Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 17 декабря 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 1-й де́нь.
Слу́жба преподо́бнаго и богоно́снаго отца́ на́шего архимандри́та Евѳи́мія, Су́ждальскаго чудотво́рца.

НА МАЛѢЙ ВЕЧЕРНИ,
На Го́споди воззва́хъ: стихи́ры, гла́съ 4. Подо́бенъ: Яко до́бля.

Труды́ по́стническими* твою́ ду́шу вооружи́въ,* плотска́я увяди́лъ еси́, преподо́бне, мудрова́нія,* и у́мъ, сла́вне, содѣ́лалъ еси́* Боже́ственныя Тро́ицы жили́ще,* и возвы́сился еси́, идѣ́же му́чениковъ во́инства* и добро́та недомы́сленная,* проро́ковъ ликова́нія,* и преподо́бныхъ ра́дованіе.* Съ ни́миже ны́нѣ ра́дуешися,* въ сла́вѣ предстоя́ Христу́,* со дерзнове́ніемъ моля́ся о душа́хъ на́шихъ. [Два́жды.]

Бла́гости навы́къ, трезвя́ся,* отъ ю́ности бо́дрствуя о всѣ́хъ,* благо́ю со́вѣстію,* умо́мъ преочище́ннымъ и душе́ю, преподо́бне Евѳи́міе,* небе́сныхъ чино́въ сія́нія* ви́дѣти сподо́бился еси́.* Съ ни́миже ны́нѣ ра́дуешися,* въ сла́вѣ предстоя́ Христу́,* со дерзнове́ніемъ моля́ся о душа́хъ на́шихъ.

Пресвѣ́тлымъ житіе́мъ твои́мъ,* преподо́бне Евѳи́міе,* а́нгелы удиви́лъ еси́* и де́монская шата́нія я́вѣ устраши́лъ еси́,* вѣ́рныхъ же собра́нія свѣ́тло украси́лъ еси́,* къ небе́сному Христо́ву жили́щу повелѣва́я ше́ствовати всегда́.* Его́же моли́ отъ тли́ и бѣ́дъ изба́витися* вѣ́рою творя́щимъ* всечестну́ю па́мять твою́.

Сла́ва, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ. Тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ безпоро́чно поревнова́лъ еси́, дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

И ны́нѣ, богоро́диченъ, или́ пра́здника.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Мона́ховъ наста́вниче,* о́тче Евѳи́міе,* украси́вся добродѣ́тельми,* Влады́цѣ твоему́ предстои́ши,* просвѣти́ пою́щія тя́.

Сти́хъ: Честна́ предъ Го́сподемъ* сме́рть преподо́бныхъ Его́.

Яви́лся еси́ сосу́дъ избра́нъ* и Бо́гу освяще́нъ,* наста́вниче о́тче на́шъ Евѳи́міе,* моли́ о пою́щихъ тя́.

Сти́хъ: Что́ возда́мъ Го́сподеви о всѣ́хъ,* я́же воздаде́ ми?

До́мъ добродѣ́тели* свѣ́тлостію, преподо́бне,* ду́шу твою́ Бо́гу соверши́лъ еси́,* о́тче Евѳи́міе.

Сла́ва, гла́съ 8:

Преподо́бне о́тче, мíра красоты́ и пи́щи вре́менныя отню́дъ возненави́дѣвъ, мона́шеское житіе́ па́че возлюби́лъ еси́, и а́нгеломъ собесѣ́дникъ бы́ти сподо́бился еси́, и, свѣти́льникъ многосвѣ́тлый Россíйскія земли́, чудесы́, я́ко второ́е со́лнце, сія́еши. Но всѣ́хъ на́съ помина́й, соверша́ющихъ свяще́нную па́мять твою́, мы́ бо ча́да твоя́, и о́вцы слове́сныхъ твои́хъ уче́ній, и тя́ на по́мощь призыва́емъ, прося́ще тобо́ю прія́ти ми́ръ и ве́лію ми́лость.

И ны́нѣ, богоро́диченъ или́ пра́здника.

Тропа́рь, гла́съ 3:

Яко свѣтозарная звѣзда, пришелъ еси отъ востока на западъ, оставивъ отечество твое, Нижній Новградъ, и, дошедъ богоспасаемаго града Суждаля, въ немъ обитель сотворилъ еси, и собралъ еси монаховъ множества, и, пріемъ да́ръ чуде́съ отъ Бо́га, о́тче Евѳи́міе, бы́лъ еси́ о Христѣ́ собесѣ́дникъ и спо́стникъ преподо́бному Се́ргію. Съ ни́мже у Христа́ Бо́га испроси́ Благовѣ́рному Импера́тору на́шему [и́мярекъ] здра́віе, и спасе́ніе, и душа́мъ на́шимъ ве́лію ми́лость.

Сла́ва, и ны́нѣ, богоро́диченъ или́ пра́здника.



НА ВЕЛИЦѢЙ ВЕЧЕРНИ,
На Го́споди воззва́хъ: стихи́ры, гла́съ 5. Подо́бенъ: Преподо́бне о́тче.

Преподо́бне о́тче, всеблаже́нне Евѳи́міе,* благода́ть пріе́мъ Пресвята́го Ду́ха,* отъ млады́хъ ногте́й Бо́га возлюби́лъ еси́* и де́моновъ полки́ погуби́лъ еси́,* тѣ́сный пу́ть ше́ствовавъ,* по́стникомъ ты́ бы́лъ еси́ похвала́* и Боже́ственнаго Ду́ха орга́нъ.* Того́ у́бо моли́, Тому́ помоли́ся, преподо́бне,* дарова́ти душа́мъ на́шимъ ми́ръ и ве́лію ми́лость. [Два́жды.]

Преподо́бне о́тче, богоно́се Евѳи́міе,* я́ко свѣтоза́рная звѣзда́, преше́лъ еси́ отъ восто́ка на за́падъ,* отъ земли́ изше́дъ Ни́жняго Нова́града,* присе́льникъ бы́лъ еси́ гра́ду Су́ждалю,* и Бо́га узрѣ́лъ еси́ мы́сленными очесы́,* обѣщава́юща ти́ возда́ніе бога́тно.* Того́ у́бо моли́, Тому́ помоли́ся, преподо́бне,* дарова́ти душа́мъ на́шимъ ми́ръ и ве́лію ми́лость.

Преподо́бне о́тче, богоно́се Евѳи́міе,* въ незаходи́мая вше́лъ еси́,* и Свято́му Ду́ху прекра́сна оби́тель яви́лся еси́,* мíра красоты́ отню́дъ возненави́дѣвъ,* высо́кія черто́ги добродѣ́тельми предугото́вивъ,* и, чуде́съ да́ръ пріе́мъ отъ Бо́га,* бы́лъ еси́ о Христѣ́ собесѣ́дникъ* и спо́стникъ преподо́бному Се́ргію.* Съ ни́мже моли́ Христа́ Бо́га* дарова́ти душа́мъ на́шимъ ми́ръ и ве́лію ми́лость.

Ины стихи́ры, гла́съ 4. Подо́бенъ: Яко до́бля.

Тѣ́сный пу́ть ше́ствовалъ еси́,* неукло́ннымъ ду́хомъ,* къ животу́ веду́щимъ, препла́вая,* по́стникомъ ты́ бы́лъ еси́ похвала́, Евѳи́міе,* крѣ́пко низложи́въ* де́монская навѣ́тованія.* Тѣ́мъ получи́лъ еси́* небе́снаго Ца́рствія наслѣ́дникъ бы́ти* и непрестаю́щія наслажда́ешися красоты́. [Два́жды.]

Пресвѣ́тлое житіе́ твое́ а́нгелы удиви́* и де́монская шата́нія я́вѣ устраши́,* вѣ́рныхъ же собра́нія свѣ́тло украси́,* къ небе́сному Христо́ву жили́щу* повелѣва́я ше́ствовати всегда́.* Его́же моли́,* отъ тли́ и бѣ́дъ изба́витися* вѣ́рою творя́щимъ* всечестну́ю па́мять твою́.

Пѣ́ніе и похвалу́ Христу́* приноси́лъ еси́ на вся́къ де́нь, о́тче,* въ пусты́ни жи́тельствуя,* еди́ному Бо́гу возложи́въ ду́шу и помышле́ніе,* я́ко вели́кій Моисе́й, въ незаходи́мая вше́лъ еси́.* Тѣ́мъ побѣди́лъ еси́ неви́димаго врага́* и бы́лъ еси́ чи́стое прія́телище,* Боже́ственнаго Ду́ха орга́нъ.

Сла́ва, гла́съ 6:

Мірскíй мяте́жъ оста́вивъ и взе́мъ кре́стъ, послѣ́довалъ еси́ Христу́ невозвра́тнымъ по́мысломъ, преподо́бнаго Діони́сія учени́къ, любо́вію Христо́вою утверди́вся, ве́сь отъ ю́ности Бо́гу освяти́лся еси́, къ Нему́ добродѣ́тельми приближа́яся, тлѣ́нная бо земна́я небре́глъ еси́, небе́сное же обрѣ́лъ еси́ бога́тство, ра́дуяся. Кто́ исповѣ́сть труды́ твоя́ и болѣ́зни? Или́ кíй язы́къ изрече́тъ жесто́кое твое́ житіе́, бдѣ́ніе же и сухояде́ніе, е́же на земли́ лега́ніе, ума́ смире́ніе и усте́нъ безмо́лвіе, моле́ніе непреста́нное и разсужде́ніе доброразсу́дное, ху́дость ри́зную, па́мять сме́ртную? Ты́ вра́чь, богому́дре, бы́лъ еси́, источа́я исцѣле́нія душа́мъ и тѣлесе́мъ человѣ́ческимъ, о́тче Евѳи́міе, моли́ Христа́ Бо́га дарова́ти на́мъ ве́лію ми́лость.

И ны́нѣ, богоро́диченъ: Кто́ Тебе́ не ублажи́тъ...
Вхо́дъ. Проки́менъ дне́ и чте́нія три́.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

На литíи стихи́ры, гла́съ 2:

Воспое́мъ, вѣ́рніи, боже́ственнаго и пречестна́го Христо́ва во́ина, преподо́бнаго Евѳи́мія, на стра́сти бо вельми́ подвиза́ся въ жи́зни вре́меннѣй, въ пѣ́ніихъ и поще́ніихъ о́бразъ бы́въ свои́мъ ученико́мъ. Того́ и Христо́съ да́ромъ обогати́, Ему́же воззове́мъ: помина́й на́съ, чту́щихъ пресвѣ́тлую па́мять твою́.

Исправле́ніе вѣ́ры и о́бразъ кро́тости яви́ тя́ ста́ду Своему́ пра́вды Со́лнце мы́сленное — Христо́съ Бо́гъ, преподо́бне Евѳи́міе, и́бо во гра́дѣ Су́ждалѣ благоуха́еши, идѣ́же сія́ютъ свѣ́тло боже́ственная твоя́ исправле́нія. Тѣ́мъ мо́лимся тебѣ́: моли́ непреста́нно спасти́ ду́ши на́ша.

Гла́съ 5:

Богому́дре о́тче, сла́вне Евѳи́міе, по́стниковъ ты́ бы́лъ еси́ похвала́, мíра красоты́ отню́дъ возненави́дѣвъ отъ ю́ности, Бо́га возлюби́лъ еси́ и тѣ́сный пу́ть ше́ствовалъ еси́. Су́ждальскій пресвѣ́тлый свѣти́льниче и всея́ Россíи те́плый засту́пниче, моли́ся о на́съ ко Го́споду, да спасе́тъ тебе́ ра́ди ду́ши на́ша.

Гла́съ 6:

Любо́вію Христо́вою, богому́дре, просвѣща́емь, душетлѣ́нныя стра́сти побѣди́въ, и я́ко па́стырь и́стинный упа́слъ еси́ слове́сное ста́до, ко отце́мъ преста́вился еси́ въ до́брѣй ста́рости и Бо́гу со а́нгелы, Евѳи́міе, предстои́ши. Того́ моли́ поми́ловати ду́ши на́ша.

Сла́ва, гла́съ 6:

Дне́сь созыва́етъ на́съ преподо́бнаго всемíрное торжество́. Пріиди́те у́бо, празднолю́бцы, свѣ́тло пра́зднуемъ въ па́мять его́, глаго́люще: ра́дуйся, свѣти́льниче многосвѣ́тлый, возводя́ ко Христу́ мона́ховъ мно́жества; ра́дуйся, гра́да Су́ждаля похвала́ и удобре́ніе, и всѣ́хъ вѣ́рныхъ благоути́шное приста́нище, и очище́ніе боля́щихъ во грѣсѣ́хъ; ра́дуйся, небе́сныхъ чино́въ сія́ніе ви́дѣти сподо́бився, съ ни́ми же ны́нѣ ра́дуешися, во сла́вѣ предстоя́ Христу́. Его́же моли́, преподо́бныхъ удобре́ніе, Евѳи́міе, изба́вити ны́ отъ ви́димыхъ и неви́димыхъ вра́гъ и спасти́ ду́ши на́ша.

И ны́нѣ, богоро́диченъ или́ пра́здника.

На стихо́внѣ стихи́ры, гла́съ 6:

Преподо́бне о́тче Евѳи́міе,* земны́хъ маловре́меннаго житія́ избѣ́глъ еси́,* мона́шеское житіе́ возлюби́въ,* и, а́нгеломъ собесѣ́дникъ и преподо́бнымъ бы́въ сожи́тель,* де́монская погуби́лъ еси́ ополче́нія,* мы́ бо пра́вый пу́ть тобо́ю ходи́ти увѣ́дѣхомъ* и тя́ на по́мощь призыва́емъ,* прося́ще тобо́ю прія́ти ми́ръ и ве́лію ми́лость.

Сти́хъ: Честна́ предъ Го́сподемъ* сме́рть преподо́бныхъ Его́.

Преподо́бне о́тче Евѳи́міе,* свѣти́льниче многосвѣ́тлый Россíйскія земли́,* чудесы́ во гра́дѣ Су́ждалѣ,* я́коже второ́е со́лнце, сія́я,* но всѣ́хъ на́съ помина́й,* соверша́ющихъ па́мять твою́.* Мы́ бо ча́да твоя́* и твою́ па́мять свѣ́тло пра́зднуемъ,* о́тче преподо́бне,* моли́ Христа́ Бо́га,* да спасе́тъ ду́ши на́ша.

Сти́хъ: Что́ возда́мъ Го́сподеви о всѣ́хъ,* я́же воздаде́ ми?

Преподо́бне о́тче Евѳи́міе,* ду́шу твою́ съ тѣ́ломъ очи́стивъ,* и Свята́го Ду́ха прекра́сная оби́тель яви́лся еси́,* Иже сла́вна тя́ конце́мъ, преблаже́нне, содѣ́я,* въ чудесѣ́хъ же вели́каго свѣти́льника,* просвѣти́вша во мра́цѣ су́щія,* я́ко наста́вника мона́ховъ,* соше́дшеся, велему́дренно ублажа́емъ.

Сла́ва, гла́съ 8:

Мона́ховъ мно́жества наста́вника тя́ почита́емъ, о́тче на́шъ Евѳи́міе, твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче, преподо́бныхъ соприча́стниче и пра́ведныхъ, съ ни́миже моли́ся Го́сподеви поми́ловатися душа́мъ на́шимъ.

И ны́нѣ, богоро́диченъ или́ пра́здника.



НА УТРЕНИ,
По 1-й стихоло́гіи сѣда́ленъ, гла́съ 8:

Мно́гимъ воздержа́ніемъ, преподо́бне, житіе́ украси́въ, пу́ть показа́въ, веду́щъ въ жи́знь добродѣ́тели смире́ніемъ, мíра бо отве́ргся, и вся́, я́же въ мíрѣ кра́сная, преоби́дѣвъ, ева́нгельскимъ уче́ніемъ послѣ́довалъ еси́, жесто́кимъ же житіе́мъ пло́ть твою́ изнуря́я, го́рдаго змíя воздержа́ніемъ смири́лъ еси́. Тѣ́мже на небесѣ́хъ водворя́ешися, Трисо́лнечному Божеству́ предстоя́. Богогла́се Евѳи́міе, моли́ Христа́ Бо́га согрѣше́ній оставле́ніе дарова́ти чту́щимъ святу́ю па́мять твою́. [Два́жды.]

Сла́ва, и ны́нѣ, богоро́диченъ:

Небе́сную две́рь и киво́тъ, пресвяту́ю го́ру, свѣ́тлый о́блакъ воспои́мъ, неопали́мую купину́, слове́сный ра́й, Евы воззва́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́лася мíрови и оставле́ніе дре́внихъ согрѣше́ній. Сего́ ра́ди вопіе́мъ Ей: моли́ся Сы́ну Твоему́ прегрѣше́ній оставле́ніе дарова́ти благоче́стно покланя́ющимся всесвято́му Рождеству́ Твоему́.

По 2-й стихоло́гіи сѣда́ленъ, гла́съ 4: Подо́бенъ: Ско́ро предвари́.

Посто́мъ украси́вшуся тебѣ́, и чистото́ю душе́вною, я́ко луча́ми пресвѣ́тлыми, просвѣща́еши вѣ́рныя, Евѳи́міе блаже́нне. Тѣ́мъ, тво́й святы́й свѣтоно́сный де́нь вѣ́рою соверша́юще, благоче́стно вопіе́мъ: я́ко имѣ́я дерзнове́ніе къ Бо́гу, моли́ спасти́ся на́мъ. [Два́жды.]

Сла́ва, и ны́нѣ, богоро́диченъ:

Обнови́ла еси́, Чи́стая, Боже́ственнымъ Рождество́мъ Твои́мъ истлѣ́вшее во страсте́хъ земноро́дныхъ ме́ртвенное существо́ и воздви́гла еси́ вся́ отъ сме́рти къ жи́зни нетлѣ́нія. Тѣ́мже Тя́ по до́лгу блажи́мъ вси́, Дѣ́во препросла́вленная, я́коже прорекла́ еси́.

По поліеле́и сѣда́ленъ, гла́съ 1. Подо́бенъ: Ка́мени запеча́тану.

Просвѣща́емь свѣтолу́чными заря́ми, преблаже́нне Евѳи́міе, наслажде́ніе небе́сное прія́лъ еси́, ра́дуяся, я́ко вои́стинну чистѣ́йшій хлѣ́бъ Творцу́ бы́лъ еси́, душе́вный ра́зумъ къ вы́шнимъ впери́въ, сла́вне. Сла́ва Да́вшему ти́ терпѣ́ніе, сла́ва Вѣнча́вшему тя́, сла́ва Даю́щему тобо́ю всѣ́мъ исцѣле́ніе. [Два́жды.]

Сла́ва, и ны́нѣ, богоро́диченъ:

Гавріи́лу вѣща́вшу Тебѣ́, Дѣ́во, ра́дуйся, со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́: сла́ва Все́льшемуся въ Тя́; сла́ва Проше́дшему изъ Тебе́; сла́ва Свободи́вшему на́съ Рождество́мъ Твои́мъ.

Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе Матѳе́я, зача́ло 43.

По 50-мъ псалмѣ́ стихи́ра, гла́съ 8:

Пое́мъ въ пѣ́снехъ и свѣ́тлостехъ, па́мять твою́ почита́юще, о́тче Евѳи́міе, я́ко бо многосвѣ́тлая звѣзда́ возсія́лъ еси́ отъ восто́ка и озари́лъ еси́ за́падную страну́. Отъ ю́ности, прему́дре, мірскíй мяте́жъ оста́вилъ еси́ и на ра́мо и́го ле́гкое воспрія́лъ еси́, я́ко преоби́дѣвъ тлѣ́нная и до́лу влеку́щая мудрова́нія и къ вы́шнему тече́нію, преблаже́нне, ра́достно устреми́вся, въ незаходи́мая всели́лся еси́ богосія́нно, на́шъ па́стырю и́стинный, моли́ Христа́ Бо́га спасти́ся душа́мъ на́шимъ.

Кано́нъ преподо́бнаго Евѳи́мія, его́же краегране́сіе: Ра́дуйся, боже́ственная мона́шествующихъ сла́ва. Гла́съ 2.

Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты Еги́петскія, я́ко просла́вися.

Ра́дуйся, исто́чниче, точа́щій струю́ оби́льную, отъ нея́же почерпа́емъ цѣле́бъ благода́ть, прегрѣше́ній избавля́емся, любо́вію приходя́щіи къ тебѣ́, приснопа́мятне.

Святы́ню пріе́мъ отъ Христа́ Бо́га отъ утро́бы, сла́вне, и яви́лся еси́ избра́нный сосу́дъ, духо́вную благода́ть всю́ пріе́мый.

Да жи́зни прича́стникъ нетлѣ́нныя яви́шися, привре́менная, о́тче му́дре, пренебре́глъ еси́ и, къ Бо́гу преше́дъ, непреста́нно мо́лиши спасти́ся всѣ́мъ на́мъ.

Богоро́диченъ: Словесе́мъ прему́дрымъ Твои́хъ усте́нъ послѣ́дующе, ра́дующеся, Пренепоро́чная, Тя́ ублажа́емъ, бы́вшую на́мъ вину́ неизрече́ннаго блаже́нства.

Пѣ́снь 3.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Всесвѣ́тлый, богому́дре, показа́лся еси́ сто́лпъ, путево́ждствуя чи́ны мона́ховъ, о́блакъ же, осѣня́ющъ жре́бій Бо́жій и ли́ца неви́димыхъ вра́гъ помрача́ющъ благода́тію всѣ́хъ Царя́.

Стои́ши предъ лице́мъ твоего́ Влады́ки, неосла́бнымъ манове́ніемъ моля́ся изба́витися ста́ду твоему́ отъ рабо́ты тмы́, преподо́бне, и мучи́тельства страсте́й, твои́хъ бо моли́твъ послу́шаетъ Бо́гъ.

Пло́ти твоея́ двиза́нія умертви́въ крѣ́пкимъ поще́ніемъ, богоглаго́льниче, бы́лъ еси́ оби́телище Влады́чне, Его́же умоли́ изба́витися скорбе́й и страсте́й смуще́нія къ тебѣ́ прибѣга́ющимъ.

Богоро́диченъ: Сви́токъ Тя́ прови́дѣ Иса́ія, въ не́мже пло́тски Сло́во зна́менася, раздра́въ рукописа́ніе первозда́ннаго, е́же преступле́ніемъ подписа́, и подаде́ оставле́ніе рабо́ты на́мъ.

Сѣда́ленъ, гла́съ 8. Подо́бенъ: Прему́дрости.

Отре́кся пло́ти Христа́ ра́ди и духо́вный яви́вся лю́демъ води́тель, услы́шалъ еси́ словеса́ Боже́ственныхъ та́йныхъ уче́ній, мона́ховъ же яви́лся еси́ пра́вило пра́вости и стра́сти вся́ крѣ́пко попра́лъ еси́. Тѣ́мъ и де́монская кова́рства до конца́ изгуби́лъ еси́, ко Христу́ зря́ всегда́, богоно́се Евѳи́міе, Его́же моли́ грѣхо́въ оставле́ніе пода́ти честву́ющимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Со́лнца о́блаче разу́мнаго, Боже́ственнаго Свѣ́та свѣти́льниче златокова́нный, нескве́рная, небла́зная, всенепоро́чная Влады́чице, омраче́нную ду́шу мою́ ослѣпле́ніемъ страсте́й безстра́стія заре́ю просвѣти́, молю́ся, и оскверне́ное ми́ се́рдце омы́й пото́ки умиле́нія, покая́нія же слеза́ми, и отъ тимѣ́нія мя́ очи́сти дѣ́лъ мои́хъ, да любо́вію зову́ Ти: Богоро́дице Приснодѣ́во, моли́ Христа́ Бо́га прегрѣше́ній оставле́ніе пода́ти ми́, Тебе́ бо имѣ́ю наде́жду, ра́бъ Тво́й.

Пѣ́снь 4.

Ирмо́съ: Пою́ Тя, слу́хомъ бо, Го́споди, услы́шахъ и ужасо́хся: до мене́ бо и́деши, мене́ ища́, заблу́ждшаго. Тѣ́мъ мно́гое Твое́ снизхожде́ніе, е́же на мя́, прославля́ю, Многоми́лостиве.

Жела́ніемъ боже́ственнымъ распали́вся, разгрѣ́явъ твое́ се́рдце, жела́нная пости́глъ еси́ до конца́, богому́дре о́тче, оста́вивъ землены́хъ пристра́стіе, единосе́льникъ вы́шнихъ бы́лъ еси́ служи́телей.

Ласка́нія све́рстниковъ, преподо́бне, попра́лъ еси́ всеобра́зно, вни́де бо раче́ніе Содѣ́теля въ тя́, богому́дре, те́плѣ, и до́льнихъ мра́чная жела́нія до конца́ отри́нулъ еси́.

На па́жить чи́сту возгна́въ воздержа́нія ста́до твое́, о́тче, ко исто́чнику приве́лъ еси́ нему́тному безстра́стія, разу́мныя звѣ́ри побѣжда́я, е́же ны́нѣ моли́твами твои́ми спаса́й.

Богоро́диченъ: Се́ Тя́ ро́ди сла́вятъ родо́въ, я́коже прорекла́ еси́, Отрокови́це: Созда́теля бо была́ еси́ пала́та и Боже́ственный хра́мъ, въ не́мже всели́ся Высоча́йшій, пло́тію обло́жся, да спасе́тъ на́съ.

Пѣ́снь 5.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Ве́сь Бо́гу прилѣжа́, о́тче, въ пусты́няхъ мра́зъ зи́мный терпѣ́лъ еси́ до́блественно, и лѣ́тній нося́ ва́ръ, и бы́лъ еси́ до́мъ му́дрости Бо́жія, добродѣ́тельнымъ сія́ніемъ многообра́зно украша́емь.

Му́жески наступи́лъ еси́ на поще́ніе, чревонеи́стовства змíя не пріе́мь совѣ́тника, о́тче, но а́лчбою, и моли́твами непреста́нными, и чистото́ю соедини́вся Бо́гу, прича́стникъ бы́лъ еси́ пи́щи безсме́ртныя.

Добродѣ́телей вше́дъ во о́блакъ, скрижа́ли прія́лъ еси́, блаже́нне, я́ко Моисе́й, богоначерта́нныя: мона́шествующихъ мно́жества научи́лъ еси́ отъ веще́ственныхъ всѣ́хъ ошаява́тися, возводя́ на го́ру Боже́ственнаго зна́нія.

Богоро́диченъ: Яви́ся, Чи́стая, пра́отцу лѣ́ствица, небе́съ вы́шши, иму́щи тве́рдое водруже́ніе: изъ Тебе́ бо Бо́гъ, вопло́щся, показа́ся и совокупи́ разстоя́щаяся пре́жде. Тѣ́мъ Тя́, Богоро́дицу, вѣ́рніи, сла́вимъ.

Пѣ́снь 6.

Ирмо́съ: Ко Го́споду отъ ки́та Іо́на возопи́: Ты́ мя возведи́ изъ глубины́ а́да, молю́ся, да я́ко Изба́вителю, во гла́сѣ хвале́нія, и́стины же ду́хомъ пожру́ Тебѣ́.

Пострека́емь Влады́чнею любо́вію, оста́вилъ еси́ вся́ до́льная и Тому́ послѣ́довалъ еси́, на ра́мо и́го ле́гкое взе́мъ му́жески, благоду́шія тезоимени́те.

Нака́занъ неизрече́нныхъ ра́зуму, блаже́нне, научи́лъ еси́ твое́ ста́до небе́сная разумѣва́ти и страсте́й наше́ствія отгоня́ти твои́ми поуче́ньми.

Житіе́ твое́ равноа́нгельно, о́тче, бы́сть, дерзнове́ніе тебѣ́ даде́ держа́й вся́ Госпо́дь страсте́й изба́вити твое́ ста́до. Тѣ́мже Христа́ о всѣ́хъ на́съ умоли́.

Богоро́диченъ: Разумѣ́въ Твое́ неизрече́нное, Чи́стая, та́инство, го́ру присѣ́нную Авваку́мъ Тя́ провозвѣсти́: изъ Тебе́ бо Содѣ́тель, за милосе́рдіе вопло́щся, дре́вняя отъя́тъ изрече́нія.

Конда́къ, гла́съ 2. Подо́бенъ: Вы́шнихъ ища́.

Волне́ній мно́жество невла́жно преходя́, безпло́тныя враги́ струя́ми сле́зъ твои́хъ погрузи́лъ еси́, богому́дре Евѳи́міе преподо́бне, тѣ́мъ и чуде́съ да́ръ прія́лъ еси́, моли́ непреста́нно о всѣ́хъ на́съ.

Икосъ:

Отве́рзи моя́ устна́, преблаже́нне, богопрія́тными твои́ми моли́твами, Бо́гу предстоя́, всесла́вне Евѳи́міе, да воспою́ боже́ственное твое́ житіе́ и возглаго́лю досто́йно добродѣ́тели твоя́, я́же на земли́ Христа́ Бо́га ра́ди соверши́лъ еси́, сто́лпъ бо яви́лся еси́ и пра́вило мона́ховъ свѣ́тло, равноа́нгельно стяжа́въ житіе́, въ незаходи́мая вои́стинну всели́лся еси́, моли́ непреста́нно о всѣ́хъ на́съ.

Пѣ́снь 7.

Ирмо́съ: Купина́ въ горѣ́ огненеопа́льная и росоно́сная пе́щь халде́йская, я́вѣ предписа́ Тя, Богоневѣ́сто, Боже́ственный бо невеще́ственный въ веще́ственнѣмъ чре́вѣ, Огнь неопа́льно прія́ла еси́. Тѣ́мже изъ Тебе́ Ро́ждшемуся пое́мъ: благослове́нъ еси́, Бо́же оте́цъ на́шихъ.

Авраа́мскій стяжа́въ нра́въ, прему́дре, отъ земли́ изше́дъ Ни́жняго Нова́града, пресе́льникъ бы́лъ еси́ Су́ждалю, и Бо́га узрѣ́лъ еси́, обѣщава́юща ти́ возда́ніе бога́тно. Тѣ́мъ, веселя́ся, усе́рдно пѣ́лъ еси́: благослове́нъ Бо́гъ оте́цъ на́шихъ.

Распаля́емь ду́хомъ, преподо́бне, ко́зни вра́жія разори́лъ еси́, ору́жіемъ огра́ждься на́съ ра́ди пригво́ждшагося на Крестѣ́. Тѣ́мъ, веселя́ся, усе́рдно пѣ́лъ еси́: благослове́нъ Бо́гъ оте́цъ на́шихъ.

Къ горѣ́ моли́твы приступи́лъ еси́, и, вше́дъ во о́блакъ Ду́ха, Бо́жія за́дняя ви́дѣлъ еси́, и, сла́ву пріе́мь разсужде́нія, бы́лъ еси́, о́тче, сто́лпъ непоколе́бленъ. Тѣ́мъ прилѣ́жно моли́ изба́витися искуше́нія вра́жія пою́щимъ тя́.

Богоро́диченъ: Зако́на Испо́лнителя чревоноси́ла еси́, пре́жде вѣ́къ су́ща Го́спода вся́ческихъ, Сы́на, Прему́дрость же и Си́лу, напослѣ́докъ, Пречи́стая, па́че естества́ на обновле́ніе земны́мъ. Тѣ́мъ благоче́стно, Чи́стая, изъ Тебе́ ро́ждшемуся зове́мъ: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго, и пла́мень въ ро́су прело́жшаго Бо́га, по́йте, дѣла́, я́ко Го́спода, и превозноси́те во вся́ вѣ́ки.

Сле́зными твои́ми тече́ніи огнепа́льныя стра́сти поже́глъ еси́, гее́нскаго пла́мене стра́хъ отгна́лъ еси́, о́тче му́дре, соверше́нною любо́вію Созда́теля своего́, примѣси́вся стра́хомъ во вся́ вѣ́ки.

Якоже Ено́хъ, къ Бо́гу преста́вився, отъ Него́ прія́тъ бы́лъ еси́, о́тче, и съ вы́шними ликостоя́ніи водворя́ешися, и пое́ши: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Ны́нѣ нетлѣ́нныхъ даро́въ наслажда́яся и трисо́лнечныя свѣ́тлости исполня́яся, блаже́нне, пѣвцы́ твоя́ страсте́й тмы́ моли́твами твои́ми изба́ви, да досто́йно Христа́ славосло́вимъ.

Богоро́диченъ: Кля́тву разруши́ла еси́ дре́внюю, Пречи́стая, земны́хъ, неизрече́ннымъ сло́вомъ Бо́га заче́нши, воплоще́нна изъ Тебе́ за милосе́рдіе, Пренепоро́чная Влады́чице, Его́же превозно́симъ во вѣ́ки.

Пѣ́снь 9.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Просвѣще́нъ добро́тою по́стническою, о́тче, и одѣ́янъ ри́зою нетлѣ́нія, Евѳи́міе, и вѣнце́мъ даро́въ укра́шенъ, Влады́цѣ всѣ́хъ предстои́ши, ра́дуяся.

Въ пребыва́лища присноживу́щая всели́лся еси́, блаже́нне, идѣ́же апо́столовъ собо́ръ и мно́жество му́ченикъ, преподо́бныхъ собра́ніе, проро́ковъ ликова́нія, воздая́нія болѣ́зней отъ Бо́га пріи́мъ досто́йно, богому́дре достосла́вне.

Всесвѣ́телъ, богоглаго́льниче, бы́лъ еси́, заря́ми свѣ́та трисо́лнечнаго свѣ́тло озаря́емь, испроси́ прегрѣше́ній разрѣше́ніе, и лю́тыхъ избавле́ніе, и злы́хъ отчужде́ніе всѣ́мъ, любо́вію къ тебѣ́ притека́ющимъ.

Богоро́диченъ: Воплоти́вся неизрече́нно Влады́ка всѣ́хъ изъ Тебе́, Богороди́тельнице Марíе, соверше́нъ бы́сть человѣ́къ, поро́ждься, я́ко пре́жде рождества́ Дѣ́ву сохрани́ Тя́ чи́сту, Его́же моли́ спасти́ отъ бѣ́дъ ду́ши на́ша.

Свѣти́ленъ. Подо́бенъ: Жены́, услы́шите.

Мірска́го злостра́стія, я́ко тру́дна, избѣ́глъ еси́ и воздержа́ніемъ пло́ть увяди́лъ еси́, обнови́лъ же еси́ душе́вную крѣ́пость, преподо́бне, и сла́вою обогати́лся еси́ небе́сною, приснопа́мятне, тѣ́мъ моля́ся не преста́й о на́съ ко Го́споду. [Два́жды.]

Богоро́диченъ:

Ужа́сное Твое́ предста́тельство, Марíе Богоукраше́нная, и стра́шная Твоя́ сла́ва по все́й земли́. О Тебѣ́ вси́ ны́нѣ хва́лимся, Тя́ Хода́таицу иму́ще къ Сы́ну и Созда́телю Твоему́, неусы́пною Твое́ю моли́твою да спасе́мся вси́.

На хвали́техъ стихи́ры, гла́съ 4. Подо́бенъ: Яко до́бля.

Труды́ по́стническими твою́ ду́шу вооружи́въ,* плотска́я увяди́лъ еси́, преподо́бне, мудрова́нія,* и у́мъ, сла́вне, содѣ́лалъ еси́ Боже́ственныя Тро́ицы жили́ще,* и возвы́сился еси́, идѣ́же му́чениковъ во́инства* и добро́та недомы́сленная,* проро́ковъ ликова́нія, преподо́бныхъ собра́нія,* пра́ведныхъ ра́дованіе.* Съ ни́миже ны́нѣ ра́дуешися,* въ сла́вѣ предстоя́ Христу́,* со дерзнове́ніемъ моли́ся о душа́хъ на́шихъ. [Два́жды.]

Бла́гости навы́къ, трезвя́ся,* отъ ю́ности бо́дрствуя во всѣ́хъ, благо́ю со́вѣстію,* умо́мъ преочище́ннымъ и душе́ю,* преподо́бне Евѳи́міе,* небе́сныхъ чино́въ сія́нія* уви́дѣти сподо́бился еси́.* Съ ни́миже ны́нѣ ра́дуешися,* во сла́вѣ предстоя́ Христу́,* со дерзнове́ніемъ моли́ся о душа́хъ на́шихъ.

Пресвѣ́тлое житіе́ твое́,* преподо́бне Евѳи́міе,* а́нгелы удиви́,* и де́монская шата́нія я́вѣ устраши́,* вѣ́рныхъ же собра́нія свѣ́тло украси́,* къ небе́сному Христо́ву жили́щу повелѣва́я ше́ствовати всегда́.* Его́же моли́* отъ тли́ и бѣ́дъ изба́витися* вѣ́рою творя́щимъ всечестну́ю па́мять твою́.

Сла́ва, гла́съ 8:

Пріиди́те, празднолю́бцы, духо́вный ли́къ совокупи́вше, честно́е торжество́ на́шего засту́пника ра́достно восхва́лимъ и благода́рственныя пѣ́сни принесе́мъ, глаго́люще: ра́дуйся, преподо́бне Евѳи́міе, свѣти́льниче свѣ́тлый, и́же мíра концы́ просвѣща́я чудесы́; ра́дуйся, и́же тѣ́ло изнури́въ, я́ко вои́стинну во́инъ Христа́ Бо́га, на стра́сти вельми́ подвиза́лся еси́ въ жи́зни привре́меннѣй вѣ́чныя ра́ди блаже́нныя жи́зни; ра́дуйся, похвало́ мона́ховъ и удобре́ніе и сто́лпе неподви́жимый, скорбя́щихъ боже́ственная ра́досте и оби́димымъ те́плый побо́рниче. И ны́нѣ, преблаже́нне Евѳи́міе, не преста́й моля́ся Христу́ Бо́гу о и́же вѣ́рою и любо́вію творя́щихъ приснора́достную и всепра́зднственную па́мять твою́.

И ны́нѣ, богоро́диченъ или́ пра́здника.

Славосло́віе вели́кое. [Ектеніи́ и отпу́стъ.]



НА ЛИТУРГІИ,

Блаже́нна свята́го, отъ кано́на пѣ́снь 3 и 6. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, [я́же воздаде́ ми?] Апо́столъ къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́.] Ева́нгеліе Луки́, зача́ло 24. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся.]

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 4 об. – 12.

/ Къ оглавленію раздѣла /


Наверхъ / Къ титульной страницѣ

0