́ческихъ, богому́дре, избѣжа́лъ еси́ и къ небе́снѣй высотѣ́ возше́лъ еси́, съ ли́ки безпло́тныхъ ны́нѣ водворя́яся.

Богоро́диченъ: Хра́мъ была́ еси́ свяще́нъ вся́ хотѣ́ніемъ, Дѣ́во, Созда́вшаго, Того́ бо вмѣсти́ла еси́, всѣ́ми Невмѣсти́маго, мíръ обновля́юща. Тѣ́мже Тя́, Богоро́дицу, проповѣ́дуемъ.

Пѣ́снь 8.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Вся́ко превзоше́дъ чу́вство, треблаже́нне, мы́сленному ны́нѣ прибли́жился еси́ Свѣ́ту, всече́стне, боговидѣ́нія сподобля́емь и просвѣще́нія исполня́емь, зовы́й: благослови́те, вся́ дѣла́ Госпо́дня, Го́спода.

Ме́ртвостію страсте́й я́вѣ облече́нъ, къ живоно́сному изше́лъ еси́ ликова́нію, всеблаже́нне, благоче́стіемъ разжиза́емь и добродѣ́тельми осія́емь, зовы́й: превозноси́те, вся́ дѣла́ Госпо́дня, Го́спода.

Вся́ку добродѣ́тель, богому́дре, отъ младе́нства извы́къ, при кончи́нѣ по́двигъ твои́хъ вѣнце́мъ украша́емь благода́тнымъ показа́лся еси́ и по́честь прія́лъ еси́, поя́: превозноси́те, вся́ дѣла́ Госпо́дня, Го́спода.

Свы́ше на́съ ны́нѣ назира́еши, о́тче, твоему́ Влады́цѣ предстоя́, побѣ́ды, тезоимени́те, дерзнове́ніе мно́го имѣ́я и душе́внаго прося́, сла́вне, спасе́нія, священноявле́нне, ста́ду твоему́.

Богоро́диченъ: Ты́ Отцу́ неразлу́чнаго, въ ложесна́хъ богому́жно пожи́вша, безсѣ́менно зачала́ еси́ и несказа́нно родила́ еси́, Богороди́тельнице Пречи́стая: тѣ́мже Тя́, спасе́ніе всѣ́хъ на́съ, познава́емъ.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щся отъ Дѣ́вы, на́мъ яви́ся, омраче́нная просвѣти́ти, собра́ти расточе́нная. Тѣ́мъ Всепѣ́тую Богоро́дицу велича́емъ.

Боже́ственныя свѣ́тлости, я́ко чи́стъ, сподо́бился еси́, добродѣ́телей ви́ды облиста́яся и исповѣ́данія вѣнце́мъ я́вѣ украша́емь, тѣ́мже всепра́зднственный пра́здникъ тво́й ублажа́емъ.

Смы́сленно, блаже́нне, твою́ жи́знь соверши́лъ еси́, повелѣ́ньми Спа́са управля́емь, ны́нѣ же, сѣ́ни преше́дшей, прера́достно жи́знь вѣ́чную досто́йно получи́лъ еси́, богоявле́нно, свяще́ннѣйше.

Теку́щихъ быстро́ прете́клъ еси́ мяте́жъ, къ ти́хому же, Ники́то, Ца́рства Христо́ва, ра́дуяся, устреми́лся еси́ приста́нищу, къ нему́же на́съ наста́ви, о́тче, тя́ блажа́щія и твою́ па́мять почита́ющія.

Богоро́диченъ: Тя́ свидѣ́нія сѣ́нь прообразова́, въ не́йже скрижа́ли, и ста́мна, и златы́й ковче́гъ, я́коже бо она́ о́ныя, та́ко и Ты́ Безнача́льнаго Сло́ва во утро́бѣ вмѣсти́ла еси́, Богоро́дице, воплоща́ема.

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 15 об. – 19.

/ Къ оглавленію раздѣла /


Наверхъ / Къ титульной страницѣ

0