Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 1 мая 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 1-й де́нь.
Преподо́бныя ма́тере на́шея Марíи Еги́птяныни.

[ВЕЧЕРЪ,]
На Го́споди воззва́хъ: стихи́ры преподо́бныя, гла́съ 6. Подо́бенъ: Всю́ отложи́вше.

Тебѣ́ у́бо возбраня́ше* честны́хъ взира́нія* скве́рнъ пре́жде привлече́нное скверне́ніе;* твое́ же чу́вство* и твоя́, богому́драя, содѣ́янныхъ со́вѣсть* къ лу́чшимъ тебѣ́ обраще́ніе содѣ́яша.* На ико́ну бо воззрѣ́вши* благослове́нныя Богоотрокови́цы,* всѣ́хъ пока́явшися прегрѣше́ній твои́хъ,* всехва́льная, пре́жнихъ,* со дерзнове́ніемъ Честно́му Дре́ву поклони́лася еси́.

Мѣсто́мъ поклони́вшися* ра́достно святы́мъ,* добродѣ́тели напу́тное,* спаси́тельнѣйшее отсю́ду прія́ла еси́,* и зѣло́ потекла́ еси́ до́брое ше́ствіе,* и, струю́ преве́зшися Іорда́нскую,* въ Крести́телевѣ обита́лищи* усе́рдно всели́лася еси́,* и страсте́й сверѣ́пство* жи́тельствомъ омрачи́ла еси́,* истончава́ющи тѣ́ла воздержа́ніемъ,* приснопа́мятная ма́ти,* плотска́я стремле́нія.

Въ пусты́ню всели́вшися,* твои́хъ страсте́й о́бразы* благоче́стно истреби́ла еси́,* богови́днѣйшее изображе́ніе въ души́ написа́вши,* добродѣ́телей ви́ды,* и толи́ко просія́ла еси́,* я́ко и на вода́хъ легко́ преходи́ти стопа́ми,* и надъ земле́ю взима́тися* во твои́хъ къ Бо́гу моле́ніихъ.* И ны́нѣ со дерзнове́ніемъ,* пресла́вная Марíе,* Христу́ предстоя́щи,* моли́ся о душа́хъ на́шихъ.

Сла́ва, гла́съ 2. Самогла́сенъ:

Душе́вная ловле́нія, и стра́сти плотскíя мече́мъ воздержа́нія посѣ́кла еси́, и мы́сленная согрѣше́нія молча́ніемъ поста́ удави́ла еси́, и струя́ми сле́зъ твои́хъ пусты́ню всю́ напои́ла еси́, и прозябла́ еси́ на́мъ покая́нія плоды́. Тѣ́мже твою́ па́мять, преподо́бная, пра́зднуемъ.

И ны́нѣ, богоро́диченъ, или́ крестобогоро́диченъ:

Дре́ву кре́стному Тя́, Іису́се, пригвожде́на зря́щи, Неискусобра́чная, пла́чущи, глаго́лаше: Ча́до сла́дкое, почто́ оста́вилъ еси́ Мя́, ро́ждшую Тя́, еди́ну, Свѣ́те непристу́пный, Пребезнача́льнаго Отца́? Потщи́ся и просла́вися, я́ко да сла́ву получа́тъ Боже́ственную, и́же Боже́ственныя стра́сти Твоя́ сла́вящіи.

Тропа́рь, гла́съ 8:

Въ тебѣ́, ма́ти, извѣ́стно спасе́ся, е́же по о́бразу, пріи́мши бо кре́стъ, послѣ́довала еси́ Христу́ и, дѣ́ющи, учи́ла еси́ презира́ти у́бо пло́ть, прехо́дитъ бо прилѣжа́ти же о души́ ве́щи безсме́ртнѣй. Тѣ́мже и со а́нгелы сра́дуется, преподо́бная Марíе, ду́хъ тво́й.


[НА УТРЕНИ,]
Кано́нъ, гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Скве́рну прегрѣше́ній очи́сти смире́нныя моея́ души́, Твое́ю ми́лостію, Христе́, мглу́ и омраче́ніе страсте́й отжени́ моли́твами преподо́бныя Твоея́.

Страстьми́ плотски́ми оскверни́вши душе́вное благоро́діе, воздержа́ніемъ па́ки, о честна́я, тво́й у́мъ просвѣти́ла еси́, ту́чами сле́зъ твои́хъ ду́шу уясни́вши.

Еги́пта страсте́й избѣ́гла еси́, я́ко отъ грѣхо́вна исто́чника, и, фарао́на изба́вльшися лю́таго оскверне́нія, безстра́стія ны́нѣ зе́млю наслѣ́довала еси́, и со а́нгелы лику́еши при́сно.

Богоро́диченъ: Зря́щи Твою́ ико́ну, Влады́чице, Богороди́тельнице Чи́стая, и ро́ждшагося Сло́ва отъ Твоея́ пречи́стыя, Дѣ́во, утро́бы, и пору́чницу Тя́ къ Сему́ те́плѣ про́ситъ пресла́вная.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Возсмердѣ́шася душе́вныя и согни́шася твоя́ ра́ны, но исто́чникомъ сле́зъ твои́хъ сія́ омы́ла еси́ те́плѣ.

Побѣжде́ни бы́ша тобо́ю де́монстіи полцы́, и страстна́я взыгра́нія слеза́ми ура́нила еси́.

Яко у́тренній о́блакъ и я́коже ка́пля, ка́плющи, была́ еси́ всѣ́мъ, пролива́ющи во́ды покая́нія спаси́тельнаго.

Богоро́диченъ: Тя́ Предста́тельницу, Чи́стая, и спасе́ніе, и крѣ́пость иму́щи, Креста́ свята́го дре́ву, честна́я, поклони́ся.

Сѣда́ленъ, гла́съ 8. Подо́бенъ: Прему́дрости.

Взыгра́нія вся́ плотска́я обузда́вши болѣ́зньми по́стническими, му́жественное показа́ла еси́ души́ твоея́ мудрова́ніе, Креста́ бо возжелѣ́вши о́бразъ ви́дѣти, себе́, приснопа́мятная, мíру распя́ла еси́, отону́дуже и къ ре́вности житія́ непоро́чнаго усе́рдно воздви́гла еси́ себе́, всеблаже́нная, Марíе пресла́вная. Моли́ Христа́ Бо́га грѣхо́въ оставле́ніе пода́ти честву́ющимъ любо́вію святу́ю па́мять твою́.

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Крестобогоро́диченъ:

Агнца и Па́стыря и Изба́вителя, Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мляй Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе, вѣ́рою пою́щимъ Боже́ственныя Стра́сти Твоя́.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Удали́лася еси́, бѣжа́вши, су́щихъ въ мíрѣ и сла́дкихъ всѣ́хъ, еди́на же Еди́ному чи́сто приобщи́лася еси́ кра́йнимъ воздержа́ніемъ и терпѣ́ніемъ дѣ́лъ твои́хъ.

Тѣле́сная движе́нія и разжже́нія воздержа́ніемъ пои́стиннѣ изсуши́ла еси́, отону́дуже ду́шу украси́ла еси́, Марíе всесла́вная, боже́ственными видѣ́ніи и дѣ́тельми.

Добродѣ́тельною твое́ю си́лою, слеза́ми и посто́мъ кра́йнимъ, моли́твою же и ва́ромъ, зимо́ю и нагото́ю прія́телище была́ еси́ Свята́го Ду́ха че́стно.

Богоро́диченъ: Къ Твое́й ико́нѣ прибѣ́гши, и изъ Тебе́ Рожде́ннаго, Марíе Дѣ́во, Тобо́ю ны́нѣ обрѣ́те жи́знь безсме́ртную, въ раи́ лику́ющи.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Въ слѣ́дъ Христа́ послѣ́довала еси́, ра́дующися, нося́щи кре́стъ сво́й на ра́мѣ, Марíе, и де́моны ура́нила еси́.

Показа́ла еси́ на́мъ покая́нія лѣчбу́, показа́ла еси́ и стезю́, веду́щую па́ки къ жи́зни неги́блющей.

Ты́ бу́ди ми́, честна́я, засту́пница непобѣди́ма и изба́ви страсте́й мя́, болѣ́зни же вся́кія мольба́ми твои́ми ко Го́споду.

Богоро́диченъ: На Твою́, Влады́чице Чи́стая, ико́ну взира́ше, Тебѣ́ всегда́ моля́щися, страсте́й напа́данія преподо́бная посрамля́ше.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

По́томъ грѣхо́вную скве́рну омы́ла еси́, къ нетлѣ́ннѣй же сла́вѣ твое́ю мы́слію смотря́ющи, ны́нѣ обрѣла́ еси́ благопло́діе болѣ́знемъ твои́мъ, сла́вная.

Всѣ́мъ грѣ́шникомъ, Марíе, житіе́ твое́ о́бразъ показа́ся, безмѣ́рно согрѣши́вшимъ, въ житіи́ воста́ти и скве́рну очи́стити слеза́ми.

Уще́дри смире́нную мою́ ду́шу, Человѣколю́бче, ю́же оскверни́хъ, дѣ́я нечи́стая хотѣ́нія пло́ти моея́, но Ты́ мя преподо́бныя моли́твами поми́луй.

Богоро́диченъ: Все́ю твое́ю душе́ю и се́рдцемъ возлюби́ла еси́ отъ Дѣ́вы рожде́ннаго Бо́га Сло́ва, Жива́го и воплоще́нна, гла́съ тебѣ́, преподо́бная, прине́сша.

Конда́къ, гла́съ 4. Подо́бенъ: Вознесы́йся.

Грѣха́ мглы́ избѣжа́вши, покая́нія свѣ́томъ озари́вши твое́ се́рдце, сла́вная, пришла́ еси́ ко Христу́, Сего́ Всенепоро́чную и святу́ю Ма́терь Моли́твенницу ми́лостивную принесла́ еси́. Отону́дуже и прегрѣше́ній обрѣла́ еси́ оставле́ніе и со а́нгелы при́сно сра́дуешися.

Икосъ:

Змíя, дре́вле во Еде́мѣ запе́ншаго Евѣ пре́лестію дре́ва, низве́ргла еси́ въ ро́въ дре́вомъ Кре́стнымъ, сла́вная Марíе, и, отбѣ́гши сла́сти, чистоты́ возжелѣ́ла еси́, отону́дуже и съ дѣ́вами сподо́билася еси́ вну́трь черто́га вни́ти твоего́ Влады́ки, съ си́ми наслади́тися досто́йно. Того́ у́бо прилѣ́жно моли́, я́ко да мно́гихъ грѣхо́въ разрѣше́ніе пода́стъ и Своея́ жи́зни на́съ сподо́битъ со а́нгелы при́сно ра́доватися.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Ско́рбную и тѣ́сную ше́ствовавши стезю́ я́вѣ, добро́тою добродѣ́телей уясни́вши ду́шу, небе́сную дости́гла еси́ жи́знь неконча́емую, идѣ́же Свѣ́тъ безконе́чный е́сть Христо́съ.

Яже въ мíрѣ попра́вши вре́менная вся́, ны́нѣ лику́еши со всѣ́ми во́инствы а́нгельскими, воспѣва́ющи: благослове́нъ еси́ въ хра́мѣ сла́вы Твоея́, Го́споди.

Кова́рства вра́жія и ору́жія оскудѣ́ша вся́ крѣ́пкимъ посто́мъ и моли́твою твое́ю, преподо́бная, и слеза́ми, и ны́нѣ у́бо отго́нятся и страсте́й настоя́нія, Марíе честна́я.

Богоро́диченъ: Неискусобра́чно я́же Бо́га безпло́тна поро́ждши вои́стинну и Дѣ́ва пребы́вши пои́стиннѣ, Твое́ю си́лою, Всечестна́я, отгна́ла еси́ страсте́й и де́моновъ во́инства.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Ве́сь сія́ніемъ добродѣ́телей озари́вши у́мъ, Марíе сла́вная, Бо́гу бесѣ́довавши, пло́ть бо истни́вши посто́мъ мно́гимъ и по́мысломъ благочести́вымъ, пѣ́ла еси́, ра́дующися: благослови́те, вся́ дѣла́ Госпо́дня, Го́спода.

Креста́ зна́меніемъ себе́ огради́вши, Іорда́нскія нога́ми немо́кренными твои́ми во́ды преплы́вши, Марíе, вѣ́рно, и Небе́снаго Христа́, Тѣ́лу и Кро́ви Его́, прича́щшися, — ны́нѣ отпуща́еши рабу́ Твою́, — рекла́ еси́.

Свяще́нникъ боже́ственный Зоси́ма, таи́нникъ благода́ти, быстрину́ я́ко ви́дѣ тя́ Іорда́нскую, сла́вная, преше́дшу немо́кренными нога́ми, стра́хомъ и тре́петомъ одержи́мь бы́въ, ра́дуяся, поя́ше: благослови́те, вся́ дѣла́ Госпо́дня, Го́спода.

Богоро́диченъ: Тобо́ю, Пренескве́рная, тлю́ и скве́рну всю́ оттрясе́, и облече́ся, Влады́чице, въ ри́зу безсме́ртну, и Тобо́ю Твоему́ Сы́ну преподо́бная вопія́ше: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Ны́нѣ нетлѣ́нною и Боже́ственною вои́стинну пи́щею насыща́ема и Свѣ́томъ наслажда́ющися мы́сленнымъ и Невече́рнимъ въ небе́сныхъ се́лѣхъ, идѣ́же а́нгельстіи чи́ни о на́съ Бо́га мо́лятъ.

Сла́вы теку́щія и тлѣ́нныя же возгнуша́вшися, Марíе, сла́ву и жи́знь наслѣ́довала еси́ блаже́нную. Христа́ моли́ о соверша́ющихъ твою́ всесвяту́ю па́мять всегда́.

Ви́ждь мою́ ско́рбь, преподо́бная, и стена́ніе се́рдца, ви́ждь тѣсноту́ жи́зни моея́, спаси́ мя отъ грѣха́ моего́ и ду́шу мою́ уще́дри твои́ми хода́тайствы ко Го́споду.

Богоро́диченъ: Влады́чице Чи́стая Богоро́дице, грѣ́шниковъ спасе́ніе, пріими́ мольбу́ сію́, изба́ви мя́ отъ грѣ́хъ мои́хъ, Твоему́ Сы́ну прибѣга́юща, моли́твами преподо́бныя Твоея́.

Свѣти́ленъ. Подо́бенъ: Свѣ́те неизмѣ́нный.

Образъ покая́нія на́мъ даде́ся, Марíе, твои́мъ бо те́плымъ умиле́ніемъ возврати́ побѣжде́ніе, Засту́пницу стяжа́вши Богоро́дицу Марíю, съ Не́юже о на́съ помоли́ся.

Богоро́диченъ:

Свѣ́тъ возсія́вшій безлѣ́тный отъ Отца́ пре́жде вѣ́къ въ лѣ́то ны́нѣ напослѣ́докъ изъ Тебе́, Дѣ́во, яви́ся на спасе́ніе мíра, къ Нему́же не преста́й о лю́дехъ Твои́хъ моля́щися.

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 1 – 4 об.

/ Къ оглавленію раздѣла /


Наверхъ / Къ титульной страницѣ

0