Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 11 декабря 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія во 2-й де́нь.
Преподо́бнаго отца́ на́шего и чудотво́рца Ти́та.

[ВЕЧЕРЪ,]
На Го́споди воззва́хъ: стихи́ры, гла́съ 8. Подо́бенъ: О, пресла́внаго чудесе́!

Ти́те богому́дре о́тче на́шъ,* тво́й нося́ кре́стъ,* Христу́ послѣ́довалъ еси́* и стра́сти вся́ души́ покори́лъ еси́.* Отону́дуже благода́ть свы́ше прія́лъ еси́* врачева́ти стра́сти* притека́ющихъ къ тебѣ́,* утиша́ти неду́ги и отгоня́ти ду́хи.* Тѣ́мъ твою́ па́мять пра́зднуемъ и блажи́мъ.

Ти́те всеблаже́нне о́тче на́шъ,* по́стническими пребыва́ніи священноочища́емь* и у́мъ прича́стіи боже́ственными просвѣща́я,* свяще́нства ма́сть всесвяту́ю* ма́ніемъ Боже́ственнаго Ду́ха* вои́стинну прія́тъ* послужи́лъ еси́ до́блѣ на земли́* Бо́гу и Зижди́телю твоему́,* я́коже а́нгелъ.

Преподо́бне Ти́те богодухнове́нне,* правосла́вія свѣ́томъ* ду́шу осія́въ,* те́мную е́реси мглу́ ума́лилъ еси́* и, возсія́въ, я́ко свѣтлѣ́йшая звѣзда́,* просвѣща́еши мíра концы́* чудодѣ́йствы твои́ми лучено́сными всегда́.* Тѣ́мъ твою́ па́мять пра́зднуемъ, торжеству́юще.

Сла́ва, и ны́нѣ, богоро́диченъ:

Помышле́нія нечи́ста* и устна́ льсти́ва,* дѣла́ же моя́ вся́ оскверне́на,* и что́ сотворю́?* Ка́ко усря́щу Судію́?* Влады́чице Дѣ́во,* моли́ Сы́на Твоего́, и Зижди́теля, и Го́спода,* я́ко да въ покая́ніи пріи́метъ ду́хъ мо́й,* я́ко еди́нъ Благоутро́бенъ.

Крестобогоро́диченъ:

Юница нескве́рная,* Юнца́ ви́дящи на дре́вѣ,* пригвожда́ема во́лею,* рыда́ющи жа́лостнѣ, —* увы́ Мнѣ́, — вопія́ше, —* люби́мѣйшее Ча́до:* что́ Ти́ со́нмъ воздаде́ безблагода́тный евре́йскій,* хотя́ Мя обезча́дствовати* отъ Тебе́, Вселюбе́зне?


[НА УТРЕНИ,]
Кано́нъ, его́же краегране́сіе: Мона́шествующихъ сто́лпъ, да пое́тся Ти́тъ. Гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Всего́ мя, страстьми́ плотски́ми лю́тѣ углѣ́бша и истлѣ́вша сластьми́, сокро́вище сы́й безстра́стія, Ти́те, моли́твами твои́ми спаси́.

Боже́ственное Ду́ха избра́ніе, Бо́гу прине́слся еси́ отъ пеле́нъ ма́тернихъ и Неискусому́жныя Богоро́дицы таи́нникъ и служи́тель бы́лъ еси́.

Яко воздержа́нія сла́дость сса́въ, отри́нулъ еси́ го́ресть страсте́й, отону́дуже па́че ме́да и со́та, о́тче, наслажда́еши ду́ши на́ша.

Но́ваго я́ко Па́влова тя́ ученика́, Ти́те, восхваля́емъ: о́наго бо ревни́тель подвиго́въ показа́лся еси́, богоблаже́нне, и съ ни́мъ вѣнцы́ воспрія́лъ еси́.

Богоро́диченъ: Сло́во Безма́терне изъ Отца́, безо́тчее сіе́ въ послѣ́дняя богому́жно родила́ еси́, еди́на Богома́ти, я́ко превы́шши всея́ тва́ри.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Мѵ́ро освяще́нія отъ по́стническихъ, преподо́бне, арома́тъ, весьма́ сложи́лся еси́ въ воню́ благоуха́нія Бо́гу.

Ору́жіе — воздержа́ніе и щи́тъ — моли́тву, преподо́бне, имѣ́я при́сно, нача́ла тмы́, обличи́въ, посрами́лъ еси́.

Въ зако́нѣхъ поще́нія поуча́яся, стра́сти погрузи́лъ еси́, я́коже другíя фараони́ты, пото́комъ сле́зъ твои́хъ.

Богоро́диченъ: Ми́лостива бы́ти мнѣ́ молю́ при́сно, Влады́чице, Твои́ми моли́твами изъ Тебе́ Рожде́ннаго, въ де́нь Су́дный.

Сѣда́ленъ, гла́съ 1. Подо́бенъ: Ли́къ а́нгельскій.

Пости́вся на земли́, я́ко безпло́тенъ, Ти́те, умори́лъ еси́ врага́ и низложи́лъ еси́ вку́пѣ собо́ръ ересе́й правосла́вными твои́ми уче́ніи. Тѣ́мже, дне́сь всесвяту́ю твою́ па́мять пра́зднующе, ра́достно воспѣва́емъ тебе́ Возвели́чившаго.

Богоро́диченъ:

Упова́ніе христіа́нъ, Пресвята́я Дѣ́во, Его́же родила́ еси́, Бо́га, па́че ума́ же и сло́ва, непреста́нно моли́ съ вы́шними си́лами пода́ти оставле́ніе грѣхо́въ на́шихъ всѣ́хъ и исправле́ніе житія́ вѣ́рою и любо́вію при́сно Тя́ сла́вящимъ.

Крестобогоро́диченъ:

Нескве́рная Агница, Агнца и Па́стыря, повѣ́шена на древѣ́, ме́ртва зря́щи, пла́чущи, вѣща́ше, ма́терски восклица́ющи: ка́ко претерплю́ Твое́, е́же па́че сло́ва, Сы́не Мо́й, сни́тіе и во́льныя стра́сти, Бо́же Преблагíй?

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Гное́ніе, блаже́нне, грѣхо́вное все́ оплева́лъ еси́ и стрѣло́ю воздержа́нія де́монскія полки́ уязви́лъ еси́.

Чистоты́ жела́ніемъ ду́шу уязви́въ, те́плѣ послѣ́довалъ еси́ Христу́ и вше́лъ еси́ въ черто́гъ сла́вы, всеблаже́нне.

Яко цвѣтни́къ благоуха́ннѣйшій и добродѣ́телей ра́й одушевле́нъ, воздержа́ніемъ процвѣ́лъ еси́, и́мже вся́ пита́еши, честву́ющія тя́.

Законополо́жника воздержа́нія и неле́стный о́бразъ кро́тости, я́ко Моисе́я тя́ и Дави́да, вои́стинну стяжа́вше вси́, о́тче, ублажа́емъ.

Богоро́диченъ: Херуви́мъ превы́шшу Тя́ и серафи́мъ, пое́мъ, Всенепоро́чная, Его́же бо трепе́щутъ вся́ческая, пло́тію Влады́ку носи́ла еси́ на объя́тіихъ Твои́хъ.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Угаси́въ вся́ стра́сти росо́ю подвиго́въ твои́хъ, Ти́те блаже́нне, бога́тно вже́гъ огне́мъ любве́ и вѣ́ры воздержа́нія свѣти́льникъ, и просвѣще́ніе безстра́стія, и дне́ сы́нъ бы́лъ еси́.

Вѣ́ры гро́здъ боже́ственнымъ воздѣ́ланіемъ, о́тче, воспита́лъ еси́, и въ точи́ла вложи́лъ еси́, и изгне́лъ еси́ болѣ́зньми воздержа́нія и, ча́шу испо́лнивъ духо́вную поще́нія, весели́ши сердца́ ста́да твоего́.

Претерпѣ́въ до́блественнѣ прило́ги и ра́ны неви́димыхъ вра́гъ, показа́лся еси́ сто́лпъ терпѣ́нія, утвержда́я ста́до твое́ па́лицею боже́ственною на па́житехъ воздержа́нія и на водѣ́ воспита́я, блаже́нне.

Богоро́диченъ: Яко приста́нище Тя́ вси́, стѣ́ну, и утвержде́ніе, и предста́тельницу на́мъ, и къ Ца́рствію непосты́дный вхо́дъ иму́ще, наде́жди на́шея не отпа́сти, мо́лимся, ма́терними Твои́ми мольба́ми, Всенепоро́чная.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Разруши́въ страсте́й мглу́ и мра́чную тму́, де́нь восто́ка и свѣ́тъ во стезя́хъ твои́хъ возсія́лъ еси́, преподо́бне, отъ мно́гихъ по́двигъ и бѣ́дъ, су́щихъ по вѣ́рѣ.

Весьма́ изступи́лъ еси́ къ Бо́гу жела́ніемъ воздержа́нія, мíръ оста́вивъ, и міродержа́теля восхи́тилъ еси́, богопрія́тне, премíрнаго Ца́рства наслажде́ніе.

Собра́лъ еси́ въ души́ боже́ственное бога́тство Ду́ха: непоро́чную моли́тву, чистоты́ цѣлому́дріе, бдѣ́ніе спротяже́нное, воздержа́нія болѣ́зни, и́миже до́мъ позна́лся еси́ Бо́га.

Ве́щи до́льнія, му́дре, прете́клъ еси́ ху́дость, невеще́ственною же моли́твою у́мъ впери́лъ еси́ и вы́шняго прія́тія наслѣ́дникъ яви́лся еси́ житія́ соверше́нствомъ.

Богоро́диченъ: Зачала́ еси́ вои́стинну Боже́ственное Сло́во во утро́бѣ Твое́й и Сіе́ преесте́ственно, Всенепоро́чная, родила́ еси́, Его́же моли́твами уми́лостиви отъ бѣ́дъ вся́ изба́вити рабы́ Твоя́.

Конда́къ, гла́съ 4. Подо́бенъ: Яви́лся еси́.

Житія́ молву́ оста́вилъ еси́ и ти́хо, все́ житіе́ твое́ пожи́въ, му́дре, къ Бо́гу преше́лъ еси́, чудоно́сне о́тче на́шъ, Ти́те преподо́бне.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Не оскверни́вся грѣхми́, рѣка́ воздержа́нія, о́тче, показа́лся еси́ на́мъ, стра́сти потопля́я и скве́рну очища́я вопію́щихъ вѣ́рно: оте́цъ на́шихъ Бо́же, благослове́нъ еси́.

Ны́нѣ съ невеще́ственными ли́ки бесѣ́дуя, богоблаже́нне, и свѣ́тлости вы́шняго гоще́нія непреста́нно наслажда́яся, уще́дри пою́щія: оте́цъ на́шихъ Бо́же, благослове́нъ еси́.

Во исповѣ́даніи вѣ́ры, о́тче, пре́былъ еси́ невра́щенъ, Христа́ бо вообража́я пло́тію и напису́я, покланя́ешися и зове́ши: оте́цъ на́шихъ Бо́же, благослове́нъ еси́.

Іису́са Влады́ки на тѣлеси́, о́тче, нося́ я́звы, и мене́, уя́звеннаго стрѣло́ю веліа́ра, уврачу́й, зову́ща: оте́цъ на́шихъ Бо́же, благослове́нъ еси́.

Богоро́диченъ: Па́че естества́ и сло́ва Влады́ку всѣ́хъ чревоноси́ла еси́ и пита́еши отъ сосе́цъ Твои́хъ, всѣ́мъ благовре́менную уготовля́юща трапе́зу, Его́же прилѣ́жно, Чи́стая, о на́съ моли́.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Сто́лпъ тя́ вдохнове́нъ я́ко вои́стинну, и о́бразъ воздержа́нія, о́тче, стяжа́вше, вси́ твою́ па́мять честву́емъ по до́лгу.

Ли́къ ра́дуется мона́шествующихъ, и лику́етъ преподо́бныхъ собо́ръ и пра́ведныхъ: вѣне́цъ бо досто́йно съ си́ми прія́лъ еси́.

Укра́шенъ добродѣ́тельми, въ черто́зѣ неизрече́нныя сла́вы восклони́лся еси́, пѣ́снь воспѣва́я Христу́ во вѣ́ки вся́.

Оде́ждею свяще́нною одѣ́явся и соверша́я же́ртвы безкро́вныя, же́ртва прине́слся еси́ Бо́гу во вѣ́ки.

Богоро́диченъ: Во утро́бѣ Твое́й су́щаго пре́жде Тебе́ заче́нши, Богома́ти Чи́стая Дѣ́во, родила́ еси́ несказа́нно Бо́га и Царя́.

Пѣ́снь 9.

Ирмо́съ: Чи́стую сла́вно почти́мъ, лю́діе, Богоро́дицу, о́гнь Божества́ пріи́мшую во чре́вѣ неопа́льно, пѣ́сньми велича́емъ.

Вра́чь неду́гующихъ во страсте́хъ отъ Бо́га показа́лся еси́, потреби́тель же, блаже́нне, и отгони́тель лука́выхъ де́моновъ, тѣ́мже тя́ блажи́мъ.

Зе́млю я́ко тлѣ́нія жили́ще оста́вилъ еси́, о́тче, и въ зе́млю всели́лся еси́ кро́ткихъ, и съ ни́ми ра́дуешися, боже́ственныя наслажда́яся сла́дости.

Уста́въ непоро́ченъ вѣ́ры и воздержа́нія о́бразъ иму́ще по́двиги твоя́, непреста́нно Зижди́теля въ пѣ́снехъ велича́емъ.

Дне́сь де́нь пра́здничный, созыва́етъ бо Ти́тъ мона́шествующихъ стада́ на ликова́ніе духо́вное и чрежде́ніе и пи́щу нетлѣ́нныя жи́зни.

Богоро́диченъ: Въ Тя́ всели́выйся, Всенепоро́чная, роди́ся, Иже пе́рвѣе родонача́льнымъ злонра́вно запе́нша, человѣкоубíйцу низложи́въ, и вся́ ны́ спасе́.

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 12 об. – 15 об.

/ Къ оглавленію раздѣла /


Наверхъ / Къ титульной страницѣ

0