Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 14 декабря 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

КАНОННИКЪ

КАНОННИКЪ.

Пра́вило моле́бное преподо́бнымъ отце́мъ Пече́рскимъ и всѣ́мъ святы́мъ, въ Ма́лой Россíи просія́вшимъ.
Пѣва́емое когда́ и гдѣ́ кто́ изво́литъ.

Стихи́ры, гла́съ 1. Подо́бенъ: Прехва́льніи му́ченицы.

По́стницы богому́дріи, ва́съ не потаи́ла е́сть земля́, но Бо́гъ изъяви́, во всѣ́хъ конца́хъ вселе́нныя чудеса́ излива́ющихъ и мѵ́ро исцѣле́ній источа́ющихъ, Тому́ помоли́теся дарова́ти душа́мъ на́шимъ ми́ръ и ве́лію ми́лость.

Ра́дуйся, ту́чнѣйшая Бо́жія горо́ Пече́рская, усыре́нная Ду́хомъ, ра́дуйся, раю́ насажде́ній безсме́ртныхъ: въ тебѣ́ бо благоволи́ водворя́тися всегда́ Бо́гъ на́шъ, обогаща́ющій тя́ чуде́съ излія́ніи, я́же источа́еши преподо́бными Его́.

Христолюби́вый гра́де Кíеве, въ Бо́зѣ лику́й, веселя́ся, содержа́щъ, я́ко многоцѣ́нное сокро́вище, гра́жданы твоя́ въ нѣ́дрѣхъ свои́хъ, святы́я по́стники же и му́ченики, съ ни́ми же сочиня́ется и Варва́ра присносла́вная, ея́же мо́щи добро́ту тебѣ́ прилага́ютъ.

Ра́дуйтеся, преподо́бныхъ по́стниковъ честна́я пребыва́нія, Ду́ха Боже́ственнаго испо́лненная, облагоуха́ющая на́ша чу́вствія ду́шъ же и тѣле́съ, и́миже на не́бо восхо́димъ и земны́я прогоня́емъ сла́сти, Христа́ ви́дяще, святы́мъ вѣнцы́ подава́юща.

Сла́ва: Пріиди́те, восхва́лимъ, вѣ́рніи, святы́хъ тве́рдая исправле́нія, и́миже до́брѣ Творцу́ благоугоди́ша до́бліи, и съ Дави́домъ Бо́гу воспои́мъ: на́мъ же зѣло́ че́стни бы́ша дру́зи Твои́, Го́споди, зѣло́ утверди́шася нача́льства и́хъ въ Тебѣ́, Христѣ́ и Спаси́тели ду́шъ на́шихъ.

И ны́нѣ: Тя́, честнѣ́йшую Царе́ву пала́ту, молю́, Многопѣ́тая: у́мъ мо́й очи́сти, оскверне́нный вся́кими грѣхи́, и пребыва́ніе кра́сное пребоже́ственныя Тро́ицы сотвори́, я́ко да держа́ву Твою́ и безмѣ́рную ми́лость велича́ю, спаса́емь, непотре́бный ра́бъ Тво́й.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Пеще́ру разбо́йниковъ, святи́лище сотвори́ Изра́иль; по́стницы же, разбо́йниковъ обита́нія хра́мы Бо́жія содѣ́лаша.

Сти́хъ: Восхва́лятся преподо́бніи во сла́вѣ [и возра́дуются на ло́жахъ свои́хъ].

Илію́ и Моисе́я, подража́юще и́стинно, въ гора́хъ и ка́менехъ Бо́жіяго наслажда́етеся явле́нія, сла́вніи.

Сти́хъ: Блаже́ни вси́, боя́щійся Го́спода, [ходя́щіи въ путе́хъ Его́].

Крилѣ́ голуби́нѣ, отъ Бо́га пріе́мше, возлетѣ́сте весьма́ въ Бо́жія упокое́нія, преподо́бніи, ду́хомъ.

Сла́ва, гла́съ то́йже:

Преподо́бніи отцы́, мíра красоты́ и пи́щу вре́менную возненави́дѣвшіи, и и́ноческое житіе́ возлю́бльшіи, а́нгеломъ собесѣ́дницы яви́стеся, и свѣти́льницы многосвѣ́тліи вселе́нныя, чудесы́ свои́ми, я́коже второ́е со́лнце, сія́юще, о всѣ́хъ на́съ моли́теся ко Го́споду, соверша́ющихъ свяще́нную па́мять ва́шу; мы́ бо ча́да ва́ша и о́вцы слове́сныя уче́ній ва́шихъ, и ва́съ на по́мощь призыва́емъ, прося́ще ва́ми прія́ти ми́ръ и ве́лію ми́лость.

И ны́нѣ, богоро́диченъ:

Бо́га, изъ Тебе́ воплоти́вшагося, разумѣ́хомъ, Богоро́дице Дѣ́во, Того́ моли́ о спасе́ніи ду́шъ на́шихъ.

На Бо́гъ Госпо́дь: Тропа́рь, гла́съ 2:

Егда́ снидо́сте во гро́бы, и самѣ́хъ себе́ заключи́сте, тогда́, стра́сти умертви́вше плотскíя, спогребо́стеся Христу́, богоно́сніи, и діа́вольскія въ подзе́мныхъ разруши́сте огра́ды, сего́ ра́ди а́нгели вѣнцы́ съ небе́съ ва́мъ подаю́тъ.

Сла́ва и ны́нѣ:

Вся́ па́че смы́сла, вся́ пресла́вная Твоя́, Богоро́дице, та́инства, чистотѣ́ запеча́танной и дѣ́вству храни́му, Ма́ти позна́лася еси́ нело́жна, Бо́га ро́ждши и́стиннаго, Того́ моли́ спасти́ся душа́мъ на́шимъ.

Та́же, псало́мъ 50-й: Поми́луй мя́, Бо́же...

Кано́нъ преподо́бнымъ отце́мъ Пече́рскимъ. Гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Мно́гими окруже́нный опечале́ньми, отъ грѣхо́въ мои́хъ напа́дающими мнѣ́ неща́дно, къ ва́мъ притека́ю, о богоно́сніи! движа́ ва́ша моли́твы въ по́мощь.

Анто́ніе богоно́се и Ѳеодо́сіе богому́дре, въ Россíи и́нокомъ первонача́льницы и наста́вницы, пе́рвую мя́ погу́бльша ума́ добро́ту ва́шими къ Бо́гу хода́тайствы па́ки удо́брите, наставля́юще мя́ ко покая́нію.

Стефа́не всехва́льне и Ни́коне всече́стне, Христо́ва ста́да бы́вшіи предводи́теле и о́ное упа́сшіи богоуго́дно въ неусы́пныхъ стра́жахъ нощны́хъ, Бо́га мнѣ́ ва́шими благопрія́тными моли́твами уми́лостивите.

Сла́ву мíра сего́ и вся́ кра́сная нивочто́же вмѣни́вый, всеизря́дне Варлаа́ме, сла́вы небе́сныя прича́стника покажи́ мя твои́ми моли́твами.

Сла́ва: Боже́ственне Влади́міре царю́, Рома́не же съ Дави́домъ, му́чениковъ красота́, ча́да су́ще о́наго, со Еле́ною, ва́шею пра́бабою, Бо́гу мя́ предста́вите.

И ны́нѣ: Твои́ми моли́твами къ Своему́ Сы́ну, Богоро́дице, ско́ро спаси́ мя отъ лю́тыхъ: Тебе́ бо помо́щницу су́щіи въ беда́хъ вси́ стяжа́хомъ всегда́.

Катава́сія: Моли́те Бо́га о на́съ, преподо́бніи отцы́ на́ши Анто́ніе и Ѳеодо́сіе и вси́ преподо́бніи Пече́рскіи, я́ко мы́ усе́рдно къ ва́мъ прибѣга́емъ, ско́рымъ помо́щникомъ и моли́твенникомъ о душа́хъ на́шихъ.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Безме́здніи вра́чеве яви́стеся, исцѣле́нія пресла́вно соверша́ющіи, Даміа́не и Ага́пите блаже́нніи, тѣ́мже и а́зъ къ ва́мъ прихожду́, о святíи! исцели́те ми я́звы душе́вныя и теле́сныя, не́мощну су́щу.

Ониси́форе блаже́нне, предви́дѣвый вся́ и предвѣща́я я́снѣ, со Іеремíемъ же Матѳе́е, я́ко проро́цы, предви́дяще, бѣды́, належа́щія ско́ро, мя́ изба́вите моли́твами ва́шими.

Исаа́кій, премно́гими страда́ніи низложи́вый діа́вольскую пре́лесть, Тя́, Христе́, мо́литъ: изба́ви на́съ отъ того́ искуше́ній и спаси́, Многоми́лостиве.

Лавре́нтіе, затвори́вый себе́ Го́сподеви и дерзнове́ніе мно́гое стяжа́вый отту́ду къ Нему́, не преста́й моля́ся всегда́, е́же изъя́тися на́мъ отъ разли́чныхъ страсте́й.

Сла́ва: Предвари́те, раби́ Бо́жіи, пре́жде да́же не поглоти́тъ мя́ до конца́ всегуби́тель, и изба́вите вско́рѣ ду́шу мою́ отъ лю́тыхъ и ми́ръ вожделѣ́нный да́руйте.

И ны́нѣ: Зо́лъ мно́жество смуща́етъ мя́ отвсю́ду, и беззако́ній пото́цы обурева́ютъ мя́, потщи́ся, предвари́вши и настоя́щія ну́жды изми́ мя, Влады́чице, хода́тайствомъ Твои́мъ.

Сѣда́ленъ, гла́съ 8. Подо́бенъ: Повелѣ́нное та́йно.

Повелѣ́нная отъ Бо́га те́плѣ исполня́юще и совѣ́ты свои́ми пра́во ше́ствующіи, въ пусты́няхъ, и гора́хъ, и разсѣ́линахъ земны́хъ обита́ша великоду́шніи по́стницы, вся́каго лише́ни человѣ́ческаго утѣше́нія, тѣ́мже труды́ плодо́въ свои́хъ пожина́юще, ны́нѣ съ Го́сподемъ ра́дуются.

Сла́ва, и ны́нѣ:

Безпло́тныхъ Твои́хъ, Христе́, и Предте́чи Твоего́, и учени́къ, проро́къ и му́ченикъ, преподо́бныхъ и всѣ́хъ святы́хъ и Богоро́дицы Неискусому́жныя и благíя Ма́тере Твоея́ моли́твами, умоле́нъ бы́въ, да́ждь на́мъ во свѣ́тѣ Твое́мъ ходи́ти и сподо́би на́съ улучи́ти Ца́рствіе Твое́ за милосе́рдіе ми́лости Твоея́.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́, и просла́вихъ Твое́ Божcтво́.

Али́піе, до́брѣ соблюды́й о́бразъ Бо́жій въ душѣ́ свое́й и зра́ки изобразу́я святы́хъ, немощны́я исцѣли́вый тро́стію свое́ю, изобрази́ и во мнѣ́ добродѣ́тельныя ви́ды, всесла́вне.

Григо́ріе всеблаже́нне, чуде́съ благода́ть отъ Бо́га пріе́мый и тезоиме́ніе отъ дѣ́лъ подо́бныхъ ны́нѣ предвари́въ, удиви́ и на на́съ твои́ми моли́твами Его́ благода́ть.

Моисе́я, чистоты́ храни́теля крѣ́пкаго, я́ко о́наго прекра́снаго Іо́сифа, дви́жемъ, Христе́, къ Тебѣ́ въ моли́тву: поми́луй на́съ.

Іоа́нне многострада́льне, и́же смире́нное тѣ́ло свое́ стесне́ніи неосла́бными порабоще́й и жи́во погребы́йся, жела́я разрѣши́тися и со Христо́мъ соедини́тся, отъ тли́ мя́ изба́ви.

Сла́ва: Про́хоре всеблаже́нне, хлѣ́бы су́щими отъ бы́лій и со́лію отъ пе́пела гла́домъ та́ющія препита́вый, умоли́ Христа́ препита́ти и на́съ, душе́внымъ гла́домъ исчеза́ющихъ.

И ны́нѣ: Не оста́ви мене́, къ Тебѣ́ прибѣга́юща, въ ра́дованіе бѣсо́мъ бы́ти, Влады́чице, но необори́мая Твоя́ моли́тва да низложи́тъ си́хъ совѣ́тованія.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Ма́рко, его́же повелѣ́нія ме́ртвіи послу́шаху, умерщвле́на мя́ паде́ніи возста́вивъ, моли́твами твои́ми спаси́.

Ѳео́филе треблаже́нне, сле́зъ ра́ди очи́стивый славолю́бія оскверне́ніе, и мнѣ́ моли́ дарова́тися избавле́нію.

Всеблаже́нне Іоа́нне, и́же бра́та твоего́ по преставле́ніи подвиже́ніемъ тѣ́ла твоего́ поче́тъ, и спа́слъ еси́ того́, Творца́ на́мъ ми́лостива сотвори́.

Одушевле́нная бы́вше сокро́вища, отъ сребролюби́ваго мучи́теля, тлѣ́нна сокро́вища у ва́съ истязу́ющаго, пострада́вшіи непови́ннѣ, небе́сныхъ сокро́вищъ прича́стника мя́ покажи́те, Васи́ліе и Ѳео́доре всеблаже́нніи.

Сла́ва: Іовлю терпѣ́нію подо́бяся, многовре́менную болѣ́знь претерпѣ́лъ еси́ усе́рдно, и ны́нѣ въ неболѣ́зненномъ сы́й поко́и, болѣ́зней мя́ вся́кихъ изба́ви, равноа́нгельне Пи́мене.

И ны́нѣ: Ви́ждь на́ша нало́ги, Многоми́лостиве, и сія́ я́ко Бо́гъ облегчи́, пріе́мь о на́съ моля́щуюся Ма́терь Твою́, Юже Ти́ во умилостивле́ніе приво́димъ.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Спиридо́не незло́биве, и́же о́гненную пе́щь ма́нтіею свое́ю угаси́лъ еси́, я́ко о́гнь, любо́вь вже́гъ въ се́рдцѣ свое́мъ, о́тче, ко Го́споду, тя́ молю́: я́же на ны́ веліа́рова угаси́ стреля́нія.

Никоди́ме, по́стниковъ сія́ніе, и́же никогда́же устнѣ́ возбрани́лъ еси́ воспѣва́ти во псалмѣ́хъ Влады́ку, не преста́й моля́ся Ему́ прилѣ́жно изба́вити вся́ отъ тли́, и бѣ́дъ, и скорбе́й, преподо́бне.

Распны́йся умерщвле́ніемъ пло́ти пе́рвѣе, отъ іуде́й же распны́йся второ́е, крѣ́пкій Евстра́тіе, и мно́гое дерзнове́ніе у Христа́ обрѣ́тъ, отъ бѣ́дъ изба́ви мя́.

Изба́ви мя́ твои́ми моли́твами, Ни́коне сла́вне, и́же мы́шцею Христо́вою высо́кою отъ плѣне́нія изба́вленъ, спа́слъ еси́ своего́ мучи́теля.

Сла́ва: Безсме́ртіе обрѣ́тъ о Христѣ́, безсме́ртнѣмъ Царѣ́ и Бо́зѣ, Аѳана́сіе блаже́нне, по сконча́ніи свое́мъ пожи́лъ еси́ во мно́гихъ лѣ́тѣхъ, пла́ча всегда́, тѣ́мже ны́нѣ оживи́ мя.

И ны́нѣ: Пречи́стая, Очище́ніе ро́ждши, Отцу́ примири́вшаго мíръ, вѣ́мъ, Чи́стая, я́ко раздражи́хъ Его́ безмѣ́рными мои́ми согрѣше́ніи, но молю́: уми́лостиви ми Того́ па́ки Ма́терними Твои́ми мольба́ми.

Конда́къ, гла́съ 8. Подо́бенъ: Взбра́нной.

Отцы́ всечестнíи, ли́че богокра́сный, чуде́съ мно́гихъ исто́чницы, мѵ́ро источа́ющіи, сокро́вища краснобога́тная Госпо́дня, въ земли́ сокрове́нная, не преста́йте, мо́лимъ вы́, о на́съ моли́тися ко Го́споду, да зове́мъ ва́мъ: ра́дуйтеся, всему́ мíру свѣти́льницы.

Икосъ:

Ангельски пожи́вшія на земли́, и а́нгеломъ равностоя́тели я́вльшіяся на небеси́, съ тѣ́мижде и неизрече́нныя о́ныя наслажда́ющіяся добро́ты, достоблаже́нныя отцы́ на́ша, помо́щники и засту́пники те́плыя, пріиди́те, вѣ́рніи, восхва́лимъ, къ ни́мъ вопію́ще: ра́дуйся, Анто́ніе, со́лнцу подо́бный свѣти́льниче; ра́дуйся, зерца́ло и о́бразе всѣ́мъ преподо́бнымъ Россíйскимъ; ра́дуйся, вторы́й Моисе́е, мы́сленныя скрижа́ли, добродѣ́тели твоя́ на́мъ отъ горы́ святы́я принесы́й. Ра́дуйся, Ѳеодо́сіе, ангелови́дный человѣ́че; ра́дуйся, звѣздо́ у́тренняя, тьму́ невѣ́дѣнія прогоня́ющая; ра́дуйся, забра́ло необори́мое отъ вра́гъ ви́димыхъ и неви́димыхъ. Ра́дуйтеся, вси́ преподо́бніи отцы́ на́ши Пече́рскіи; ра́дуйтеся, земнíи а́нгели и небе́сніи человѣ́цы; ра́дуйтеся, благоуха́нніи цвѣ́ти ра́йстіи; ра́дуйтеся, пребога́тая сокро́вища сокрове́нная въ земли́; ра́дуйтеся, би́серіе многоцѣ́нніи, отъ пеще́ры, а́ки отъ мо́ря, просія́вшіи; ра́дуйтеся, на́ша похвало́ и всѣ́мъ прибѣга́ющимъ къ ва́мъ изба́вителіе от бѣ́дъ; ра́дуйтеся, всему́ мíру свѣти́льницы.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Нико́лае чу́дне, помо́щниче въ ско́рбехъ, и́же о самѣ́мъ еди́нѣмъ сло́вѣ исцѣля́еши стра́сти немощны́хъ, изъяви́ся ско́ро, и отъ обдержа́щихъ мя́ скорбе́й изба́ви, и болѣ́зни се́рдца моего́ облегчи́.

Ера́зме му́дре, и́же бога́тство свое́ истощи́лъ еси́ во благолѣ́піе хра́ма Бо́жія, твои́ми моли́твами хра́мъ мя́ покажи́ духо́вный.

Сребролю́бія потопи́вый змíя сле́зъ ту́чами, Аре́ѳо сла́вне, я́ко имѣ́я дерзнове́ніе, моли́ся о на́съ ко Го́споду.

Ти́те блаже́нне, гнѣ́внаго бѣ́са смире́ніемъ попра́вый, и Пи́мене, по́стникомъ единоревни́телю, изба́вите мя́ отъ искуше́ній бѣсо́вскихъ ва́шими моли́твами.

Сла́ва: Анто́ніе му́чениче и тве́рдый Евста́ѳіе, вку́пѣ со Іоа́нномъ горды́ню Олге́рдову до земли́ низложи́вшіи, умерщвля́ющія мя́ стра́сти успи́те.

И ны́нѣ: На моле́ніе мое́ ны́нѣ умилосе́рдися и ра́дость въ печа́ли мѣ́сто да́руй ми́, да пою́ Тя́, Влады́чице, и вопію́ Сы́ну Твоему́: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

О, Ку́кшо му́чениче, свяще́нникомъ пра́вило, по́стникомъ и преподо́бнымъ украше́ніе, и́же въ про́повѣди Ева́нгелія со ученико́мъ твои́мъ честны́мъ коне́цъ пріе́мь, я́ко апо́столъ, моли́твами твои́ми и мене́ на пу́ть спасе́нія наста́ви.

Не́сторе богому́дре, житíй святы́хъ списа́телю пе́рвѣйшій и ревни́телю о́нѣмъ до́брый, сла́вы о́нѣхъ моли́твами твои́ми яви́ мя о́бщника.

Полика́рпе сла́вне, тѣ́хже житія́ святы́хъ коне́чнѣе исписа́вый и во еди́но собра́вый, въ кни́зѣ живо́тнѣй твои́ми моли́твами и мнѣ́ написа́тися сподо́би.

Яко жи́ви су́ще, богоно́сніи, и по сме́рти блаже́нному Діони́сію отъ среды́ гробо́въ отвѣща́сте: вои́стину воскре́се Госпо́дь! умерщвле́нна мя́ страстьми́ оживи́те.

Сла́ва: Евфроси́нію, ра́дованіе По́лоцкое и дѣ́вамъ сія́ніе, Христе́ мо́й, Тебѣ́ привожду́ моли́твенницу, ея́же ра́ди спаси́ мя.

И ны́нѣ: Царя́ Небе́снаго ро́ждшая, дерзнове́ніе Ма́тернее я́ко иму́щи къ Нему́, Дѣ́во, изба́ви на́съ отъ бѣ́дъ.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Михаи́ле, Иларіо́не, Пе́тре, Алексíе, Іо́но, Фо́тіе и Кипріа́не, боже́ственніи іера́рси, Ефре́ме, Нико́лае, Ники́то, Иса́іе, Ми́но же, Луко́ и Ѳеокти́сте, Бо́га на́мъ уми́лостивите.

Лео́нтіе, Стефа́не и Ге́рмане, Ни́фонте, Мари́не, Евѳи́міе, Лавре́нтіе же, Діони́сіе и Си́моне, я́ко пріе́мшіи вла́сть отъ Бо́га, проси́те и мнѣ́ оставле́ніе.

Си́моне іера́рше, и́же Агнца Бо́жія пе́рвѣе принося́й въ же́ртву Вседержи́телю, послѣди́ же и себе́ сама́го, я́ко а́гня, приведы́й въ же́ртву, спаси́ мя твои́ми моли́твами.

Священному́чениковъ украше́ніе, Мака́ріе блаже́нне, и́же пре́жде да́же прія́ти престо́лъ на земли́ чу́вственный, на престо́лы мы́сленныя препосла́лся еси́, Бо́гу мя́ примири́.

Сла́ва: Привожду́ Ти, о Всеще́дре, Іуліанíю, присносвѣтя́щую свѣщу́, еле́емъ благода́ти обдержи́мую, ея́же моли́твами отъ вся́каго зла́ соблюди́ мя.

И ны́нѣ: Со святы́ми а́нгелы, съ боже́ственными апо́столы, со сла́вными му́ченики и всѣ́ми преподо́бными Своего́ моли́ Сы́на и Бо́га, Богороди́тельнице Пречи́стая, отъ бѣ́дъ изба́вити ду́ши на́ша.

На хвали́техъ стихи́ры, гла́съ 1. Подо́бенъ: Прехва́льніи му́ченицы.

Не терпя́ бѣсо́мъ себе́ сама́го принести́ заколе́ніе, Бо́гу вся́ческихъ прине́слъ еси́ же́ртву непоро́чную и пресоверше́нную, Іоа́нне сла́вне, съ тобо́ю же и оте́цъ спожре́ся. Оба, сла́вяще Христа́ ва́шими удесы́, непреста́нно Того́ о на́съ моли́те.

Му́чениче всехва́льне Христо́въ Михаи́ле, мудрова́ніе я́коже ца́рь неужа́сное имѣ́я, не стерпѣ́лъ еси́ тва́ри послужи́ти, па́че Сотво́ршаго, Его́же ра́ди вся́кія ра́ны претерпѣ́лъ еси́ и лю́тую сме́рть: сего́ ра́ди тя́ Христо́съ Госпо́дь въ го́рняя преста́вилъ е́сть Ца́рствія.

Ви́дя царя́ Михаи́ла, страда́льче Ѳео́доре, за владѣ́ющаго всѣ́ми Бо́га умрѣ́ти изво́лившаго па́че, не́жели ца́рствовати, сла́ву оста́вилъ еси́ и вся́кую сла́дость увяда́емую, и послѣ́довалъ еси́ ему́ со вся́кимъ до́блествомъ, сего́ ра́ди со Христо́мъ спрославля́етеся.

Сла́ва, гла́съ 8:

Преподо́бніи отцы́, поучи́вшеся де́нь и но́щь въ зако́нѣ Госпо́дни, досто́йни бы́сте древеса́ живо́тнаго са́да бы́ти, и пло́дъ ва́шъ страда́ньми и вѣнцы́ процвѣте́; дерзнове́ніе у́бо иму́ще ко подвигополо́жнику Христу́ Бо́гу, и на́мъ испроси́те очище́ніе и ве́лію ми́лость.

И ны́нѣ, богоро́диченъ:

Богоро́дице, му́ченикомъ украше́ніе, по́стникомъ сія́ніе, іера́рхомъ наслажде́ніе, царе́мъ благолѣ́піе, проро́комъ сла́во, проповѣ́дникомъ заложе́ніе, и всѣ́мъ святы́мъ похвало́, Христа́ моли́ съ ни́ми о рабѣ́хъ Твои́хъ, изба́витися вся́каго озлобле́нія.

Моли́тва ко всѣ́мъ преподо́бнымъ отце́мъ Пече́рскимъ.

Преблаже́нніи, присносла́вніи, преподо́бніи отцы́, святíи первонача́льницы Пече́рскіи, Анто́ніе и Ѳеодо́сіе, свы́ше Бо́гомъ дарова́нніи, дво́ице благода́тная, сою́зомъ соверше́нства, любо́вію къ Бо́гу и бли́жнему соедине́нная, не то́чію въ жи́зни се́й вре́менной друголю́бнѣ труди́вшіися о по́льзѣ душе́вной и́ночествующихъ и въ мíрѣ благоче́стно живу́щихъ, но и по отше́ствіи свое́мъ въ жи́знь вѣ́чную обѣща́вшіися посо́бствовати всѣ́мъ и моли́тися ко Го́споду Бо́гу и Пресвятѣ́й Богоро́дице о спасе́ніи всѣ́хъ, наипа́че грѣ́шниковъ, отъ ни́хже пе́рвый е́смь а́зъ. Къ ва́мъ, уго́дникомъ Бо́жіимъ и Пресвяты́я Богоро́дицы, я́ко и́стиннымъ хода́таемъ спасе́нія, притека́я, смире́нно молю́ся: предста́ните мнѣ́ въ по́мощь, у́зами грѣхо́въ свя́занному, и помоли́теся о мнѣ́, ку́пно же и всѣ́хъ наслѣ́дниковъ богоуго́днаго ва́шего житія́ и снаслѣ́дниковъ Ца́рствія небе́снаго подви́гните на многомогу́щія моли́твы, всѣ́хъ бо ва́съ, недосто́йный, призыва́ти на заступле́ніе дерза́ю, жела́я отъ всѣ́хъ грѣхо́въ мои́хъ ва́ми свобожде́ніе получи́ти. Вси́ преподо́бніи отцы́ Пече́рскіи, богоуго́дно труди́вшіися и нетлѣ́нно въ пеще́рахъ почива́ющіи, святíи іера́рси, священнонача́льницы, священнои́ноцы, по́стницы, му́ченицы, дѣ́вственницы, чудотво́рцы, вы́ есте́ ро́дъ избра́нъ, ца́рское свяще́ніе, язы́къ свя́тъ, лю́діе обновле́нія, извѣсти́теліе добродѣ́телей изъ тмы́ тлѣ́нныя сея́ жи́зни Призва́вшаго ва́съ въ чу́дный свѣ́тъ; ва́съ бо ни земля́ потаи́ла е́сть, а́ще же кíихъ и потаи́ла, подъ спу́домъ почива́ющихъ, но, вѣ́рую, я́ко всѣ́хъ не́бо прія́ло е́сть, и я́ко сла́вы ва́шея исповѣ́сти, та́ко и име́нъ ва́шихъ исчести́ ми не возмо́жно, мно́жеству бо звѣ́здному уподо́бистеся, ра́звѣ Са́мъ, исчита́яй мно́жество звѣ́здъ и всѣ́мъ и́мъ имена́ нарица́яй, исповѣ́данный отъ ва́съ на земли́ Ца́рь сла́вы, Христо́съ, всѣ́хъ ва́съ, преподо́бныхъ Свои́хъ, по и́мени напи́санныхъ на небесѣ́хъ, исчита́етъ и соверше́нно исповѣ́дуетъ предъ Отце́мъ Свои́мъ Небе́снымъ. Помози́те мнѣ́, грѣ́шному, въ сокруше́ніи и смире́ніи се́рдца моего́ припа́дая, молю́ся ва́мъ, свѣ́тъ су́ще мíру и свѣти́льницы, изъ-подъ спу́да пеще́рнаго поста́влени душа́ми на свѣ́щницѣ небе́сномъ, осіява́йте мя́, омраче́ннаго навѣ́ты вра́жіими, свѣ́томъ благода́ти свы́ше, да въ не́мъ ходя́щъ, не преткну́ о ка́мень ноги́ моея́. Вы́ есте́ сосу́ди, въ че́сть избра́нніи, испо́лненніи благода́ти Бо́жія оби́льно, молю́: сподо́бите мя́, грѣ́шнаго, отъ исполне́нія ва́шего прія́ти. Вы́ есте́ со́ль земли́, а́зъ же е́смь земля́, бу́дите мнѣ́ со́лію, соблюда́юще всецѣ́ло ду́шу и тѣ́ло мое́ отъ согни́тія грѣхо́внаго. Вси́ вы́, преподо́бніи Пече́рскіи, вра́чеве благода́тніи, исцѣля́ющіи вся́къ неду́гъ и вся́ку я́зю въ лю́дехъ, молю́ся ва́мъ, святíи: исцѣли́те и моя́ душе́вныя и тѣле́сныя я́звы, да досто́йно прославля́ю Бо́га въ души́ и тѣлеси́ мое́мъ, всѣ́хъ ва́съ во все́мъ благодаря́. Вы́ бы́сте а́лчущіи и жа́ждущіи пра́вды, ны́нѣ же блаже́ннаго обѣ́да въ Ца́рствіи Бо́жіи досто́йно насыща́етеся. Смире́нно колѣ́на се́рдца моего́ преклоня́я, молю́ ва́съ: подади́те и мнѣ́, а́лчущему и жа́ждущему, тоя́жде благода́ти, поне́ отъ крупи́цъ па́дающихъ отъ трапе́зы ва́шея, и насыти́те ду́шу мою́ тщу́ и ду́шу а́лчущу испо́лните бла́гъ. О, всеще́дріи госпо́діе! всѣ́хъ ва́съ до́брый Па́стырь пасе́тъ, и ничто́же ва́съ уже́ лиши́тъ. Ва́шими благопрія́тными моли́твами содѣ́лайте, да и мене́, а́ще и недосто́йнаго, ничто́же лиши́тъ бла́го; мо́жете бо, преподо́бніи вси́, всѣ́мъ вся́ о укрѣпля́ющемъ всѣ́хъ ва́съ Іису́сѣ Христѣ́. Бу́дите, уго́дницы Бо́жіи, и мнѣ́, окая́нному, вси́ вся́, да съ про́чіими всѣ́ми и мене́, къ ва́мъ всеусе́рдно притека́ющаго, приобря́щете. Аще бо мно́го мо́жетъ моли́тва еди́наго пра́веднаго, поспѣшеству́емая во благо́е, кольми́ па́че ва́съ, пра́ведныхъ и преподо́бныхъ мно́гихъ, мо́гутъ моли́твы вся́ у всеми́лостиваго Бо́га. Не два́ или́ тріе́ во и́мя Христо́во со́брани есте́, и не два́ совѣща́стеся на земли́ проси́ти во и́мя Христо́во Отца́ Небе́снаго, но ве́ліе мно́жество ва́съ, о преподо́бніи! Помоли́теся о мнѣ́, еди́номъ отъ грѣ́шныхъ, а́зъ же вѣ́рую, я́ко Бо́гъ, прославля́емый въ совѣ́тѣ всѣ́хъ ва́съ, преподо́бныхъ Свои́хъ, услы́шитъ проше́ніе со́бранныхъ и совѣща́нныхъ во и́мя Его́. Изгуби́хъ, окая́нный, грѣхопаде́ньми мои́ми благода́ть Бо́жію, вы́, святíи Пече́рскіи, мно́жествомъ свои́мъ поищи́те, молю́, вои́стинну обря́щете. Увы́ мнѣ́! затворе́ны предо мно́ю, недосто́йнымъ, две́ри милосе́рдія, вы́, преподо́бніи уго́дницы Бо́жіи, вси́ потолцы́те, и отве́рзутся ра́ди ва́съ мнѣ́, грѣ́шному, я́ко да и а́зъ къ ва́шему мно́жественному числу́, съ бо́льшею ва́шею сла́вою, ва́шими святы́ми моли́твами, причте́нъ бы́ти сподо́блюся. О достохва́льніи, преподо́бніи отцы́ Пече́рскіи! вы́ есте́ ра́дованіе Царя́ Небе́снаго, вы́ благопрія́тная же́ртва Вы́шняго, вы́ гра́ждане но́ваго Іерусали́ма, вы́ наслѣ́дницы Ца́рствія Бо́жія! Та́ко бо вси́ теко́сте, я́ко и жела́емое пости́гнусте. Молю́, и мои́мъ нога́мъ благо́е тече́ніе въ пути́ за́повѣдей Госпо́днихъ содѣ́лайте и жела́емое пости́гнути грѣ́шнаго мене́ сподо́бите ва́шими многомо́щными хода́тайствы, да вше́дъ въ до́мъ Ца́рствія вѣ́чнаго, возра́дуюся и возвеселю́ся, благодаря́ всѣ́хъ ва́съ, преподо́бныхъ, о таково́й любви́ ва́шей ко бли́жнему, и ку́пно съ ва́ми восхвалю́ и возвели́чу во хвале́ніи Еди́наго въ Тро́ицѣ Пресвятѣ́й, отъ всея́ тва́ри на небеси́ и на земли́ хвали́маго, благослови́маго и покланя́емаго Всеми́лостиваго Бо́га, Отца́ и Сы́на и Свята́го Ду́ха, съ Пречи́стою и Присноблаже́нною Дѣ́вою Богоро́дицею, ны́нѣ, и при́сно, и во вѣ́ки вѣко́въ, ами́нь.

Досто́йно е́сть... Трисвято́е, и по Отче на́шъ.
Тропа́рь: Егда́ снидо́сте во гро́бы... Сла́ва, и ны́нѣ, богоро́диченъ: Вся́ па́че смы́сла...

И отпу́стъ: Го́споди Іису́се Христе́, Бо́же на́шъ, моли́твами Пречи́стыя Твоея́ Ма́тере, преподо́бныхъ и богоно́сныхъ оте́цъ на́шихъ Анто́нія и Ѳеодо́сія и про́чихъ чудотво́рцевъ Пече́рскихъ, и всѣ́хъ святы́хъ, поми́луй и спаси́ на́съ, я́ко Бла́гъ и Человѣколю́бецъ, ами́нь.

Источникъ: Ака́ѳисты съ кано́ны, и про́чая душеполе́зная моле́нія. — Кíевъ: Въ Тѵпогра́фіи Кіевопече́рской Ла́ѵры, 1754. — Л. 258-271.

/ Къ оглавленію раздѣла /


Наверхъ / Къ титульной страницѣ

0