Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 22 сентября 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

ИРМОЛОГІЙ.

Пѣ́сни Свяще́ннаго Писа́нія, пое́мыя на у́трени во святу́ю Четыредеся́тницу.

Во святу́ю и вели́кую Четыредеся́тницу стихосло́вятся пѣ́сни си́це:

Тре́тію же пѣ́снь пое́мъ си́це: Глаго́летъ пе́рвый ли́къ сти́хъ: Госпо́дь взы́де на небеса́... и тропа́рь кано́на мине́и. Вторы́й ли́къ, сти́хъ: И да́стъ крѣ́пость царю́... и вторы́й тропа́рь кано́на мине́и. Та́же: Сла́ва, И ны́нѣ, съ тропари́ кано́на. И пое́тъ пе́рвый ли́къ ирмо́съ мине́и тре́тія пѣ́сни послѣди́ кано́на. Си́мъ о́бразомъ пое́мъ и 6-ю пѣ́снь.

Четве́ртую же, и пя́тую, и седму́ю пѣ́сни си́це пое́мъ: Глаго́ли пе́рвѣе ирмо́съ кано́на мине́и. Та́же коне́чныя два́ стиха́ пѣ́сни пое́мъ къ тропаре́мъ кано́на. И Сла́ва, И ны́нѣ. Ирмосо́мъ же не покрыва́емъ пѣ́сни, зане́ ирмо́съ глаго́лется пре́жде пѣ́сни. Пою́тся же ирмосы́ мине́и по кано́нѣ, то́кмо по 3-й и 6-й пѣ́снехъ. Зане́же у тѣ́хъ пѣ́сней пе́рвѣе ирмо́съ не пое́тся. Въ про́чія же дни́ седми́цы, кромѣ́ понедѣ́льника, та́ко пое́тся и пе́рвая пѣ́снь, я́коже указа́ся о 4-й и 5-й пѣ́снехъ. А въ ни́хже пѣ́снехъ бу́детъ трипѣ́снецъ, пое́тся послѣди́ кано́на катава́сія, ирмо́съ трипѣ́снца, я́коже вы́ше изъяви́ся.

[Зри́:] Вѣ́домо же бу́ди, я́ко осмогла́сникъ не пое́тся во всю́ святу́ю Четыредеся́тницу, кромѣ́ недѣ́ль. Пое́тся же то́чію мине́я и трипѣ́снецъ. А въ ни́хже пѣ́снехъ нѣ́сть трипѣ́снца, пое́тся то́кмо мине́я.


Пѣ́снь пе́рвая.
[Пѣ́снь Моисе́ова во Исхо́дѣ, глава́ 15-я.]
[Вку́пѣ погрузи́въ фарао́на, Моисе́й глаго́летъ: Го́сподеви пое́мъ, сла́вно бо просла́вися.]

1. Пое́мъ Го́сподеви, сла́вно бо просла́вися: коня́ и вса́дника ве́рже въ мо́ре. 2. Помо́щникъ и Покрови́тель бы́сть мнѣ́ во спасе́ніе: Се́й мо́й Бо́гъ, и просла́влю Его́, Бо́гъ отца́ моего́, и вознесу́ Его́. 3. Госпо́дь, сокруша́яй бра́ни, Госпо́дь и́мя Ему́, колесни́цы фарао́новы и си́лу его́ ве́рже въ мо́ре. 4. Избра́нныя вса́дники триста́ты потопи́ въ Чермнѣ́мъ мо́ри. 5. Пучи́ною покры́ и́хъ, погрязо́ша во глубинѣ́, я́ко ка́мень. 6. Десни́ца Твоя́, Го́споди, просла́вися въ крѣ́пости, десна́я Твоя́ рука́, Го́споди, сокруши́ враги́, и мно́жествомъ сла́вы Твоея́ сте́рлъ еси́ сопроти́вныхъ. 7. Посла́лъ еси́ гнѣ́въ Тво́й, пояде́ я́, я́ко сте́бліе, и ду́хомъ я́рости Твоея́ разступи́ся вода́.

На 14: 8. Огустѣ́ша, я́ко стѣна́, во́ды, огустѣ́ша и во́лны посредѣ́ мо́ря. 9. Рече́ вра́гъ: гна́въ, пости́гну, раздѣлю́ коры́сть, испо́лню ду́шу мою́, убію́ мече́мъ мои́мъ, госпо́дствовати бу́детъ рука́ моя́.

[На 12:] 10. Посла́лъ еси́ ду́хъ Тво́й, покры́ я́ мо́ре, погрязо́ша, я́ко о́лово, въ водѣ́ зѣ́льнѣй. 11. Кто́ подо́бенъ Тебѣ́ въ бозѣ́хъ, Го́споди, кто́ подо́бенъ Тебѣ́? Просла́вленъ во святы́хъ, ди́венъ, сла́вно творя́й чудеса́.

[На 10:] 12. Просте́рлъ еси́ десни́цу Твою́, пожре́ я́ земля́. Наста́вилъ еси́ пра́вдою Твое́ю лю́ди Твоя́ сія́, я́же изба́вилъ еси́. 13. Утѣ́шилъ еси́ крѣ́постію Твое́ю во оби́тель святу́ю Твою́. Слы́шаша язы́цы и прогнѣ́вашася, болѣ́зни прія́ша живу́щіи въ Филисти́мѣ.

На 8: 14. Тогда́ потща́шася влады́ки Едо́мстіи, и князе́й Моави́тскихъ прія́тъ я́ тре́петъ, раста́яша вси́, живу́щіи въ Ханаа́нѣ. 15. Нападе́тъ на ня́ стра́хъ и тре́петъ, вели́чіемъ мы́шцы Твоея́ да ока́менятся.

[На 6:] 16. До́ндеже про́йдутъ лю́діе Твои́, Го́споди, до́ндеже про́йдутъ лю́діе Твои́ сíи, я́же стяжа́лъ еси́. 17. Вве́дъ, насади́ я́ въ го́ру достоя́нія Твоего́, въ гото́вое жили́ще Твое́, е́же содѣ́лалъ еси́, Го́споди, святы́ню, ю́же угото́вастѣ ру́цѣ Твои́.

На 4: 18. Госпо́дь, ца́рствуяй вѣ́ки, и на вѣ́къ, и еще́, егда́ вни́де ко́нь фарао́новъ съ колесни́цами и вса́дники въ мо́ре. 19. И наведе́ на ня́ Госпо́дь во́ду морску́ю, сы́нове же Изра́илевы проидо́ша су́шею посредѣ́ мо́ря.

Сла́ва [Отцу́, и Сы́ну, и Свято́му Ду́ху]. И ны́нѣ, [и при́сно, и во вѣ́ки вѣко́въ. Ами́нь].


Пѣ́снь втора́я.
[Пѣ́снь Моисе́ова во Второзако́ніи, глава́ 32-я.]
[Зако́ну пи́сану па́ки, пѣ́снь Моисе́ова.]

[Зри́:] Подоба́етъ вѣ́дати, я́ко втора́я пѣ́снь никогда́же стихосло́вится, то́кмо во еди́ной вели́кой Четыредеся́тницѣ, во вто́рникъ. Стихосло́вимъ же ю́ да́же до конца́, къ тропаре́мъ же глаго́лемъ припѣ́въ: Сла́ва Тебѣ́, Бо́же на́шъ, сла́ва Тебѣ́, еди́ному коему́ждо.

1. Вонми́, не́бо, и возглаго́лю, и да слы́шитъ земля́ глаго́лы у́стъ мои́хъ. 2. Да ча́етъ, я́ко до́ждь, вѣща́ніе мое́, да сни́дутъ, я́ко роса́, глаго́ли мои́. 3. Яко ту́ча на тро́скотъ и я́ко и́ней на сѣ́но, я́ко и́мя Госпо́дне призва́хъ, дади́те вели́чіе Бо́гу на́шему. 4. Бо́гъ, и́стинна дѣла́ Его́, и вси́ путіе́ Его́ су́дъ. 5. Бо́гъ вѣ́ренъ, и нѣ́сть непра́вды въ Не́мъ, пра́веденъ и преподо́бенъ Госпо́дь. 6. Согрѣши́ша, не Того́ ча́да поро́чная, ро́де стропти́вый и развраще́нный, сія́ ли Го́сподеви воздаете́? 7. Сíи лю́діе бу́и и не му́дри, не Са́мъ ли се́й Оте́цъ тво́й стяжа́ тя́, и сотвори́ тя́, и созда́ тя́? 8. Помяни́те дни́ вѣ́чныя, разумѣ́йте лѣ́та ро́да родо́въ. 9. Вопроси́ отца́ твоего́, и возвѣсти́тъ тебѣ́, ста́рцы твоя́, и реку́тъ ти́. 10. Егда́ раздѣля́ше Вы́шній язы́ки, я́коже разсѣ́я сы́ны Ада́мовы. 11. Поста́ви предѣ́лы язы́ковъ по числу́ а́нгелъ Бо́жіихъ, и бы́сть ча́сть Госпо́дня, лю́діе Его́ Іа́ковъ, у́же наслѣ́дія Его́ Изра́иль. 12. Удовли́ его́ въ пусты́ни въ жа́жди зно́я въ безво́днѣ. 13. Обы́де его́, и наказа́ его́, и сохрани́ его́, я́ко зѣ́ницу о́ка. 14. Яко оре́лъ, покры́ гнѣздо́ свое́ и на птенцы́ своя́ возжелѣ́. 15. Просте́ръ крилѣ́ свои́, и прія́тъ я́, и подъя́тъ я́ на ра́му свое́ю. 16. Госпо́дь еди́нъ вожда́ше я́, и не бѣ́ съ ни́ми бо́гъ чу́ждь. 17. Возведе́ я́ на си́лу земли́, насы́ти я́ жи́тъ се́льныхъ. 18. Сса́ша ме́дъ изъ ка́мене и еле́й отъ тве́рда ка́мене. 19. Ма́сло кра́віе и млеко́ о́вчее съ ту́комъ а́гнчимъ и о́внимъ, сыно́въ ю́нчихъ и ко́злихъ съ ту́комъ пшени́чнымъ и кро́вь гро́здову пія́ху вино́. 20. И яде́ Іа́ковъ, и насы́тися, и отве́ржеся возлю́бленный. 21. Уты́, утолстѣ́, разширѣ́, и оста́ви Бо́га, сотво́ршаго его́, и отступи́ отъ Бо́га, Спа́са своего́. 22. Прогнѣ́ваша Мя́ о чужи́хъ и въ ме́рзостехъ свои́хъ преогорчи́ша Мя́. 23. Пожро́ша бѣсово́мъ, а не Бо́гу, бого́мъ, и́хже не вѣ́дѣша: но́ви и секра́ти пріидо́ша, и́хже не вѣ́дѣша отцы́ и́хъ. 24. Бо́га, ро́ждшаго тя́, оста́вилъ еси́ и забы́лъ еси́ Бо́га, пита́ющаго тя́. 25. И ви́дѣ Госпо́дь, и возревнова́, и раздражи́ся за гнѣ́въ сыно́въ и́хъ и дще́рей. 26. И рече́: отвращу́ лице́ Мое́ отъ ни́хъ и покажу́, что́ бу́детъ и́мъ напослѣ́докъ. 27. Яко ро́дъ развраще́нъ е́сть, сы́нове, и́мже нѣ́сть вѣ́ры въ ни́хъ. 28. Тíи раздражи́ша Мя́ не о бо́зѣ, прогнѣ́ваша Мя́ во и́долѣхъ свои́хъ. 29. И Азъ раздражу́ я́ не о язы́цѣ, о язы́цѣ же неразу́мливѣ прогнѣ́ваю я́. 30. Яко о́гнь возгори́тся отъ я́рости Моея́, разжже́тся до а́да преиспо́дняго. 31. Снѣ́сть зе́млю и жи́та ея́, попали́тъ основа́нія го́ръ. 32. Соберу́ на ни́хъ зла́я и стрѣ́лы Моя́ сконча́ю въ ни́хъ. 33. Та́юще гла́домъ, и снѣ́дь пти́цъ и го́рбъ неисцѣ́ленъ. 34. Зу́бы звѣре́й послю́ въ ня́, съ я́ростію пресмыка́ющихся по земли́. 35. Отвнѣ́ безча́дитъ я́ ме́чь, и отъ храмо́въ и́хъ стра́хъ: ю́ноша съ дѣ́вою, ссу́щее съ соверше́ннымъ ста́рцемъ. 36. Рѣ́хъ: разсѣ́ю я́, уста́влю же отъ человѣ́къ па́мять и́хъ. 37. Аще не за гнѣ́въ враго́въ, да не долголѣ́тствуютъ и да не наля́гутъ супоста́ти. 38. Да не реку́тъ: рука́ на́ша высока́, и не Госпо́дь сотвори́ сія́ вся́. 39. Яко язы́къ погуби́вый совѣ́тъ е́сть, и нѣ́сть въ ни́хъ худо́жества. 40. Не смы́слиша разумѣ́ти сія́ вся́, да пріи́мутъ во гряду́щее лѣ́то. 41. Ка́ко пожене́тъ еди́нъ ты́сящи и два́ дви́гнета тмы́, 42. Аще не Бо́гъ отда́стъ я́, и Госпо́дь преда́стъ я́? 43. Не су́ть бо бо́зи и́хъ, я́ко Бо́гъ на́шъ, врази́ же на́ши неразу́мливи. 44. Отъ виногра́довъ бо Содо́мскихъ виногра́дъ и́хъ, и розга́ и́хъ отъ Гомо́рры. 45. Гро́здъ и́хъ — гро́здъ же́лчи, гро́здъ го́рести и́хъ. 46. Ярость зміе́въ — вино́ и́хъ, и я́рость а́спидовъ неисцѣ́льна. 47. Не сія́ ли вся́ собра́шася у Мене́ и запечатлѣ́шася въ сокро́вищахъ Мои́хъ? 48. Въ де́нь отмще́нія возда́мъ, 49. Во вре́мя, внегда́ соблазни́тся нога́ и́хъ. 50. Яко бли́зъ де́нь поги́бели и́хъ, и предстои́тъ гото́вая ва́мъ. 51. Яко су́дитъ Госпо́дь лю́демъ Свои́мъ и о рабѣ́хъ Свои́хъ умоле́нъ бу́детъ. 52. Ви́дѣ бо я́ разсла́блены, и иста́явша во вре́мя, и изнемо́гша. 53. И рече́ Госпо́дь: гдѣ́ су́ть бо́зи и́хъ, и́хже упова́ша на ня́, и́хже ту́къ же́ртвъ и́хъ ядя́сте и пія́сте вино́ тре́бъ и́хъ? 54. Да воскре́снутъ, и помо́гутъ ва́мъ, и бу́дутъ ва́мъ покрови́тели. 55. Ви́дите, ви́дите, я́ко Азъ е́смь, и нѣ́сть Бо́гъ, ра́звѣ Мене́. 56. Азъ убію́ и жи́ти сотворю́, поражу́ и Азъ исцѣлю́, и нѣ́сть, и́же и́зметъ отъ руку́ Мое́ю. 57. Яко воздви́гну на не́бо ру́ку Мою́, и клену́ся десни́цею Мое́ю, и реку́: живу́ Азъ во вѣ́ки. 58. Яко поострю́, я́ко мо́лнію, ме́чь Мо́й, и пріи́метъ су́дъ рука́ Моя́. 59. И возда́мъ ме́сть враго́мъ и ненави́дящимъ Мя́ возда́мъ. 60. Упою́ стрѣ́лы Моя́ отъ кро́ве, и ме́чь Мо́й снѣ́сть мяса́, 61. Отъ кро́ве я́звенныхъ и плѣне́нія, отъ гла́въ князе́й язы́ческихъ. 62. Возвесели́теся, небеса́, ку́пно съ Ни́мъ, и да покло́нятся Ему́ вси́ а́нгели Бо́жіи. 63. Возвесели́теся, язы́цы, съ людьми́ Его́, и да укрѣпя́тся Ему́ вси́ сы́нове Бо́жіи. 64. Яко кро́вь сыно́въ Свои́хъ отмща́етъ, и отмсти́тъ, и возда́стъ ме́сть враго́мъ, и ненави́дящимъ Его́ возда́стъ. 65. И очи́ститъ Госпо́дь зе́млю люде́й Свои́хъ.

Сла́ва [Отцу́, и Сы́ну, и Свято́му Ду́ху]. И ны́нѣ, [и при́сно, и во вѣ́ки вѣко́въ. Ами́нь].


Пѣ́снь тре́тія.
[Моли́тва Анны, ма́тере Саму́ила проро́ка, въ 1-й кни́гѣ Ца́рствъ, глава́ 2-я.]
[Бо́га почита́етъ непло́ды ражда́ющая стра́нно: Свя́тъ еси́, Го́споди, и Тя́ пое́тъ ду́хъ мо́й.]

1. Утверди́ся се́рдце мое́ во Го́сподѣ, вознесе́ся ро́гъ мо́й о Бо́зѣ мое́мъ, разшири́шася уста́ моя́ на враги́ моя́, возвесели́хся о спасе́ніи Твое́мъ. 2. Яко нѣ́сть свя́тъ, я́ко Госпо́дь, и нѣ́сть пра́веденъ, я́ко Бо́гъ на́шъ, и нѣ́сть свя́тъ, па́че Тебе́. 3. Не хвали́теся и не глаго́лите высо́кая въ горды́ни, ниже́ да изы́детъ велерѣ́чіе изъ у́стъ ва́шихъ. 4. Яко Бо́гъ ра́зумовъ Госпо́дь, и Бо́гъ, уготовля́яй начина́нія Своя́.

На 14: 5. Лу́къ си́льныхъ изнемо́же и немощству́ющіи препоя́сашася си́лою. 6. Испо́лненніи хлѣ́бовъ лиши́шася, и а́лчущіи прише́льствоваша зе́млю.

[На 12:] 7. Яко непло́ды роди́ се́дмь, и мно́гая въ ча́дѣхъ изнемо́же. 8. Госпо́дь мертви́тъ и живи́тъ, низво́дитъ во а́дъ и возво́дитъ.

[На 10:] 9. Госпо́дь убо́житъ и богати́тъ, смиря́етъ и вы́ситъ, возставля́етъ отъ земли́ убо́га и отъ гно́ища воздвиза́етъ ни́ща. 10. Посади́ти его́ съ могу́щими люде́й и престо́лъ сла́вы наслѣ́дуя ему́.

На 8: 11. Дая́й моли́тву моля́щемуся и благослови́ лѣ́та пра́веднаго. 12. Яко не укрѣпля́ется си́ленъ му́жъ крѣ́постію свое́ю, Госпо́дь не́мощна сотвори́ супоста́та Его́, Госпо́дь Свя́тъ.

[На 6:] 13. Да не хва́лится прему́дрый прему́дростію свое́ю, и да не хва́лится си́льный си́лою свое́ю, и да не хва́лится бога́тый бога́тствомъ свои́мъ. 14. Но о се́мъ да хва́лится хваля́йся, е́же разумѣ́ти и зна́ти Го́спода и твори́ти су́дъ и пра́вду посредѣ́ земли́.

На 4: 15. Госпо́дь взы́де на небеса́ и возгремѣ́, То́й су́дитъ конце́мъ земли́, пра́веденъ Сы́й. 16. И да́стъ крѣ́пость царю́ на́шему, и вознесе́тъ ро́гъ христа́ Своего́.

Сла́ва [Отцу́, и Сы́ну, и Свято́му Ду́ху]. И ны́нѣ, [и при́сно, и во вѣ́ки вѣко́въ. Ами́нь].


Пѣ́снь четве́ртая.
[Моли́тва свята́го Авваку́ма проро́ка, глава́ 3-я.]
[Сло́ва истоща́ніе Авваку́мъ сказу́етъ: Сла́ва си́лѣ Твое́й, Го́споди.]

1. Го́споди, услы́шахъ слу́хъ Тво́й и убоя́хся, Го́споди, разумѣ́хъ дѣла́ Твоя́ и ужасо́хся. 2. Посредѣ́ двою́ живо́тну позна́нъ бу́деши. Внегда́ прибли́житися лѣ́томъ — позна́ешися, внегда́ пріити́ вре́мени — яви́шися, внегда́ смути́тися души́ мое́й во гнѣ́вѣ — ми́лость Твою́ помяне́ши. 3. Бо́гъ отъ ю́га пріи́детъ, и Святы́й изъ горы́ пріосѣне́нныя ча́щи. 4. Покры́ небеса́ добродѣ́тель Его́, и хвалы́ Его́ испо́лнь земля́. 5. И сія́ніе Его́, я́ко свѣ́тъ бу́детъ, ро́зи въ рука́хъ Его́, и положи́ любо́вь держа́вну крѣ́пости Свое́й. 6. Предъ лице́мъ Его́ преды́детъ сло́во и изы́детъ на по́ле за пя́ту Его́. 7. Ста́ и подви́жеся земля́, призрѣ́ и раста́яша язы́цы. 8. Стры́шася го́ры ну́ждею, раста́яша хо́лми вѣ́чніи, ше́ствія вѣ́чная и́хъ за тру́дъ ви́дѣша. 9. Селе́нія Еѳіо́пская убоя́тся и кро́вы земли́ Мадіа́мскія. 10. Еда́ въ рѣка́хъ прогнѣ́ваешися, Го́споди? Еда́ въ рѣка́хъ я́рость Твоя́? Или́ въ мо́ри устремле́ніе Твое́? 11. Яко вся́деши на ко́ни Твоя́, и ѣжде́ніе Твое́ спасе́ніе. 12. Наляца́я наляче́ши лу́къ тво́й на ски́птры, глаго́летъ Госпо́дь. 13. Рѣка́ми разся́дется земля́, у́зрятъ Тя́ и поболя́тъ лю́діе. 14. Расточа́я во́ды ше́ствія, даде́ бе́здна гла́съ сво́й, высота́ привидѣ́нія своя́. 15. Воздви́жеся со́лнце, и луна́ ста́ въ чи́нѣ свое́мъ. 16. Во свѣ́тъ стрѣ́лы Твоя́ по́йдутъ, въ блиста́ніи мо́лніи ору́жій Твои́хъ. 17. Преще́ніемъ ума́лиши зе́млю и я́ростію низложи́ши язы́ки. 18. Изше́лъ еси́ на спасе́ніе люде́й Твои́хъ, спасти́ пома́занныя Твоя́ прише́лъ еси́.

На 14: 19. Вложи́лъ еси́ во главы́ беззако́нныхъ сме́рть, воздви́глъ еси́ у́зы да́же до вы́и въ коне́цъ. 20. Разсѣ́клъ еси́ во изступле́ніи главы́ си́льныхъ, стрясу́тся въ не́й, разве́рзутъ узды́ своя́, я́ко снѣда́яй ни́щій та́й.

[На 12:] 21. И возве́лъ еси́ на мо́ре ко́ни Твоя́, смуща́ющія во́ды мно́ги. 22. Сохрани́хся, и убоя́ся се́рдце мое́ отъ гла́са моли́твы усте́нъ мои́хъ.

[На 10:] 23. И вни́де тре́петъ въ ко́сти моя́, и во мнѣ́ смяте́ся крѣ́пость моя́. 24. Почíю въ де́нь ско́рби моея́, да взы́ду въ лю́ди прише́льствія моего́.

На 8: 25. Зане́ смо́ковь не плодопринесе́тъ, и не бу́детъ ро́да въ лоза́хъ. 26. Солже́тъ дѣ́ло ма́слинное, и поля́ не сотворя́тъ я́ди.

[На 6:] 27. Оскудѣ́ша о́вцы отъ пи́щи, и не бу́детъ воло́въ при я́слехъ. 28. Азъ же о Го́сподѣ возра́дуюся, возвеселю́ся о Бо́зѣ, Спа́сѣ мое́мъ.

На 4: 29. Госпо́дь Бо́гъ мо́й — си́ла моя́ и учини́тъ но́зѣ мои́ на соверше́ніе. 30. И на высо́кая возво́дитъ мя́, побѣди́ти ми́ въ пѣ́сни Его́.

Сла́ва [Отцу́, и Сы́ну, и Свято́му Ду́ху]. И ны́нѣ, [и при́сно, и во вѣ́ки вѣко́въ. Ами́нь].


Пѣ́снь пя́тая.
[Моли́тва Иса́іи проро́ка, глава́ 26-я.]
[Иса́іи прорече́ніе, моли́тва вя́щши: Го́споди Бо́же на́шъ, ми́ръ да́ждь на́мъ.]

1. Отъ но́щи у́тренюетъ ду́хъ мо́й къ Тебѣ́, Бо́же, зане́ свѣ́тъ повелѣ́нія Твоя́ на земли́. 2. Пра́вдѣ научи́теся, живу́щіи на земли́, преста́ бо нечести́вый, не научи́тся пра́вдѣ, на земли́ и́стины не сотвори́тъ. 3. Да во́змется нечести́вый, да не ви́дитъ сла́вы Госпо́дни. Го́споди, высока́ Твоя́ мы́шца, и не вѣ́дѣша, разумѣ́вше же, постыдя́тся.

На 14: 4. За́висть пріи́метъ лю́ди ненака́занныя, и ны́нѣ о́гнь супоста́ты поя́стъ. 5. Го́споди Бо́же на́шъ, ми́ръ да́ждь на́мъ, вся́ бо возда́лъ еси́ на́мъ.

[На 12:] 6. Го́споди Бо́же на́шъ, стяжи́ ны́, Го́споди, ра́звѣ Тебе́, ино́го не вѣ́мы, и́мя Твое́ имену́емъ. 7. Ме́ртвіи же живота́ не и́мутъ ви́дѣти, ниже́ вра́чеве воскреся́тъ.

[На 10:] 8. Сего́ ра́ди наве́лъ еси́, и погуби́лъ, и взя́лъ еси́ вся́къ му́жескъ по́лъ и́хъ. 9. Приложи́ и́мъ зла́, Го́споди, приложи́ зла́ сла́внымъ земли́.

На 8: 10. Го́споди, въ ско́рби помяну́хомъ Тя́, въ ско́рби ма́лѣ наказа́ніе Твое́ на́мъ. 11. И я́ко боля́щая приближа́ется роди́ти и въ болѣ́зни свое́й вопія́ше, та́ко бы́хомъ Возлю́бленному Твоему́.

[На 6:] 12. Стра́ха ра́ди Твоего́, Го́споди, во чре́вѣ прія́хомъ, и поболѣ́хомъ, и роди́хомъ ду́хъ спасе́нія, его́же сотвори́хомъ на земли́. 13. Не паде́мъ, но паду́тъ живу́щіи на земли́.

На 4: 14. Воскре́снутъ ме́ртвіи, и воста́нутъ, и́же во гробѣ́хъ, и возвеселя́тся, и́же на земли́. 15. Роса́ бо, я́же отъ Тебе́, исцѣле́ніе и́мъ е́сть, земля́ же нечести́выхъ паде́тъ.

Сла́ва [Отцу́, и Сы́ну, и Свято́му Ду́ху]. И ны́нѣ, [и при́сно, и во вѣ́ки вѣко́въ. Ами́нь].


Пѣ́снь шеста́я.
[Моли́тва Іо́ны проро́ка, глава́ 2-я.]
[Яко проро́ка Іо́ну спаси́ на́съ, Го́споди. Отъ звѣ́ря воззва́ Іо́на, глаго́ля:]

1. Возопи́хъ въ ско́рби мое́й ко Го́споду Бо́гу моему́, и услы́ша мя́.

[На 12:] 2. Изъ чре́ва а́дова во́пль мо́й услы́шалъ еси́, гла́съ мо́й, отве́рглъ мя́ еси́ во глубины́ се́рдца морска́го, и рѣ́ки обыдо́ша мя́. 3. Вся́ высоты́ Твоя́ и во́лны Твоя́ на мнѣ́ преидо́ша.

[На 10:] 4. И а́зъ рѣ́хъ: отри́нухся отъ о́чію Твое́ю, еда́ приложу́ призрѣ́ти ми́ къ хра́му свято́му Твоему́? 5. Возлія́ся вода́ до души́ моея́, бе́здна обы́де мя́ послѣ́дняя.

На 8: 6. Понре́ глава́ моя́ въ разсѣ́ли го́ръ, снидо́хъ въ зе́млю, ея́же вереи́ ея́ закле́пи вѣ́чніи. 7. И да взы́детъ изъ истлѣ́нія живо́тъ мо́й къ Тебѣ́, Го́споди Бо́же мо́й.

[На 6:] 8. Внегда́ скончава́тися отъ мене́ души́ мое́й, Го́спода помяну́хъ. 9. И да пріи́детъ къ Тебѣ́ моли́тва моя́, къ хра́му свято́му Твоему́.

На 4: 10. Храня́щіи су́етная и ло́жная ми́лость свою́ оста́виша. 11. Азъ же со гла́сомъ хвале́нія и исповѣ́данія пожру́ Тебѣ́: ели́ка обѣща́хъ, возда́мъ Тебѣ́ во спасе́ніе мое́, Го́сподеви.

Сла́ва [Отцу́, и Сы́ну, и Свято́му Ду́ху]. И ны́нѣ, [и при́сно, и во вѣ́ки вѣко́въ. Ами́нь].


Пѣ́снь седма́я.
[Моли́тва святы́хъ тріе́хъ о́трокъ, въ кни́гѣ Даніи́ла, глава́ 3-я.]
[Хвала́ пла́мень угаша́етъ тріе́хъ ю́ношъ: Оте́цъ и на́шъ Бо́же, благослове́нъ еси́.]

1. Благослове́нъ еси́, Го́споди Бо́же оте́цъ на́шихъ, и хва́льно и просла́влено и́мя Твое́ во вѣ́ки. 2. Яко пра́веденъ еси́ о всѣ́хъ, я́же сотвори́лъ еси́ на́мъ. 3. И вся́ дѣла́ Твоя́ и́стинна, и пра́ви путіе́ Твои́, и вси́ суди́ Твои́ и́стинни. 4. И судьбы́ и́стинны сотвори́лъ еси́ по всѣ́мъ, я́же наве́лъ еси́ на ны́, и на гра́дъ святы́й оте́цъ на́шихъ Іерусали́мъ. 5. Яко и́стиною и судо́мъ наве́лъ еси́ сія́ вся́ на ны́ грѣ́хъ ра́ди на́шихъ. 6. Яко согрѣши́хомъ и беззако́нновахомъ отступи́ти отъ Тебе́ и прегрѣши́хомъ во всѣ́хъ. 7. И за́повѣдей Твои́хъ не послу́шахомъ, ниже́ соблюдо́хомъ, ниже́ сотвори́хомъ, я́коже заповѣ́далъ еси́ на́мъ, да бла́го на́мъ бу́детъ. 8. И вся́, я́же сотвори́лъ еси́ на́мъ, и вся́, ели́ка наве́лъ еси́ на́мъ, и́стиннымъ судо́мъ сотвори́лъ еси́. 9. И пре́далъ еси́ на́съ въ ру́ки враго́въ беззако́нныхъ, ме́рзкихъ отсту́пниковъ, и царе́ви непра́ведну и лука́внѣйшу па́че всея́ земли́. 10. И ны́нѣ нѣ́сть на́мъ отве́рсти у́стъ, сту́дъ и поноше́ніе бы́хомъ рабо́мъ Твои́мъ и чту́щимъ тя́. 11. Не преда́ждь же на́съ до конца́ и́мене Твоего́ ра́ди, и не разори́ Завѣ́та Твоего́, и не отста́ви ми́лости Твоея́ отъ на́съ, Авраа́ма ра́ди, возлю́бленнаго отъ Тебе́, и за Исаа́ка, раба́ Твоего́, и Изра́иля свята́го Твоего́. 12. Имже глаго́лалъ еси́ умно́жити сѣ́мя и́хъ, я́ко звѣ́зды небе́сныя и я́ко песо́къ при краи́ мо́ря. 13. Яко, Влады́ко, ума́лихомся па́че всѣ́хъ язы́къ и есмы́ смире́ни по все́й земли́ дне́сь грѣ́хъ ра́ди на́шихъ. 14. И нѣ́сть во вре́мя сіе́ нача́льника, и проро́ка и вожда́, ниже́ всесожже́нія, ниже́ же́ртвы, ниже́ приноше́нія, ниже́ кади́ла, ни мѣ́ста, е́же пожре́ти предъ Тобо́ю и обрѣсти́ ми́лость. 15. Но душе́ю сокруше́нною и ду́хомъ смире́ннымъ да прія́ти бу́демъ. 16. Яко во всесожже́ніихъ о́внихъ и ю́нчихъ и я́ко во тма́хъ а́гнецъ ту́чныхъ, та́ко да бу́детъ же́ртва на́ша предъ Тобо́ю дне́сь и да соверши́тся по Тебѣ́, я́ко нѣ́сть студа́ упова́ющимъ на Тя́. 17. И ны́нѣ возслѣ́дуемъ всѣ́мъ се́рдцемъ, и бои́мся Тебе́, и и́щемъ лица́ Твоего́. 18. Не посрами́ на́съ, но сотвори́ съ на́ми по кро́тости Твое́й и по мно́жеству ми́лости Твоея́. 19. И изми́ на́съ по чудесе́мъ Твои́мъ, и да́ждь сла́ву и́мени Твоему́, Го́споди. 20. И да посра́мятся вси́, явля́ющіи рабо́мъ Твои́мъ зла́я, и да постыдя́тся отъ вся́кія си́лы, и крѣ́пость и́хъ да сокруши́тся. 21. И да разумѣ́ютъ, я́ко Ты́ еси́ Госпо́дь Бо́гъ Еди́нъ и сла́венъ по все́й вселе́ннѣй. 22. И не преста́ша влага́ющіи я́ слуги́ царе́вы, жгу́ще пе́щь на́фѳою, и смоло́ю, и изгре́бьми, и ро́ждіемъ.

На 14: 23. И разлива́шеся пла́мень надъ пе́щію на ла́кти четы́редесять де́вять. 24. И обы́де, и пожже́, я́же обрѣ́те о пе́щи халде́йстѣй.

[На 12:] 25. Ангелъ же Госпо́день сни́де ку́пно съ су́щими о Аза́ріи въ пе́щь. 26. И оттрясе́ пла́мень о́гненный отъ пе́щи.

[На 10:] 27. И сотвори́ сре́днее пе́щи, я́ко ду́хъ росы́ шумя́щъ, и не прикосну́ся и́хъ отню́дь о́гнь, ни оскорби́, ниже́ стужи́ и́мъ. 28. Тогда́ тріе́, я́ко еди́нѣми усты́ поя́ху, и благословля́ху, и сла́вляху Бо́га въ пещи́, глаго́люще:

На 8: 29. Благослове́нъ еси́, Го́споди Бо́же оте́цъ на́шихъ, и препѣ́тый, и превозноси́мый во вѣ́ки. 30. И благослове́но и́мя сла́вы Твоея́ свято́е, препѣ́тое и превозноси́мое во вѣ́ки.

[На 6:] 31. Благослове́нъ еси́ въ хра́мѣ святы́я сла́вы Твоея́, препѣ́тый и превозноси́мый во вѣ́ки. 32. Благослове́нъ еси́, ви́дяй бе́здны, сѣдя́й на херуви́мѣхъ, препѣ́тый и превозноси́мый во вѣ́ки.

На 4: 33. Благослове́нъ еси́ на престо́лѣ сла́вы Ца́рствія Твоего́, препѣ́тый и превозноси́мый во вѣ́ки. 34. Благослове́нъ еси́ на тве́рди небе́снѣй, препѣ́тый и превозноси́мый во вѣ́ки.

Сла́ва [Отцу́, и Сы́ну, и Свято́му Ду́ху]. И ны́нѣ, [и при́сно, и во вѣ́ки вѣко́въ. Ами́нь].


Пѣ́снь осма́я.
[Пѣ́ніе святы́хъ тріе́хъ о́трокъ, въ кни́гѣ Даніи́ла, глава́ 3-я.]
[Влады́ку воспо́й естество́: Го́спода по́йте дѣла́ и превозноси́те во вся́ вѣ́ки.]

1. Благослови́те, вся́ дѣла́ Госпо́дня, Го́спода, по́йте и превозноси́те Его́ во вѣ́ки. 2. Благослови́те, а́нгели Госпо́дни, небеса́ Госпо́дня, Го́спода, по́йте и превозноси́те Его́ во вѣ́ки. 3. Благослови́те, во́ды вся́, я́же превы́ше небе́съ, вся́ си́лы Госпо́дни, Го́спода, по́йте и превозноси́те Его́ во вѣ́ки. 4. Благослови́те, со́лнце и мѣ́сяцъ, звѣ́зды небе́сныя Го́спода, по́йте и превозноси́те Его́ во вѣ́ки. 5. Благослови́те, вся́къ до́ждь и роса́, вси́ ду́си, Го́спода, по́йте и превозноси́те Его́ во вѣ́ки.

На 14: 6. Благослови́те, о́гнь и ва́ръ, сту́дъ и зно́й, Го́спода, по́йте и превозноси́те Его́ во вѣ́ки. 7. Благослови́те, ро́сы и и́ней, ле́ди и мра́зъ, Го́спода, по́йте и превозноси́те Его́ во вѣ́ки.

[На 12:] 8. Благослови́те, сла́ны и снѣ́зи, но́щи и днíе, Го́спода, по́йте и превозноси́те Его́ во вѣ́ки. 9. Благослови́те, свѣ́тъ и тма́, мо́лнія и о́блацы, Го́спода, по́йте и превозноси́те Его́ во вѣ́ки.

[На 10:] 10. Благослови́те, земля́, го́ры и хо́лми и вся́, прозяба́ющая на не́й, Го́спода, по́йте и превозноси́те Его́ во вѣ́ки. 11. Благослови́те, исто́чницы, моря́ и рѣ́ки, ки́ти и вся́, дви́жущаяся въ вода́хъ, Го́спода, по́йте и превозноси́те Его́ во вѣ́ки.

На 8: 12. Благослови́те, вся́ пти́цы небе́сныя, звѣ́ріе и вси́ ско́ти, Го́спода, по́йте и превозноси́те Его́ во вѣ́ки. 13. Благослови́те, сы́нове человѣ́честіи, да благослови́тъ Изра́иль Го́спода, по́йте и превозноси́те Его́ во вѣ́ки.

[На 6:] 14. Благослови́те, свяще́нницы Госпо́дни, раби́ Госпо́дни, Го́спода, по́йте и превозноси́те Его́ во вѣ́ки. 15. Благослови́те, ду́си и ду́ши пра́ведныхъ, преподо́бніи и смире́нніи се́рдцемъ, Го́спода, по́йте и превозноси́те Его́ во вѣ́ки.

На 4: 16. Благослови́те, Ана́нія, Аза́рія, Мисаи́лъ, Го́спода, по́йте и превозноси́те Его́ во вѣ́ки. 17. Благослови́те, апо́столи, проро́цы и му́ченицы Госпо́дни, Го́спода, по́йте и превозноси́те Его́ во вѣ́ки.

[На 2:] 18. Благослови́мъ Отца́, и Сы́на, и Свята́го Ду́ха, Го́спода. 19. [И] ны́нѣ, и при́сно, и во вѣ́ки вѣко́въ, ами́нь.

[Та́же:] Хва́лимъ, благослови́мъ, покланя́емся Го́сподеви, пою́ще и превознося́ще во вся́ вѣ́ки.


Пѣ́снь девя́тая.
[Пѣ́снь Богоро́дицы, отъ Луки́ свята́го Ева́нгелія, зача́ло 4-е.]
[Сы́на пое́тъ и Бо́га Ма́терь Отрокови́ца. Богоро́дицу въ пѣ́снехъ велича́емъ.]

1. Вели́читъ душа́ Моя́ Го́спода, и возра́довася ду́хъ Мо́й о Бо́зѣ, Спа́сѣ Мое́мъ. 2. Яко призрѣ́ на смире́ніе Рабы́ Своея́, се́ бо отъ ны́нѣ ублажа́тъ Мя́ вси́ ро́ди. 3. Яко сотвори́ Мнѣ́ вели́чіе Си́льный, и свя́то и́мя Его́, и ми́лость Его́ въ ро́ды родо́въ боя́щимся Его́. 4. Сотвори́ держа́ву мы́шцею Свое́ю, расточи́ го́рдыя мы́слію се́рдца и́хъ. 5. Низложи́ си́льныя со престо́лъ и вознесе́ смире́нныя, а́лчущія испо́лни бла́гъ и богатя́щіяся отпусти́ тщи́. 6. Воспрія́тъ Изра́иля, о́трока Своего́, помяну́ти ми́лости, я́коже глаго́ла ко отце́мъ на́шимъ, Авраа́му и сѣ́мени его́, да́же до вѣ́ка.

[Моли́тва Заха́ріи, отца́ Предте́чева, отъ Луки́ свята́го Ева́нгелія, зача́ло 4-е.]
[Заха́рія благословля́етъ отроча́те рожде́ніе.]

1. Благослове́нъ Госпо́дь, Бо́гъ Изра́илевъ, я́ко посѣти́ и сотвори́ избавле́ніе лю́демъ Свои́мъ.

[На 12:] 2. И воздви́же ро́гъ спасе́нія на́мъ въ дому́ Дави́довѣ, о́трока Своего́. 3. Якоже глаго́ла усты́ святы́хъ, су́щихъ отъ вѣ́ка проро́къ Его́.

[На 10:] 4. Спасе́ніе отъ вра́гъ на́шихъ и изъ руки́ всѣ́хъ, ненави́дящихъ на́съ. 5. Сотвори́ти ми́лость со отцы́ на́шими и помяну́ти Завѣ́тъ святы́й Сво́й.

На 8: 6. Кля́тву, е́юже кля́тся ко Авраа́му, отцу́ на́шему, да́ти на́мъ безъ стра́ха, изъ руки́ вра́гъ на́шихъ изба́вльшимся. 7. Служи́ти Ему́ преподо́біемъ и пра́вдою предъ Ни́мъ вся́ дни́ живота́ на́шего.

[На 6:] 8. И ты́, отроча́, проро́къ Вы́шняго нарече́шися, преды́деши бо предъ лице́мъ Госпо́днимъ угото́вати пути́ Его́. 9. Да́ти ра́зумъ спасе́нія лю́демъ Его́ во оставле́ніе грѣ́хъ и́хъ милосе́рдія ра́ди ми́лости Бо́га на́шего.

На 4: 10. Въ ни́хже посѣти́ на́съ Восто́къ съ высоты́, яви́тися во тмѣ́ и сѣ́ни сме́ртнѣй сѣдя́щимъ. 11. Напра́вити но́ги на́ша на пу́ть ми́ренъ.

Сла́ва [Отцу́, и Сы́ну, и Свято́му Ду́ху]. И ны́нѣ, [и при́сно, и во вѣ́ки вѣко́въ. Ами́нь].

Источникъ: Ирмоло́гій. — Поча́евъ: Въ Тѵпогра́фіи Поча́евскія Успе́нскія Ла́ѵры, 1875. — С. 264 – 287.

/ Къ оглавленію раздѣла /


Наверхъ / Къ титульной страницѣ

0