Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 18 ноября 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

ИРМОЛОГІЙ.

Пѣ́сни Свяще́ннаго Писа́нія пра́здничныя.

[Пѣ́снь пе́рвая.]

Въ недѣ́лю у́бо по возгла́сѣ свяще́нника: Ми́лостію и щедро́тами.., начина́емъ ирмо́съ кано́на. Глаго́лемъ же и еди́нъ тропа́рь безъ стиха́, глаго́люще: Сла́ва, Го́споди, свято́му Воскресе́нію Твоему́.

Аще же Влады́чній пра́здникъ или́ пра́зднуемаго свята́го е́сть, глаго́лемъ ирмо́съ два́жды.

Та́же начина́етъ пе́рвый ли́къ сти́хъ пѣ́сни:

[На 12:] Пое́мъ Го́сподеви, сла́вно бо просла́вися: коня́ и вса́дника ве́рже въ мо́ре. И тропа́рь.

Та́же вторы́й ли́къ:

Помо́щникъ и Покрови́тель бы́сть мнѣ́ во спасе́ніе: Се́й мо́й Бо́гъ, и просла́влю Его́, Бо́гъ отца́ моего́, и вознесу́ Его́. И тропа́рь.

[На 10:] Госпо́дь, сокруша́яй бра́ни, Госпо́дь и́мя Ему́, колесни́цы фарао́новы и си́лу его́ ве́рже въ мо́ре.

Пучи́ною покры́ я́, погрязо́ша во глубинѣ́, я́ко ка́мень.

На 8: Тогда́ потща́шася влады́ки Едо́мстіи, и князе́й Моави́тскихъ прія́тъ я́ тре́петъ, раста́яша вси́, живу́щіи въ Ханаа́нѣ.

Нападе́тъ на ня́ стра́хъ и тре́петъ, вели́чіемъ мы́шцы Твоея́ да ока́менятся.

На 6: До́ндеже про́йдутъ лю́діе Твои́, Го́споди, до́ндеже про́йдутъ лю́діе Твои́ сíи, я́же стяжа́лъ еси́.

Содѣ́лалъ еси́, Го́споди, святы́ню, ю́же угото́вастѣ ру́цѣ Твои́.

На 4: Госпо́дь, ца́рствуяй вѣ́ки, и на вѣ́къ, и еще́, егда́ вни́де ко́нь фарао́новъ съ колесни́цами и вса́дники въ мо́ре.

Сы́нове же Изра́илевы проидо́ша су́шею посредѣ́ мо́ря.

Сла́ва Отцу́, и Сы́ну, и Свято́му Ду́ху.

И ны́нѣ, и при́сно, и во вѣ́ки вѣко́въ. Ами́нь.

И катава́сія по ко́ейждо пѣ́сни.



Пѣ́снь тре́тія.

[На 12:] Утверди́ся се́рдце мое́ въ Го́сподѣ, вознесе́ся ро́гъ мо́й о Бо́зѣ мое́мъ, разшири́шася уста́ моя́ на враги́ моя́, возвесели́хся о спасе́ніи Твое́мъ.

Яко нѣ́сть свя́тъ, я́ко Госпо́дь, и нѣ́сть пра́веденъ, я́ко Бо́гъ на́шъ, и нѣ́сть свя́тъ, па́че Тебе́.

[На 10:] Не хвали́теся и не глаго́лите высо́кая въ горды́ни, ниже́ да изы́детъ велерѣ́чіе изъ у́стъ ва́шихъ.

Яко Бо́гъ ра́зумовъ Госпо́дь, и Бо́гъ, уготовля́яй начина́нія Своя́.

На 8: Дая́й моли́тву моля́щемуся и благослови́ лѣ́та пра́веднаго.

Госпо́дь не́мощна сотвори́ супоста́та Его́, Госпо́дь Свя́тъ.

На 6: Да не хва́лится прему́дрый прему́дростію свое́ю, и да не хва́лится си́льный си́лою свое́ю, и да не хва́лится бога́тый бога́тствомъ свои́мъ.

Но о се́мъ да хва́лится хваля́йся, е́же разумѣ́ти и зна́ти Го́спода и твори́ти су́дъ и пра́вду посредѣ́ земли́.

На 4: Госпо́дь взы́де на небеса́ и возгремѣ́, То́й су́дитъ конце́мъ земли́, пра́веденъ Сы́й.

И да́стъ крѣ́пость царю́ на́шему, и вознесе́тъ ро́гъ христа́ Своего́.

Сла́ва [Отцу́, и Сы́ну, и Свято́му Ду́ху].

И ны́нѣ, [и при́сно, и во вѣ́ки вѣко́въ. Ами́нь].

Катава́сія. И ектенія́.



Пѣ́снь четве́ртая.

[На 12:] Го́споди, услы́шахъ слу́хъ Тво́й и убоя́хся, Го́споди, разумѣ́хъ дѣла́ Твоя́ и ужасо́хся.

Внегда́ смути́тися души́ мое́й во гнѣ́вѣ, ми́лость Твою́ помяне́ши.

[На 10:] Бо́гъ отъ ю́га пріи́детъ, и Святы́й изъ горы́ пріосѣне́нныя ча́щи.

Покры́ небеса́ добродѣ́тель Его́, и хвалы́ Его́ испо́лнь земля́.

На 8: Зане́ смо́квь не плодопринесе́тъ, и не бу́детъ ро́да въ лоза́хъ.

Солже́тъ дѣ́ло ма́слинное, и поля́ не сотворя́тъ я́ди.

На 6: Оскудѣ́ша о́вцы отъ пи́щи, и не бу́детъ воло́въ при я́слехъ.

Азъ же о Го́сподѣ возра́дуюся, возвеселю́ся о Бо́зѣ, Спа́сѣ мое́мъ.

На 4: Госпо́дь Бо́гъ мо́й — си́ла моя́ и учини́тъ но́зѣ мои́ на соверше́ніе.

И на высо́кая возво́дитъ мя́, побѣди́ти ми́ въ пѣ́сни Его́.

Сла́ва [Отцу́, и Сы́ну, и Свято́му Ду́ху].

И ны́нѣ, [и при́сно, и во вѣ́ки вѣко́въ. Ами́нь].

Катава́сія.



Пѣ́снь пя́тая.

[На 12:] Отъ но́щи у́тренюетъ ду́хъ мо́й къ Тебѣ́, Бо́же, зане́ свѣ́тъ повелѣ́нія Твоя́ на земли́.

Пра́вдѣ научи́теся, живу́щіи на земли́.

[На 10:] Да во́змется нечести́вый, да не ви́дитъ сла́вы Госпо́дни. Го́споди, высока́ Твоя́ мы́шца, и не вѣ́дѣша, разумѣ́вше же, постыдя́тся.

За́висть пріи́метъ лю́ди ненака́занныя, и ны́нѣ о́гнь супоста́ты поя́стъ.

На 8: Приложи́ и́мъ зла́, Го́споди, приложи́ зла́ сла́внымъ земли́.

Го́споди, въ ско́рби помяну́хомъ Тя́, въ ско́рби ма́лѣ наказа́ніе Твое́ на́мъ.

На 6: И я́ко боля́щая приближа́ется роди́ти и въ болѣ́зни свое́й вопія́ше, та́ко бы́хомъ Возлю́бленному Твоему́.

Не паде́мъ, но паду́тъ живу́щіи на земли́.

На 4: Воскре́снутъ ме́ртвіи, и воста́нутъ, и́же во гробѣ́хъ, и возвеселя́тся, и́же на земли́.

Роса́ бо, я́же отъ Тебе́, исцѣле́ніе и́мъ е́сть, земля́ же нечести́выхъ паде́тъ.

Сла́ва [Отцу́, и Сы́ну, и Свято́му Ду́ху].

И ны́нѣ, [и при́сно, и во вѣ́ки вѣко́въ. Ами́нь].

Катава́сія.



Пѣ́снь шеста́я.

[На 12:] Возопи́хъ въ ско́рби мое́й ко Го́споду Бо́гу моему́, и услы́ша мя́.

Отве́рглъ мя́ еси́ во глубины́ се́рдца морска́го, и рѣ́ки обыдо́ша мя́.

[На 10:] Вся́ высоты́ Твоя́ и во́лны Твоя́ на мнѣ́ преидо́ша.

Еда́ приложу́ призрѣ́ти ми́ къ хра́му свято́му Твоему́?

На 8: Возлія́ся вода́ до души́ моея́, бе́здна обы́де мя́ послѣ́дняя.

Понре́ глава́ моя́ въ разсѣ́ли го́ръ, снидо́хъ въ зе́млю, ея́же вереи́ ея́ закле́пи вѣ́чніи.

На 6: И да взы́детъ изъ истлѣ́нія живо́тъ мо́й къ Тебѣ́, Го́споди Бо́же мо́й.

И да пріи́детъ къ Тебѣ́ моли́тва моя́, къ хра́му свято́му Твоему́.

На 4: Храня́щіи су́етная и ло́жная ми́лость свою́ оста́виша.

Ели́ка обѣща́хъ, возда́мъ Тебѣ́ во спасе́ніе мое́, Го́сподеви.

Сла́ва [Отцу́, и Сы́ну, и Свято́му Ду́ху].

И ны́нѣ, [и при́сно, и во вѣ́ки вѣко́въ. Ами́нь].

Катава́сія. И ектенія́.



Пѣ́снь седма́я.

[На 12:] Благослове́нъ еси́, Го́споди Бо́же оте́цъ на́шихъ, и хва́льно и просла́влено и́мя Твое́ во вѣ́ки.

И вся́ дѣла́ Твоя́ и́стинна, и пра́ви путіе́ Твои́.

[На 10:] И вси́ суди́ Твои́ и́стинни, и судьбы́ и́стинны сотвори́лъ еси́.

И на гра́дъ святы́й оте́цъ на́шихъ Іерусали́мъ.

На 8: Благослове́нъ еси́, Го́споди Бо́же оте́цъ на́шихъ, и препѣ́тый, и превозноси́мый во вѣ́ки.

И благослове́но и́мя сла́вы Твоея́ свято́е, препѣ́тое и превозноси́мое во вѣ́ки.

На 6: Благослове́нъ еси́ въ хра́мѣ святы́я сла́вы Твоея́, препѣ́тый и превозноси́мый во вѣ́ки.

Благослове́нъ еси́, ви́дяй бе́здны, сѣдя́й на херуви́мѣхъ, препѣ́тый и превозноси́мый во вѣ́ки.

На 4: Благослове́нъ еси́ на престо́лѣ сла́вы Ца́рствія Твоего́, препѣ́тый и превозноси́мый во вѣ́ки.

Благослове́нъ еси́ на тве́рди небе́снѣй, препѣ́тый и превозноси́мый во вѣ́ки.

Сла́ва [Отцу́, и Сы́ну, и Свято́му Ду́ху].

И ны́нѣ, [и при́сно, и во вѣ́ки вѣко́въ. Ами́нь].

Катава́сія.



Пѣ́снь осма́я.

[На 12:] Благослови́те, вся́ дѣла́ Госпо́дня, Го́спода, по́йте и превозноси́те Его́ во вѣ́ки.

Благослови́те, а́нгели Госпо́дни, небеса́ Госпо́дня, Го́спода, по́йте и превозноси́те Его́ во вѣ́ки.

[На 10:] Благослови́те, во́ды вся́, я́же превы́ше небе́съ, вся́ си́лы Госпо́дни, Го́спода, по́йте и превозноси́те Его́ во вѣ́ки.

Благослови́те, со́лнце и мѣ́сяцъ, звѣ́зды небе́сныя Го́спода, по́йте и превозноси́те Его́ во вѣ́ки.

На 8: Благослови́те, вся́ пти́цы небе́сныя, звѣ́ріе и вси́ ско́ти, Го́спода, по́йте и превозноси́те Его́ во вѣ́ки.

Благослови́те, сы́нове человѣ́честіи, да благослови́тъ Изра́иль Го́спода, по́йте и превозноси́те Его́ во вѣ́ки.

На 6: Благослови́те, свяще́нницы Госпо́дни, раби́ Госпо́дни, Го́спода, по́йте и превозноси́те Его́ во вѣ́ки.

Благослови́те, ду́си и ду́ши пра́ведныхъ, преподо́бніи и смире́нніи се́рдцемъ, Го́спода, по́йте и превозноси́те Его́ во вѣ́ки.

На 4: Благослови́те, Ана́нія, Аза́рія, Мисаи́лъ, Го́спода, по́йте и превозноси́те Его́ во вѣ́ки.

Благослови́те, апо́столи, проро́цы и му́ченицы Госпо́дни, Го́спода, по́йте и превозноси́те Его́ во вѣ́ки.

Благослови́мъ Отца́, и Сы́на, и Свята́го Ду́ха, Го́спода.

И ны́нѣ, и при́сно, и во вѣ́ки вѣко́въ, ами́нь.

Та́же глаго́лемъ: Хва́лимъ, благослови́мъ, покланя́емся Го́сподеви, пою́ще и превознося́ще во вся́ вѣ́ки.

Покло́нъ и катава́сія.



[Пѣ́снь девя́тая.]
Пѣ́снь Пресвяты́я Богоро́дицы:

Вели́читъ душа́ Моя́ Го́спода, и возра́довася ду́хъ Мо́й о Бо́зѣ, Спа́сѣ Мое́мъ.

Яко призрѣ́ на смире́ніе Рабы́ Своея́, се́ бо отъ ны́нѣ ублажа́тъ Мя́ вси́ ро́ди.

Яко сотвори́ Мнѣ́ вели́чіе Си́льный, и свя́то и́мя Его́, и ми́лость Его́ въ ро́ды родо́въ боя́щимся Его́.

Сотвори́ держа́ву мы́шцею Свое́ю, расточи́ го́рдыя мы́слію се́рдца и́хъ.

Низложи́ си́льныя со престо́лъ и вознесе́ смире́нныя, а́лчущія испо́лни бла́гъ и богатя́щіяся отпусти́ тщи́.

Воспрія́тъ Изра́иля, о́трока Своего́, помяну́ти ми́лости, я́коже глаго́ла ко отце́мъ на́шимъ, Авраа́му и сѣ́мени его́, да́же до вѣ́ка.

Пѣ́снь свята́го проро́ка Заха́ріи, отца́ Предте́чева:

[На 12:] Благослове́нъ Госпо́дь, Бо́гъ Изра́илевъ, я́ко посѣти́ и сотвори́ избавле́ніе лю́демъ Свои́мъ.

И воздви́же ро́гъ спасе́нія на́мъ въ дому́ Дави́довѣ, о́трока Своего́.

[На 10:] Якоже глаго́ла усты́ святы́хъ, су́щихъ отъ вѣ́ка проро́къ Его́, спасе́ніе отъ вра́гъ на́шихъ и изъ руки́ всѣ́хъ, ненави́дящихъ на́съ.

Сотвори́ти ми́лость со отцы́ на́шими и помяну́ти Завѣ́тъ святы́й Сво́й.

На 8: Кля́тву, е́юже кля́тся ко Авраа́му, отцу́ на́шему, да́ти на́мъ безъ стра́ха, изъ руки́ вра́гъ на́шихъ изба́вльшимся.

Служи́ти Ему́ преподо́біемъ и пра́вдою предъ Ни́мъ вся́ дни́ живота́ на́шего.

На 6: И ты́, отроча́, проро́къ Вы́шняго нарече́шися, преды́деши бо предъ лице́мъ Госпо́днимъ угото́вати пути́ Его́.

Да́ти ра́зумъ спасе́нія лю́демъ Его́ во оставле́ніе грѣ́хъ и́хъ милосе́рдія ра́ди ми́лости Бо́га на́шего.

На 4: Въ ни́хже посѣти́ на́съ Восто́къ съ высоты́, яви́тися во тмѣ́ и сѣ́ни сме́ртнѣй сѣдя́щимъ.

Напра́вити но́ги на́ша на пу́ть ми́ренъ.

Сла́ва [Отцу́, и Сы́ну, и Свято́му Ду́ху].

И ны́нѣ, [и при́сно, и во вѣ́ки вѣко́въ. Ами́нь].

Катава́сія [и] ектенія́, зане́ въ сицевы́я дни́ Досто́йно... не пое́тся. Та́же ексапостила́рій.

Источникъ: Ирмоло́гій. — Поча́евъ: Въ Тѵпогра́фіи Поча́евскія Успе́нскія Ла́ѵры, 1875. — С. 253 – 263.

/ Къ оглавленію раздѣла /


Наверхъ / Къ титульной страницѣ

0