Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 29 iюня 2017 г. Сейчасъ на порталѣ посѣтителей - 22.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЧАСОСЛОВЪ

ЧАСОСЛОВЪ.

Нача́ло полу́нощницы.

Свяще́нникъ глаго́летъ: Благослове́нъ Бо́гъ на́шъ...
И мы́: Сла́ва Тебѣ́, Бо́же на́шъ, сла́ва Тебѣ́.

Царю́ Небе́сный, Утѣ́шителю, Ду́ше и́стины, И́же вездѣ́ сы́й и вся́ исполня́яй, Сокро́вище благи́хъ и жи́зни Пода́телю, пріиди́ и всели́ся въ ны́, и очи́сти ны́ отъ вся́кія скве́рны, и спаси́, Бла́же, ду́ши на́ша.

Святы́й Бо́же, Святы́й Крѣ́пкій, Святы́й Безсме́ртный, поми́луй на́съ. [Три́жды, и покло́ны три.]

Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ. Ами́нь.

Пресвята́я Тро́ице, поми́луй на́съ: Го́споди, очи́сти грѣхи́ на́ша; Влады́ко, прости́ беззако́нія на́ша; Святы́й, посѣти́ и исцѣли́ не́мощи на́ша, и́мене Твоего́ ра́ди.

Го́споди поми́луй. [Три́жды.] Сла́ва, и ны́нѣ.

О́тче на́шъ, И́же еси́ на небесѣ́хъ! Да святи́тся и́мя Твое́, да пріи́детъ Ца́рствіе Твое́, да бу́детъ во́ля Твоя́, я́ко на небеси́ и на земли́. Хлѣ́бъ на́шъ насу́щный да́ждь на́мъ дне́сь; и оста́ви на́мъ до́лги на́ша, я́коже и мы́ оставля́емъ должнико́мъ на́шимъ; и не введи́ на́съ во искуше́ніе, но изба́ви на́съ отъ лука́ваго.

Свяще́нникъ: Я́ко Твое́ е́сть Ца́рство...
Та́же, Го́споди поми́луй. [12.] Сла́ва, и ны́нѣ.

Пріиди́те, поклони́мся Царе́ви на́шему Бо́гу. [Покло́нъ.]

Пріиди́те, поклони́мся и припаде́мъ Христу́, Царе́ви на́шему Бо́гу. [Покло́нъ.]

Пріиди́те, поклони́мся и припаде́мъ самому́ Христу́, Царе́ви и Бо́гу на́шему. [Покло́нъ.]

И а́біе псало́мъ 50:

Поми́луй мя́, Бо́же, по вели́цѣй ми́лости Твое́й, и по мно́жеству щедро́тъ Твои́хъ очи́сти беззако́ніе мое́. Наипа́че омы́й мя отъ беззако́нія моего́, и отъ грѣха́ моего́ очи́сти мя. Я́ко беззако́ніе мое́ а́зъ зна́ю и грѣ́хъ мо́й предо мно́ю е́сть вы́ну. Тебѣ́ Еди́ному согрѣши́хъ, и лука́вое предъ Тобо́ю сотвори́хъ, я́ко да оправди́шися во словесѣ́хъ Твои́хъ и побѣди́ши, внегда́ суди́ти Ти́. Се́ бо въ беззако́ніихъ зача́тъ е́смь, и во грѣсѣ́хъ роди́ мя́ ма́ти моя́. Се́ бо и́стину возлюби́лъ еси́, безвѣ́стная и та́йная прему́дрости Твоея́ яви́лъ ми́ еси́. Окропи́ши мя́ иссо́помъ, и очи́щуся, омы́еши мя́, и па́че снѣ́га убѣлю́ся. Слу́ху моему́ да́си ра́дость и весе́ліе, возра́дуются ко́сти смире́нныя. Отврати́ лице́ Твое́ отъ грѣ́хъ мои́хъ, и вся́ беззако́нія моя́ очи́сти. Се́рдце чи́сто сози́жди во мнѣ́, Бо́же, и ду́хъ пра́въ обнови́ во утро́бѣ мое́й. Не отве́ржи мене́ отъ лица́ Твоего́, и Ду́ха Твоего́ Свята́го не отъими́ отъ мене́. Возда́ждь ми́ ра́дость спасе́нія Твоего́, и Ду́хомъ Влады́чнимъ утверди́ мя́. Научу́ беззако́нныя путе́мъ Твои́мъ, и нечести́віи къ Тебѣ́ обратя́тся. Изба́ви мя́ отъ крове́й, Бо́же, Бо́же спасе́нія моего́, возра́дуется язы́къ мо́й пра́вдѣ Твое́й. Го́споди, устнѣ́ мои́ отве́рзеши, и уста́ моя́ возвѣстя́тъ хвалу́ Твою́. Я́ко а́ще бы восхотѣ́лъ еси́ же́ртвы, да́лъ бы́хъ убо́, всесожже́нія не благоволи́ши. Же́ртва Бо́гу ду́хъ сокруше́нъ, се́рдце сокруше́нно и смире́нно Бо́гъ не уничижи́тъ. Ублажи́, Го́споди, благоволе́ніемъ Твои́мъ Сіо́на, и да сози́ждутся стѣ́ны Іерусали́мскія. Тогда́ благоволи́ши же́ртву пра́вды, возноше́ніе и всесожега́емая: тогда́ возложа́тъ на олта́рь Тво́й тельцы́.

Та́же, каѳи́сма 17-я.

[Блаже́ни непоро́чніи въ пу́ть, ходя́щіи въ зако́нѣ Госпо́дни. Блаже́ни испыта́ющіи свидѣ́нія Его́, всѣ́мъ се́рдцемъ взы́щутъ Его́. Не дѣ́лающіи бо беззако́нія въ путе́хъ Его́ ходи́ша. Ты́ заповѣ́далъ еси́ за́повѣди Твоя́ сохрани́ти зѣло́. Дабы́ испра́вилися путіе́ мои́, сохрани́ти оправда́нія Твоя́. Тогда́ не постыжу́ся, внегда́ призрѣ́ти ми́ на вся́ за́повѣди Твоя́. Исповѣ́мся Тебѣ́ въ пра́вости се́рдца, внегда́ научи́ти ми ся судьба́мъ пра́вды Твоея́. Оправда́нія Твоя́ сохраню́, не оста́ви мене́ до зѣла́. Въ чесо́мъ испра́витъ юнѣ́йшій пу́ть сво́й? внегда́ сохрани́ти словеса́ Твоя́. Всѣ́мъ се́рдцемъ мои́мъ взыска́хъ Тебе́, не отри́ни мене́ отъ за́повѣдей Твои́хъ. Въ се́рдцѣ мое́мъ скры́хъ словеса́ Твоя́, я́ко да не согрѣшу́ Тебѣ́. Благослове́нъ еси́, Го́споди, научи́ мя оправда́ніемъ Твои́мъ. Устна́ма мои́ма возвѣсти́хъ вся́ судьбы́ у́стъ Твои́хъ. На пути́ свидѣ́ній Твои́хъ наслади́хся, я́ко о вся́комъ бога́тствѣ. Въ за́повѣдехъ Твои́хъ поглумлю́ся и уразумѣ́ю пути́ Твоя́. Во оправда́ніихъ Твои́хъ поучу́ся, не забу́ду слове́съ Твои́хъ. Возда́ждь рабу́ Твоему́, живи́ мя, и сохраню́ словеса́ Твоя́. Откры́й о́чи мои́, и уразумѣ́ю чудеса́ отъ зако́на Твоего́. Пришле́цъ а́зъ е́смь на земли́, не скры́й отъ мене́ за́повѣди Твоя́. Возлюби́ душа́ моя́ возжела́ти судьбы́ Твоя́ на вся́кое вре́мя. Запрети́лъ еси́ го́рдымъ, про́кляти уклоня́ющіися отъ за́повѣдей Твои́хъ. Отыми́ отъ мене́ поно́съ и уничиже́ніе, я́ко свидѣ́ній Твои́хъ взыска́хъ. Ибо сѣдо́ша кня́зи и на мя́ клевета́ху, ра́бъ же Тво́й глумля́шеся во оправда́ніихъ Твои́хъ. Ибо свидѣ́нія Твоя́ поуче́ніе мое́ е́сть, и совѣ́ти мои́ оправда́нія Твоя́. Прильпе́ земли́ душа́ моя́, живи́ мя по словеси́ Твоему́. Пути́ моя́ возвѣсти́хъ, и услы́шалъ мя́ еси́, научи́ мя оправда́ніемъ Твои́мъ. Пу́ть оправда́ній Твои́хъ вразуми́ ми, и поглумлю́ся въ чудесѣ́хъ Твои́хъ. Воздрема́ душа́ моя́ отъ уны́нія, утверди́ мя въ словесѣ́хъ Твои́хъ. Пу́ть непра́вды отста́ви отъ мене́ и зако́номъ Твои́мъ поми́луй мя́. Пу́ть и́стины изво́лихъ и судьбы́ Твоя́ не забы́хъ. Прилѣпи́хся свидѣ́ніемъ Твои́мъ, Го́споди, не посрами́ мене́. Пу́ть за́повѣдей Твои́хъ теко́хъ, егда́ разшири́лъ еси́ се́рдце мое́. Законоположи́ мнѣ́, Го́споди, пу́ть оправда́ній Твои́хъ, и взыщу́ и́ вы́ну. Вразуми́ мя, и испыта́ю зако́нъ Тво́й и сохраню́ и́ всѣ́мъ се́рдцемъ мои́мъ. Наста́ви мя́ на стезю́ за́повѣдей Твои́хъ, я́ко ту́ю восхотѣ́хъ. Приклони́ се́рдце мое́ во свидѣ́нія Твоя́, а не въ лихои́мство. Отврати́ о́чи мои́, е́же не ви́дѣти суеты́, въ пути́ Твое́мъ живи́ мя. Поста́ви рабу́ Твоему́ сло́во Твое́ въ стра́хъ Тво́й. Отыми́ поноше́ніе мое́, е́же непщева́хъ, я́ко судьбы́ Твоя́ бла́ги. Се́, возжела́хъ за́повѣди Твоя́, въ пра́вдѣ Твое́й живи́ мя. И да пріи́детъ на мя́ ми́лость Твоя́, Го́споди, спасе́ніе Твое́ по словеси́ Твоему́. И отвѣща́ю поноша́ющимъ ми́ сло́во, я́ко упова́хъ на словеса́ Твоя́. И не отыми́ отъ у́стъ мои́хъ словесе́ и́стинна до зѣла́, я́ко на судьбы́ Твоя́ упова́хъ. И сохраню́ зако́нъ Тво́й вы́ну, въ вѣ́къ и въ вѣ́къ вѣ́ка. И хожда́хъ въ широтѣ́, я́ко за́повѣди Твоя́ взыска́хъ. И глаго́лахъ о свидѣ́ніихъ Твои́хъ предъ цари́, и не стыдя́хся. И поуча́хся въ за́повѣдехъ Твои́хъ, я́же возлюби́хъ зѣло́. И воздвиго́хъ ру́цѣ мои́ къ за́повѣдемъ Твои́мъ, я́же возлюби́хъ, и глумля́хся во оправда́ніихъ Твои́хъ. Помяни́ словеса́ Твоя́ рабу́ Твоему́, и́хже упова́ніе да́лъ ми́ еси́. То́ мя утѣ́ши во смире́ніи мое́мъ, я́ко сло́во Твое́ живи́ мя. Го́рдіи законопреступова́ху до зѣла́, отъ зако́на же Твоего́ не уклони́хся. Помяну́хъ судьбы́ Твоя́ отъ вѣ́ка, Го́споди, и утѣ́шихся. Печа́ль прія́тъ мя́ отъ грѣ́шникъ, оставля́ющихъ зако́нъ Тво́й. Пѣ́та бя́ху мнѣ́ оправда́нія Твоя́ на мѣ́стѣ прише́льствія моего́. Помяну́хъ въ нощи́ и́мя Твое́, Го́споди, и сохрани́хъ зако́нъ Тво́й. Се́й бы́сть мнѣ́, я́ко оправда́ній Твои́хъ взыска́хъ. Ча́сть моя́ еси́, Го́споди, рѣ́хъ сохрани́ти зако́нъ Тво́й. Помоли́хся лицу́ Твоему́ всѣ́мъ се́рдцемъ мои́мъ, поми́луй мя́ по словеси́ Твоему́. Помы́слихъ пути́ Твоя́ и возврати́хъ но́зѣ мои́ во свидѣ́нія Твоя́. Угото́вихся и не смути́хся, сохрани́ти за́повѣди Твоя́. Ужа грѣ́шникъ обяза́шася мнѣ́, и зако́на Твоего́ не забы́хъ. Полу́нощи воста́хъ исповѣ́датися Тебѣ́ о судьба́хъ пра́вды Твоея́. Прича́стникъ а́зъ е́смь всѣ́мъ боя́щимся Тебе́ и храня́щимъ за́повѣди Твоя́. Ми́лости Твоея́, Го́споди, испо́лнь земля́, оправда́ніемъ Твои́мъ научи́ мя. Бла́гость сотвори́лъ еси́ съ рабо́мъ Твои́мъ, Го́споди, по словеси́ Твоему́. Бла́гости, и наказа́нію, и ра́зуму научи́ мя, я́ко за́повѣдемъ Твои́мъ вѣ́ровахъ. Пре́жде да́же не смири́ти ми ся, а́зъ прегрѣши́хъ, сего́ ра́ди сло́во Твое́ сохрани́хъ. Бла́гъ еси́ Ты́, Го́споди, и бла́гостію Твое́ю научи́ мя оправда́ніемъ Твои́мъ. Умно́жися на мя́ непра́вда го́рдыхъ, а́зъ же всѣ́мъ се́рдцемъ мои́мъ испыта́ю за́повѣди Твоя́. Усыри́ся, я́ко млеко́, се́рдце и́хъ, а́зъ же зако́ну Твоему́ поучи́хся. Бла́го мнѣ́, я́ко смири́лъ мя́ еси́, я́ко да научу́ся оправда́ніемъ Твои́мъ. Бла́гъ мнѣ́ зако́нъ у́стъ Твои́хъ, па́че ты́сящъ зла́та и сребра́.

Сла́ва, и ны́нѣ.
Аллилу́ія, аллилу́ія, аллилу́ія, сла́ва Тебѣ́, Бо́же. [Три́жды, и покло́ны три.]
Господи помилуй. [Три́жды.]

Ру́цѣ Твои́ сотвори́стѣ мя́ и созда́етѣ мя́: вразуми́ мя, и научу́ся за́повѣдемъ Твоимъ. Боя́щіися Тебе́ у́зрятъ мя́ и возвеселя́тся, я́ко на словеса́ Твоя́ упова́хъ. Разумѣ́хъ, Го́споди, я́ко пра́вда судьбы́ Твоя́, и вои́стинну смири́лъ мя́ еси́. Бу́ди же ми́лость Твоя́, да утѣ́шитъ мя́, по словеси́ Твоему́ рабу́ Твоему́. Да пріи́дутъ мнѣ́ щедро́ты Твоя́, и жи́въ бу́ду, я́ко зако́нъ Тво́й поуче́ніе мое́ е́сть. Да постыдя́тся го́рдіи, я́ко непра́ведно беззако́нноваша на мя́, а́зъ же поглумлю́ся въ за́повѣдехъ Твои́хъ. Да обратя́тъ мя боя́щіися Тебе́ и вѣ́дящіи свидѣ́нія Твоя́. Бу́ди се́рдце мое́ непоро́чно во оправда́ніяхъ Твои́хъ, я́ко да не постыжу́ся. Исчеза́етъ во спасе́ніе Твое́ душа́ моя́, на словеса́ Твоя́ упова́хъ. Исчезо́ша о́чи мои́ въ сло́во Твое́, глаго́люще: когда́ утѣ́шиши мя́? Зане́ бы́хъ я́ко мѣ́хъ на сла́нѣ, оправда́ній Твои́хъ не забы́хъ. Коли́ко е́сть дне́й раба́ Твоего́? когда́ сотвори́ши ми́ отъ гоня́щихъ мя́ су́дъ? Повѣ́даша мнѣ́ законопресту́пницы глумле́нія, но не я́ко зако́нъ Тво́й, Го́споди. Вся́ за́повѣди Твоя́ и́стина, непра́ведно погна́ша мя́, помози́ ми́. Въ ма́лѣ не сконча́ша мене́ на земли́, а́зъ же не оста́вихъ за́повѣдей Твои́хъ. По ми́лости Твое́й живи́ мя, и сохраню́ свидѣ́нія у́стъ Твои́хъ. Во вѣ́къ, Го́споди, сло́во Твое́ пребыва́етъ на небеси́. Въ ро́дъ и ро́дъ и́стина Твоя́: основа́лъ еси́ зе́млю, и пребыва́етъ. Учине́ніемъ Твои́мъ пребыва́етъ де́нь, я́ко вся́ческая рабо́тна Тебѣ́. Яко а́ще бы не зако́нъ Тво́й поуче́ніе мое́ бы́лъ, тогда́ у́бо поги́блъ бы́хъ во смире́ніи мое́мъ. Во вѣ́къ не забу́ду оправда́ній Твои́хъ, я́ко въ ни́хъ оживи́лъ мя́ еси́. Тво́й е́смь а́зъ, спаси́ мя́, я́ко оправда́ній Твои́хъ взыска́хъ. Мене́ жда́ша грѣ́шницы погуби́ти мя́, свидѣ́нія Твоя́ разумѣ́хъ. Вся́кія кончи́ны ви́дѣхъ коне́цъ, широка́ за́повѣдь Твоя́ зѣло́. Ко́ль возлюби́хъ зако́нъ Тво́й, Го́споди, ве́сь де́нь поуче́ніе мое́ е́сть. Па́че вра́гъ мои́хъ умудри́лъ мя́ еси́ за́повѣдію Твое́ю, я́ко въ вѣ́къ моя́ е́сть. Па́че всѣ́хъ уча́щихъ мя́ разумѣ́хъ, я́ко свидѣ́нія Твоя́ поуче́ніе мое́ е́сть. Па́че ста́рецъ разумѣ́хъ, я́ко за́повѣди Твоя́ взыска́хъ. Отъ вся́каго пути́ лука́ва возбрани́хъ нога́мъ мои́мъ, я́ко да сохраню́ словеса́ Твоя́. Отъ суде́бъ Твои́хъ не уклони́хся, я́ко Ты́ законоположи́лъ ми́ еси́. Ко́ль сладка́ горта́ни моему́ словеса́ Твоя́, па́че ме́да усто́мъ мои́мъ. Отъ за́повѣдей Твои́хъ разумѣ́хъ, сего́ ра́ди возненави́дѣхъ вся́къ пу́ть непра́вды. Свѣти́льникъ нога́ма мои́ма зако́нъ Тво́й и свѣ́тъ стезя́мъ мои́мъ. Кля́хся и поста́вихъ сохрани́ти судьбы́ пра́вды Твоея́. Смири́хся до зѣла́, Го́споди, живи́ мя по словеси́ Твоему́. Во́льная у́стъ мои́хъ благоволи́ же, Го́споди, и судьба́мъ Твои́мъ научи́ мя. Душа́ моя́ въ руку́ Твое́ю вы́ну, и зако́на Твоего́ не забы́хъ. Положи́ша грѣ́шницы сѣ́ть мнѣ́, и отъ за́повѣдей Твои́хъ не заблуди́хъ. Наслѣ́довахъ свидѣ́нія Твоя́ во вѣ́къ, я́ко ра́дованіе се́рдца моего́ су́ть. Приклони́хъ се́рдце мое́ сотвори́ти оправда́нія Твоя́ въ вѣ́къ за воздая́ніе. Законопресту́пныя возненави́дѣхъ, зако́нъ же Тво́й возлюби́хъ. Помо́щникъ мо́й и Засту́пникъ мо́й еси́ Ты́, на словеса́ Твоя́ упова́хъ. Уклони́теся отъ мене́, лука́внующіи, и испыта́ю за́повѣди Бо́га моего́. Заступи́ мя по словеси́ Твоему́, и жи́въ бу́ду, и не посрами́ мене́ отъ ча́янія моего́. Помози́ ми и спасу́ся, и поучу́ся во оправда́ніихъ Твои́хъ вы́ну. Уничижи́лъ еси́ вся́ отступа́ющіи отъ оправда́ній Твои́хъ, я́ко непра́ведно помышле́ніе и́хъ. Преступа́ющіи непщева́хъ вся́ грѣ́шныя земли́, сего́ ра́ди возлюби́хъ свидѣ́нія Твоя́. Пригвозди́ стра́ху Твоему́ пло́ти моя́, отъ суде́бъ бо Твои́хъ убоя́хся. Сотвори́хъ су́дъ и пра́вду, не преда́ждь мене́ оби́дящимъ мя́. Воспріими́ раба́ Твоего́ во бла́го, да не оклевета́ютъ мене́ го́рдіи. Очи мои́ исчезо́стѣ во спасе́ніе Твое́ и въ сло́во пра́вды Твоея́. Сотвори́ съ рабо́мъ Твои́мъ по ми́лости Твое́й и оправда́ніемъ Твои́мъ научи́ мя́. Ра́бъ Тво́й е́смь а́зъ, вразуми́ мя, и увѣ́мъ свидѣ́нія Твоя́. Вре́мя сотвори́ти Го́сподеви, разори́ша зако́нъ Тво́й. Сего́ ра́ди возлюби́хъ за́повѣди Твоя́ па́че зла́та и топа́зія. Сего́ ра́ди ко всѣ́мъ за́повѣдемъ Твои́мъ направля́хся, вся́къ пу́ть непра́вды возненави́дѣхъ. Ди́вна свидѣ́нія Твоя́, сего́ ра́ди испыта́ я́ душа́ моя́. Явле́ніе слове́съ Твои́хъ просвѣща́етъ и вразумля́етъ младе́нцы. Уста́ моя́ отверзо́хъ и привлеко́хъ ду́хъ, я́ко за́повѣдей Твои́хъ жела́хъ.

Сла́ва, и ны́нѣ.
Аллилу́ія, аллилу́ія, аллилу́ія, сла́ва Тебѣ́, Бо́же. [Три́жды, и покло́ны три.]
Господи помилуй. [Три́жды.]

При́зри на мя́ и поми́луй мя́, по суду́ лю́бящихъ и́мя Твое́. Стопы́ моя́ напра́ви по словеси́ Твоему́, и да не облада́етъ мно́ю вся́кое беззако́ніе. Изба́ви мя́ отъ клеветы́ человѣ́ческія, и сохраню́ за́повѣди Твоя́. Лице́ Твое́ просвѣти́ на раба́ Твоего́ и научи́ мя оправда́ніемъ Твои́мъ. Исхо́дища водна́я изведо́стѣ о́чи мои́, поне́же не сохрани́хъ зако́на Твоего́. Пра́веденъ еси́, Го́споди, и пра́ви суди́ Твои́. Заповѣ́далъ еси́ пра́вду, свидѣ́нія Твоя́, и и́стину зѣло́. Иста́яла мя́ е́сть ре́вность Твоя́, я́ко забы́ша словеса́ Твоя́ врази́ мои́. Разжже́но сло́во Твое́ зѣло́, и ра́бъ Тво́й возлюби́ е́. Юнѣ́йшій а́зъ е́смь и уничиже́нъ, оправда́ній Твои́хъ не забы́хъ. Пра́вда Твоя́ пра́вда во вѣ́къ, и зако́нъ Тво́й и́стина. Ско́рби и ну́жды обрѣто́ша мя́, за́повѣди Твоя́ поуче́ніе мое́. Пра́вда свидѣ́нія Твоя́ въ вѣ́къ, вразуми́ мя, и жи́въ бу́ду. Воззва́хъ всѣ́мъ се́рдцемъ мои́мъ, услы́ши мя́, Го́споди, оправда́нія Твоя́ взыщу́. Воззва́хъ Ти́, спаси́мя, и сохраню́ свидѣ́нія Твоя́. Предвари́хъ въ безго́діи и воззва́хъ, на словеса́ Твоя́ упова́хъ. Предвари́стѣ о́чи мои́ ко у́тру, поучи́тися словесе́мъ Твои́мъ. Гла́съ мо́й услы́ши, Го́споди, по ми́лости Твое́й, по судьбѣ́ Твое́й живи́ мя. Прибли́жишася гоня́щіи мя́ беззако́ніемъ, отъ зако́на же Твоего́ удали́шася. Бли́зъ еси́ Ты́, Го́споди, и вси́ путіе́ Твои́ и́стина. Испе́рва позна́хъ отъ свидѣ́ній Твои́хъ, я́ко въ вѣ́къ основа́лъ я́ еси́. Ви́ждь смире́ніе мое́ и изми́ мя, я́ко зако́на Твоего́ не забы́хъ. Суди́ су́дъ мо́й и изба́ви мя́, словесе́ ра́ди Твоего́ живи́ мя. Дале́че отъ грѣ́шникъ спасе́ніе, я́ко оправда́ній Твои́хъ не взыска́ша. Щедро́ты Твоя́ мно́ги, Го́споди, по судьбѣ́ Твое́й живи́ мя. Мно́зи изгоня́щіи мя́ и стужа́ющіи ми́, отъ свидѣ́ній Твои́хъ не уклони́хся. Ви́дѣхъ неразумѣва́ющія и иста́яхъ, я́ко слове́съ Твои́хъ не сохрани́ша. Ви́ждь, я́ко за́повѣди Твоя́ возлюби́хъ, Го́споди, по ми́лости Твоей́ живи́ мя. Нача́ло слове́съ Твои́хъ и́стина, и во вѣ́къ вся́ судьбы́ пра́вды Твоея́. Кня́зи погна́ша мя́ ту́не, и отъ слове́съ Твои́хъ убоя́ся се́рдце мое́. Возра́дуюся а́зъ о словесѣ́хъ Твои́хъ, я́ко обрѣта́яй коры́сть мно́гу. Непра́вду возненави́дѣхъ и омерзи́хъ, зако́нъ же Тво́й возлюби́хъ. Седмери́цею дне́мъ хвали́хъ Тя́ о судьба́хъ пра́вды Твоея́. Ми́ръ мно́гъ лю́бящимъ зако́нъ Тво́й, и нѣ́сть и́мъ собла́зна. Ча́яхъ спасе́нія Твоего́, Го́споди, и за́повѣди Твоя́ возлюби́хъ. Сохрани́ душа́ моя́ свидѣ́нія Твоя́ и возлюби́ я́ зѣло́. Сохрани́хъ за́повѣди Твоя́ и свидѣ́нія Твоя́, я́ко вси́ путіе́ мои́ предъ Тобо́ю, Го́споди. Да прибли́жится моле́ніе мое́ предъ Тя́, Го́споди, по словеси́ Твоему́ вразуми́ мя. Да вни́детъ проше́ніе мое́ предъ Тя́, Го́споди, по словеси́ Твоему́ изба́ви мя́. Отры́гнутъ устнѣ́ мои́ пѣ́ніе, егда́ научи́ши мя́ оправда́ніемъ Твои́мъ. Провѣща́етъ язы́къ мо́й словеса́ Твоя́, я́ко вся́ за́повѣди Твоя́ пра́вда. Да бу́детъ рука́ Твоя́, е́же спасти́ мя́, я́ко за́повѣди Твоя́ изво́лихъ. Возжела́хъ спасе́ніе Твое́, Го́споди, и зако́нъ Тво́й поуче́ніе мое́ е́сть. Жива́ бу́детъ душа́ моя́ и восхва́литъ Тя́, и судьбы́ Твоя́ помо́гутъ мнѣ́. Заблуди́хъ, я́ко овча́ поги́бшее, взыщи́ раба́ Твоего́, я́ко за́повѣдей Твои́хъ не забы́хъ.

Сла́ва, и ны́нѣ. [Бе́зъ аллилу́іи.] ]

И а́біе:

Вѣ́рую во еди́наго Бо́га Отца́, Вседержи́теля, Творца́ не́бу и земли́, ви́димымъ же всѣ́мъ и неви́димымъ. И во еди́наго Го́спода Іису́са Христа́, Сы́на Бо́жія, Единоро́днаго, И́же отъ Отца́ рожде́ннаго пре́жде всѣ́хъ вѣ́къ; Свѣ́та отъ Свѣ́та, Бо́га и́стинна отъ Бо́га и́стинна, рожде́нна, не сотворе́нна, единосу́щна Отцу́, И́мже вся́ бы́ша. На́съ ра́ди человѣ́къ и на́шего ра́ди спасе́нія сше́дшаго съ небе́съ и воплоти́вшагося отъ Ду́ха Свя́та и Марíи Дѣ́вы, и вочеловѣ́чшася. Распя́таго же за ны́ при Понтíйстѣмъ Пила́тѣ, и страда́вша, и погребе́на. И воскре́сшаго въ тре́тій де́нь по Писа́ніемъ. И возше́дшаго на небеса́, и сѣдя́ща одесну́ю Отца́. И па́ки гряду́щаго со сла́вою суди́ти живы́мъ и ме́ртвымъ, Его́же Ца́рствію не бу́детъ конца́.

Втора́го Собо́ра: И въ Ду́ха Свята́го, Го́спода, Животворя́щаго, И́же отъ Отца́ исходя́щаго, Иже со Отце́мъ и Сы́номъ спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Исповѣ́дую еди́но креще́ніе во оставле́ніе грѣхо́въ. Ча́ю воскресе́нія ме́ртвыхъ, и жи́зни бу́дущаго вѣ́ка, ами́нь.

Трисвято́е. [Покло́ны три]. Пресвята́я Тро́ице... О́тче на́шъ...
И а́біе свяще́нникъ возглаша́етъ: Я́ко Твое́ е́сть Ца́рство...

Та́же тропари́ сія́, во гла́съ 8:

Се́ Жени́хъ гряде́тъ въ полу́нощи, и блаже́нъ ра́бъ, его́же обря́щетъ бдя́ща; недосто́инъ же па́ки, его́же обря́щетъ уныва́юща. Блюди́ у́бо, душе́ моя́, не сно́мъ отяготи́ся, да не сме́рти предана́ бу́деши, и Ца́рствія внѣ́ затвори́шися; но воспряни́ зову́щи: Свя́тъ, Свя́тъ, Свя́тъ еси́ Бо́же, Богоро́дицею поми́луй на́съ.

Сла́ва: Де́нь о́нъ стра́шный помышля́ющи душе́ моя́, побди́ вжига́ющи свѣщу́ твою́, еле́емъ просвѣща́ющи: не вѣ́си бо когда́ пріи́детъ къ тебѣ́ гла́съ глаго́лющій: се́ Жени́хъ. Блюди́ у́бо душе́ моя́, да не воздре́млеши, и пребу́деши внѣ́ толку́щи я́ко пя́ть дѣ́въ, но бо́дренно пожди́, да усря́щеши Христа́ еле́емъ масти́тымъ, и да́стъ ти́ черто́гъ Боже́ственный сла́вы Своея́.

И ны́нѣ, Бо́горо́диченъ: Тебе́ необори́мую стѣ́ну, спасе́ія утвержде́ніе, Богоро́дице Дѣ́во, мо́лимъ: сопроти́вныхъ совѣ́ты разори́, люде́й твои́хъ печа́ль на ра́дость преложи́, гра́дъ тво́й огради́, Импера́тору спобори́, о ми́рѣ мíра моли́, я́ко ты́ еси́, Богоро́дице, упова́ніе на́ше.

Та́же, Го́споди поми́луй, [40.]
И моли́тву сію́:

Иже на вся́кое вре́мя, и на вся́кій ча́съ, на Небеси́ и на земли́, покланя́емый и сла́вимый Христе́ Бо́же, долготерпѣли́ве, многоми́лостиве, многоблагоутро́бне, И́же пра́ведныя любя́й, и грѣ́шныя ми́луяй, И́же вся́ зовы́й ко спасе́нію обѣща́нія ра́ди бу́дущихъ бла́гъ. Са́мъ Го́споди, пріими́ и на́ша въ ча́съ се́й моли́твы и испра́ви живо́тъ на́шъ къ за́повѣдемъ Твои́мъ, ду́ши на́ша освяти́, тѣлеса́ очи́сти, помышле́нія испра́ви, мы́сли очи́сти, и изба́ви на́съ отъ вся́кія ско́рби, зо́лъ и болѣ́зней; огради́ на́съ святы́ми Твои́ми А́нгелы, да ополче́ніемъ и́хъ соблюда́еми и наставля́еми, дости́гнемъ въ соедине́ніе вѣ́ры, и въ ра́зумъ непристу́пныя Твоея́ сла́вы, я́ко благослове́нъ еси́ во вѣ́ки вѣко́въ, ами́нь.

Го́споди поми́луй. [Три́жды.] Сла́ва, и ны́нѣ.

Честнѣ́йшую Херуви́мъ, и сла́внѣйшую безъ сравне́нія Серафи́мъ, безъ истлѣ́нія Бо́га Сло́ва ро́ждшую, су́щую Богоро́дицу Тя́ велича́емъ. [Покло́нъ.]

Именемъ Госпо́днимъ благослови́, о́тче.

Свяще́нникъ: Бо́же уще́дри ны́, и благослови́ ны, просвѣти́ лице́ Твое́ на ны́, и поми́луй ны́.

Зри: И а́ще е́сть аллилу́ія, твори́мъ покло́ны три́ вели́кія, глаго́люще моли́тву сію́ та́йно свята́го Ефре́ма, раздѣля́юще ю́ въ три́ ча́сти:

Го́споди и Влады́ко живота́ моего́, ду́хъ пра́здности, уны́нія, любонача́лія и праздносло́вія не да́ждь ми́. [Покло́нъ.]

Ду́хъ же цѣлому́дрія, смиреному́дрія, терпѣ́нія и любве́, да́руй ми́ рабу́ твоему́. [Покло́нъ.]

Е́й, Го́споди, Царю́, да́руй ми́ зрѣ́ти моя́ прегрѣше́нія, и не осужда́ти бра́та моего́, я́ко благослове́нъ еси́ во вѣ́ки вѣко́въ. [Покло́нъ.]

Та́же ма́лыхъ 12, глаго́люще на кíйждо покло́нъ: Бо́же, очи́сти мя́ грѣ́шнаго.

И па́ки послѣди́ моли́тву всю́: Го́споди и Влады́ко живота́ моего́... [И покло́нъ еди́нъ вели́кій.]

Та́же моли́тву сію́:

Влады́ко Бо́же О́тче Вседержи́телю, Го́споди Сы́не Единоро́дный Іису́се Христе́, и Святы́й Ду́ше, еди́но Бо́жество́, еди́на си́ла, поми́луй мя́ грѣ́шнаго, и и́миже вѣ́си судьба́ми, спаси́ мя недосто́йнаго раба́ Твоего́, я́ко благослове́нъ еси́ во вѣ́ки вѣко́въ, ами́нь.

А́ще же нѣ́сть аллилу́ія, оставля́ется:

Го́споди и Влады́ко живота́ моего́... и покло́ны, и глаго́лемъ то́кмо: Влады́ко Бо́же О́тче Вседержи́телю...

И моли́твы сія́.

Зри: Подоба́етъ вѣ́дати, я́ко моли́твы сія́ глаго́лются отъ 22-го Септе́мврія мѣ́сяца, до недѣ́ли Ва́ій.

Васíлія Вели́каго:

Го́споди Вседержи́телю, Бо́же си́лъ и вся́кія пло́ти, въ вы́шнихъ живы́й и на смире́нная призира́яй, сердца́ же и утро́бы испыту́яй и сокрове́нная человѣ́ковъ я́вѣ предвѣ́дый, Безнача́льный и Присносу́щный Свѣ́те, у Него́ же нѣ́сть премѣне́нія, или́ преложе́нія осѣне́ніе; Са́мъ, Безсме́ртный Царю́, пріими́ моле́нія на́ша, я́же въ настоя́щее вре́мя, на мно́жество Твои́хъ щедро́тъ дерза́юще, отъ скве́рныхъ къ Тебѣ́ усте́нъ твори́мъ, и оста́ви на́мъ прегрѣше́нія на́ша, я́же дѣ́ломъ, и сло́вомъ, и мы́слію, вѣ́дѣніемъ, или́ невѣ́дѣніемъ согрѣше́ная на́ми; и очи́сти ны́ отъ вся́кія скве́рны пло́ти и ду́ха. И да́руй на́мъ бо́дреннымъ се́рдцемъ и тре́звенною мы́слію всю́ настоя́щаго житія́ но́щь прейти́, ожида́ющимъ прише́ствія свѣ́тлаго и явле́ннаго дне́ Единоро́днаго Твоего́ Сы́на, Го́спода и Бо́га и Спа́са на́шего Іису́са Христа́, въ о́ньже со сла́вою Судія́ всѣ́хъ пріи́детъ, кому́ждо отда́ти по дѣло́мъ его́; да не па́дше и облѣни́вшеся, но бо́дрствующе и воздви́жени въ дѣ́ланіи обря́щемся гото́ви, въ ра́дость и Боже́ственный черто́гъ сла́вы Его́ совни́демъ, идѣ́же пра́зднующихъ гла́съ непреста́нный, и неизрече́нная сла́дость зря́щихъ Твоего́ лица́ добро́ту неизрече́нную. Ты́ бо еси́ и́стинный Свѣ́тъ, просвѣща́яй и освяща́яй вся́ческая, и Тя́ пое́тъ вся́ тва́рь во вѣ́ки вѣко́въ, ами́нь.

Та́же возвыша́етъ свяще́нникъ ру́цѣ, глаго́ля того́жде:

Тя́ благослови́мъ, вы́шній Бо́же и Го́споди ми́лости, творя́щаго при́сно съ на́ми вели́кая же и неизслѣ́дованная, сла́вная же и ужа́сная, и́хже нѣ́сть числа́, пода́вшаго на́мъ со́нъ во упокое́ніе не́мощи на́шея, и ослабле́ніе трудо́въ многотру́дныя пло́ти. Благодари́мъ Тя́, я́ко не погуби́лъ еси́ на́съ со беззако́ньми на́шими, но человѣколю́бствовалъ еси́ обы́чно, и въ неча́яніи лежа́щія ны́ воздви́глъ еси́, во е́же славосло́вити держа́ву Твою́. Тѣ́мже мо́лимъ безмѣ́рную Твою́ бла́гость, просвѣти́ на́ша мы́сли, очеса́, и у́мъ на́шъ отъ тя́жкаго сна́ лѣ́ности возста́ви: отве́рзи на́ша уста́, и испо́лни я́ Твоего́ хвале́нія, я́ко да возмо́жемъ непоколе́блемо пѣ́ти же и исповѣ́датися Тебѣ́ во всѣ́хъ, и отъ всѣ́хъ сла́вимому Бо́гу, Безнача́льному Отцу́, со Единоро́днымъ Твои́мъ Сы́номъ, и Всесвяты́мъ и благи́мъ и животворя́щимъ Твои́мъ Ду́хомъ, ны́нѣ и при́сно, и во вѣ́ки вѣко́въ, ами́нь.

Та́же, Пріиди́те, поклони́мся... [Три́жды, и покло́ны три́]
И псалмы́:

Возведо́хъ о́чи мои́ въ го́ры, отню́дуже пріи́детъ по́мощь моя́. По́мощь моя́ отъ Го́спода, сотво́ршаго не́бо и зе́млю. Не да́ждь во смяте́ніе ноги́ твоея́, ниже́ воздре́млетъ храня́й тя́, се́, не воздре́млетъ, ниже́ у́снетъ храня́й Изра́иля. Госпо́дь сохрани́тъ тя́, Госпо́дь покро́въ тво́й на руку́ десну́ю твою́. Во дни́ со́лнце не ожже́тъ тебе́, ниже́ луна́ но́щію. Госпо́дь сохрани́тъ Тя́ отъ вся́каго зла́, сохрани́тъ ду́шу твою́ Госпо́дь. Госпо́дь сохрани́тъ вхожде́ніе твое́ и исхожде́ніе твое́, отъ ны́нѣ и до вѣ́ка.

Се́, ны́нѣ благослови́те Го́спода, вси́ раби́ Госпо́дни, стоя́щіи въ хра́мѣ Госпо́дни, во дво́рѣхъ до́му Бо́га на́шего. Въ но́щехъ воздѣжи́те ру́ки ва́ша во свята́я, и благослови́те Го́спода. Благослови́тъ тя́ Госпо́дь отъ Сіо́на, сотвори́вый не́бо и зе́млю.

Сла́ва, и ны́нѣ.
Трисвято́е. [Покло́ны три.] Пресвята́я Тро́ице... О́тче на́шъ...
[Свяще́нникъ:] Я́ко Твое́ е́сть Ца́рство...

И тропари́ сія́, гла́съ 2:

Помяни́, Го́споди, я́ко Бла́гъ, рабы́ Твоя́, и ели́ка въ житіи́ согрѣши́ша, прости́; никто́же бо безгрѣ́шенъ, то́кмо Ты́, могíй и преста́вленнымъ да́ти поко́й.

Глубино́ю му́дрости человѣколю́бно вся́ стро́яй и́ поле́зное всѣ́мъ подава́яй, Еди́не Содѣ́телю, упоко́й, Го́споди, ду́шы ра́бъ Твои́хъ: на Тя́ бо упова́ніе возложи́ша, Творца́ и Зижди́теля и Бо́га на́шего.

Сла́ва, конда́къ: Со святы́ми упоко́й, Христе́, ду́ши ра́бъ Твои́хъ, идѣ́же нѣ́сть болѣ́знь, ни печа́ль, ни воздыха́ніе, но жи́знь безконе́чная.

И ны́нѣ, бо́горо́диченъ: Блажи́мъ Тя́ вси́ ро́ди, Богоро́дице Дѣ́во, въ Тя́ бо невмѣсти́мый Христо́съ Бо́гъ на́шъ, вмѣсти́тися благоволи́. Блаже́ни есмы́ и мы́, Предста́тельство Тя́ иму́ще: де́нь бо и но́щь мо́лишися о на́съ, и ски́птры ца́рствія Твои́ми моли́твами утвержда́ются. Тѣ́мъ воспѣва́юще вопіе́мъ Ти́: ра́дуйся, Благода́тная, Госпо́дь съ Тобо́ю.

Го́споди поми́луй. [12.]
И моли́тва сія́:

Помяни́ Го́споди, въ наде́жди воскресе́нія, жи́зни вѣ́чныя, усо́пшія отцы́ и бра́тію на́шу, и вся́ во благоче́стіи и вѣ́рѣ сконча́вшіяся, и прости́ и́мъ вся́кое согрѣше́ніе, во́льное же и нево́льное, сло́вомъ, или́ дѣ́ломъ, или́ помышле́ніемъ согрѣше́нное и́ми, и всели́ я́ въ мѣ́ста свѣ́тла, въ мѣ́ста прохла́дна, въ мѣ́ста поко́йна, отню́дуже отбѣже́ вся́кая болѣ́знь, печа́ль и воздыха́ніе, идѣ́же присѣща́етъ свѣ́тъ лица́ Твоего́, весели́тъ вся́ и́же отъ вѣ́ка святы́я Твоя́. Да́руй и́мъ и на́мъ Ца́рствіе Твое́ и прича́стіе неизрече́нныхъ и вѣ́чныхъ Твои́хъ бла́гъ, и Твоея́ безконе́чныя и блаже́нныя жи́зни наслажде́ніе. Ты́ бо еси́ жи́знь, и воскресе́ніе, и поко́й усо́пшихъ рабо́въ Твои́хъ, Христе́ Бо́же на́шъ, и Тебѣ́ сла́ву возсыла́емъ, со Безнача́льнымъ Твои́мъ Отце́мъ, и Пресвяты́мъ и благи́мъ и животворя́щимъ Твои́мъ Ду́хомъ, ны́нѣ и при́сно, и во вѣ́ки вѣко́въ, ами́нь.

Пресла́вная Приснодѣ́во, Ма́ти Христа́ Бо́га, принеси́ на́шу моли́тву Сы́ну Твоему́ и Бо́гу на́шему, да спасе́тъ Тобо́ю ду́ши на́ша.

Упова́ніе мое́ Оте́цъ, прибѣ́жище мое́ Сы́нъ, покро́въ мо́й Ду́хъ Святы́й: Тро́ице Свята́я, сла́ва Тебѣ́.

Сла́ва, и ны́нѣ. Го́споди поми́луй. [Три́жды.] Благослови́.
И свяще́нникъ: Христо́съ и́стинный Бо́гъ...
И быва́етъ отпу́стъ. И пріе́млемъ проще́ніе обы́чное.
Свяще́нникъ глаго́летъ:

Помо́лимся о Благочести́вѣйшемъ, Самодержа́внѣйшемъ, Вели́комъ Госуда́рѣ на́шемъ Импера́торѣ [и́мярекъ], всея́ Россíи.

И мы́: Го́споди поми́луй. [Ча́сто.]

О Супру́гѣ Его́, Благочести́вѣйшей Госуда́рынѣ, Императри́цѣ [и́мярекъ].

О Наслѣ́дникѣ Его́, Благовѣ́рномъ Госуда́рѣ, Цесаре́вичѣ и Вели́комъ Кня́зѣ [и́мярекъ] и о все́мъ ца́рствующемъ До́мѣ.

О Святѣ́йшемъ Прави́тельствующемъ Сѵно́дѣ. О благопоспѣше́ніи и укрѣпле́ніи христолюби́ваго во́инства. О отцѣ́ на́шемъ [и́мярекъ], и все́й во Христѣ́ бра́тіи на́шей. О ненави́дящихъ и лю́бящихъ на́съ. О ми́лующихъ и служа́щихъ на́мъ. О заповѣ́давшихъ на́мъ недосто́йнымъ моли́тися о ни́хъ. О избавле́ніи плѣне́нныхъ. О отше́дшихъ отцѣ́хъ и бра́тіяхъ на́шихъ. О въ мо́ри пла́вающихъ. О въ не́мощехъ лежа́щихъ. Помо́лимся и о изоби́ліи плодо́въ земны́хъ. И о вся́кой души́ христіа́нъ правосла́вныхъ. Ублажи́мъ благочести́выя цари́. Правосла́вныя архіере́и, и кти́торы святы́я оби́тели сея́ [или: свята́го хра́ма сего́]. Роди́тели на́ша, и вся́ пре́жде отше́дшыя отцы́ и бра́тію на́шу, здѣ́ лежа́щія и повсю́ду правосла́вныя.

Предстоя́тель: Рце́мъ и о ни́хъ [или́ съ греч.: о себѣ́ самѣ́хъ].
[Ликъ:] Го́споди поми́луй. [Три́жды.]

Моли́твами святы́хъ оте́цъ на́шихъ, Го́споди Іису́се Христе́, Бо́же на́шъ, поми́луй на́съ, ами́нь.

Вонми́, я́ко си́це до́лжно пѣ́тися во всю́ седми́цу полу́нощницѣ.


Зри: Подоба́етъ вѣ́дати, я́ко во святѣ́й горѣ́ Аѳо́нстѣй, по Помяни́ Го́споди... глаго́лютъ настоя́щія тропари́:

Поми́луй на́съ, Го́споди, поми́луй на́съ; вся́каго бо отвѣ́та недоумѣ́юще, сію́ Ти́ моли́тву я́ко Влады́цѣ грѣ́шніи прино́симъ: поми́луй на́съ.

Сла́ва: Го́споди, поми́луй на́съ, на Тя́ бо упова́хомъ; не прогнѣ́вайся на ны́ зѣло́, ниже́ помяни́ беззако́ній на́шихъ, но при́зри и ны́нѣ я́ко благоутро́бенъ, и изба́ви ны́ отъ вра́гъ на́шихъ; Ты́ бо еси́ Бо́гъ на́шъ, и мы́ лю́діе Твои́, вси́ дѣла́ руку́ Твое́ю, и и́мя Твое́ призыва́емъ.

И ны́нѣ: Милоcе́рдія две́ри отве́рзи на́мъ, благослове́нная Богоро́дице, надѣ́ющіися на Тя́ да не поги́бнемъ, но да изба́вимся Тобо́ю отъ бѣ́дъ: Ты́ бо еси́ спасе́іе ро́да христіа́нскаго.

И свяще́нникъ ектенію́:

Поми́луй на́съ, Бо́же...

Еще́ мо́лимся, о е́же сохрани́тися гра́ду сему́, и святѣ́й оби́тели се́й [или́: свято́му хра́му сему́]. И про́чая.

Го́споди поми́луй. [40.]

Возгла́съ: Услы́ши ны́, Бо́же... Посе́мъ: Сла́ва, и ны́нѣ, и отпу́стъ, и про́чая я́ко предпи́сана су́ть.

Источникъ: Часословъ. — М.: Сѵнодальная тѵпографія, 1896. — Л. 14-24 об.

/ Къ оглавленію раздѣла /


Наверхъ / Къ титульной страницѣ

0