Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 27 апрѣля 2017 г. Сейчасъ на порталѣ посѣтителей - 8.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕЯ ОБЩАЯ.

Слу́жба о́бща му́ченицѣ еди́ной.

ВЕЧЕРЪ,
На Го́споди воззва́хъ, стихи́ры, гла́съ 4. Подо́бенъ: Яко до́бля.

Дѣ́вства добро́тами,* и муче́ній кровьми́,* ду́шу твою́ украси́вши, му́ченице сла́вная [и́мярекъ],* вручи́лася еси́ Созда́вшему,* сохраня́ющу тя́ нетлѣ́нну во вѣ́къ и́стинно.* О се́мъ ликовству́ющи* съ во́инствы арха́нгелъ и а́нгелъ,* апо́столъ, проро́къ* и му́ченикъ ликостоя́ніи, всехва́льная.

И къ коле́самъ привяза́ема,* и звѣрьми́ растерза́ема,* и огне́мъ и водо́ю обостри́вши* тво́й по́мыслъ Боже́ственнымъ Ду́хомъ,* тмы́ нача́льника тече́ніи кро́вными,* му́жески удави́ла еси́,* и востекла́ еси́ къ разу́мнымъ черто́гомъ,* вѣ́но Жениху́ твоему́,* дѣ́во, прине́сши страда́ніе.

Жениха́ Христа́ Кро́вію* освяти́вшися, прехва́льная,* твое́ю кро́вію украси́ла еси́ плотску́ю оде́жду.* Тѣ́мже обою́ду просвѣ́щшися, прехва́льная, [и́мярекъ],* свѣ́тлаго сподо́билася еси́ черто́га Его́.* Его́же моли́,* отъ тли́ и бѣ́дъ изба́витися,* вѣ́рою творя́щимъ* всечестну́ю па́мять твою́.

Сла́ва, и ны́нѣ, богоро́диченъ:

Яко моли́тву неусыпа́ющую, мольбу́ пребыва́ющу, иму́щи, Пречи́стая, ко Го́споду, напа́сти успи́, и во́лны укроти́ окая́нныя моея́ души́, и въ ско́рби су́щее се́рдце мое́ утѣ́ши, Отрокови́це, молю́ Тя, и облагодати́ у́мъ мо́й, я́ко да досто́йно Тя́ просла́влю.

Крестобогоро́диченъ:

Агнца и Па́стыря, Тя́ на Дре́вѣ я́ко ви́дѣ, Агница ро́ждшая рыда́ше, и ма́терски Тебѣ́ вѣща́ше: Сы́не возжелѣ́нне, ка́ко на Дре́вѣ кре́стнѣмъ повѣ́шенъ еси́, Долготерпѣли́ве? Ка́ко ру́цѣ и но́зѣ Твои́, Сло́ве, пригвозди́шася отъ беззако́нныхъ, и Кро́вь Твою́ излія́лъ еси́, Влады́ко?

Аще и́мать самогла́сенъ, Сла́ва, гла́съ 6:

Одесну́ю Спа́са предста́ дѣ́ва, и страстоте́рпица и му́ченица, [и́мярекъ], одѣ́яна добродѣ́тельми непобѣжде́на, и преукра́шена еле́емъ чистоты́, и кро́вію страда́нія, и вопію́щи къ Нему́, ра́достно свѣщу́ держа́щи: въ воню́ мѵ́ра Твоего́ теко́хъ, Христе́ Бо́же, я́ко уязви́хся Твое́ю любо́вію а́зъ, не отлучи́ мене́, Женише́ небе́сный. Тоя́ моли́твами, низпосли́ на́мъ, всеси́льне Спа́се, ми́лости Твоя́.

И ны́нѣ, богоро́диченъ:

Никто́же притека́яй къ Тебѣ́, посра́мленъ отъ Тебе́ исхо́дитъ, Пречи́стая Богоро́дице Дѣ́во, но про́ситъ благода́ти, и пріе́млетъ дарова́ніе къ поле́зному проше́нію.

Крестобогоро́диченъ:

Пречи́стая, я́ко ви́дѣ тя́ на Крестѣ́ ви́сяща, рыда́ющи вопія́ше Ма́терски: Сы́не мо́й и Бо́же мо́й, сла́дкое Мое́ Ча́до, ка́ко терпи́ши стра́сть поно́сную?

Аще ли пра́зднуеши съ поліеле́емъ, глаго́ли богоро́диченъ воскре́сный:

Кто́ Тебе́ не ублажи́тъ, [Пресвята́я Дѣ́во? Кто́ ли не воспое́тъ Твоего́ пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Вхо́дъ. Проки́менъ дне́.
Чте́нія три́, му́ченическая.

Проро́чества Иса́іина чте́ніе. [Глава́ 43.]

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 4.]

Пра́ведникъ а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть и живы́й посредѣ́ грѣ́шникъ преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая, и паре́ніе по́хоти премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше, и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры, гла́съ 4. Подо́бенъ: Яко до́бля.

Мучи́тельскому шата́нію* и на́глому суровству́,* по́мысломъ сопроти́вльшися мужему́дренно,* бу́дущихъ предви́дящи* наслажде́ніе, богому́дренная,* пребыва́ющее при́сно во вѣ́ки неподви́жимо,* е́же и получи́ла еси́,* отъ земли́ преста́вльшися къ черто́гамъ небе́снымъ,* и ли́ку неразори́мому, сла́вная.

Сти́хъ: Ди́венъ Бо́гъ во святы́хъ Свои́хъ,* Бо́гъ Изра́илевъ.

Ца́рствія благолѣ́піе* и добро́ту кра́сную ви́дѣти сподо́билася еси́,* Жениха́ твоего́ Христа́,* укра́шена ра́нами тве́рдаго твоего́ страда́нія,* и Исто́чнику благи́хъ* досто́йно прибли́жилася еси́.* Отону́дуже боже́ственнаго весе́лія пло́дъ* бога́тно прія́ла еси́, блаже́нная,* и безсме́ртную сла́ву.

Сти́хъ: Въ це́рквахъ благослови́те Бо́га,* Го́спода отъ исто́чникъ Изра́илевыхъ.

Ни и́го рабо́тное,* ни сла́бость же́нская,* ни гла́дъ, ни ра́ны запя́ша ти́,* му́ченичестѣй тве́рдости уподо́битися, всесла́вная,* усе́рдіемъ души́ му́ки претерпѣ́ла еси́.* Отону́дуже получи́ла еси́ небе́сный черто́гъ,* и вѣнце́мъ благода́ти украси́лася еси́,* предстоя́щи Зижди́телю твоему́.

Сла́ва, гла́съ 5:

Дѣ́вства твоего́ красоты́, восхотѣ́ Ца́рь сла́вы Христо́съ, я́ко непоро́чну тя́ невѣ́сту Себѣ́ обручи́, совокупле́ніемъ нетлѣ́ннымъ, и́бо во́лею Свое́ю пода́въ добро́тѣ твое́й си́лу, на враги́ же и стра́сти непобѣди́му показа́, претерпѣ́вшую ра́ны го́рькія, и му́ки свирѣ́пыя, сугу́бымъ вѣнце́мъ увязе́ тя, и поста́ви одесну́ю Себе́ я́ко цари́цу испещре́ну. Того́ моли́, му́ченице честна́я и многострада́льная, [и́мярекъ], пѣвце́мъ твои́мъ спасе́ніе и жи́знь пода́ти, и ве́лію ми́лость.

И ны́нѣ, богоро́диченъ:

Блажи́мъ Тя́, Богоро́дице Дѣ́во, и сла́вимъ Тя́ вѣ́рніи по до́лгу, гра́дъ непоколеби́мый, стѣ́ну необори́мую, тве́рдую предста́тельницу и прибѣ́жище ду́шъ на́шихъ.

Крестобогоро́диченъ:

Зря́щи дре́вле Агнца Своего́ Дѣ́ва и всеблаже́нная Отрокови́ца, на Кре́стъ воздви́жена, вопія́ше, слезя́щи: увы́ Мнѣ́, Сы́не Мо́й, ка́ко умира́еши, Бо́гъ сы́й естество́мъ безсме́ртенъ?

Тропа́рь во уста́вѣ. Аще ли нѣ́сть уста́ва, глаго́ли се́й тропа́рь, гла́съ 4:

Агница Твоя́, Іису́се, [и́мярекъ], зове́тъ ве́ліимъ гла́сомъ: Тебе́, Женише́ мо́й, люблю́, и Тебе́ и́щущи, страда́льчествую, и сраспина́юся, и спогреба́юся креще́нію Твоему́, и стражду́ Тебе́ ра́ди, я́ко да ца́рствую въ Тебѣ́, и умира́ю за Тя́, да и живу́ съ Тобо́ю; но, я́ко же́ртву непоро́чную, пріими́ мя, съ любо́вію поже́ршуюся Тебѣ́; тоя́ моли́твами, я́ко Ми́лостивъ, спаси́ ду́ши на́ша.

Сла́ва, и ны́нѣ, богоро́диченъ или́ крестобогоро́диченъ:



НА УТРЕНИ,
На Бо́гъ Госпо́дь: тропа́рь то́йже.

По 1-й каѳи́смѣ сѣда́ленъ, гла́съ 5. Подо́бенъ: Собезнача́льное.

Благоче́стно порабо́тившися Вседержи́телю, злочести́вому же мучи́телю не порабо́тилася еси́, честна́я, но претерпѣ́ла еси́ тве́рдо те́мное заключе́ніе, и ра́нъ разжже́ніе, и преста́вилася еси́ къ Бо́гу, богому́драя му́ченице, [и́мярекъ], моли́ся о на́съ, соверша́ющихъ па́мять твою́. [Два́жды.]

Сла́ва, и ны́нѣ, богоро́диченъ:

Те́плая Предста́тельнице и непобѣди́мая, упова́ніе извѣ́стное и непосты́дное, стѣно́ и покро́ве, и приста́нище прибѣга́ющимъ къ Тебѣ́, Приснодѣ́во Чи́стая, Сы́на Твоего́ и Бо́га моли́ со а́нгелы, умире́ніе да́ти мíру, и спасе́ніе, и ве́лію ми́лость.

По 2-й каѳи́смѣ сѣда́ленъ, гла́съ 1. Подо́бенъ: Гро́бъ Тво́й.

Муче́ній о́гнь, Ду́ха росо́ю погаси́ла еси́, честна́я, и къ Свѣ́ту преста́вилася еси́ боже́ственному и невеще́ственному, и по кончи́нѣ блаже́ннѣй источа́еши исцѣле́ній ка́пли, [и́мярекъ], уставля́ющи разжже́ніе страсте́й си́лою духо́вною. [Два́жды.]

Сла́ва, и ны́нѣ, богоро́диченъ:

Моли́твы Твои́хъ ра́бъ пріими́, Богоро́дице, и изба́ви на́съ отъ вся́кія бѣды́, я́ко ро́ждшая Христа́ Спа́са, Изба́вителя ду́шъ на́шихъ.

По Хвали́те и́мя Госпо́дне...

Припѣ́въ: Велича́емъ тя́, страстоте́рпице Христо́ва [и́мярекъ], и чте́мъ честно́е страда́ніе твое́, е́же за Христа́ претерпѣ́ла еси́.

[Псало́мъ избра́нный: Бо́гъ на́мъ прибѣ́жище и си́ла, Помо́щникъ въ ско́рбехъ, обрѣ́тшихъ ны́ зѣло́...]

По поліеле́и, сѣда́ленъ, гла́съ 4. Подо́бенъ: Вознесы́йся на Кре́стъ.

Прише́дшую Христу́ во́лею, и украси́вшую добродѣ́тельми се́рдце, благолѣ́пно воспои́мъ, [и́мярекъ], вѣ́рныхъ мно́жество: та́ бо посрами́ мучи́тельскую де́рзость, и просія́вши я́ко со́лнце посредѣ́ беззако́нникъ, по кончи́нѣ яви́ся земны́мъ подтвержде́ніе боже́ственное, вку́пѣ и держа́ва. [Два́жды.]

Сла́ва, и ны́нѣ, богоро́диченъ:

Отъ а́нгела Сло́во пріи́мши во утро́бѣ Твое́й, и ро́ждши воплоще́нна Бо́га Емману́ила, Богоро́дице, моли́ о душа́хъ на́шихъ.

Степе́нна, 1-й антифо́нъ 4-го гла́са. Проки́менъ, гла́съ 4: Ди́венъ Бо́гъ во святы́хъ Свои́хъ, Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Вся́кое дыха́ніе... Ева́нгеліе Матѳе́я, зача́ло 62.

По 50-мъ псалмѣ́ стихи́ра, гла́съ 6:

Одесну́ю Спа́са предста́ дѣ́ва, и страстоте́рпица и му́ченица, [и́мярекъ], одѣ́яна добродѣ́тельми непобѣжде́на, и преукра́шена еле́емъ чистоты́, и кро́вію страда́нія, и вопію́щи къ Нему́, ра́достно свѣщу́ держа́щи: въ воню́ мѵ́ра Твоего́ теко́хъ, Христе́ Бо́же, я́ко уязви́хся Твое́ю любо́вію а́зъ, не отлучи́ мене́, Женише́ небе́сный. Тоя́ моли́твами, низпосли́ на́мъ, всеси́льне Спа́се, ми́лости Твоя́.

Кано́нъ, гла́съ 8.

Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко еди́нъ сла́вно просла́вися.

Влече́тъ къ пѣснопѣ́нію премíрныхъ во́инства, и земны́хъ ли́ки, всехва́льная отрокови́ца, чудесы́.

Добро́ты возжела́въ Влады́ка всѣ́хъ, краснѣ́йшаго твоего́ се́рдца всехва́льная, небе́сныхъ черто́говъ сподо́би тя́.

На ка́зни и болѣ́зни, и на ра́ны многообра́зныя, не устрашена́, му́ченице, вмѣсти́лася еси́: поспѣша́ющую бо и́маши благода́ть Спа́сову, возмога́ющую тя́.

Богоро́диченъ: Пречи́стая Богоро́дице, воплоще́нно Присносу́щное и Пребоже́ственное Сло́во, па́че естества́ ро́ждшую, пое́мъ Тя́.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Яви́лася еси́ на суди́щи, му́жественну ду́шу нося́щи, и врага́ я́коже нему́жественна побѣди́ла еси́ всехва́льная.

Поро́къ въ добро́тѣ твое́й, ниже́ вра́ска души́ бы́сть, и тя́ Христо́съ невѣ́сту въ нетлѣ́нныя черто́ги прія́тъ.

Исцѣли́ всехва́льная души́ моея́ стру́пы, му́ченице Христо́ва, [и́мярекъ], и ути́ши твои́ми моли́твами жи́зни моея́ бу́рю.

Богоро́диченъ: Тя́ вси́ стяжа́хомъ прибѣ́жище и стѣ́ну на́шу, христіа́не, и Тя́ славосло́вимъ немо́лчно, Безневѣ́стная.

Сѣда́ленъ, гла́съ 8. Подо́бенъ: Прему́дрости.

Крове́й твои́хъ струя́ми, му́ченице Христо́ва, пото́пъ нечести́вымъ при́сно дѣ́йствуеши, всехва́льная; ту́чами же благода́ти слове́сныя ни́вы напая́ющи всегда́, въ ни́хже возраща́еши кла́съ вѣ́ры, тѣ́мъ пресла́вно и по сме́рти яви́лася еси́ о́блакъ, источа́ющи жи́зни свидѣ́тельство, страстоте́рпице всехва́льная, [и́мярекъ], моли́ся Христу́ Бо́гу, согрѣше́ній оставле́ніе дарова́ти, чту́щимъ любо́вію святу́ю па́мять твою́.

Сла́ва, и ны́нѣ, богоро́диченъ:

Яко Дѣ́ву и еди́ну въ жена́хъ Тя́ безсѣ́менно ро́ждшую Бо́га пло́тію, вси́ ублажа́емъ ро́ди человѣ́честіи: о́гнь бо всели́ся въ Тя́ Божества́, и я́ко младе́нца дои́ши Зижди́теля и Го́спода. Тѣ́мъ а́нгельскій собо́ръ и человѣ́ческій ро́дъ, досто́йно сла́вимъ пресвято́е Рождество́ Твое́, и согла́сно вопіе́мъ Ти́: моли́ Христа́ Бо́га, прегрѣше́ній оставле́ніе дарова́ти, досто́йно пою́щимъ сла́ву Твою́.

Крестобогоро́диченъ:

Агнца, и Па́стыря и Изба́вителя, Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мляй Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися, и да́руй согрѣше́ній оставле́ніе, вѣ́рою пою́щимъ Боже́ственныя стра́сти Твоя́.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́, и просла́вихъ Твое́ Божество́.

Нескве́рное зерца́ло боже́ственныхъ разумѣ́ній тебе́ саму́ю устро́ивши, я́ко свѣти́льникъ златолѣ́потнѣйшій страда́лицъ посредѣ́, му́ченице, возсія́ла еси́.

Мра́чному не принесла́ еси́ де́мону же́ртвы, непобѣди́мая му́ченице, [и́мярекъ], жизноно́сную бо возлюби́ла еси́ за благоче́стіе сме́рть прія́ти.

Яко неболѣ́зненно нося́щи со страстоно́сцы тѣ́ло непоро́чная, ра́нами нечу́вственна пребыла́ еси́, боже́ственныя любве́ раче́ніемъ.

Богоро́диченъ: Очище́ніе на́мъ да́руй невѣ́дѣній, я́ко безгрѣ́шенъ, и умири́ мíръ Тво́й, Бо́же, моли́твами Ро́ждшія Тя́.

Пѣ́снь 5.

Ирмо́съ: Утренююще вопіе́мъ Ти́: Го́споди, спаси́ ны, Ты́ бо еси́ Бо́гъ на́шъ, ра́звѣ Тебе́ ино́го не вѣ́мы.

Дне́ и мíра противополо́жное увѣ́дѣвши, ратолю́бнаго де́мона люби́ти не восхотѣ́ла еси́.

Мнѣ́въ твою́ осла́бити боже́ственную, му́ченице [и́мярекъ], крѣ́пость, смѣ́хъ яви́ся, козньми́ вселука́вый.

Пода́ждь ми́ просвѣще́ніе и ми́ръ, всехва́льная, рѣша́щи моли́твами твои́ми многомяте́жное смуще́ніе.

Богоро́диченъ: Дѣ́ву по рождествѣ́ пое́мъ Тя́, Богоро́дице, Ты́ бо Бо́га Сло́ва пло́тію мíру породила́ еси́.

Пѣ́снь 6.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ я́ко ри́зою, многоми́лостиве Христе́ Бо́же на́шъ.

Му́жественное въ же́нстѣй пло́ти, души́ мудрова́ніе нося́щи сла́вная, о звѣ́рѣхъ су́щихъ въ вода́хъ неради́ла еси́.

Побѣди́ла еси́ мучи́телей горды́ню, неврежде́на пребыла́ еси́, му́ченице непобѣди́мая, и вѣне́цъ побѣ́ды прія́ла еси́.

Яко добру́, и я́ко красну́, я́ко че́стну, и я́ко дѣ́вства заря́ми сія́ющую, тебе́ Жени́хъ Госпо́дь Себѣ́ приво́дитъ, пресла́вная.

Богоро́диченъ: Еди́на сло́вомъ пло́тію Сло́во поро́ждшая, изба́ви, мо́лимся, сѣ́тей вра́жіихъ ду́ши на́ша.

Конда́къ во уста́вѣ.
Аще ли нѣ́сть уста́ва, глаго́ли се́й конда́къ, гла́съ 2. Подо́бенъ: Вы́шнихъ ища́.

Хра́мъ Тво́й всечестны́й, я́ко цѣльбу́ душе́вную обрѣ́тше вси́ вѣ́рніи, велегла́сно вопіе́мъ Ти́, дѣ́во му́ченице, [и́мярекъ], великоимени́тая: Христа́ Бо́га моли́ непреста́нно о всѣ́хъ на́съ.

Икосъ.

Уневѣ́стившуюся Христу́ муче́ніемъ, [и́мярекъ], соше́дшеся, почти́мъ досто́йно, я́ко да тоя́ моли́твами, душетлѣ́нныя па́губы изба́вльшеся, губи́тельства, тру́са и паде́жа, житіе́ во смире́ніи препрово́димъ, сподо́бльшеся со всѣ́ми святы́ми, отъ вѣ́ка Бо́гу благоугоди́вшими, ходи́ти во свѣ́тѣ, и пѣ́ти съ си́ми: удиви́лъ еси́, Спа́се, Твоя́ ми́лости всѣ́мъ человѣ́комъ, вѣ́рою хва́лящимъ ю́. Тѣ́мже зове́мъ е́й: моли́ непреста́нно о всѣ́хъ на́съ.

Пѣ́снь 7.

Ирмо́съ: Отъ Іуде́и доше́дше о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Па́че ума́ яви́шася боже́ственныхъ му́чениковъ благому́жества, Зижди́тель бо всѣ́хъ, тва́рь покаря́етъ во страда́ніи зову́щимъ: отце́въ на́шихъ Бо́же, благослове́нъ еси́.

Ху́лящая загради́ [1], преслову́щая отрокови́ца, уста́ мучи́телей, и горды́ню пребеззако́нныхъ, Ду́хомъ Святы́мъ, боже́ственно воспѣва́ющи: отце́въ на́шихъ Бо́же, благослове́нъ еси́.

Тро́ица о́трокъ преподо́бныхъ, разже́гшія пе́щь дре́вле попали́; ны́нѣ же богому́драя, Тро́ицу пою́щи, слуги́ улови́, отце́въ Бо́га пою́щія: Бо́же, благослове́нъ еси́.

Богоро́диченъ: На́ше спасе́ніе я́коже восхотѣ́лъ еси́, Спа́се, устро́ити, во утро́бу Дѣ́вы всели́лся еси́, Юже мíру предста́тельницу показа́лъ еси́, отце́въ на́шихъ Бо́же, благослове́нъ еси́.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Блаже́ннѣйшая въ жена́хъ, Вы́шняго возме́здную иму́щи благода́ть, поя́ше хва́лящи Христа́ во вѣ́ки вся́.

Укрѣпле́на по́мысломъ невѣ́стника, невеще́ственнымъ раче́ніемъ, тѣ́ло предала́ еси́ на сме́рть, и живе́ши во вѣ́ки вся́.

Та́йно Жени́хъ ко пречи́стѣй невѣ́стѣ въ пе́щь прише́дъ, духо́вною росо́ю Отчимъ благоволе́ніемъ спа́слъ е́сть, пою́щу Христа́ во вѣ́ки.

Богоро́диченъ: По́мощи я́же отъ Тебе́ тре́бующія не пре́зри, Дѣ́во, пою́щія и превознося́щія Тя́ во вѣ́ки.

Пѣ́снь 9.

Ирмо́съ: Тя́, неискусобра́чную Ма́терь Бо́га вы́шняго, Тя́, па́че ума́ ро́ждшую сло́вомъ вои́стинну Бо́га, вы́шшую пречи́стыхъ си́лъ, немо́лчными славословле́ніи велича́емъ.

Тече́ніе живы́я кро́ве, зна́меніе нетлѣ́нныя свы́ше дарова́нныя тебѣ́ жи́зни, му́ченице всехва́льная, цѣле́ній бо сокро́вище непреста́нное че́рплющимъ яви́лася еси́.

Косне́ся тебѣ́ сме́рть естества́ зако́номъ, богому́драя, въ живоно́сную же ме́ртвость нестра́стно облекла́ся еси́. Еюже я́ко одушевле́нное твое́ тѣ́ло поло́жши всечестно́е, живе́ши нетлѣ́нно, и свидѣ́тельствуютъ твоя́ кровотече́нія.

Яко со́лнечную лучу́ озаря́ющую вся́, и я́ко невѣ́сту Христо́ву предобру́, я́ко го́рлицу чистолюби́вую, и я́ко ма́слину, я́ко ке́дръ, я́ко су́щую избра́нную голуби́цу, хва́лимъ тя́ вси́, [и́мярекъ], богоимени́тая.

Богоро́диченъ: Невѣ́сто неискусобра́чная, сосу́де благово́нія, Тя́ я́ко и́стинную и непоро́чную, и боже́ственнаго о́блакъ свѣ́та, пріе́мшую небе́сный до́ждь во утро́бѣ, Дѣ́во Ма́ти, велича́емъ.

Свѣти́ленъ:

Яко невѣ́ста украси́лася еси́ добро́тою, обручи́вшися Жениху́ страстьми́ добротво́рными; вну́трь же черто́га свѣтови́дна, я́ко избра́нная всели́лася еси́, нося́щи свѣщу́ дѣви́ческую, и ны́нѣ ца́рствуеши съ Живу́щимъ во вѣ́ки, [и́мярекъ], сія́ющи.

Богоро́диченъ:

Тя́ заступле́ніе вси́ и́мамы, грѣ́шніи, о Пречи́стая Дѣ́во! Ты́ благоувѣ́тлива на́мъ сотвори́ Сы́на Твоего́, ма́терними Твои́ми моли́твами.

На хвали́техъ стихи́ры самогла́сны, гла́съ 3:

Страда́льческое торжество́, вѣ́рніи, богому́дреннѣ соверша́емо, ви́дяще, чу́дному въ совѣ́тѣхъ Бо́гу на́шему, благода́рственное пѣснопѣ́ніе воспои́мъ: неви́димую бо держа́ву проти́вныя си́лы, въ же́нстѣмъ естествѣ́ побѣди́, и Боже́ственную Свою́ си́лу въ не́мощи соверши́въ доброму́ченицы; тоя́ моли́твами спаса́етъ ду́ши на́ша. [Два́жды.]

Истины ча́шу отъ свои́хъ крове́й страда́льческихъ всехва́льная му́ченица Христо́ва, [и́мярекъ], раствори́вши и сію́ всегда́ предлага́ющи Це́ркви, въ не́йже церко́вныя пито́мцы, му́дрости гла́сомъ созыва́етъ, глаго́лющи: почерпи́те пи́во Воскресе́нія свидѣ́тельное, невѣ́рныхъ прогони́тельное, и страсте́й чисти́тельное, благочести́вымъ же душа́мъ храни́тельно, Спа́су зову́ще: напои́вый на́съ пото́комъ сла́дости Ду́ха, спаси́ ду́ши на́ша.

Иже Кро́вію Христо́вою ду́ши запеча́тавше въ де́нь избавле́нія, кро́вь святу́ю, отъ му́ченическаго исто́чника востека́ющую на́мъ, съ весе́ліемъ духо́внымъ проро́чески почерпе́мъ, живото́чныхъ страсте́й Спа́совыхъ, и присносу́щныя сла́вы образова́тельну. Тѣ́мже Ему́ возопіи́мъ: прославля́яйся во святы́хъ Твои́хъ, Го́споди, пресла́вныя Твоея́ страстоте́рпицы моли́твами, спаси́ ду́ши на́ша.

Сла́ва, гла́съ 6:

Страда́льческимъ ше́ствовавши путе́мъ, мучи́тельскаго избѣжа́ла еси́ совѣ́та, [и́мярекъ], всечестна́я: я́ко дѣ́ва, у́бо мудра́, свѣшу́ нося́щи вошла́ еси́ во дворы́ Го́спода твоего́; я́ко му́ченица му́жествомъ, благода́ть прія́ла еси́ исцѣли́ти плотскíя стра́сти. Но и на́съ, воспѣва́ющихъ тя́, душе́вныхъ болѣ́зней изба́ви, я́же къ Бо́гу мольба́ми твои́ми.

И ны́нѣ, богоро́диченъ:

Бо́га, изъ Тебе́ Воплоти́вшагося, разумѣ́хомъ, Богоро́дице Дѣ́во, Того́ моли́ о спасе́ніи ду́шъ на́шихъ.

Крестобогоро́диченъ:

Всечи́стая, я́ко ви́дѣ Тебе́ на Крестѣ́ повѣ́шена, пла́чущи, вопія́ше ма́терски: Сы́не Мо́й, и Бо́же Мо́й, сладча́йшее Мое́ Ча́до, ка́ко терпи́ши стра́сть поно́сную?

Аще и́мать Сла́ву на сихо́внѣ, глаго́ли вече́рній.
И ны́нѣ, богоро́диченъ или́ крестобогоро́диченъ.



[НА ЛИТУРГІИ,

Проки́менъ, гла́съ 4: Ди́венъ Бо́гъ во святы́хъ Свои́хъ, Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Апо́столъ къ Кори́нѳяномъ, зача́ло 181. Другíй къ Гала́томъ, зача́ло 208. Аллилу́ія, гла́съ 1: Терпя́ потерпѣ́хъ Го́спода, и вня́тъ ми́ и услы́ша моли́тву мою́. [Сти́хъ: Поста́ви на ка́мени но́зѣ мои́ и испра́ви стопы́ моя́]. Ева́нгеліе Матѳе́я, зача́ло 62, или́ Ма́рка, зача́ло 21. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Примѣчаніе:
[1] Исправлено по: «Великій Сборникъ» (Часть I-я: Часословъ, Воскресный октоихъ и Общая минея. Jordanville, 1952). Въ изданіи 1864 года: «Бляду́щая загради́...».

Источникъ: Мине́а Общая. — Кíевъ: Въ тѵпогра́фіи Кíево-Пече́рской Ла́ѵры, 1864. — Л. 64 об. – 67 об.

/ Къ оглавленію раздѣла /


Наверхъ / Къ титульной страницѣ

0