Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 24 мая 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (АРХИВЪ).

Мѣ́сяца Ма́ія въ 11-й де́нь.
Слу́жба свято́му благовѣ́рному кня́зю мора́вскому Ростисла́ву.

НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 4. Подо́бенъ: Да́лъ еси́ зна́меніе.

Благовѣ́рный и честны́й свѣти́льникъ возсія́лъ еси́,* посредѣ́ цвѣту́щаго са́да,* его́же насади́лъ еси́ святы́ми равноапо́стольными Кири́лломъ и Меѳо́діемъ,* и́хже призва́въ къ себѣ́ изъ Константи́на гра́да,* и ввѣ́рилъ еси́ и́мъ благочести́выхъ ю́ношей* къ науче́нію правосла́внаго богосло́вія,* да сíи же слу́жатъ олтарю́ Христо́ву.* Моли́ся у́бо, кня́же Ростисла́ве,* о душа́хъ на́шихъ. [Два́жды.]

Яко изъ ма́тернія утро́бы,* изъ го́рнія сѣ́ни Іерусали́мскія,* Ду́ха Свята́го иму́щія,* благовѣ́стниковъ Боже́ственныя и́стины,* учи́телей вели́кихъ,* призва́лъ еси́, кня́же Ростисла́ве,* на зе́мли словя́нскія святы́хъ Кири́лла и Меѳо́дія,* е́же бы люде́й на́шихъ укрѣпи́ти въ правосла́віи и единомы́сліи,* спасти́ и просвѣти́ти ду́ши на́ша. [Два́жды.]

Не прія́ша тя́ латы́няни, кня́же Ростисла́ве,* бы́сть бо сіе́ по про́мыслу Бо́жію,* того́ ра́ди не жела́лъ еси́ бы́ти у престо́ла ри́мскаго,* полюби́ ду́хъ тво́й свѣ́тъ восто́ка правосла́внаго,* его́же насади́лъ еси́ во виногра́дницѣ твое́мъ,* сего́ ра́ди и поне́слъ еси́ у́зы,* заключе́ніе и оче́съ избоде́ніе,* я́ко му́ченикъ и́стинный Христу́ прине́слся еси́,* Того́же моли́ о пою́щихъ тя́. [Два́жды.]

Ра́намъ преда́лся еси́ и му́камъ,* благовѣ́рный кня́же Ростисла́ве,* непрекло́ненъ му́дростію,* пребѣ́ я́ко кади́ло благоуха́ніемъ духо́внымъ испо́лнено,* просвѣща́я сердца́ благода́тію* чту́щихъ святу́ю па́мять твою́ вѣ́рно. [Два́жды.]

Сла́ва, гла́съ 6:

На ка́мени вѣ́ры апо́стольскія утверди́лся еси́, да́ры Ду́ха Свята́го прія́тъ, отъ ти́ны пога́нскія зе́млю словя́нскую свободи́лъ еси́, и вѣ́ру и́стиную въ не́й насади́лъ еси́, благовѣ́рный кня́же мора́вскій Ростисла́ве. Моли́, спасти́ и просвѣти́ти ду́ши на́ша.

И ны́нѣ, богоро́диченъ:

Кто́ Тебѣ́ не ублажи́тъ, Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ.

Та́же: Свѣ́те ти́хій... Вхо́дъ. Проки́менъ дне́ и чте́нія.

Ца́рствъ тре́тіихъ чте́ніе. [Глава́ 8.]

Ста́ Соломо́нъ предъ лице́мъ же́ртвенника Госпо́дня, предъ всѣ́мъ собо́ромъ Изра́илевымъ, и воздѣ́въ ру́цѣ свои́ на не́бо, и рече́: Го́споди Бо́же Изра́илевъ, нѣ́сть Бо́гъ, я́коже Ты́, на небеси́ горѣ́ и на земли́ до́лѣ. Аще бо не́бо и не́бо небесе́ не довлѣ́ютъ Тебѣ́, ка́ко до́мъ се́й, его́же созда́хъ и́мени Твоему́? Оба́че и при́зриши на моли́тву мою́, Го́споди Бо́же Изра́илевъ, услы́шати моле́нія и моли́тву, е́юже ра́бъ Тво́й мо́лится предъ Тобо́ю, къ Тебѣ́ дне́сь. Да бу́дутъ о́чи Твои́ отве́рсты на до́мъ се́й де́нь и но́щь, на мѣ́сто сіе́, о не́мже глаго́лалъ еси́: бу́детъ и́мя Мое́ та́мо, е́же услы́шати моли́тву, е́юже мо́лится ра́бъ Тво́й на мѣ́стѣ се́мъ, во дни́ и но́щи. И послу́шати мольбы́ раба́ Твоего́ и люде́й Твои́хъ Изра́иля. И ели́ка а́ще помо́лятся къ Тебѣ́ на мѣ́стѣ се́мъ, и Ты́ услы́шиши на мѣ́стѣ жили́ща Твоего́ на небеси́, и сотвори́ши, и ми́лостивъ бу́деши и́мъ.

Проро́чества Иса́іина чте́ніе. [Главы́ 61 и 62.]

Да возра́дуется душа́ моя́ о Го́сподѣ, облече́ бо мя́ въ ри́зу спасе́нія, и оде́ждею весе́лія одѣ́я мя́, я́ко жениху́ возложи́ мнѣ́ вѣне́цъ, и я́ко невѣ́сту украси́ мя красото́ю. И я́ко земля́ растя́щая цвѣ́тъ сво́й, и я́ко вертогра́дъ сѣ́мена своя́ прозяба́етъ: та́ко возсія́етъ Госпо́дь пра́вду, и ра́дость предъ всѣ́ми язы́ки. Сіо́на ра́ди не умо́лкну, и Іерусали́ма ра́ди не попущу́, до́ндеже у́бо изы́детъ я́ко свѣ́тъ пра́вда моя́, и спасе́ніе же мое́ я́ко свѣща́ разжже́тся. И у́зрятъ язы́цы пра́вду твою́, и вси́ ца́ріе зе́мстіи сла́ву твою́, и нареку́тся и́менемъ твои́мъ но́вымъ, е́же Госпо́дь имену́етъ е́. И бу́деши вѣне́цъ добро́ты въ руцѣ́ Госпо́дни, и діади́ма ца́рствія въ руцѣ́ Бо́га Твоего́. И ктому́ не нарече́шися оста́вленъ, и земля́ твоя́ ктому́ не нарече́тся пуста́. Тебѣ́ бо нарече́тся во́ля моя́, и земля́ твоя́ вселе́нная, я́ко благоволи́тъ Госпо́дь въ тебѣ́, и земля́ твоя́ насели́тся. И я́ко живы́й ю́ноша съ дѣ́вою, та́ко поживу́тъ сы́нове твои́ съ тобо́ю. И бу́детъ, и́мже о́бразомъ возвесели́тся жени́хъ о невѣ́стѣ, та́ко возвесели́тся Госпо́дь о тебѣ́.

Проро́чества Иса́іина чте́ніе. [Глава́ 60.]

Свѣти́ся, свѣти́ся, Іерусали́ме: пріи́де бо тво́й свѣ́тъ и сла́ва Госпо́дня на тебѣ́ возсія́. Яко се́ тма́ покры́етъ зе́млю и мра́къ на язы́ки, на тебѣ́ бо яви́тся Госпо́дь, и сла́ва Его́ на тебѣ́ у́зрится. И по́йдутъ ца́ріе свѣ́томъ твои́мъ, и язы́цы свѣ́тлостію восто́ка твоего́. Возведи́ о́крестъ о́чи твои́ и ви́ждь со́бранная ча́да твоя́: пріи́дутъ вси́ сы́нове твои́ издале́ча, и дще́ри твоя́ на ра́мѣхъ во́змутся. Тогда́ у́зриши, и возра́дуешися, и убои́шися, и ужа́снешися се́рдцемъ, егда́ преложи́тъ на тя́ бога́тство мо́ря, и язы́къ, и люде́й. И пріи́дутъ ти́ стада́ велблу́дъ, и покры́ютъ тя́ велблу́ды Мадіа́мстіи и Гефа́рстіи, вси́ отъ Сава́ пріи́дутъ, нося́ще тебѣ́ зла́то и лива́нъ, принесу́тъ тебѣ́ и ка́мень че́стенъ, и спасе́ніе отъ Го́спода благовѣстя́тъ. И вся́ о́вцы Кида́рскія соберу́тся тебѣ́, и о́вни Навео́ѳстіи пріи́дутъ тебѣ́, и вознесу́тся прія́тная на же́ртвенникъ Мо́й, и до́мъ моли́твы Моея́ просла́вится. Кíи су́ть, и́же, я́ко о́блацы, лета́ютъ, и я́ко го́лубіе со птенцы́ свои́ми? Со мно́ю е́сть Сіо́нъ, Мене́ о́строви ожида́ша и корабли́ Ѳарсíйстіи въ пе́рвыхъ, е́же привести́ ча́да твоя́ издале́ча и сребро́ и зла́то и́хъ съ ни́ми, за и́мя Госпо́дне Свято́е и за е́же Свято́му Изра́илеву сла́вну бы́ти. И сози́ждутъ сы́нове иноро́дніи стѣ́ны твоя́, и ца́ріе и́хъ предста́нутъ тебѣ́: за гнѣ́въ бо Мо́й порази́хъ тя́ и за ми́лость Мою́ возлюби́хъ тя́. И отве́рзутся врата́ твоя́, Іерусали́ме, вы́ну де́нь и но́щь и не затворя́тся, е́же ввести́ къ тебѣ́ си́лу язы́ковъ и цари́ и́хъ ведо́мыя. Язы́цы бо и ца́ріе, и́же тебѣ́ не порабо́таютъ, поги́бнутъ, и язы́цы запустѣ́ніемъ запустѣ́ютъ. И сла́ва Лива́нова къ тебѣ́ пріи́детъ, въ кипари́сѣ, и пе́вкѣ и ке́дрѣ вку́пѣ, просла́вити мѣ́сто свято́е Мое́, и мѣ́сто но́гъ Мои́хъ просла́влю. И по́йдутъ къ тебѣ́, боя́щеся, сы́нове смири́вшихъ тя́ и прогнѣ́вавшихъ тя́ и покло́нятся слѣда́мъ но́гъ твои́хъ вси́ прогнѣ́вавшіи тя́, и нарече́шися гра́дъ Госпо́день, Сіо́нъ Свята́го Изра́илева. За е́же бы́ти тебѣ́ оста́влену и возненави́дѣну, и не бѣ́ помога́яй тебѣ́, и положу́ тя въ ра́дость вѣ́чную, весе́ліе родо́мъ родо́въ. И изссе́ши млеко́ язы́ковъ, и бога́тство царе́й снѣ́си, и разумѣ́еши, я́ко Азъ Госпо́дь, спаса́яй тя́ и избавля́яй тя́, Бо́гъ Изра́илевъ.

На литíи стихи́ра хра́ма, и свята́го, гла́съ 5:

Благочести́ваго Ростисла́ва па́мять ра́достно пра́зднуемъ дне́сь, глаго́лалъ бо еси́ ко Царьгра́ду во свое́мъ проше́ніи: не и́мамъ такова́го и́же бы ны́, во сво́й язы́къ и́стую вѣ́ру христіа́нскую сказа́лъ еси́, сего́ ра́ди послу́шася ти́ учи́тели, и сíи изложи́ста и́стинную вѣ́ру на язы́цѣ словя́нстѣмъ. Тѣ́мже и мы́ ны́нѣ мо́лимся, испроси́ на́мъ у Го́спода ве́лія ми́лости.

Гла́съ 6:

Досто́йно е́сть и пра́ведно, чти́ти па́мять твою́, благовѣ́рне, я́ко потруди́лся еси́ о на́съ, е́же бы́хомъ воспѣва́ли Бо́га на язы́цѣ свое́мъ. Просвѣща́й помышле́нія на́ша мольба́ми твои́ми.

Гла́съ 7:

Весе́ліе дне́сь земли́ твоея́, кня́же Ростисла́ве, я́ко возмого́хомъ чести́ Ева́нгеліе на нарѣ́чіи на́шемъ. Христа́ еси́ возжела́лъ, и́долы пренебрѣ́глъ, Того́ моли́ о спасе́ніи на́шемъ.

Гла́съ 8:

Хвала́ Бо́гу отъ бре́нныхъ усте́нъ, воспѣва́ема е́сть въ боже́ственнѣй па́мяти твое́й: поруга́въ извая́нія, и́доловъ зра́ки, и жа́ло а́дское кресто́мъ притупи́въ, моли́ спасти́ся душа́мъ на́шимъ, Ростисла́ве всече́стне.

Сла́ва, гла́съ 1:

Це́рковь дне́сь украша́ется, и діа́воля пре́лесть побѣжда́ется, и земля́ на́ша отъ ти́ны многобо́жія изыма́ется, мы́ же вопіе́мъ ти́: ра́дуйся, вѣ́рныхъ утвержде́ніе, Це́ркве огражде́ніе, о на́съ не оскудѣва́яй моля́ся ко Го́споду, красото́ церко́вная.

И ны́нѣ, богоро́диченъ:

Предста́тельнице ро́да христіа́нскаго, не пре́зри надѣ́ющихся на Тя́, но изба́ви ны́ отъ вся́кія ну́жды и печа́ли.

На стихо́внѣ стихи́ры, гла́съ 5. Подо́бенъ: Ра́дуйся.

Ра́дуйся, земле́ Мора́вская,* дне́сь бо прише́ствіемъ отъ восто́къ концы́ твои́ просвѣти́шася,* и попра́ся сме́ртная держа́ва пога́нства,* и вознесо́хомся отъ тмы́ къ Свѣ́ту,* Имже и́долы попра́шася,* и язы́цы посрами́шася,* и насади́ся и́стинная Це́рковь.* Предста́тельствуй о на́съ, благовѣ́рный кня́же Ростисла́ве.

Сти́хъ: Возвесели́тся пра́ведникъ о Го́сподѣ* и упова́етъ на Него́.

Ра́дуйся, благовѣ́рне кня́же Ростисла́ве,* фра́нкская вражда́ бо тобо́ю упраздни́ся* и зло́ба сокруши́ся,* и ра́довахуся лю́діе земли́ твоея́,* бла́гость бо уче́ньми святы́хъ Кири́лла и Меѳо́дія сѣ́мо принесе́ся,* и научи́хомся воспѣва́ти Бо́га Тро́ицу во Еди́ницѣ,* и почита́ти твою́ па́мять вѣ́рно.* Моли́ся о на́съ, благовѣ́рне кня́же на́шъ.

Сти́хъ: Честна́ предъ Го́сподемъ* сме́рть преподо́бныхъ Его́.

Возсія́лъ еси́ звѣздо́ пресвѣ́тлая,* надъ страна́ми словя́нстѣми,* и источи́лъ еси́ Боже́ственныя струи́* на страны́ за́пада, сѣ́вера и ю́га,* и напои́лъ еси́ и́хъ я́ко древа́ живо́тная,* сíи же тебе́, кня́же Ростисла́ве, велича́ютъ,* потщи́ся на умоле́ніе ко Го́споду,* и моли́твами твои́ми испроси́ на́мъ ве́лія ми́лости.

Сла́ва, гла́съ 8:

Взыгра́йте дне́сь, вси́ словя́нстіи наро́ды, пра́зднующе благовѣ́рнаго кня́зя на́шего Ростисла́ва свѣ́тлую па́мять: призва́ніемъ бо твои́мъ изъ Царьгра́да учи́телей вели́кихъ, пога́нства отрѣши́хомся, и правосла́вно покланя́тися Тро́ицѣ Животворя́щей научи́хомся, тѣ́мже про́симъ тя́: моли́ся за страны́ на́ша су́щія, вся́каго наи́тія вра́жія изба́витися, и къ правосла́внѣй вѣ́рѣ привести́ отпа́дшихъ отъ нея́.

И ны́нѣ, богоро́диченъ:

Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.

Тропа́рь, гла́съ 7:

Яко а́нгеломъ собесѣ́дникъ показа́лся еси́ вои́стинну, благовѣ́рный кня́же Ростисла́ве, вѣ́ру и́стинную на зе́мляхъ словя́нстѣхъ насади́лъ еси́, и пога́нскія ка́пища разруши́лъ еси́, сего́ ра́ди вопіе́мъ ти́: моли́ спасти́ся душа́мъ на́шимъ.

Сла́ва, и ны́нѣ, богоро́диченъ:

Яко на́шего воскресе́нія сокро́вище, на Тя́ надѣ́ющіяся, Всепѣ́тая, отъ ро́ва и глубины́ прегрѣше́ній возведи́, Ты́ бо пови́нныя грѣху́ спасла́ еси́, ро́ждшая Спасе́ніе на́ше, Яже пре́жде рождества́ Дѣ́ва, и въ рождествѣ́ Дѣ́ва, и по рождествѣ́ па́ки пребыва́еши Дѣ́ва.


НА УТРЕНИ,
На Бо́гъ Госпо́дь: Тропа́рь то́йже.

По 1-мъ стихосло́віи сѣда́ленъ, гла́съ 3. Подо́бенъ: Красотѣ́ дѣ́вства.

Обле́къ въ ри́зу спасе́нія* еле́емъ Ду́ха пома́за тя́, сла́вне,* Присносу́щное Сло́во и Госпо́дь.* Отню́дуже пріи́де благода́ть и на на́съ,* въ ра́зумѣ пою́щихъ тя́:* ра́дуйся, Ростисла́ве кня́же всеблаже́нне. [Два́жды.]

Сла́ва, и ны́нѣ, богоро́диченъ, подо́бенъ то́йже:

Засту́пнице неусыпа́емая,* стѣ́но и прибѣ́жище ро́да христіа́нскаго,* ру́чко всезлата́я,* и боже́ственная ста́мно ма́нны,* непреста́й спаса́ти ны́,* христіа́номъ упова́ніе.

По 2-мъ стихосло́віи сѣда́ленъ, гла́съ 2. Подо́бенъ: До́ме Евфра́ѳовъ.

Распне́ся на́съ ра́ди,* на дре́вѣ Влады́ка тва́ри,* тебе́ же я́ко пу́ть многосвѣ́тлый показа́,* кня́же Ростисла́ве,* тѣ́мже сла́ва тебѣ́. [Два́жды.]

Сла́ва, и ны́нѣ, богоро́диченъ, подо́бенъ то́йже:

Проро́къ Иса́ія,* предрече́ воплоще́ніе Бо́жія Сло́ва:* сни́де бо я́ко до́ждь на руно́,* Ду́хъ Святы́й на Тя́, Богоро́дице,* и вмѣсти́ла еси́ Невмѣсти́маго.

По Хвали́те и́мя.., велича́ніе:

Велича́емъ тя́, благовѣ́рный кня́же Ростисла́ве, и чте́мъ святу́ю па́мять твою́, ты́ бо страны́ словя́нстѣи просвѣти́лъ еси́.

Псало́мъ избра́нный:

Небеса́ повѣ́даютъ сла́ву Бо́жію, творе́ніе же руку́ Его́ возвѣща́етъ тве́рдь. Исповѣ́дятъ небеса́ чудеса́ Твоя́, Го́споди. Вмѣ́сто оте́цъ твои́хъ бы́ша сы́нове твои́. Поста́виши я́ кня́зи по все́й земли́. Бо́гъ бого́въ Госпо́дь глаго́ла и призва́ зе́млю. Отъ восто́къ со́лнца до за́падъ, хва́льно и́мя Госпо́дне. Освѣти́ша мо́лнія Его́ вселе́нную. Возвѣсти́ша небеса́ пра́вду Его́. И ви́дѣша вси́ лю́діе сла́ву Его́. Кня́зи Іу́довы влады́ки и́хъ. Воцари́ся Бо́гъ надъ язы́ки. Бо́гъ прославля́емъ въ совѣ́тѣ святы́хъ. Ве́лій и стра́шенъ е́сть надъ всѣ́ми окре́стными Его́. Рцы́те во язы́цѣхъ, я́ко Госпо́дь воцари́ся. Возвѣсти́те во язы́цѣхъ сла́ву Его́, во всѣ́хъ лю́дехъ чудеса́ Его́. Во всю́ зе́млю изы́де вѣща́ніе и́хъ. И въ концы́ вселе́нныя глаго́лы и́хъ. Покори́ лю́ди на́мъ, и язы́ки подъ но́ги на́ша. Ве́лій Госпо́дь на́шъ, и ве́лія крѣ́пость Его́. То́й да́стъ си́лу и держа́ву лю́демъ Свои́мъ: благослове́нъ Бо́гъ.

Сла́ва, и ны́нѣ. Аллилу́ія, аллилу́ія, аллилу́ія. [Три́жды.]

По поліеле́и сѣда́ленъ, гла́съ 2:

Боже́ственнымъ Ду́хомъ просвѣще́нъ, Христу́ послѣ́довалъ еси́, и на́съ того́жде научи́, ты́ бо въ князѣ́хъ благочести́въ показа́лся еси́, тѣ́мже моли́твами твои́ми спаса́й на́съ. [Два́жды.]

Сла́ва, и ны́нѣ, богоро́диченъ, гла́съ то́йже:

Воздви́гла еси́ вся́ отъ тлѣ́нія къ нетлѣ́нію Боже́ственнымъ Рождество́мъ Твои́мъ, Дѣ́во Чи́стая, тѣ́мъ Тя́ достодо́лжно вси́ блажи́мъ.

Степе́нна 4-го гла́са, 1-й антифо́нъ. Проки́менъ, гла́съ 4: Вознесо́хъ избра́ннаго* отъ люде́й Мои́хъ. Сти́хъ: Сего́ ра́ди пома́за Тя́, Бо́же, Бо́гъ Тво́й. Вся́кое дыха́ніе... Ева́нгеліе отъ Іоа́нна, зача́ло 36. По 50-мъ псалмѣ́, Сла́ва: Моли́твами равноапо́стольнаго кня́зя Ростисла́ва, Ми́лостиве... И ны́нѣ: Моли́твами Богоро́дицы, Ми́лостиве... Та́же: Поми́луй мя́, Бо́же...

Посе́мъ стихи́ра, гла́съ 6:

Возлюби́лъ еси́ пра́вду и возненави́дѣлъ еси́ беззако́ніе, благовѣ́рне кня́же на́шъ: чу́вства просте́ръ къ небеси́ и звѣ́здную стяжа́въ добро́ту, отъ сего́ та́йно науча́емь бы́лъ вся́ческихъ Го́спода, Его́же моли́ о душа́хъ на́шихъ.

Кано́нъ, гла́съ 8, его́же краегране́сіе: Благовѣ́рному кня́зю Ростисла́ву воспою́.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Бо́же, Ты́ Еди́ный и́маши вла́сть отпуща́ти грѣси́, моли́твами благовѣ́рнаго кня́зя Ростисла́ва поми́луй на́съ грѣ́шныхъ.

Люде́й Твои́хъ облагодати́, Бо́же, чту́щихъ честну́ю па́мять просвѣти́теля земе́ль словя́нстѣхъ, вѣ́рно.

Аще бы́ не ты́, кня́же Ростисла́ве, кто́ бы́ на́съ научи́лъ кла́нятися Тріеди́ному Бо́гу правосла́вно, сего́ ра́ди тя́ воспѣва́емъ.

Богоро́диченъ: Го́спода всѣ́хъ и Зижди́теля носи́ла еси́, Богоро́дице, во утро́бѣ Твое́й. Мо́лимъ Ти ся́: хода́тайствуй грѣха́ изба́витися на́мъ.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Отче на́шъ Небе́сный, внемли́ хвалѣ́ свято́му Твоему́, о́нъ бо потруди́ся о душа́хъ на́шихъ.

Вѣ́рныя ча́да твоя́, Ростисла́ве, благодаре́ніе тебѣ́ прино́симъ, возмо́жемъ бо пѣ́ти Тро́ицу во язы́цѣ свое́мъ.

Ясти со Христо́мъ небе́сныя пи́щи па́че всего́ возжделѣ́вый, и сего́ ра́ди и́долы попра́въ и но́щь невѣ́дѣнія упраздни́въ на земли́ на́шей, Ростисла́ве блаже́нне, Го́спода Царя́ почита́ти, сего́ Еди́наго научи́вый.

Богоро́диченъ: Родила́ еси́ на́мъ Спа́са мíра, Пресвята́я Богоро́дице, а́зъ же на сіе́ не взира́ю, уподо́бихся скоту́ немы́слящу, вся́каго грѣха́ и осужде́нія, молю́, изба́вити мя́.

Сѣда́ленъ, гла́съ 5. Подо́бенъ: Собезнача́льное Сло́во.

Согла́сно вси́ воспои́мъ свѣ́тлую па́мять благовѣ́рнаго, се́й бо призва́ на зе́млю на́шу равноапо́стольныхъ учи́телей, уче́ньми ко́ихъ ду́ши на́ша водворя́ются въ небе́сныхъ оби́телѣхъ. Моли́ дарова́ти пра́зднующимъ любо́вію святу́ю па́мять твою́, ми́ръ и ве́лію ми́лость. [Два́жды.]

Сла́ва, и ны́нѣ, богоро́диченъ, подо́бенъ то́йже:

Мíрови родила́ еси́ мíръ Содержа́щаго, пита́ла еси́ всѣ́хъ Пита́теля и Нача́льника жи́зни на́шея, Его́же моли́ о спасе́ніи на́шемъ, не и́мамы бо ины́я по́мощи ра́звѣ Тебе́, вся́ бо мо́жеши, ели́ка хо́щеши, Влады́чице.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Ника́коже возмого́хомъ пѣ́ти Бо́га на язы́цѣ лати́нстѣмъ, ниже́ гре́честѣмъ, я́коже не разумѣ́хомъ слове́съ что́мыхъ. Оба́че уви́дяху очеса́ на́ша и́стину чрезъ писа́нія, изложе́нныя въ нарѣ́чіи словя́нстѣмъ.

Оле чудесе́! Ка́ко пое́мъ Бо́га въ Тро́ицѣ, и си́мъ Боже́ственную благода́ть стяжа́емъ и себе́ къ обоже́нію приво́димъ, тѣ́мже хва́лимъ тя́, Ростисла́ве боже́ственне.

Мора́вская страна́ дне́сь испо́лнися ме́домъ и млеко́мъ, предста́тельствуй о не́й при́сно, да сíи отъ нея́ не оскудѣ́ютъ, Ростисла́ве всеблаже́нне.

Утренюемъ воспѣ́ти тя́, Ростисла́ве, я́ко ты́ избавля́еши на́съ отъ скорбе́й и печа́лей моли́твами твои́ми.

Богоро́диченъ: Ко Го́споду моли́твы Своя́ о на́съ вознеси́, Богоро́дице, я́ко Ты́ еси́ спасе́ніе ро́да христіа́нскаго.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Николи́же дрема́лъ еси́, но у́треневалъ ко Христу́, небе́сному Влады́цѣ, кня́же, свѣ́та испо́лненъ бы́лъ еси́.

Яко звѣзда́ многосвѣ́тлая сія́еши, кня́же, въ порфи́ру бо спасе́нія обле́клся еси́.

Зако́нъ небе́сный па́че земна́го возлюби́въ и Христу́ послужи́лъ еси́, сія́я добро́тами, Ростисла́ве всече́стне.

Богоро́диченъ: Юницу воспѣва́емъ, честнѣ́йшую херуви́мъ и сла́внѣйшую серафи́мъ: Та́ бо мо́литъ за ны́ Христа́ Бо́га на́шего.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Ростисла́ве, кня́же на́шъ, ко́е сіе́ бы́сть та́инство, я́ко ду́хъ тво́й правосла́вно Бо́га воспѣ́, и́долы тобо́ю бо низложи́шася, и прія́лъ еси́ ра́достно Ца́рство небе́сное.

Очи твои́ сожже́на бѣ́ста отъ сро́дника твоего́, я́коже рече́ преда́ніе, прія́лъ бо си́мъ еси́ му́ченическій вѣне́цъ, и Свѣ́та ви́дѣлъ еси́ па́че пре́жняго.

Се́ держа́ва твоя́ и се́ лю́ди твоя́, кня́же благовѣ́рный, при́зри на ны́, пою́щихъ тя́, тобо́ю бо пре́лести де́монскія избавля́емся.

Богоро́диченъ: Тобо́ю еди́ною, Богоро́дице, изба́витися мо́жемъ скорбе́й и грѣхо́въ: исцѣли́ мя, уязви́ся бо се́рдце мое́, ухапле́ніемъ лука́ваго.

Конда́къ, гла́съ 8:

Тя́ покрови́теля земли́ на́шея почита́емъ, Ростисла́ве кня́же благовѣ́рный, тобо́ю исто́чницы водны́я наводни́шася, и са́дъ тво́й напои́ся, его́же возрасти́лъ еси́: хва́лимъ тя́, приснопа́мятне.

Икосъ:

Вѣ́рніи, дне́сь Ростисла́ва почти́мъ, земля́ бо на́ша я́ко ту́ка и ма́сти испо́лнися сказа́ніемъ ева́нгельскимъ, е́же приложи́ста къ язы́ку на́шему святíи равноапо́стольніи Меѳо́дій и Кири́ллъ, сего́ язы́цы посрами́шася и лати́няни устраши́шася, обурева́емая бо сердца́ утверди́лъ еси́, че́стно славосло́вити Сопресто́льна Сло́ва и Соприсносу́щна, отъ сего́ хва́лимъ тя́, приснопа́мятне.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Имамы покрови́теля земли́ словя́нскія на небесѣ́хъ, Ростисла́ва кня́зя благовѣ́рнаго, кíй иновѣ́рцевъ ополче́нія низложи́въ. Бо́же, благослове́нъ еси́.

Скве́рна не косну́ся тя́, кня́же пра́ведный, возлюби́лъ бо еси́ Христа́, Ему́же свяще́нныя хра́мы воздви́глъ еси́.

Ла́врами чи́стоты вѣнча́нъ бы́лъ еси́, бо преда́лся еси́ Бо́гу, и лю́демъ земли́ твоея́ послужи́лъ еси́.

Богоро́диченъ: Азъ отягче́нъ мно́гими грѣхи́, Дѣ́во Чи́стая, согрѣша́ю вы́ну во́лею мое́ю, но къ обы́чному ны́нѣ милосе́рдію прибѣга́ю, спаси́ мя.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Въ багряни́цу, сла́вне, одѣ́явся милосе́рдіемъ, и я́ко порфи́рою добродѣ́тельми украси́вся, преста́вился еси́ къ небе́сному Ца́рствію, зову́ще: іере́и, благослови́те, лю́діе, превозноси́те Христа́ во вѣ́ки.

Ублажи́мъ те́плаго моли́твенника о душа́хъ на́шихъ, показу́ющаго на́мъ свѣ́тлыя мы́сли: лю́діе, превозноси́те Христа́ во вѣ́ки.

Ви́дѣніе ли́ка твоего́ боже́ственнаго и поуче́ніе слове́съ твои́хъ поуча́ста на́съ вопи́ти: лю́діе, превозноси́те Христа́ во вся́ вѣ́ки.

Богоро́диченъ: О, чудесе́! Ка́ко Дѣ́ва родила́ еси́ и Дѣ́ва пребыла́ еси́? Умъ мо́й умири́ и се́рдце мое́ чи́сто сохрани́, того́ ра́ди вопіе́мъ: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Свя́то свою́ прожи́лъ еси́ жи́знь и свя́то ю́ сконча́, ны́нѣ же на небесѣ́хъ я́сно сія́еши и излива́еши рѣ́ки благода́ти, во е́же спасти́ся душа́мъ на́шимъ.

Преблаже́нне кня́же Ростисла́ве, моли́ся за ны́ ко Го́споду, дабы́ страны́ на́ши жи́ли въ правосла́віи и единомы́сліи, и не подража́ли бы многочи́сленнымъ блуда́мъ за́паднымъ, е́же е́сть отъ діа́вола.

Отче Пребезнача́льне, Безсме́ртный Царю́, сподо́билъ еси́ Ца́рствія небе́снаго свята́го Своего́, его́же благоче́стно оправда́лъ еси́ дре́вле на земли́, и ца́рствовати его́ поста́вилъ еси́, и́же возлюби́ Тя́ чи́стѣ, его́же моли́твами спаси́ на́съ.

Богоро́диченъ: Юдо́ли плаче́вныя изба́ви мя́, Влады́чице, всѣ́хъ Го́спода и Творца́ заче́ншая, я́коже Цари́ца одесну́ю Сего́, Чи́стая, предстои́ши. Мо́лимъ Ти ся, сподо́би и на́съ десна́го предстоя́нія на пра́веднѣмъ суди́щи Христо́вѣмъ.

Свѣти́ленъ.

Свѣ́томъ вѣ́ры правосла́вныя просвѣти́лъ еси́, Ростисла́ве блаже́нне, зе́мли на́ша словя́нскія, и ны́нѣ мо́лимъ тя́: просвѣща́й на́съ свѣ́томъ Бо́жіимъ. [Два́жды.]

Сла́ва, и ны́нѣ, богоро́диченъ:

Свѣ́тъ ро́ждшая мíру, Преблагослове́нная Влады́чице, просвѣти́ о́чи ду́шъ на́шихъ, я́ко всегда́ Тя́ ублажа́емъ.

На хвали́техъ стихи́ры на 4, гла́съ 2:

Зе́мли словя́нскія уче́ніемъ ева́нгельскимъ обогати́шася, и изба́вися оте́чество на́ше отъ язы́чества богоме́рзкаго, тѣ́мже ты́ е́сть ны́нѣ на́мъ прибѣ́жище, моли́, правосла́вію научи́ти во страна́хъ на́шихъ.

Непоколеби́мый сто́лпъ терпѣ́нія, въ разли́чныхъ напа́стехъ, Іову уподо́бился еси́ Ростисла́ве, всѣ́мъ дре́внимъ страда́льцемъ за и́стину подо́бенъ бы́лъ еси́, за сіе́ и прія́лъ еси́ на небеси́ мзду́ за труды́ твоя́, тѣ́мъ тя́ ны́нѣ велича́емъ.

Правосла́вія насади́телю благíй, благовѣ́рный кня́же Ростисла́ве, помози́ моли́твами твои́ми, ше́ствовати путе́мъ спасе́нія, и въ небе́сныхъ оби́телѣхъ всели́тися, идѣ́же е́сть всѣ́хъ веселя́щихся жили́ще.

Ра́зума духо́внаго испо́лнился и посрами́лъ еси́ врага́, прельсти́вшаго Ада́ма первозда́ннаго, сему́ врагу́ язы́чество бѣ́ ча́домъ, его́же порази́лъ еси́ на земли́ твое́й.

Сла́ва, гла́съ 3:

Язы́чества всеси́льный прогони́телю, избра́ бо тя́ Госпо́дь на дѣ́ло сіе́ за смире́ніе твое́, Ростисла́ве богозва́нне. Ца́рь и Бо́гъ бога́тыми дарова́ніи украша́етъ досто́йныхъ, То́йже и тебе́ украси́, Ростисла́ве досточу́дне.

И ны́нѣ, богоро́диченъ, гла́съ то́йже:

Дѣ́во, Ма́ти, Пречи́стая, Ты́ еси́ Боже́ственный покро́въ рабо́мъ Твои́мъ, въ ско́рбѣхъ Утѣ́шительнице и въ искуше́ніихъ крѣ́пкая Помо́щнице, моли́ Го́спода спасти́ся на́мъ, я́ко Человѣколюби́вая еси́.

Славосло́віе вели́кое. Ектеніи́ и отпу́стъ.



НА ЛИТУРГІИ,

Блаже́нна отъ кано́на свята́го, пѣ́снь 3-я и 6-я. Проки́менъ, гла́съ 4: Возвесели́тся пра́ведникъ о Го́сподѣ, и упова́етъ на Него́. Сти́хъ: Ибо рука́ Моя́ засту́питъ его́, и мы́шца Моя́ укрѣпи́тъ его́. Апо́столъ къ Гала́томъ, зача́ло 200 [гл. 1, ст. 11-19]. Аллилу́ія, гла́съ 1: Вознесо́хъ избра́ннаго отъ люде́й Мои́хъ. Сти́хъ: Го́споди, си́лою Твое́ю восвесели́тся ца́рь. [Ева́нгеліе Іоа́нна, зача́ло 35, отъ полу́.] Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Коне́цъ и Бо́гу сла́ва!

Источникъ: Слу́жба свято́му благовѣ́рному кня́зю мора́вскому Ростисла́ву. — Пряшевъ, 2001. — 13 с.

/ Къ оглавленію раздѣла /


Наверхъ / Къ титульной страницѣ

0