Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 22 сентября 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕЯ ОБЩАЯ.

Слу́жба о́бщая преподо́бнымъ Пече́рскимъ, двѣма́ или́ мно́гимъ.

НА ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры [на 6], гла́съ 2. Подо́бенъ: Кíими похва́льными вѣнцы́.

Кíими пѣ́сненными пѣ́ніи* похва́лимъ богоно́сныхъ оте́цъ на́шихъ [и́мярекъ],* превели́кихъ добродѣ́телей ревни́телей,* за́повѣдей Бо́жіихъ* соверше́ннѣйшихъ послу́шателей и храни́телей?* Ихже ра́ди улучи́вше* небе́сная селе́нія,* хода́тайствуютъ спасти́ся* душа́мъ на́шимъ. [Два́жды.]

Кíими сладкогла́сными хвале́ніи* воспое́мъ богому́дрыхъ оте́цъ на́шихъ [и́мярекъ],* нетлѣ́нными тѣлесы́ свои́ми* съ на́ми спребыва́ющихъ,* душа́ми же торжеству́ющихъ* въ селе́ніихъ Святы́я Тро́ицы,* отъ Нея́же то́чатъ благода́ть врачева́нія* душа́мъ на́шимъ. [Два́жды.]

Сла́ва, гла́съ 6:

Кто́ вы́ досто́йно ублажи́тъ, богоно́сныя отцы́, или́ кто́ по достоя́нію воспое́тъ по́двиги и труды́ ва́ша? Обложе́ни бо су́ще ме́ртвенною пло́тію, безпло́тнымъ а́нгеломъ уподо́бистеся, вы́ну бо славосло́вите Го́спода псалмы́ и пѣ́ніи непреста́нными. Тѣ́мже, пресели́вшеся ко престо́лу Бо́жія сла́вы, идѣ́же гла́съ чи́стъ пра́зднующихъ, не преста́йте прося́ще душа́мъ на́шимъ ми́ръ и ве́лію ми́лость.

И ны́нѣ, гла́съ то́йже, богоро́диченъ догма́тикъ:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Та́же вхо́дъ. Проки́менъ дне́ и чте́нія преподо́бнымъ, три́.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры, гла́съ 6. Подо́бенъ: Тридне́венъ.

Пріиди́те, о празднолю́бцы,* возвели́чимъ богоно́сныя отцы́,* Це́ркве сла́вная украше́нія,* лико́въ и́ночествующихъ похвалу́,* мíру христіа́нскому удобре́ніе* и на́мъ, вѣ́рнымъ, спасе́ніе.

Сти́хъ: Ра́дуйтеся, пра́ведніи, о Го́сподѣ,* пра́вымъ подоба́етъ похвала́.

Лику́етъ дне́сь Пече́рская оби́тель,* стяжа́вшая до́брыя гра́жданы [и́мярекъ],* отцы́ достоблаже́нныя,* весели́тся и пеще́ра,* храня́щая мо́щи и́хъ* точа́щая врачева́нія неоску́дно* съ вѣ́рою и говѣ́ніемъ* къ ни́мъ притека́ющимъ.

Сти́хъ: Весели́теся о Го́сподѣ* и ра́дуйтеся, пра́ведніи.

Блаже́нства а́лчущихъ* пра́вды возжела́сте,* притеко́сте ко Хлѣ́бу жи́зни,* Его́же сла́дкаго раче́нія* и любве́ вкуси́вше,* жи́знь вѣ́чную воспрія́ли есте́,* ея́же о́бщники покажи́те* вѣ́рою и любо́вію* па́мять ва́шу соверша́ющихъ.

Сла́ва, гла́съ 2:

Лѣ́ствицу ви́дяще отцы́ свяще́ннѣйшіи, отъ горы́ святы́я Пече́рскія къ небеси́ утвержде́ну, на не́йже Бо́жія Ма́ти положи́ Свое́ селе́ніе и а́нгельскія ли́ки со святы́ми по не́й къ небеси́ восхожда́ху. Тѣ́хъ стопа́мъ послѣ́довали есте́, а́ки безпло́тніи, и, возше́дше вѣ́дѣніемъ и дѣя́ніемъ, ны́нѣ предстоите́ Святѣ́й Тро́ицѣ, идѣ́же помяни́те и на́съ, покланя́ющихся моще́мъ ва́шимъ, преблаже́нніи.

И ны́нѣ, богоро́диченъ, гла́съ то́йже:

О, чудесе́ но́ваго, [всѣ́хъ дре́внихъ чуде́съ! Кто́ бо позна́ Ма́терь, безъ му́жа ро́ждшую и на руку́ нося́щую всю́ тва́рь Содержа́щаго? Бо́жіе е́сть изволе́ніе Ро́ждшееся. Его́же я́ко Младе́нца, Пречи́стая, Твои́ма рука́ма носи́вшая, и ма́тернее дерзнове́ніе къ Нему́ иму́щая, не преста́й моля́щи о чту́щихъ Тя́, уще́дрити и спасти́ ду́ши на́ша].

Стихи́ра двѣма́ святы́ма. Сла́ва, гла́съ 3:

Ра́дуйся, дво́ице свяще́нная, а́нгеловъ и человѣ́ковъ говѣ́йная, [и́мярекъ пе́рваго], стра́хъ Бо́жій стяжа́вый въ се́рдцѣ свое́мъ и ра́зумъ духо́вный, [и́мярекъ втора́го], единомы́сленный и единонра́вный ему́ въ добродѣ́телехъ и трудѣ́хъ, не преста́йте ку́пно моля́ще Спа́са уще́дрити и спасти́ ду́ши на́ша.

И ны́нѣ, богоро́диченъ, гла́съ то́йже:

Пріиди́те, богокра́сный ли́че Пече́рскихъ отце́въ и убо́зіи подража́теліе и́хъ, воспо́йте Ма́терь Бо́га на́шего и Всемо́щную Храни́тельницу оби́тели сея́, изъ глубины́ души́ прося́ще предъ чуде́снымъ Ея́ о́бразомъ ми́ра и спасе́нія душа́мъ на́шимъ.

Тропа́рь, гла́съ 3:

Преблаже́нніи и богоно́сніи отцы́ на́ши [и́мярекъ], я́ко стяжа́вшіи дерзнове́ніе ко Го́споду равноа́нгельнымъ свои́мъ житіе́мъ, его́же ра́ди обогати́ Христо́съ нетлѣ́ніемъ и чудесы́ мо́щи ва́ша, мо́лимъ ва́съ прилѣ́жно: испроси́те душа́мъ на́шимъ очище́ніе и ве́лію и бога́тую ми́лость.

[Сла́ва, и ны́нѣ, богоро́диченъ:

Тя́, хода́тайствовавшую спасе́ніе ро́да на́шего, воспѣва́емъ, Богоро́дице Дѣ́во: пло́тію бо, отъ Тебе́ воспрія́тою, Сы́нъ Тво́й и Бо́гъ на́шъ, Кресто́мъ воспріи́мъ стра́сть, изба́ви на́съ отъ тли́, я́ко Человѣколю́бецъ.]


НА УТРЕНИ,
[На Бо́гъ Госпо́дь: Тропа́рь преподо́бныхъ, два́жды. Сла́ва, и ны́нѣ, богоро́диченъ.]

По 1-й стихоло́гіи сѣда́ленъ, гла́съ 4. Подо́бенъ: Яви́лся еси́. [1]

Мно́гими скорбми́ пу́ть жи́зни сея́ преидо́сте, и доспѣ́вше кра́я у́мнаго жела́нія, въ черто́гъ Боже́ственныя сла́вы всели́стеся. И ны́нѣ, ра́дующеся со всѣ́хъ Царе́мъ и Бо́гомъ, моли́теся, я́ко да и мы́ ва́шего весе́лія прича́стницы бу́демъ, ва́шу па́мять почита́ющіи, отцы́ всеблаже́нніи. [Два́жды.]

Сла́ва, и ны́нѣ, богоро́диченъ:

Предста́тельнице Святѣ́й Тро́ицѣ, предста́ни на́мъ ско́ро въ дне́шній де́нь, собра́вшимся въ хра́мѣ Твое́мъ всечестнѣ́мъ, и да́ждь сла́ву преподо́бныхъ Твои́хъ зрѣ́ти, сла́вящимъ Тя́, Дѣ́во Богоро́дице, моли́твами Твои́ми.

По 2-мъ стихосло́віи сѣда́ленъ, гла́съ 3: [2]

Бра́къ Агнчій въ черто́зѣ небе́снѣмъ услы́шавше, и зва́нію Царя́ Вы́шняго ко всѣ́мъ бы́вшу, вся́ мірска́я пристра́стія оста́висте, отцы́ богоно́сніи, и сле́зными струя́ми ри́зы своя́ испра́вше, чи́сти внидо́сте въ трапе́зу Христа́ Бо́га; но пре́жде да́же не затворя́тся две́ри того́ вхо́да, моли́теся, я́ко да и мы́, покая́ніемъ вше́дше, ва́мъ прича́стницы бу́демъ. [Два́жды.]

Сла́ва, и ны́нѣ, богоро́диченъ:

Черто́гъ, присносу́щною сла́вою укра́шенъ, ви́дяще вы́ну, жела́ніе и́мамы совни́ти въ о́нь, но оде́жды не иму́ще, стыди́мся, да не свя́зани отъ а́нгелъ и изве́ржени бу́демъ. Ты́, су́щи оде́жда наги́хъ дерзнове́нія, Дѣ́во Марíе, украси́ ны и введи́ вну́трь Ца́рствія Христо́ва.

Велича́ніе и псало́мъ избра́нный о́бщій преподо́бнымъ:

[Велича́ніе: Ублажа́емъ ва́съ, преподо́бніи отцы́ [и́мярекъ], и чте́мъ святу́ю па́мять ва́шу, наста́вницы мона́ховъ и собесѣ́дницы а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...]

По поліеле́и сѣда́ленъ, гла́съ 8. Подо́бенъ: Прему́дрости.

Зва́нію Го́спода своего́ послѣ́дующе, кре́стъ, а́ки же́злъ, въ ру́цѣ воспріе́мше, не убоя́стеся стра́ха, предстоя́щаго во тмѣ́, но упова́ніемъ преидо́сте къ безбѣ́дному приста́нищу, и по́двиговъ свои́хъ обрѣ́тше воздая́ніе, веселите́ся въ свѣ́тѣ непристу́пнѣмъ. Тѣ́мже ва́съ почита́емъ, отцы́ всеблаже́нніи, я́ко при́сно моля́щихъ Христа́ Бо́га согрѣше́ній оставле́ніе дарова́ти пра́зднующимъ любо́вію святу́ю па́мять ва́шу. [Два́жды.]

Сла́ва, и ны́нѣ, богоро́диченъ:

Яко еди́ну въ жена́хъ Благослове́нную и дѣ́вамъ похвалу́ и украше́ніе, въ бра́нехъ непребори́мую по́мощь, немощны́мъ утвержде́ніе и ско́рое посѣще́ніе въ печа́ли су́щимъ иму́ще Тя́, Богоневѣ́стная Дѣ́во, дне́сь въ Пече́рстѣмъ Твое́мъ хра́мѣ припа́даемъ и мольбы́ на́ша къ Тебѣ́ прино́симъ, я́ко да мо́лиши Христа́ Бо́га, согрѣше́ній оставле́ніе дарова́ти, благоче́стно покланя́ющимся Пресвято́му Рождеству́ Твоему́.

Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе... Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Возсія́ дне́сь свѣтлѣ́е со́лнца всепра́зднственная па́мять богоно́сныхъ оте́цъ и озаря́етъ празднолю́бное сосло́віе луча́ми благода́ти многоразли́чныхъ чуде́съ. Тѣ́мже и мы́, о всеблаже́нніи, съ вѣ́рою къ ва́мъ притека́емъ и припа́даемъ къ моще́мъ ва́шимъ, прося́ще въ ну́ждахъ на́шихъ ско́раго ва́шего посѣще́нія. Вы́ же не пре́зрите моле́нія на́шего, но, я́ко иму́ще дерзнове́ніе ко Влады́цѣ, испроси́те на́мъ ве́лію ми́лость.

[Кано́нъ Богоро́дицы со ирмосо́мъ на 6 и преподо́бнымъ на 8.]

Кано́нъ Богоро́дицы, гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Ско́рбныхъ наведе́нія обурева́ютъ смире́нную мою́ ду́шу и напа́стей о́блацы мое́ покрыва́ютъ се́рдце, Богоневѣ́стная, но, Свѣ́тъ ро́ждшая Боже́ственный и Превѣ́чный, возсія́й мнѣ́ свѣ́тъ ра́достный.

Отъ безмѣ́рныхъ ну́ждей и скорбе́й, и отъ враго́въ лю́тыхъ, и отъ напа́стей жите́йскихъ изба́влься, Всепречи́стая, крѣ́пкою си́лою Твое́ю, воспѣва́ю, велича́ю безмѣ́рную Твою́ ми́лость и е́же ко мнѣ́ Твое́ утѣше́ніе.

Ны́нѣ надѣ́яся, къ Твоему́ прибѣго́хъ заступле́нію крѣ́пкому, и къ Твоему́ покро́ву вседу́шно притеко́хъ, и колѣ́на приклоня́ю, Влады́чице, и пла́чу, и стеню́, не пре́зри мене́, окая́ннаго, христіа́номъ Прибѣ́жище.

Не умолчу́ вопи́ти яснѣ́йше вели́чія Твоя́: а́ще бы не Ты́, Отрокови́це, всегда́ предстоя́ла еси́, о мнѣ́ моля́щи Сы́на Твоего́, кто́ бы отъ толи́кихъ бу́рь и лю́тыхъ бѣ́дъ изба́вилъ мя́?

Инъ кано́нъ преподо́бнымъ, гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Отве́рземъ уста́ на́ша, бра́тіе, восхвали́ти и воспѣ́ти па́мять [и́мярекъ], оте́цъ преблаже́нныхъ и духоно́сныхъ.

Просла́вляющія Мя́ просла́влю, рекíй, Госпо́дь дне́сь въ па́мяти святы́хъ и преподо́бныхъ оте́цъ [и́мярекъ] приглаша́етъ воспѣ́ти и восхвали́ти труды́ и по́двиги и́хъ.

Жела́ній краснѣ́йшій Іису́съ любо́вь привлече́ къ Себѣ́ сердца́ ва́ша и ду́ши [ва́ша], Его́же сладча́йшей любви́ прилѣпи́вшеся, бога́тство обоже́нія воспрія́сте.

Имже о́бразомъ жела́етъ еле́нь на исто́чники водны́я, си́це возжела́сте душа́ми ва́шими вкуси́ти во́ду жи́ву благода́ти, точа́щую ме́дъ безстра́стія и млеко́ обоже́нія.

Богоро́диченъ: Обоже́ніе земноро́дныхъ, Богоро́дицу, мы́сленный ра́й, рѣку́ во́дъ жи́зни, Чи́стую и Пренепоро́чную Дѣ́ву Марíю любо́вію восхва́лимъ.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Недоумѣ́вый отъ всѣ́хъ, болѣ́зненно зову́ Ти: предвари́ те́плое предста́тельство и Твою́ по́мощь да́ждь ми́, рабу́ Твоему́, смире́нному и окая́нному, Твоего́ заступле́нія и́щущему те́плѣ.

Удиви́ла еси́ вои́стинну ны́нѣ на мнѣ́, Влады́чице, благодѣ́янія Твоя́, Отрокови́це, и ми́лости Твоя́. Тѣ́мже сла́влю Тя́, и воспѣва́ю, и почита́ю мно́гое и безмѣ́рное смотре́ніе Твое́.

Бу́ря мя́ обурева́етъ напа́стей, Влады́чице, и ско́рбныхъ треволне́нія погружа́ютъ, но, предвари́вши, ру́ку ми́ да́ждь по́мощи, те́плое заступле́ніе и предста́тельство Твое́.

Истинную Богоро́дицу исповѣ́дую, Влады́чице, Тя́, сме́рти держа́ву потреби́вшую. Яко бо оживля́ющая, отъ у́стъ а́довыхъ къ животу́ возвела́ еси́ мя́, въ зе́млю те́кшаго.

Инъ.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Въ го́ру Бо́жія Ма́тере, во оби́тель Пече́рскую вседу́шно притеко́сте и, сочета́вше себе́ лико́мъ оте́цъ Пече́рскихъ, ку́пно съ ни́ми бы́сте пѣсносло́вцы и уго́дницы Го́спода и Пречи́стыя Богоро́дицы.

Нача́ло прему́дрости, стра́хъ Госпо́день, стяжа́вше въ се́рдцѣ свое́мъ, преблаже́нніи отцы́ на́ши, бы́ли есте́ про́сти душе́ю, кро́тцы и незло́биви се́рдцемъ, сего́ ра́ди воспочи́ въ ва́съ Преблагíй Бо́гъ.

Иже худоро́дная мíра и уничиже́нная избра́вый Бо́гъ, зря́ предложе́ніе ва́ше и любо́вь се́рдца, избра́ ва́съ отъ земна́го ро́да и приведе́ въ монасты́рь Пече́рскій благоугожда́ти Ему́ въ и́ночестѣмъ, по́стничестѣмъ житіи́.

Всеозаря́ющій свѣ́тъ бы́ти и́ноческое житіе́ увѣ́дѣвше, оста́висте мíръ, ве́сь лежа́щій во злѣ́, и, прите́кше во оби́тель Бо́жія Ма́тере, вда́сте тѣлеса́ и ду́ши ва́ша въ сниска́ніе боголюбе́зныя чистоты́ се́рдца и смиренному́дрія.

Богоро́диченъ: Соедини́ла еси́ Бо́га человѣ́комъ, земноро́дныхъ вознесла́ еси́ къ небе́снымъ, обожи́ла еси́ естество́ на́ше, сего́ ра́ди блажа́тъ Тя́ вси́ ро́ди человѣ́честіи, Богоро́дице Марíе, небе́сныхъ умо́въ ра́дованіе.

Сѣда́ленъ, гла́съ 4:

Сочета́вше подвиго́мъ и трудо́мъ тѣле́снымъ добродѣ́тели ду́ха, моли́тву, смиренному́дріе и кро́тость, и сотвори́вше я́ теплѣ́йшею любо́вію, Исто́чнику любве́ всесоверше́ннѣ присво́истеся. Вдохни́те и въ на́ша хла́дная сердца́ о́гнь любве́ Боже́ственныя, да зове́мъ ва́мъ: ра́дуйтеся, [и́мярекъ], отцы́ всечестнíи, мíра теплѣ́йшіи засту́пницы и храни́теліе. [Два́жды.]

Сла́ва, и ны́нѣ, богоро́диченъ:

Мíру всему́ ско́рая Помо́щнице и обурева́емымъ ти́хое приста́нище, на́съ, вла́ющихся самохо́тныхъ страсте́й волна́ми, приведи́ въ тишину́ ско́рую бла́гости Твоея́ и изба́ви отъ бѣ́дъ пою́щихъ Ти́: ра́дуйся, всѣ́хъ ра́досте и спасе́ніе.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

И гдѣ́ про́чее и́ное обря́щу заступле́ніе? Ка́мо прибѣ́гну? Гдѣ́ же и спасу́ся? Ку́ю те́плую возы́мамъ Помо́щницу, скорбьми́ жите́йскими и бу́рями, увы́, мнѣ́ коле́блему? На Тя́ еди́ну упова́ю, и дерза́ю, и хвалю́ся, и притека́ю къ покро́ву Твоему́, спаси́ мя.

Рѣку́ сла́дкую ми́лости Твоея́, бога́тыми дарми́ ороси́вшуюся, окая́нную и смире́нную ду́шу мою́, Всечи́стая, напа́стей и скорбе́й пе́щію сожже́нную, велича́ю, проповѣ́дую и притека́ю къ покро́ву Твоему́, спаси́ мя.

Тя́, Чи́стую, Тя́, Дѣ́ву и Нескве́рную, еди́ну и́мамъ стѣ́ну необори́мую, прибѣ́жище, покро́въ крѣ́пкій, ору́жіе спасе́нія, не пре́зри мене́, блу́днаго, наде́ждо ненадѣ́емыхъ, немощству́ющихъ по́моще, оскорбля́емыхъ ра́досте и заступле́ніе.

Ка́ко изрещи́ Твоя́ по досто́инству возмогу́ безмѣ́рныя щедро́ты, о Влады́чице, я́же мою́ всегда́ ду́шу, лю́тѣ оскорбля́емую, я́ко во́ды обыше́дшія? Но, о Твоего́ про́мысла и благодѣя́нія, его́же безу́мно, окая́нный, погуби́хъ!

Инъ.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Потща́стеся мно́гими по́двиги, посто́мъ и труды́ стяжа́ти бога́тство добродѣ́телей, сего́ ра́ди всели́ся въ сердца́ ва́ша Іису́съ Пребоже́ственный и содѣ́ла ва́съ свя́ты хра́мы Боже́ственнаго снизхожде́нія Своего́.

Иже некни́жныя ученики́ умудри́вый и сотвори́вый я́ огневѣща́тельныя витíи, Се́й и въ ва́ша сердца́, блаже́нніи отцы́, вдохну́ любо́вь къ жизнето́чнымъ словесе́мъ Свои́мъ.

Зѣло́ тружда́ющеся о спасе́ніи души́ своея́, непреста́нно имѣ́ли есте́ во устѣ́хъ свои́хъ псалмы́ Дави́довы и горя́щимъ се́рдцемъ воспѣва́ли есте́: сла́ва, Христе́, си́лѣ Твое́й.

Богоро́диченъ: Цѣвни́цу сладкопѣ́снивую, гу́сли благозву́чныя, псалти́рь, красно́ и предо́брѣ изглаша́ющій любо́вь Бо́жію къ земноро́днымъ, зна́емъ Тя́, Пресвята́я Дѣ́во, и́бо въ Тя́ всели́ся Госпо́дь, обвесели́ человѣ́ки.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Благода́рно вопію́ Ти: ра́дуйся, Ма́ти Дѣ́во; ра́дуйся, Богоневѣ́сто; ра́дуйся, Боже́ственный покро́ве; ра́дуйся, ору́жіе и стѣно́ неруши́мая; ра́дуйся, предста́тельство, и по́моще, и спасе́ніе, и́же къ Тебѣ́ притека́ющимъ вѣ́рою. [Два́жды.]

Ненави́дящіи мя́ всу́е, стрѣ́лы, и мечи́, и ро́въ угото́виша, и и́щутъ всеокая́ннаго моего́ тѣ́ла исто́ргнути и низвести́ въ зе́млю жела́ютъ, но отъ си́хъ, Чи́стая, предвари́вши, спаси́ мя.

Кíй Тебѣ́ да́ръ принесу́ благодаре́нія, за я́же наслади́хся Твои́хъ дарова́ній и Твоея́ безмѣ́рныя благосты́ни? Тѣ́мже у́бо сла́влю, пѣсносло́влю и велича́ю Твою́ неизрече́нную ко мнѣ́ ми́лость.

Инъ.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Ужасо́шася бра́тія Пече́рская, зря́ще ва́ше равноа́нгельное житіе́, бдѣ́ніе, и поще́ніе, и всемо́щную любо́вь ко всѣ́мъ, и сла́вляху Бо́га, дарова́вшаго ва́мъ такову́ю си́лу благода́ти Своея́.

Изъ ро́да въ ро́дъ достопа́мятны сла́вная дѣла́ житія́ ва́шего, дивя́тся а́нгели восхожде́нію ва́шему къ небеси́ и человѣ́цы сла́вятъ Бо́га, ди́внаго во святы́хъ Свои́хъ.

Жего́ми пла́менемъ страсте́й и опаля́еми огне́мъ грѣхо́внымъ, къ ва́мъ прибѣга́емъ, отцы́ достоблаже́нніи: водо́ю моли́твъ угаси́те разжже́нія любогрѣхо́вная и [отъ] огня́ гее́нскаго изба́вите притека́ющихъ къ ва́шему заступле́нію.

Богоро́диченъ: Вода́ жи́зни еси́ и кла́дязь безсме́ртія, прера́дованная Госпоже́ Влады́чице Богоро́дице, иста́явшія ны́ отъ лю́тыхъ страсте́й напо́й, оживи́, и обнови́ струя́ми благода́ти и ми́лости Твоея́.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Облацы ско́рбныхъ покры́ша окая́нную мою́ ду́шу и се́рдце, и помраче́ніе вво́дятъ мнѣ́, Отрокови́це. Но, ро́ждшая Свѣ́тъ Непристу́пный, изжени́ сія́ дале́че, дохнове́ніемъ боже́ственныя моли́твы Твоея́.

Утѣше́ніе въ ско́рбехъ вѣ́мъ, и неду́говъ врача́ Тя́ зна́ю, и всесоверше́нное сокруше́ніе сме́рти, и рѣку́ живота́ неисчерпа́емую, и всѣ́хъ, су́щихъ въ напа́стехъ, ско́рое и бы́строе заступле́ніе.

Не скрыва́ю глубины́ Твоея́ ми́лости, и то́къ безмѣ́рныхъ чуде́съ, и исто́чникъ приснотеку́щій вои́стинну, я́же ко мнѣ́ ми́лости Твоея́, Влады́чице, но всѣ́мъ исповѣ́дую, и вопію́, и проповѣ́дую, и вѣща́ю.

Обыдо́ша мя́ жите́йскія бу́ри, я́ко пче́лы со́тъ, Дѣ́во, и мое́ содержа́щія се́рдце уязвля́ютъ стрѣ́лы скорбе́й, но да обря́щу Тя́ помо́щницу, и гони́тельницу, и изба́вительницу, Всепречи́стая.

Инъ.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Боже́ственное вои́стинну и всечестно́е соверша́юще пра́зднество въ лѣ́тней па́мяти богоно́сныхъ оте́цъ на́шихъ, пріиди́те, богому́дріи, возра́дуемся се́рдцемъ и устна́ми, велича́юще просла́вившаго и́хъ Го́спода.

Всече́стнѣ подвиза́ющеся о Го́сподѣ со вся́кимъ смиренному́дріемъ и кро́тостію, терпѣливоду́шно понесо́сте кре́стъ сво́й, и́мже достиго́сте вѣ́чнаго воздая́нія Христа́ Жизнода́вца.

Яко же́ртва чи́стая и всесожже́ніе ту́чное, принесо́стеся Царю́ сла́вы, достоблаже́нніи отцы́ на́ши, моли́твою те́плою и дѣя́ніи честны́ми возше́дше на небеса́, въ Ца́рство Христа́ Бо́га на́шего.

Тружда́ющеся со вся́кимъ благоговѣ́ніемъ и стра́хомъ Бо́жіимъ во вруче́ннѣмъ ва́мъ послуша́ніи, не измѣни́ли есте́ по́двига и труда́ духо́внаго, и́бо, рука́ми творя́ вруче́нную ва́мъ рабо́ту, вы́ну приноси́ли есте́ же́ртву хвале́нія Бо́гу, пло́дъ усте́нъ, прославля́ющихъ и́мя Его́.

Богоро́диченъ: Хлѣ́бъ живо́тный, сходя́й съ небесе́ и дая́й живо́тъ мíру, вмѣсти́ла еси́ во утро́бу Твою́, Чи́стая Дѣ́во Ма́ти, мо́лимъ Тя́, не лиши́ на́съ Боже́ственнаго прича́стія Твоего́.

Конда́къ, гла́съ 4:

Бога́тство благода́ти и сыноположе́нія стяжа́вше мно́гими по́двиги и добродѣ́тельми, и́хже ра́ди Христо́съ всели́ ду́ши ва́ша въ небе́сная селе́нія Своя́, дарова́въ благода́ть нетлѣ́нія и чуде́съ моще́мъ ва́шимъ. Къ ни́мъ же притека́юще, вопіе́мъ: ра́дуйтеся, [и́мярекъ], отцы́ на́ши, лико́въ и́ночествующихъ похвало́ и удобре́ніе.

Икосъ:

Подража́юще нра́вомъ равноа́нгельныхъ и богоно́сныхъ оте́цъ Анто́нія и Ѳеодо́сія, отве́ргшеся мíра, притеко́сте въ оби́тель Бо́жія Ма́тере, идѣ́же мно́гими по́двиги и смире́ніемъ соверше́ннѣ угоди́вше Бо́гу, во оби́тели рая́ пресели́стеся. Тѣ́мже, ликовству́юще во свѣ́тѣ непристу́пнѣмъ, не пре́зрите и на́съ, усе́рдно къ ва́мъ притека́ющихъ и ве́село соверша́ющихъ па́мять ва́шу, [и́мярекъ], отцы́ на́ши, лико́въ и́ночествующихъ похвало́ и удобре́ніе.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Свѣ́тъ ро́ждшая, Влады́чице, помраче́на мя́ но́щію грѣхо́въ просвѣти́, Ты́, Свѣ́та су́щи прія́телище чи́стое и непоро́чное, да любо́вію Тя́ сла́влю.

Покро́въ бу́ди и предста́тельство, и заступле́ніе, и похвала́, Дѣ́во, обнаже́ну мнѣ́ ны́нѣ вся́кія по́мощи, безпомо́щныхъ си́ло и наде́ждо ненадѣ́емыхъ.

Все́ю душе́ю, и мы́слію, и се́рдцемъ, и устна́ми Тя́ сла́влю, наслади́вся Твои́хъ вели́кихъ дарова́ній, но, о Твоея́ благосты́ни и безмѣ́рныхъ Твои́хъ чуде́съ!

Ви́ждь ми́лостивымъ о́комъ Твои́мъ, и посѣти́ озлобле́ніе, е́же и́мамъ, и лю́тыхъ напа́стей, и вре́да, и бѣ́дъ, и отъ искуше́ній мя́ изба́ви безмѣ́рною ми́лостію Твое́ю.

Инъ.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Не послужи́ша мíру и его́ по́хотемъ, богому́дріи уго́дницы Твои́, Го́споди, но, вся́ злоухищре́нія врага́ му́жески попра́вше, побѣ́дныя вѣнцы́ улучи́ша, моли́твами и моле́ніемъ и́хъ спаси́ ду́ши на́ша, Преблагíй.

Единомы́сленніи и единонра́вніи бы́вше, блаже́нніи отцы́, въ моли́твѣ, въ смире́ніи и во вруче́ннѣмъ ва́мъ послуша́ніи, сего́ ра́ди ку́пно живете́ и ра́дуетеся во оби́телехъ Святы́я Тро́ицы, Ейже вѣ́рно послужи́сте въ ва́шемъ житіи́.

До́брѣ и богоуго́днѣ пожи́сте въ оби́тели Пече́рстѣй, мно́гая бо лѣ́та препроводи́вше чи́сто и непоро́чно, соверша́юще свято́е дѣ́ло, бы́сте уго́дницы Го́спода и Пречи́стыя Его́ Ма́тере.

Яко пшени́ца созрѣ́лая, во вре́мя пожа́тая, преидо́сте въ жи́тницы небе́сныя, преста́вльшеся, идѣ́же насыща́етеся лицезрѣ́ніемъ и сла́вою Пресла́дкаго Іису́са, Ему́же преда́сте себе́, я́ко же́ртву чи́сту и непоро́чну.

Богоро́диченъ: Жи́знь на́шу окорми́, Всеблага́я Богоневѣ́стная, и ду́ши на́ша напра́ви къ приста́нищу благоути́шному Ца́рствія Сы́на Твоего́, къ Тебѣ́ вопіе́мъ и на Тя́ наде́жду возлага́емъ, не отри́ни моле́нія на́шего.

Пѣ́снь 8.

Ирмо́съ: На горѣ́ святѣ́й просла́вльшася и въ купинѣ́ огне́мъ Приснодѣ́вы Моисе́ови та́йну я́вльшаго, Го́спода по́йте и превозноси́те во вся́ вѣ́ки.

Благоутро́бія ра́ди ми́лости Твоея́, Дѣ́во, не пре́зри, Чи́стая, потопля́емаго мене́ бу́рею жите́йскихъ во́лнъ, но да́ждь ми́ ру́ку по́мощи, утѣсня́ему озлобле́ньми жите́йскими.

Обстоя́нія, и ско́рби, и ну́жды обрѣто́ша мя́, Чи́стая, и напа́сти жите́йскія, и искуше́нія отвсю́ду мя́ обыдо́ша, но предста́ни ми́, и заступи́ мя крѣ́пкимъ Твои́мъ покро́вомъ.

Въ бу́ряхъ да обря́щу Тя́ приста́нище, въ печа́лехъ ра́дость и весе́ліе, и въ неду́зѣхъ ско́рую по́мощь, и въ бѣда́хъ изба́вительницу, и предста́тельницу во искуше́ніихъ.

Ра́дуйся, престо́ле огнеобра́зный Госпо́день; ра́дуйся, Боже́ственная и маннопріе́мная ру́чко; ра́дуйся, златы́й свѣти́льниче, свѣще́ неугаси́мая; ра́дуйся, дѣ́вамъ сла́во, и ма́теремъ украше́ніе и похвало́.

Инъ.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Тружда́ющеся въ послуша́ніи ва́шемъ съ вѣ́рою и смире́ніемъ, са́ми себе́ принесо́сте въ же́ртву чи́сту, благопрія́тну Го́сподеви, Его́же умоли́те дарова́ти душа́мъ на́шимъ очище́ніе и ве́лію ми́лость.

Не я́ко зерца́ломъ въ гада́ніихъ, но лице́мъ къ Лицу́ зри́сте Сла́дкаго Іису́са, Его́же возжела́сте, и Его́же возлюби́сте, и Тому́ преда́сте ду́шу и произволе́ніе свое́; моли́те о соверша́ющихъ па́мять ва́шу съ любо́вію и говѣ́ніемъ.

Ва́шими моли́твами, отцы́ достоблаже́нніи, сподо́бите, да и мы́, притека́ющіи къ ва́шему покро́ву и заступле́нію, досто́йно насы́тимся хлѣ́ба живо́тнаго, благода́ти и сла́вы Іису́са Христа́, Го́спода на́шего.

Яко цвѣ́тъ, я́ко па́ръ, я́ко сѣ́нь ды́ма расходя́щагося, житіе́ на́ше, что́ у́бо всу́е мяте́мся, бра́тіе, и не притеце́мъ къ цѣльбоно́снымъ моще́мъ оте́цъ достоблаже́нныхъ и преподо́бныхъ на́шихъ [и́мярекъ], и́хже моли́твами, Христе́, спаси́ ду́ши на́ша.

Богоро́диченъ: Яже Ра́дость мíру роди́вшая и облагода́тствовавшая естество́ человѣ́ческое, Тя́ мо́лимъ и къ Тебѣ́ прибѣга́емъ: спаси́ на́съ, Влады́чице мíра и Всенепоро́чная, да не пости́гнетъ на́съ ча́съ сме́ртный негото́выхъ.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Къ кому́ прибѣ́гну ино́му, Чи́стая? Гдѣ́ притеку́ про́чее и спасу́ся? Къ кому́ иду́? Ко́е же обря́щу прибѣ́жище? Ко́е те́плое заступле́ніе? Ку́ю въ ско́рбехъ помо́щницу? На Тя́ еди́ну упова́ю, о Тебѣ́ еди́нѣй хвалю́ся, и на Тя́, дерза́я, прибѣго́хъ.

Нѣ́сть исчи́слити возмо́жно вели́чія Твоя́, Богоневѣ́сто, и глубину́ неиспыта́тельну изрещи́ па́че ума́ чуде́съ Твои́хъ, соверше́нныхъ вы́ну, любо́вію Тя́ чту́щимъ и вѣ́рою покланя́ющимся, я́ко вои́стинну Бо́га ро́ждшей.

Въ пѣ́снехъ благода́рныхъ славосло́влю и почита́ю безмѣ́рную ми́лость, и мно́гую си́лу Твою́ всѣ́мъ исповѣ́дую, и благодѣя́нія Твоя́, я́же истощи́ла еси́ на мя́, проповѣ́дую, велича́ю душе́ю же и се́рдцемъ, и мы́слію, и язы́комъ всегда́.

Моле́ніе мое́ прими́ убо́гое, и пла́ча моего́ не пре́зри, и сле́зъ, и стена́нія, но заступи́ мя, я́ко Блага́я, и проше́нія испо́лни: мо́жеши бо вся́, я́ко всемо́щнаго Влады́ки Бо́га Ма́ти, а́ще возмаа́еши то́кмо моему́ окая́нному смире́нію.

Инъ.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Вси́ земноро́дніи, стецы́теся усе́рдно къ свяще́нному торжеству́ преподо́бныхъ оте́цъ на́шихъ [и́мярекъ] и припади́те къ нетлѣ́ннымъ и цѣльбоно́снымъ моще́мъ и́хъ: тíи бо су́ть засту́пницы и хода́таи на́ши предъ Бо́гомъ.

Предстоя́ще престо́лу Всецаря́ и наслажда́ющеся ликовствова́нія съ го́рними си́лами, не забу́дите и на́съ, отцы́ всеблаже́нніи, восхваля́ющихъ труды́ и по́двиги ва́ша и святу́ю па́мять ва́шу любо́вію почита́ющихъ.

Чи́стыя ду́ши ва́ша бы́ша оби́тели Святы́я Тро́ицы, Юже не то́кмо въ жи́зни, но и по сме́рти исповѣ́дуете, и́бо нетлѣ́ніе, чудотворе́нія и благоуха́ніе моще́й ва́шихъ проповѣ́дуютъ и возвѣща́ютъ Тро́ическое поклоне́ніе и еди́нство.

Богоро́диченъ: Предстоя́щи одесну́ю престо́ла Сы́на Твоего́, о Богома́ти, не забу́ди хода́тайствомъ Твои́мъ и на́съ, моли́твенникъ и пѣве́цъ Твои́хъ, вѣ́рою и любо́вію при́сно велича́ющихъ Тя́, Чи́стую Ма́терь и Дѣ́ву.

Свѣти́ленъ:

Празднолю́бныхъ собо́ри стеко́шася въ свѣ́тлѣй па́мяти [и́мярекъ], оте́цъ достоблаже́нныхъ и богоно́сныхъ, восхвали́ти труды́ и по́двиги, добродѣ́тели и чудеса́ и́хъ: тíи бо, я́ко иму́ще дерзнове́ніе ко Го́споду, умо́лятъ Его́ спасти́ ду́ши на́ша. [Два́жды.]

Сла́ва, и ны́нѣ, богоро́диченъ:

Оби́тель, ю́же создала́ еси́ и въ не́йже восхотѣ́ла еси́ жи́ти, [поддержи́ и] сохрани́ Твои́мъ покро́вомъ, Всенепоро́чная, всѣ́мъ же, живу́щимъ въ не́й и притека́ющимъ въ ню́ на поклоне́ніе святы́мъ моще́мъ уго́дниковъ Твои́хъ, проле́й вели́кую и бога́тую ми́лость Сы́на Твоего́ и Бо́га на́шего.

На хвали́техъ стихи́ры [на 4], гла́съ 4:

[Имярекъ] богому́дріи,* а́нгельскому житію́ ревну́юще,* въ моли́твѣ и псалмопѣ́ніи* при́сно пребыва́cте,* сего́ ра́ди бы́сте хра́мы Свята́го Ду́ха,* Иже обогати́ ва́съ нетлѣ́ніемъ и чудесы́,* да мо́лите о душа́хъ на́шихъ. [Два́жды.]

Человѣ́цы Бо́жіи,* и́стинніи раби́ Госпо́дни,* непоро́чніи, пра́ведніи, благочести́віи* позна́ни бы́сте, всеблаже́нніи отцы́.* Сего́ ра́ди возвели́чи Госпо́дь па́мять ва́шу,* въ не́йже лику́юще,* сла́вимъ Христа́ Бо́га,* прославля́ющаго святы́я Своя́.

Анто́нію богоно́сному* и Ѳеодо́сію богому́дрому* ревну́юще добродѣ́тельнымъ житіе́мъ,* въ трудѣ́хъ и по́двизѣхъ,* въ моли́твахъ и бдѣ́ніихъ* жи́знь свою́ сконча́сте;* по блаже́ннѣмъ же успе́ніи свое́мъ,* ку́пно съ ни́ми ра́дующеся и веселя́щеся,* помяни́те и на́съ,* па́мять ва́шу хвала́ми почита́ющихъ.

Сла́ва, гла́съ 5:

Собери́теся дне́сь, христолюби́выхъ люде́й мно́жества, въ свѣ́тлѣй па́мяти достоблаже́нныхъ оте́цъ на́шихъ [и́мярекъ], и, восхваля́юще свѣ́тлыя по́двиги и́хъ, возвели́чимъ возвели́чившаго и́хъ Христа́, да́рующаго на́мъ моли́твами и́хъ очище́ніе и ве́лію ми́лость.

И ны́нѣ, богоро́диченъ, гла́съ то́йже:

Высоту́ обоже́нія, глубину́ Боже́ственнаго снизхожде́нія и любве́, широту́ милосе́рдія Тобо́ю стяжа́хомъ, Чи́стая Богоро́дице, Приснодѣ́во. Тѣ́мъ Тя́ немо́лчными гла́сы велича́емъ.


НА ЛИТУРГІИ,

Слу́жба о́бщая преподо́бнымъ: [Блаже́нна отъ кано́на, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Луки́, зача́ло 24. Прича́стенъ: Ра́дуйтеся, пра́ведніи, о Го́сподѣ, пра́вымъ подоба́етъ похвала́.]

Примѣчанія:
[1] См. сѣдаленъ по 1-мъ стихословіи съ службѣ Собора преподобнымъ отцемъ Печерскимъ, ихже нетлѣнныя мощи въ Дальней пещерѣ почиваютъ (28-го августа).
[2] См. сѣдальны по 2-мъ стихословіи и по поліелеи съ богородичнами ихъ въ службѣ Собора преподобнымъ отцемъ Печерскимъ, ихже нетлѣнныя мощи въ Ближней пещерѣ почиваютъ (28-го сентября).

Источникъ: Пече́рская Минíа. [Ча́сть пе́рвая.] — Кíевъ: Въ тѵпогра́фіи Кíево-Пече́рскія Ла́ѵры, 2007. — С. 23-40.

/ Къ оглавленію раздѣла /


16
Наверхъ / Къ титульной страницѣ

0