«ОСАННА» — ОДИНЪ ИЗЪ ПРОЕКТОВЪ «РУССКАГО ПОРТАЛА»

Сайтъ основанъ 4 Апрѣля 2011 г. (17 Апрѣля 2011 г. по н. ст.) въ день Входа Господня въ Іерусалимъ — Недѣлю Ваій.
RSS-каналъ сайта — http://www.russportal.ru/news/rss.php?h=8.         Разсылка новостей — http://www.russportal.ru/subscribe

Изъ слова свт. Іоанна, архіеп. Шанхайскаго и Санъ-Францисскаго († 1966 г.)

Православная Церковь, исполняя наставленіе апостола Павла молиться за царей, даже языческихъ, поскольку они являются защитниками порядка, а не гонителями Вѣры, всегда возносила моленіе Богу, чтобы сила крестная помогала уповающимъ на крестъ царямъ. Службы святому кресту по средамъ и пятницамъ, въ кои дни воспоминаются страданія Христовы, и въ другіе праздники Животворящаго креста полны такихъ моленій. Въ нихъ говорится: «Крестъ царей держава», «о тебѣ вѣрнѣйшіе царіе наши хвалятся, яко твоею силою исмаильтейскіе люди державно покаряюще», «побѣды благовѣрнымъ царемъ на сопротивныя даруя и Твое сохраняя Крестомъ Твоимъ жительство», «древо честное царемъ на варвары побѣду подающее»... Такими и тому подобными выраженіями наполнены службы кресту. — Замѣчательно, что многія изъ сихъ пѣснопѣній написаны святыми Отцами, которые сами жестоко страдали отъ царей иконоборцевъ; они не прекращали моленія за царей, твердо вѣря, что послѣ злыхъ царей будутъ и цари благочестивые. Не измѣняли тѣ молитвы православные греки и южные славяне и находясь подъ властью турокъ или чужихъ чужеземныхъ властей, хотя бы они были иновѣрными. далѣе>> (Свт. Іоаннъ, архіеп. Шанхайскій и Санъ-Францисскій († 1966 г.)

Анонсы обновленій

6 МАІЯ. СЛУЖБА СВ. ПРАВ. ІОВУ МНОГОСТРАДАЛЬНОМУ

«Пра́веденъ и незло́бивъ, и́стиненъ же, и непоро́ченъ, и вѣ́ренъ, и вся́кія огреба́яся, Іове, злы́я ве́щи, позна́нъ бы́лъ еси́, блаже́нне, укра́шенъ добродѣ́тельми я́ко вои́стинну и благоче́стіемъ сія́я. Тѣ́мже тя́ ублажа́емъ и свято́е твое́ дне́сь и честно́е пра́зднуемъ, ра́дующеся, торжество́. — Бога́тствомъ благоче́стія, я́ко багряни́цею многоцѣ́нною, укра́шенъ, непоро́чный Іове, ми́лостію, пра́вдою, я́коже боже́ственнымъ вѣнце́мъ, одѣ́янъ, надъ страстьми́ томя́щими ты́ ца́рствовалъ еси́. Тѣ́мже къ ца́рствомъ разу́мнымъ преста́вился еси́, Царю́, пресла́вне, Вѣ́чному предстоя́ти. — Іова, непобѣди́маго во искуше́ніихъ бы́вша, пло́ти своея́ я́звами столпа́ непоколеби́маго, му́жеству забра́ло, всѣ́мъ позна́на бы́вша мудролю́бнымъ по́мысломъ, діа́волу жа́ла сокруши́вша, боже́ственнаго и богому́драго, благочести́вымъ утвержде́ніе, Госпо́дня непоро́чнаго восхва́лимъ уго́дника. — Іова непоро́чнаго и чистѣ́йшаго, превысо́каго столпа́ и непобѣди́маго хитростьми́ врага́ бы́вша ду́хомъ, вси́ ублажи́мъ и вѣ́рно восхва́лимъ, вели́ка уго́дника Христу́ бы́вшаго, и сего́ прилѣ́жно моля́ща спасти́ отъ бѣ́дъ ду́ши на́ша...» (Кíевъ, 1893) далѣе...

5 МАІЯ. СЛУЖБА СВ. ВЕЛИКОМУЧЕНИЦѢ ИРИНѢ

«Багряни́цею отъ кро́ве твоея́ свѣ́тло, всечестна́я, одѣ́явшися, востекла́ еси́, къ Нему́же вожделѣ́ла еси́, Царю́, и Зижди́телю всѣ́хъ, и Го́споду, отъ Него́же побѣ́дный вѣне́цъ вои́стинну прія́ла еси́, съ Ни́мъ же ны́нѣ ца́рствуеши, я́ко дѣ́ва и му́ченица многострада́льная. — Огня́ паля́щаго стремле́ніе стерпѣ́ла еси́, прехва́льная, и строга́нія вся́ тѣле́сная, взира́ющи къ воздая́ніемъ та́мошнимъ, всечестна́я, я́же еди́ный Іису́съ предугото́ва лю́бящимъ и те́плѣ Того́ жела́ющимъ, я́ко Жениха́ ду́шъ краснѣ́йшаго. — Ослади́вшися любо́вію Христо́вою, бо́ги возненави́дѣла еси́ язы́ческія и безду́шныя истука́нныя, Ири́но сла́вная: богоразу́мія сто́лпъ явле́ннѣйшій себе́ зря́щимъ возста́вила еси́, я́ко пострада́вши, и тече́ніе сконча́вши, и вѣ́ру непоро́чну соблю́дши. — Ми́ръ тебѣ́ мно́гъ прибы́сть, му́ченице, разрѣ́шшися пло́ти по болѣ́знехъ мно́гихъ: ра́дуяся бо, Жени́хъ на небесѣ́хъ тя́ горѣ́ прія́тъ, всепросвѣще́ну, и страда́ніемъ облиста́ющу, и въ черто́гъ Боже́ственный введе́ ра́дующуся...» (Кíевъ, 1893) далѣе...

4 МАІЯ. СЛУЖБА ПЕЧЕРСКОЙ ИКОНѢ ПРЕСВЯТОЙ БОГОРОДИЦЫ

«О, ди́вное чу́до! Пречи́стый ли́къ Богома́тере самопису́ется, и у́жаса исполня́ются Ея́ повелѣ́ніемъ мусíю кладу́щіи гре́честіи иконопи́сцы въ небеси́ подо́бнѣй це́ркви Пече́рстѣй и тре́петно взыва́ютъ къ Первообра́знѣй: Чи́стая, ра́дуйся, на́съ не оставля́ющая, Госпо́дь съ Тобо́ю. — Непости́жно явле́ніе ико́ны Богоро́дицы на стѣнѣ́ Пече́рскія це́ркве и ди́вно сія́ніе, со́лнца свѣтлѣ́йшее, исходя́щее отъ нея́, превосхо́дитъ же у́мъ земноро́дный и ужаса́етъ явле́ніе Ду́ха Всесвята́го въ ви́дѣ голуби́нѣ, отъ о́браза чуде́снаго, подаю́щаго на́мъ Собо́ю ве́лію ми́лость. — Пресла́вное ны́нѣ чу́до, ди́вно явле́ніе свѣ́тлаго о́браза Пречи́стыя Богоро́дицы съ Предвѣ́чнымъ Младе́нцемъ ви́дяще, иконопи́сцы гре́честіи вку́пѣ съ преподо́бнымъ Али́піемъ отъ души́ сла́вляху Ю, съ ни́ми же и мы́ недосто́йными усты́ отъ се́рдца вопіе́мъ Обра́дованнѣй: ра́дуйся, Цари́це, на́съ не оставля́ющая. — Кто́ не удиви́тся и не просла́витъ Засту́пницу ро́да на́шего, чуде́сно явля́ющую е́же о на́съ промышле́ніе въ сія́ющемъ ли́кѣ Свое́мъ, незри́мо изображе́нномъ въ благода́ти испо́лненной це́ркви Пече́рстѣй, е́же ви́дяще и благоговѣ́йно воспомина́юще, благода́рно вси́ воззове́мъ Обра́дованнѣй: ра́дуйся, на́ша и́стинная Ма́ти, Пече́рская похвало́...» (Кíевъ, 2007) далѣе...

4 МАІЯ. СЛУЖБА СВ. ПРЕПОДОБНОМУЧ. ПЕЛАГІИ ТАРСІЙСКОЙ

«Егда́ манове́ніемъ боже́ственнымъ боже́ственными огласи́лася еси́ глаго́лы, блаже́нная, я́коже земля́, сла́вная, тучна́, прія́ла еси́ серде́чными брозда́ми сѣ́мя слове́сное и стори́чествующій кла́съ прорасти́ла еси́ всѣ́мъ, вѣ́рно чту́щимъ тя́, му́ченице, вои́стинну, Пелагíе, сердца́ благода́тію наслажда́ющи. — Еди́наго рачи́теля Христа́ добро́ту взыска́вши, добро́ты мíра ми́мо текла́ еси́, къ присноживы́мъ же исто́чникомъ потща́лася еси́ свята́го креще́нія, и, си́хъ напо́лншися, жа́ждею страда́нія а́біе распали́лася еси́. Тѣ́мже, зѣло́ въ разжже́нъ сосу́дъ вше́дши усе́рдно, конца́ боже́ственнаго сподо́билася еси́. — Невѣ́ста избра́нна и чиста́, отъ Неискусому́жныя Рожде́нному невѣ́ста была́ еси́, пе́рвѣе вре́меннаго жениха́, сла́вная, ума́ пра́востію твое́ю возгнуша́вшися и земны́я обагре́ныя оде́жды: тѣ́мже вѣ́чнующую сла́ву и одѣя́ніе нетлѣ́нія, му́ченице Пелагíе, ны́нѣ воспрія́ла еси́. — Любо́вію Христо́вою ду́шу распа́льши, вошла́ еси́ му́жески въ зѣло́ разжже́нный, богому́драя, коно́бъ, Пелагíе, и была́ еси́ Влады́цѣ твоему́ благово́нная же́ртва. Тѣ́мже дне́сь, всесвяту́ю твою́ па́мять творя́ще, воспѣва́емъ тя́...» (Кíевъ, 1893) далѣе...

3 МАІЯ. СЛУЖБА ПРЕП. ѲЕОДОСІЮ, ИГУМЕНУ ПЕЧЕРСКОМУ

«Преподо́бне о́тче богоно́се Ѳеодо́сіе, вельми́ подвиза́вся во вре́меннѣй жи́зни пѣ́сньми, посто́мъ и бдѣ́ніемъ, о́бразъ бы́лъ еси́ твои́мъ ученико́мъ и ны́нѣ у́бо лику́еши со безпло́тными, Христа́ непреста́нно славосло́вя, отъ Бо́га Бо́жіе Сло́во и Изба́вителя, прекло́ншаго главу́ на Крестѣ́ и изба́вивша ле́сти ро́дъ человѣ́чь. Того́ моли́, Тому́ помоли́ся, преподо́бне, дарова́ти вселе́ннѣй ми́ръ и ве́лію ми́лость. — Преподо́бне о́тче богоно́се Ѳеодо́сіе, вои́стинну сподо́бился еси́ боже́ственныя жи́зни, чистото́ю и поще́ніемъ сію́ обрѣ́тъ, жи́въ бо преста́вился еси́ на и́стинный живо́тъ, всѣ́хъ отре́кся, со безпло́тными Христа́ непреста́нно славосло́вя, отъ Дѣ́вы неизрече́нно пло́ть пріе́мша, испрове́ргшаго а́дъ и воскреси́вшаго ме́ртвыя, я́же отъ вѣ́ка. Того́ моли́, Тому́ помоли́ся, преподо́бне, дарова́ти вселе́ннѣй ми́ръ и ве́лію ми́лость. — Отче богому́дре Ѳеодо́сіе, ты́, отъ утро́бы Бо́гу прибли́живъ тво́й смы́слъ, весьма́ прилѣжа́лъ еси́ Царю́ Вседержи́телю, плоды́ досто́йны принося́ Ему́ отъ твои́хъ по́двигъ, преподо́бне, соукраша́емь добродѣ́тельными вѣнцы́, тѣ́мъ благи́хъ обрѣ́лъ еси́ воспрія́тіе, досточу́дне...» (Кíевъ, 1785) далѣе...

3 МАІЯ. СЛУЖБА СВВ. МУЧЕНИКАМЪ ТИМОѲЕЮ И МАВРѢ

«До́блія въ му́ченицѣхъ, крѣ́пко пострада́вшія, и борца́ умори́вшія, и Христа́ возлюби́вшія, и мíръ возненави́дѣвшія, Сіо́на мы́сленнаго досто́йныя жи́тели, Ма́вру дне́сь и Тимоѳе́я, вѣ́рою соше́дшеся, восхва́лимъ согла́сно, мучениколю́бцы вси́. — Вяза́нія тѣле́сная, оче́съ же избоде́ніе, провертѣ́ніе уше́съ, коле́сное озлобле́ніе, ка́мене тя́жкаго обѣ́шеніе подъя́лъ еси́, Тимоѳе́е, низло́жь врага́ и къ боже́ственнѣй сла́вѣ возноси́мь, сла́вне. Сего́ ра́ди тя́, вѣ́рою соше́дшеся, моле́бно восхваля́емъ, сла́ва му́чениковъ и похвала́. — Свѣтолу́чными сія́ньми врага́ омрачи́ла еси́, чи́сто пострада́вши, Ма́вро сла́вная: коно́бная бо врѣ́нія, пе́рстовъ отъя́тіе, свѣ́щное жже́ніе, вре́менное пропя́тіе претерпѣ́ла еси́ и прешла́ еси́ къ боже́ственному поко́ю, идѣ́же ли́къ му́ченикъ всегда́ весели́тся. — Поче́тше Бо́га, омрачи́ша пре́лесть Тимоѳе́й му́дрый и сла́вная Ма́вра и, вся́ко претерпѣ́вше, прехва́льніи, муче́ніе, просвѣти́шася па́че лу́чъ со́лнечныхъ и бы́ша сослужи́тели а́нгеломъ, и́хже вѣ́рою сла́вимъ...» (Кíевъ, 1893) далѣе...

2 МАІЯ. СЛУЖБА НА ПРЕНЕСЕНІЕ МОЩЕЙ СВВ. МУЧЧ. БОРИСА И ГЛѢБА

«Дне́сь церко́вная разширя́ются нѣ́дра, пріе́млющи бога́тство Бо́жія благода́ти, веселя́тся Ру́сстіи собо́ри, ви́дяще пресла́вная чудеса́, я́же твори́те приходя́щимъ къ ва́мъ вѣ́рою, святíи чудотво́рцы Бори́се и Глѣ́бе, моли́те Христа́ Бо́га, да спасе́тъ ду́ши на́ша. — Пріиди́те, восхва́лимъ чудотво́рцы и му́ченики: сíи бо, зако́нно пострада́вше, побѣди́ша супроти́внаго врага́. И ны́нѣ, свѣ́тло укра́шени, предстоя́тъ Христу́, ра́дующеся. Тѣ́мъ и мы́ пѣ́сньми па́мять и́хъ ве́село похва́лимъ, любо́вію вопію́ще: ра́дуйтеся, вселе́ннѣй засту́пницы и побо́рницы на враги́; ра́дуйтеся, врачи́ боля́щимъ и бѣсо́мъ прогони́теліе; ра́дуйтеся, о любе́зная версто́, бра́тіе прекра́сніи, Рома́не сла́вный и Дави́де чу́дный, люби́мицы Христо́ви, за ны́ моли́те Святу́ю Тро́ицу, умири́ти ми́ръ и спасти́ ду́ши на́ша. — Дне́сь земля́ Ру́сская ва́ми, страстоте́рпцы Христо́ви, кня́же Бори́се и сла́вный Глѣ́бе, сы́ны вели́каго кня́зя Влади́міра, свѣ́тится, я́ко со́лнце, свои́ми бо вѣнцы́ на всю́ Ру́сскую зе́млю сія́ете, моли́те Христа́ Бо́га на́шего за вся́ вѣ́рныя христіа́ны, да спасе́тъ ду́ши на́ша...» (Кíевъ, 2007) далѣе...

2 МАІЯ. СЛУЖБА СВТ. АѲАНАСІЮ ВЕЛИКОМУ, ПАТР. АЛЕКСАНДРЙСКОМУ

«Преподо́бне о́тче, богоявле́нне Аѳана́сіе, отъ младе́нства позна́лся еси́ Це́ркви свѣти́льникъ, сія́я видѣ́ніи пресвѣ́тлыми и вся́цѣмъ же о́бразомъ богатѣ́яся добродѣ́телей, словесы́ огнедухнове́нными попаля́я е́реси, вѣ́рныя же вся́ наставля́я, Тро́ицы сія́ніемъ пребоже́ственнымъ, въ Божествѣ́ еди́номъ разумѣва́емыя и соприсносу́щную сла́ву иму́щія. Ту́ моли́ и То́й моли́ся всегда́ дарова́ти вселе́ннѣй единомышле́ніе, ми́ръ и ве́лію ми́лость. — Преподо́бне о́тче, богоглаго́ливе Аѳана́сіе, тезоимени́тъ влѣ́поту безсме́ртія нарече́нъ бы́въ, сего́ хода́тайствующею ше́ствовалъ еси́ стезе́ю, житія́ свѣ́тлостію обога́щся я́вѣ, у́мъ чи́стъ, богому́дре, стяжа́въ, Сло́ву побо́рникъ обрѣ́лся еси́ и по Ду́сѣ дыха́я Пресвятѣ́мъ, Имже просвѣща́емь, побѣжда́лъ еси́ враги́ твоя́, Имже огражда́емь, неутоли́мь яви́лся еси́, Имже и обожа́емь, Ему́же и прича́стникъ, свя́те, всѣ́мъ испроси́ дарова́ти единомышле́ніе, ми́ръ и ве́лію ми́лость. — Христо́ва святи́теля воспое́мъ вси́, Аѳана́сія, я́ко Аріева уче́нія вся́ упраздни́въ, и Святы́я Тро́ицы державу во все́мъ мíрѣ я́сно возвѣща́етъ, Еди́наго Бо́га, въ Тре́хъ Ли́цѣхъ Нераздѣ́льна, Его́же и мо́литъ о на́съ, вѣ́рою соверша́ющихъ па́мять его́...» (Кíевъ, 1893) далѣе...

1 МАІЯ. СЛУЖБА СВ. СВЯЩЕННОМУЧ. МАКАРІЮ, МИТР. КІЕВСКОМУ

«Ра́дуйся, свяще́нная главо́, Бо́жій избра́нниче Мака́ріе, ду́шу твою́ за Правосла́вную вѣ́ру положи́вый, и истерза́ніе тѣлесе́ твоего́ ра́достно претерпѣ́вый, сего́ ра́ди отъ Го́спода на небеси́ вѣне́цъ прія́лъ еси́. Того́ у́бо непреста́нно моли́, спасти́ и просвѣти́ти ду́ши на́ша. — Ра́дуйся, святи́телей красото́, му́чениковъ честны́й вѣ́нче, и исповѣ́дниковъ печа́те злата́я, къ и́хже лико́мъ отъ подвигополо́жника Христа́ причте́нъ бы́лъ еси́, съ ни́ми же, о Мака́ріе, о на́съ моли́ся, е́же спасти́ и просвѣти́ти ду́ши на́ша. — Ра́дуйся, слове́сныхъ ове́цъ па́стырю до́брый, лю́тыхъ волко́въ не убоя́выйся, но къ ста́ду твоему́ издале́ча потщíйся и отъ нечести́выхъ ага́рянъ во́льную сме́рть прія́вый, ду́шу же свою́ въ ру́цѣ Госпо́дни пре́далъ еси́. Его́же при́сно моли́, да отъ духо́вныхъ волко́въ огради́тъ ста́до твое́, ко святы́мъ твои́мъ моще́мъ притека́ющее. — Ра́дуйся, моли́твенниче на́шъ теплѣ́йшій, свое́ нетлѣ́нное тѣ́ло посредѣ́ це́ркве во утвержде́ніе наде́жды на́мъ оста́вивый, и тѣ́мъ утѣше́ніе въ ско́рбѣхъ на́мъ подава́яй, ду́хомъ же Го́сподеви на небесѣ́хъ предстоя́й, отъ Него́же ми́ръ испроси́ душа́мъ на́шимъ...» (Кíевъ, 2007) далѣе...

1 МАІЯ. СЛУЖБА СВЯТОМУ ПРОРОКУ ІЕРЕМІИ

«Го́споди, Ты́, пре́жде созда́тися, проразумѣ́лъ еси́ Іеремíю сла́внаго и, пре́жде рожде́нія изъ ложе́снъ, проро́ка освяти́лъ еси́, я́ко провѣ́дый вои́стинну ра́зума свобо́дное, его́же моли́твами, я́ко Ми́лостивъ, спаси́ ду́ши на́ша. — Го́споди, а́ще и въ ка́лъ вве́рженъ бы́сть Іеремíя святы́й, но кра́сное благово́ніе у́мно воспріима́ше, въ ра́йскихъ се́лѣхъ я́коже водворя́яся, его́же моли́твами, я́ко Благодѣ́тель, всѣ́хъ на́съ сохрани́. — Го́споди, Твои́ми пресвѣ́тлыми заря́ми проро́къ сія́я и супроти́вными зря́щеся блаже́нъ и че́стенъ, добродѣ́телей бо я́вѣ стыди́тся и супоста́тъ, и бу́дущая, я́ко настоя́щая, восхожде́нія предувѣ́дѣ. — Приложи́ тебѣ́ у́хо Бо́гъ услы́шавати словеса́ Его́, богогла́сный проро́че. Тѣ́мже, я́ко настоя́щая не су́щая, всѣ́мъ уясни́лъ еси́, рыда́ньми же о лю́дехъ твои́хъ, уда́льшихся отъ Го́спода, пла́калъ еси́. И ны́нѣ сы́й на небесѣ́хъ, мо́лишися спасти́ся на́мъ. — Очи́стивъ ду́хомъ, вели́кій проро́че и му́чениче, твое́ свѣтоза́рное се́рдце, сла́вне Іеремíе, проро́чествія да́ръ свы́ше прія́лъ еси́ и возопи́лъ еси́ велегла́сно во страна́хъ: се́ Бо́гъ на́шъ, и не приложи́тся и́нъ къ Нему́, Иже, вопло́щся, на земли́ яви́лся е́сть...» (Кíевъ, 1893) далѣе...

30 АПРѢЛЯ. СЛУЖБА («ПОЛІЕЛЕЙНАЯ») СВ. АПОСТОЛУ ІАКОВУ ЗЕВЕДЕЕВУ

«Блаже́нне богови́дче Іа́кове, ты́, Сло́ва гла́съ а́біе воспріе́мъ, о оте́ческомъ небре́глъ еси́ угожде́ніи и любви́. Оста́вль у́бо житія́ смуще́ніе, въ мы́сленное же преше́дъ мо́ре, сіе́ возмути́лъ еси́ благоче́стія уче́ніи и заря́ми премíрными твои́ми, богоблаже́нне. — Сло́ва самови́дче Іа́кове, Нача́льнику жи́зни и Отцу́ бу́дущихъ угожда́я дѣя́ніи, Исма́ила всескве́рнаго пе́рвенства, блаже́нне, лиши́лъ еси́, чре́во я́ко бо́га вмѣня́юща. Его́же и запя́лъ еси́, и на́га показа́лъ еси́ оте́ческаго покро́ва, благослове́нія же и наслѣ́дія неприча́стна. — Кня́зь поста́вленъ бы́лъ еси́, сла́вне, ны́нѣ по все́й земли́, о тебѣ́ я́коже пре́жде написа́ся, учени́къ бы́въ вся́ Сотво́ршаго, и ре́вностію твое́ю теплѣ́йшею, и дерзнове́ніемъ непобѣди́мымъ убíйство претерпѣ́лъ еси́, отъ честна́го двоена́десятихъ учени́къ, блаже́нне, совокупле́нія пе́рвѣе убива́емый. — Прему́дрый ло́вче, святы́й учениче́, дѣ́лателю Спа́совъ и сказа́телю Того́ страсте́й, и́же тва́рь вѣ́рою обте́къ, и прельще́ныя язы́ки собра́въ, и Бо́гу приве́дъ, я́ко кади́ло до́брое, на небеса́ возве́лся еси́. Тѣ́мже, предстоя́ Судіи́, моли́ изба́витися на́мъ отъ беззако́ній на́шихъ и въ де́нь Су́дный спасти́ся муче́нія...» (Кíевъ, 1893) далѣе...

30 АПРѢЛЯ. СЛУЖБА («СЛАВОСЛОВНАЯ») СВ. АПОСТОЛУ ІАКОВУ ЗЕВЕДЕЕВУ

«Тро́стію благода́тною, изъ глубины́ су́етства человѣ́ки извле́клъ еси́, досточу́дне, Учи́теля манове́ніемъ повину́яся, Іа́кове, просвѣ́щшаго по всему́ твою́ мы́сль и апо́стола и че́стна богогла́сника тя́, преблаже́нне, показа́вшаго Сего́ непостижи́маго Божества́. — Духо́вное сія́ніе на тя́ сни́де въ ви́дѣ о́гненнѣ и тя́, блаже́нне, боже́ственное прія́телище содѣ́ла, крѣ́пко отгоня́ща безбо́жія тму́ и мíръ просвѣща́юща свѣ́тлостію прему́дрыхъ твои́хъ слове́съ, тайноповѣ́дателю, апо́столовъ ве́рше, Христо́въ самови́дче Іа́кове. — Блиста́ніи проповѣ́данія во тмѣ́ спя́щія невѣ́дѣнія, сла́вне Іа́кове, просвѣ́щь показа́лъ еси́ сы́ны вѣ́рою Влады́ки и Бо́га, Его́же стра́сти поревнова́лъ еси́ и сме́рти, и сла́вы бы́лъ еси́ прича́стникъ, я́ко прему́дръ, и я́ко богогла́сникъ, и я́ко учени́къ и́стиненъ. — Пріиди́те, небе́снаго та́инства проповѣ́дателя и сказа́теля Ева́нгелія псало́мскими пѣ́сньми Іа́кова вси́ восхва́лимъ: се́й бо рѣка́ яви́ся мы́сленнаго рая́, душе́вныя бразды́ небе́сными ту́чами напая́я и плодоно́сны показу́я Христу́ Бо́гу, подаю́щему всѣ́мъ моли́твами его́ очище́ніе, и просвѣще́ніе, и ве́лію ми́лость...» (М., 1689) далѣе...

30 АПРѢЛЯ. СЛУЖБА СВТ. ИГНАТІЮ (БРЯНЧАНИНОВУ), ЕП. КАВКАЗСКОМУ

«Ра́дуйся и весели́ся свѣ́тло, земле́ Россíйская, но́ваго святи́теля Бо́жія, Игна́тія, яви́вшая, и́же вѣ́ру Христо́ву писа́ньми свои́ми изъясни́ и, зако́ны Ду́ха воспису́я, стезю́ житія́ духо́внаго я́сно содѣ́ла. — Ра́дуйся, святи́телю Игна́тіе преди́вне, измла́да пу́ть за́повѣдей Христо́выхъ возлюби́въ, избра́нникъ Госпо́день преди́венъ яви́лся еси́, горни́ло же искуше́ній и бѣ́дъ преше́дъ, учи́тель правосла́внымъ лю́демъ показа́ся, жи́зни вѣ́чныя зако́ны духо́вныя изъясня́я. — Ра́дуйся, и́же во и́ночестѣмъ чи́нѣ и́мя Богоно́сца воспрія́лъ еси́, си́це и са́мъ, святи́телю Игна́тіе, ско́рби и болѣ́зни, я́ко священному́ченикъ, терпя́, чрезъ все́ житіе́ твое́ и́мя Христо́во вну́трь се́рдца своего́ запечатлѣ́лъ еси́, моли́твою непреста́нною укрѣпля́яся. — Ра́дуйся, святи́телю Христо́въ богому́дре, Бо́га и́стиннаго и жи́ва взыска́въ, да́же до конца́ днíй твои́хъ предстоя́лъ еси́ Христу́, моли́твою непреста́нною и любо́вію укрѣпля́яся, та́же терпѣ́ніемъ скорбе́й находя́щихъ утвержда́яся...» (М., 2005) далѣе...

29 АПРѢЛЯ. СЛУЖБА СВВ. ДЕВЯТИ МУЧЕНИКАМЪ КИЗИЧЕСКИМЪ

«Му́ченицы Христо́вы прехва́льніи, одержа́щу иногда́ е́ллинскому безу́мію и влеку́щу всѣ́хъ въ беззако́нныя я́мы пути́ пра́ваго не оста́висте и безбо́жію не приложи́стеся, но пострада́сте нра́ва до́блестію и жи́знь, мече́мъ умерщвле́ни, наслѣ́довасте. — Ѳео́гнія и Ру́ѳа, Антипа́тра, Ѳеости́ха и Арте́му, Ма́гна и Ѳеодо́та, сла́внаго Ѳавма́сія и боже́ственнаго Филимо́на, страда́ніи свѣ́тло облиста́вшія и су́щія во тмѣ́ просвѣти́вшіи, вѣ́рою почти́мъ и пѣ́сньми ублажи́мъ, свяще́нную си́хъ пра́зднующе па́мять, веселя́щеся. — Цвѣ́ти му́чениковъ кра́сніи, по́лкъ свяще́нный, богособра́нное совокупле́ніе, Це́рковь изря́дная, со́нмъ богоизбра́ненъ, ли́къ святы́й, собо́ръ блаже́нный, за Тро́ицу подви́гшеся, Се́й моли́теся, Сію́ умоли́те о на́съ, я́ко да пріи́мемъ грѣхо́въ оставле́ніе. — Ли́къ свѣтови́денъ свяще́нныхъ страда́лецъ, совокупле́ніе красно́, богособра́ненъ собо́ръ, девяточи́сленный соста́въ, пострада́вше крѣ́пко, попра́вше вра́жіе мучи́тельство и причто́стеся а́нгельскимъ лико́мъ, Го́сподеви предстоите́...» (Кíевъ, 1893) далѣе...

28 АПРѢЛЯ. СЛУЖБА СВТ. КИРИЛЛУ, ЕП. ТУРОВСКОМУ

«Отче на́шъ Кири́лле богому́дре, отъ ю́ности боже́ственному уче́нію прилѣжа́лъ еси́, и плоды́ досто́йны Христу́ Царю́ прине́слъ еси́, тѣ́мже преукра́шенъ сла́вы вѣнце́мъ возше́лъ еси́ въ небе́сныя оби́тели. — Отче на́шъ Кири́лле преподо́бне, добродѣ́тельнымъ мона́шескимъ житіе́мъ Бо́гу угоди́лъ еси́, и я́коже дре́внія подви́жницы, на сто́лпъ возше́дъ, затвори́лся еси́, моля́ся Отцу́ Небе́сному о спасе́ніи мíра. — Отче на́шъ святи́телю Кири́лле, послуша́нія ра́ди благода́ть епи́скопства воспрія́лъ еси́, па́ству Ту́ровскую отъ бѣ́дъ и напа́стей до́брѣ сохрани́лъ еси́ и отъ раздо́ровъ Це́рковь Ру́сскую изба́вилъ еси́ свои́ми наставле́ньми и поуче́ньми. — Кíя похвалы́ и да́ры духо́вныя принесе́мъ златоу́стому учи́телю всея́ Руси́ Кири́ллу? Онъ же ны́нѣ со а́нгелы и со всѣ́ми святы́ми за ро́дъ христіа́нскій предъ престо́ломъ Бо́жіимъ мо́лится, дарова́ти странѣ́ на́шей ми́ръ, Це́ркви Правосла́внѣй утвержде́ніе и единомы́сліе, архіере́емъ и́стинное согла́сіе, власте́мъ благо́е вразумле́ніе, во́инству благоче́стіе и на враги́ побѣ́ду, лю́демъ покая́ніе и страсте́й свобожде́ніе, земли́ благопло́діе и душа́мъ на́шимъ ве́лія ми́лости...» (Минскъ, 2005) далѣе...

28 АПРѢЛЯ. СЛУЖБА СВВ. АПП. ІАСОНУ И СОСИПАТРУ

«Іа́сонъ блаже́нный, струя́ спаси́тельная, я́коже теку́щи земли́ исполне́нія, сердца́, жже́ніемъ держи́ма злы́мъ, напои́ и вѣ́рою ороси́, тѣ́мже по кончи́нѣ ублажа́ется. Того́ моли́твами, Го́споди, всѣ́мъ пода́ждь ве́лію ми́лость. — Іа́сонъ богодухнове́нный лѣ́ствица бы́сть, до небе́съ дося́жущая, вѣ́рныя возводя́щая уче́ніемъ къ небе́снѣй жи́зни, живе́тъ же по кончи́нѣ и предстои́тъ, ра́дуяся, Тро́ицѣ сла́вный. Того́ моли́твами, Го́споди, всѣ́мъ пода́ждь ве́лію ми́лость. — Іа́сонъ пребога́тый исцѣле́нія всегда́ источа́етъ приходя́щимъ къ ра́цѣ его́, и уставля́етъ неду́ги душа́мъ, и отгоня́етъ преле́стныя ду́хи, и утиша́етъ бу́ри. Того́ моли́твами, Го́споди, всѣ́мъ пода́ждь ве́лію ми́лость. — Свѣтосія́нными заря́ми слове́съ честны́хъ, просвѣти́лъ еси́ всѣ́хъ богоподо́бно, Іа́соне апо́столе, и тму́ отгна́лъ еси́, и, пострада́въ, блаже́нне, источа́еши исцѣле́нія, и тѣле́съ уставля́еши лю́тыя болѣ́зни. Тѣ́мъ, соше́дшеся, свято́е твое́ вси́ твори́мъ торжество́, Спа́са сла́вяще, и вѣ́рно вопіе́мъ ти́: моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́...» (Кíевъ, 1893) далѣе...

27 АПРѢЛЯ. СЛУЖБА СВЯЩЕННОМУЧ. СИМЕОНУ, СРОДНИКУ ГОСПОДНЮ

«Свяще́нникъ свяще́ннѣйшій, страда́лецъ зако́ненъ, сро́дникъ Зижди́теля и́стинный, чудотво́рецъ досточу́денъ, свѣти́льникъ пресвѣ́телъ, заблу́ждшихъ во́ждь, Симео́не, показа́лся еси́, сто́лпъ непоколе́бленъ честны́я Це́ркве, и вы́шняго наслѣ́дникъ Ца́рствія, и а́нгеломъ равноче́стный. — По болѣ́знехъ тѣле́сныхъ, святи́телю пресла́вне, по вся́цѣй му́цѣ многоболѣ́зненнѣй, по премно́гихъ боре́ніихъ Кресту́ прибли́жился еси́, подо́бяся Христу́, распе́ншемуся во́лею. Тѣ́мже, ра́дующеся, святу́ю твою́ па́мять соверша́юще, Симео́не, моли́твами твои́ми разрѣше́ніе согрѣше́ній пріе́млемъ. — Въ Це́рковь небе́сную свяще́нно вше́лъ еси́, свяще́нно облива́емь, блаже́нне, кро́вію, и Тро́ицѣ предстои́ши, бога́тно сія́я отту́ду блиста́ніи истека́ющими, пребога́те. Тѣ́мже дне́сь, Симео́не, твою́ па́мять свѣтоно́сную соверша́юще, чу́вствія души́ просвѣща́емъ. — Яко звѣзду́ вели́ку, Це́рковь, стяжа́вши дне́сь богогла́снаго Симео́на, просвѣща́ется, зову́щи: ра́дуйся, му́чениковъ честны́й нача́льниче...» (Кíевъ, 1893) далѣе...

26 АПРѢЛЯ. СЛУЖБА СВТ. СТЕФАНУ, ЕП. ПЕРМСКОМУ

«Егда́ боже́ственное раче́ніе пріи́де на тя́, прему́дре Стефа́не, тогда́ вся́, я́же во пло́ти, мудрова́нія оста́вивъ, невозвра́тно Христу́ послѣ́довалъ еси́, и, апо́столомъ подо́бяся, въ да́льнихъ страна́хъ невѣ́дущимъ Бо́га проповѣ́далъ еси́, и отъ тмы́ тѣ́хъ къ свѣ́ту богоразу́мія вся́ наста́вилъ еси́. Тѣ́мже и вѣнцы́ небе́сными Христо́съ, Ему́же порабо́талъ еси́, вѣнча́ тя, Его́же моли́ спасти́ и просвѣти́ти ду́ши на́ша. — Егда́ боже́ственное жела́ніе на́йде на тя́, святи́телю, тогда́ вся́ преле́стная, я́же въ мíрѣ, мудрова́нія оста́вль, и, къ вы́шнимъ жела́я, вы́шнихъ взыска́лъ еси́; отону́дуже и прему́дрость не отъ человѣ́къ, ни человѣ́комъ, но отъ вы́шняго про́мысла пріе́мь писа́нія но́вая ко Христо́ву позна́нію изложи́лъ еси́, и невѣ́дущимъ лю́демъ Бо́гъ тобо́ю позна́нъ бы́сть. Его́же моли́, Стефа́не прему́дре, спасти́ и просвѣти́ти ду́ши на́ша. — Иже дре́вле оляденѣ́вшая невѣ́рныхъ люде́й сердца́, уче́ніемъ твои́мъ, блаже́нне Стефа́не, воздѣ́лалъ еси́, сѣ́мя вѣ́ры въ ни́хъ насади́въ. Тѣ́мже тя́ я́ко учи́теля и наста́вника благоче́стія попремно́гу, вси́ вѣ́рніи, ублажа́емъ...» (Кíевъ, 1893) далѣе...

25 АПРѢЛЯ. СЛУЖБА («ПОЛІЕЛЕЙНАЯ») СВ. АП. И ЕВАНГЕЛИСТУ МАРКУ

«Ма́рко всеблаже́нне, отъ сла́достнаго пото́ка пи́лъ еси́, я́ко изъ Еде́ма устреми́вшаяся пресвѣ́тло чи́стая рѣка́ ми́ра, облива́яй вода́ми ева́нгельскія твоея́ про́повѣди земли́ лице́, церко́вныя тве́рди напая́я богодохнове́нными уче́ніи. — Ма́рко пресла́вне, Моисе́й у́бо пре́жде еги́птяны въ мо́ри потопи́, но ты́, прему́дре, отъ пре́лести тѣ́хъ морскíя извле́клъ еси́ си́лою и́же къ тѣ́мъ съ пло́тію Прише́дшаго и тѣ́хъ рукотворе́нная низложи́вша мы́шцею высо́кою. — О, Ма́рко всесвяще́нне, во свѣ́тѣ Ду́ха живы́й, духо́венъ ве́сь бы́лъ еси́, и ны́нѣ, всебога́те, и́же ко Влады́цѣ неоску́дными зрѣ́ніи и блаже́ннѣйшими осія́ніи, положе́ньми обожа́емь та́инства глави́зну, и кончи́ну обрѣ́лъ еси́ многовожделѣ́нну. — Прему́дрый ло́вче, святы́й учениче́, дѣ́лателю Спа́совъ и сказа́телю Того́ страсте́й, и́же тва́рь вѣ́рою обте́къ, и прельще́нныя язы́ки собра́въ, и Бо́гу приве́дъ, я́ко кади́ло до́брое, на небеса́ возведе́ся. Тѣ́мже, предстоя́ Судіи́, моли́ изба́витися на́мъ отъ беззако́ній на́шихъ и въ де́нь Су́дный изба́витися муче́нія...» (Кíевъ, 1893) далѣе...

25 АПРѢЛЯ. СЛУЖБА («СЛАВОСЛОВНАЯ») СВ. АП. И ЕВАНГЕЛИСТУ МАРКУ

«Богогла́сныхъ слове́съ написа́теля, вѣ́рніи, и Еги́пта вели́каго наста́вника, досто́йно воспое́мъ, вопію́ще: Ма́рко му́дре, уче́ніи и моли́твами твои́ми къ невла́емому житію́ наставля́ти всѣ́хъ на́съ не преста́й, Христо́въ учениче́. — Спутеше́ственникъ бы́лъ еси́ сосу́да избра́ннаго и съ ни́мъ проше́лъ еси́ всю́ Македо́нію; въ Ри́мѣ же учени́къ бы́въ Петру́, сла́докъ сказа́тель показа́лся еси́ и почи́лъ еси́, пострада́въ боголѣ́пно, во Еги́птѣ, Ма́рко, дру́же Христо́въ. — Изсо́хшія и оляденѣ́вшія ду́ши оживи́лъ еси́ свѣ́тлыми кропле́ніи Ева́нгелія. Тѣ́мже твою́, боже́ственный Ма́рко, свѣ́тло съ на́ми Александрíя дне́сь торжеству́етъ па́мять и восхваля́етъ, покланя́ющися твои́мъ моще́мъ. — Идольскую горды́ню низложи́въ, Спа́совы стра́сти жела́я, Ма́рко апо́столе, яви́лся еси́ мíру съ небесе́, всѣ́мъ источа́я чудеса́, и язы́комъ бы́лъ еси́, преблаже́нне, учи́тель. Тѣ́мже твою́ па́мять по досто́инству почита́емъ, въ пѣ́снехъ сла́вяще и вѣ́рно велича́юще: богогла́се пребога́те, моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́...» (М., 1689) далѣе...

Просьба о молитвенной поддержкѣ

Просимъ молитвъ нашихъ читателей о здравіи и спасеніи рабовъ Божіихъ, Александра, Людмилы, Евгенія, Александра, Анны, Раисы, чьими трудами созданъ и поддерживается нашъ сайтъ.

Нашъ баннеръ

Баннеръ	Размѣры	Кодъ баннера
	88 x 31	<!--osanna.russportal.ru--> <a href=http://osanna.russportal.ru><img src=http://osanna.russportal.ru/image/osanna88x31.gif width="88" height="31" border=0 title='Собрание Богослужебных текстов Православной Церкви'></a> <!--osanna.russportal.ru-->